ယၡါယၤ ၃၇:၁-၃၈
၃၇ ဖဲစီၤဃံးစကံယၤ နၢ်ဟူဝဲ တၢ်ကတိၤတဖၣ်န့ၣ်အခါ အဝဲဖှီၣ်ညာ်အဆ့ကၤ ဒီးသိးထီၣ်ဝဲ ထၢၣ်တၢ်ကံးညာ်* ဒီးလဲၤဝဲလၢ ယဟိဝၤယွၤ အဟံၣ်လီၤ.+
၂ ဝံၤဒီး အမၢလီၤဝဲ စီၤအ့ၤလယါကံၣ် လၢအတီခိၣ်ရိၤမဲတၢ်လၢ နီပူၤ, နဲၣ်ရွဲၣ် စီၤၡ့ၤဘနၤ ဒီးပှၤလုၢ်တၢ်ဒိၣ်လၢ အတီခိၣ်ရိၤမဲတၢ်တဖၣ် ဆူစီၤအၤမိးအဖိခွါ ဝံယၡါယၤ+ အအိၣ်လီၤ. ဒီးအဝဲသ့ၣ် သိးဝဲ ထၢၣ်တၢ်ကံးညာ်လီၤ.
၃ ဒီးအဝဲသ့ၣ်တဲ ဝံယၡါယၤဒ်အံၤ, “စီၤဃံးစကံယၤ တဲဝဲလၢ ‘တၢ်တနံၤအံၤ မ့ၢ်တၢ်ကိၢ်တၢ်ဂီၤ, တၢ်သိၣ်ဃီၣ် ဒီးတၢ်မဲာ်ဆှး အမုၢ်နံၤလီၤ. ပလီၤဂာ် ဒ်ပိာ်မုၣ်တဂၤလၢ ကဘၣ်အိၣ်ဖျဲၣ်ထီၣ်အဖိ အခါဘၣ်လံ ဘၣ်ဆၣ် အဂံၢ်အဘါလၢ အကအိၣ်ဖျဲၣ်ထီၣ်အီၤအဂီၢ်န့ၣ် တအိၣ်ဘၣ်.+
၄ ဘၣ်သ့ၣ်သ့ၣ် နကစၢ် ယဟိဝၤယွၤ ကနၢ်ဟူဝဲ တၢ်ကတိၤလၢ ပှၤစိာ်စပံးထံအခိၣ်တဂၤ* လၢကီၢ်အၤၡူၢ်အစီၤပၤ ဆှၢလီၤအီၤဒ်သိး အကတဲဆဲးအဲး ကစၢ်ယွၤလၢ အမူဝဲတဂၤန့ၣ် အဂီၢ်လီၤ.+ ဒီးနကစၢ် ယဟိဝၤယွၤ ကမၤဆၢက့ၤအီၤ ခီဖျိလၢ တၢ်ကတိၤလၢ အနၢ်ဟူဝဲတဖၣ်အဃိလီၤ. အဃိ ဃ့ဘါထုကဖၣ်န့ၢ်တၢ်လၢ+ ပှၤလၢ အအိၣ်တ့ၢ်ဒံးဖဲအံၤတဖၣ် အဂီၢ်တက့ၢ်.’”+
၅ ဖဲစီၤပၤဃံးစကံယၤ အခ့အပှၤတဖၣ် လဲၤလၢ ဝံယၡါယၤ အအိၣ်အခါ+
၆ ဝံယၡါယၤ တဲဘၣ်အဝဲသ့ၣ်လၢ “သုကဘၣ်တဲဘၣ် သုကစၢ်ဒ်အံၤ, ‘ယဟိဝၤယွၤ တဲဝဲလၢ “တဘၣ်ပျံၤတၢ်+ ခီဖျိလၢ တၢ်ကတိၤတဖၣ်လၢ နနၢ်ဟူဘၣ်အီၤလၢ အၤၡူၢ်အစီၤပၤ+ အခ့အပှၤတဖၣ် ကတိၤထီဒါယၤ အဃိန့ၣ်တဂ့ၤ.
