ယၡါယၤ ၃၁:၁-၉
၃၁ ပှၤလၢ အလဲၤလီၤဃု တၢ်မၤစၢၤလၢ ကီၢ်အဲၤကူပတူးအပူၤ,+ပှၤလၢ အသန့ၤအသးလၢ ကသ့ၣ်တဖၣ်,+ပှၤလၢ အနာ်န့ၢ် လ့ၣ်ကဟၣ် ခီဖျိလၢ လ့ၣ်ကဟၣ်အိၣ်အါအဃိဒီးပှၤလၢ အနာ်န့ၢ် ကသ့ၣ်ဒုးသုး* ခီဖျိလၢ ကသ့ၣ်ဒုးသုး အဂံၢ်ဘါဆူၣ်အဃိန့ၣ် ကဘၣ်ကီဘၣ်ခဲ သပှၢ်တၢၢ်လီၤ.
အဝဲသ့ၣ်န့ၣ် တပာ်ဂံၢ်ပာ်ဘါ အံၣ်စရ့လး အကစၢ်ယွၤလၢ အစီဆှံတဂၤန့ၣ်ဘၣ်ဒီးအဝဲသ့ၣ် တဃု ယဟိဝၤယွၤဘၣ်.
၂ ဘၣ်ဆၣ် ကစၢ်ယွၤန့ၣ် အကူၣ်တၢ်သ့ ဒီးအကဒုးလီၤ တၢ်နးတၢ်ဖှီၣ်ဒီးအကမၤလၢပှဲၤထီၣ် အတၢ်ကတိၤတဖၣ်လီၤ.
အဝဲကဂဲၤဆၢထၢၣ်ထီဒါ ပှၤလၢ အမၤတၢ်အၢတၢ်သီတဒူၣ်ဒီးအဝဲကထီဒါ ပှၤလၢ အမၤစၢၤ ပှၤလၢ အမၤတၢ်ကမၣ်တဖၣ်လီၤ.+
၃ မ့မ့ၢ် ပှၤအဲၤကူပတူးဖိတဖၣ်န့ၣ် မ့ၢ်ဒၣ် ပှၤဟီၣ်ခိၣ်ဖိ ဒ်သိးသိးလီၤ ဒီးတမ့ၢ် ကစၢ်ယွၤဘၣ်.
အဝဲသ့ၣ် အကသ့ၣ်တဖၣ် မ့ၢ်ဒၣ် ဆၣ်ဖိကီၢ်ဖိတဖၣ် ဒီးတမ့ၢ် ပှၤနီၢ်သးဖိဘၣ်.+
ဖဲယဟိဝၤယွၤ ယၤထီၣ်အစုအခါပှၤတကလုာ်လၢ အမၤစၢၤတၢ်န့ၣ် ကလီၤဃံၢ်ဒီးပှၤတကလုာ်လၢ အန့ၢ်ဘၣ် တၢ်မၤစၢၤန့ၣ် ကလီၤဃံၢ်စ့ၢ်ကီးလီၤ.
အဝဲသ့ၣ်ခဲလၢာ် ကတုၤလၢ တၢ်ဟးဂီၤ တကတီၢ်ဃီလီၤ.
၄ ယဟိဝၤယွၤ တဲဘၣ်ယၤလၢ“ပှၤမ့ၢ်ကိး ပှၤကွၢ်သိတဖု ဒ်သိးကနီဟးထီၣ်ခ့ယုၢ်လၢ အဂံၢ်ဆူၣ်တဒုလၢ အကညီၤတၢ်ခီဖျိလၢ အန့ၢ်ဘၣ် အဆၣ်အဃိဒီးအဝဲသ့ၣ် မ့ၢ်ကိးပသူကိးပသီ ဒီးမၤဒိၣ်ထီၣ် အကလုၢ် သနာ်က့ခ့ယုၢ် တပျံၤတၢ်ဖုးတၢ်ဘၣ်.
ဒ်န့ၣ်အသိး တၢ်သုးမုၢ်ဂီၢ်မုၢ်အကစၢ် ယဟိဝၤယွၤ ကဟဲလီၤဒုးတၢ်လၢကစၢၢ်စံယိၣ် ဒီးစံယိၣ်တၢ်လူၢ်ခိၣ် အဂီၢ်လီၤ.
၅ ဒ်ထိၣ်တဖၣ်လၢ အယူၤလီၤဒီသဒၢအဖိအသိး တၢ်သုးမုၢ်ဂီၢ်မုၢ်အကစၢ် ယဟိဝၤယွၤ ကဒီသဒၢ ဝ့ၢ်ယရူၤၡလ့ၣ်လီၤ.+
အဝဲကဒီသဒၢအီၤ ဒီးအုၣ်က့ၤခီၣ်က့ၤအီၤလီၤ.
ဒီးအဝဲ ကပာ်မူအီၤ ဒီးမၤပူၤဖျဲးအီၤလီၤ.”
၆ “အိ အံၣ်စရ့လး အပှၤဂီၢ်မုၢ်ဧၢ, ဟဲက့ၤကဒါက့ၤလၢ ပှၤလၢ သုထီဒါအီၤ ဒူဒူတဂၤန့ၣ် အအိၣ်တက့ၢ်.+
၇ ဖဲန့ၣ်အဆၢကတီၢ် ပှၤတဂၤစုာ်စုာ် ကတၢၤကွံာ်အယွၤလၢ အဘျုးတအိၣ်ဘၣ်တဖၣ် လၢအဝဲသ့ၣ် အနီၢ်ကစၢ် တ့ထီၣ်ဝဲလၢ စ့ညၣ် ဒီးထူလီၤ. အဝဲသ့ၣ်တ့ထီၣ် တၢ်သ့ၣ်တဖၣ်န့ၣ် အဃိ မ့ၢ်ဝဲတၢ်ဒဲးဘးလီၤ.
၈ ပှၤအၤၡူၢ်ဖိတဖၣ် ကလီၤဃံၢ်လၢနး ဘၣ်ဆၣ် တမ့ၢ်လၢ ပှၤဟီၣ်ခိၣ်ဖိ အနးဘၣ်.
အဝဲသ့ၣ် ကသံလၢနး ဘၣ်ဆၣ် တမ့ၢ်လၢ ပှၤဟီၣ်ခိၣ်ဖိ အနးဘၣ်.+
ခီဖျိလၢ နးအဃိ အဝဲသ့ၣ် ကဃ့ၢ်ကွံာ်ဝဲဒီးအပှၤပိာ်ခွါ သးစၢ်တဖၣ်န့ၣ် ကဘၣ်တၢ်မၢကဲကုၢ်အီၤလီၤ.
၉ ပှၤလၢ အမၤသးဒ်သိးဒီး တၢ်အိၣ်သဒၢအလီၢ်လၢ ပှၤအၤၡူၢ်ဖိ အဂီၢ်န့ၣ် ကလီၤမၢ်ကွံာ်လၢ တၢ်ပျံၤတၢ်ဖုးအဃိဒီးပှၤအၤၡူၢ်ဖိ အခိၣ်အနၢ်တဖၣ် ကပျံၤတၢ်ဒိၣ်မး ခီဖျိလၢ တၢ်ပနီၣ် အတၢၣ်တတၢၣ် အဃိလီၤ.”
ယဟိဝၤယွၤ လၢအမ့ၢ် ပှၤလၢအတၢ်ကပီၤ* အိၣ်ဝဲလၢ စံယိၣ် ဒီးအဖၣ်ကပူၤ အိၣ်ဝဲလၢ ဝ့ၢ်ယရူၤၡလ့ၣ် အပူၤန့ၣ် တဲဝဲဒ်န့ၣ်လီၤ.