၇ ယကထၢနုာ်လီၤ တၢ်ဆိကမိၣ်တခါလၢ အသးပူၤ ဒီးအဝဲကနၢ်ဟူ တၢ်ကစီၣ်တခါ ဒီးကက့ၤကဒါက့ၤလၢ အနီၢ်ကစၢ်အထံအကီၢ်လီၤ.+ ဒီးယကမၤဒ်သိး အဝဲကသံလၢနး လၢအနီၢ်ကစၢ် အထံအကီၢ် အပူၤလီၤ.”’”+
၈ ဖဲပှၤစိာ်စပံးထံ အခိၣ်တဂၤန့ၣ် နၢ်ဟူဝဲလၢ ကီၢ်အၤၡူၢ် အစီၤပၤ ဟးထီၣ်ကွံာ်လၢ ဝ့ၢ်လၤကံၣ်အခါ အဝဲက့ၤကဒါက့ၤလၢ စီၤပၤအအိၣ် ဒီးထံၣ်ဝဲလၢ စီၤပၤန့ၣ် ဒုးဝဲဝ့ၢ်လံးဘနၤလီၤ.+
၉ ဒီးကီၢ်အၤၡူၢ် အစီၤပၤနၢ်ဟူ ပှၤတဲလၢ ကီၢ်အဲၤသံအီးပး အစီၤပၤတံရဟၤကၤ ဟဲထီၣ်ဒ်သိး ကဒုးတၢ်ဒီးအီၤအဂီၢ်လီၤ. အဃိ ဖဲစီၤပၤ နၢ်ဟူဝဲဒ်န့ၣ်အခါ အမၢလီၤကဒီး ပှၤစိာ်တၢ်ကစီၣ်ဖိတဖၣ်လၢ စီၤဃံးစကံယၤ အအိၣ်+ ဒီးတဲဝဲလၢ
၁၀ “သုဘၣ်တဲ ယူဒၤအစီၤပၤဃံးစကံယၤ ဒ်အံၤ, ‘ကစၢ်ယွၤလၢ နနာ်န့ၢ်အီၤတဂၤန့ၣ် တဘၣ်ပျဲ အလံၣ်န့ၢ်လီန့ၢ်နၤ ခီဖျိအတဲဝဲလၢ “ဝ့ၢ်ယရူၤၡလ့ၣ် တဘၣ်တၢ်ဟ့ၣ်လီၤအီၤလၢ ကီၢ်အၤၡူၢ် အစီၤပၤအစုပူၤဘၣ်” န့ၣ်တဂ့ၤ.+
၁၁ ကီၢ်အၤၡူၢ် အစီၤပၤတဖၣ် မၤဟးဂီၤဝဲ ထံကီၢ်ခဲလၢာ် ဒ်လဲၣ်န့ၣ် နနၢ်ဟူဘၣ်လီၤ.+ မ့ၢ်နဆိကမိၣ်လၢ နကပူၤဖျဲးဧါ.
၁၂ ကိစၣ်, ဝ့ၢ်ဟၤရၣ်,+ ရ့စ့း ဒီးပှၤလၢအအိၣ်လၢ ဧ့ၤဒ့ၣ်လၢ အအိၣ်ပာ်စၢၤလၢ သလးစၢ်န့ၣ် အိၣ်ဖဲလဲၣ်. မ့ၢ်ပှၤကလုာ် အယွၤတဖၣ်လၢ ယမိၢ်ပၢ် ဖံဖုလၢပျၢၤတဖၣ် မၤဟးဂီၤကွံာ်ဝဲန့ၣ် မၤပူၤဖျဲး အဝဲသ့ၣ်ဧါ.+
၁၃ ဝ့ၢ်ဃမါသး ဒီးဝ့ၢ်အၢ်ပး အစီၤပၤတဖၣ် အိၣ်ဖဲလဲၣ်. ဝ့ၢ်စဖၤရဝံၣ်,+ ဝ့ၢ်ဟ့နၤ ဒီးဝ့ၢ်ဧၤဝါ အစီၤပၤတဖၣ် အိၣ်ဖဲလဲၣ်.’”
၁၄ စီၤဃံးစကံယၤ ဟံးန့ၢ် လံာ်ပရၢတဖၣ်လၢ ပှၤစိာ်တၢ်ကစီၣ်ဖိတဖၣ် အစုလိၤ ဒီးဖးဝဲလီၤ. ဝံၤဒီး စီၤဃံးစကံယၤ လဲၤလၢ ယဟိဝၤယွၤ အဟံၣ် ဒီးသလၣ်ထီၣ်ဝဲ လံာ်ပရၢတဖၣ်န့ၣ်လၢ ယဟိဝၤယွၤ အမဲာ်ညါလီၤ.+
၁၅ ဒီးစီၤဃံးစကံယၤ ဃ့ဘါထုကဖၣ် လၢယဟိဝၤယွၤ အအိၣ်လၢ+
၁၆ “အိ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ+ လၢအမ့ၢ် အံၣ်စရ့လး အကစၢ်ယွၤ လၢအဆ့ၣ်နီၤလၢ အလီၢ်ပစိာ် လၢခ့ရူာ်တဖၣ် အဖီခိၣ်* တဂၤဧၢ, နမ့ၢ်ယွၤအမ့ၢ်အတီ ထဲတဂၤလၢ ဘီမုၢ်ခဲလၢာ် လၢဟီၣ်ခိၣ်ချၢ အဖီခိၣ်လီၤ. နတ့လီၤ မူခိၣ် ဒီးဟီၣ်ခိၣ်လီၤ.
၁၇ အိ ယဟိဝၤယွၤဧၢ, အိးထီၣ်နနၢ် ဒီးဒိကနၣ်တက့ၢ်.+ အိ ယဟိဝၤယွၤဧၢ, အိးထီၣ်နမဲာ်ချံ ဒီးကွၢ်တက့ၢ်.+ ကနၣ် တၢ်ကစီၣ်ခဲလၢာ်လၢ စီၤစၤနဃ့ရံာ် ဆှၢလီၤဝဲ ဒ်သိး ကတဲဆဲးအဲးနၤ, ယွၤလၢ အမူတဂၤန့ၣ်တက့ၢ်.+
၁၈ အိ ယဟိဝၤယွၤဧၢ, ကီၢ်အၤၡူၢ် အစီၤပၤတဖၣ် မၤဟးဂီၤဝဲ ကီၢ်တဖၣ်+ ဃုာ်ဒီးအဝဲသ့ၣ် အနီၢ်ကစၢ် အကီၢ်န့ၣ် မ့ၢ်အနီၢ်ကီၢ်လီၤ.
၁၉ အဝဲသ့ၣ် ဒွဲၣ်ထီၣ်ကွံာ် ပှၤကလုာ် အယွၤတဖၣ်+ မ့ၢ်လၢ တၢ်သ့ၣ်တဖၣ်န့ၣ် တမ့ၢ်ယွၤအနီၢ်ကီၢ်ဘၣ် ဒီးပှၤတ့ထီၣ်အီၤလၢ သ့ၣ်ဒီးလၢၢ် လၢပှၤစုအဃိလီၤ.+ လၢတၢ်န့ၣ်အဃိ အဝဲသ့ၣ် မၤဟးဂီၤကွံာ် ယွၤတဖၣ်န့ၣ် န့ၢ်ဝဲလီၤ.
၂၀ အိ ပကစၢ် ယဟိဝၤယွၤဧၢ, ဒ်သိးဘီမုၢ်ခဲလၢာ်လၢ ဟီၣ်ခိၣ်ချၢ ကသ့ၣ်ညါလၢ နမ့ၢ်ကစၢ်ယွၤ ထဲတဂၤဧိၤအဂီၢ် မၤပူၤဖျဲးပှၤလၢ စီၤစၤနဃ့ရံာ် အစုပူၤတက့ၢ်. အိ ယဟိဝၤယွၤဧၢ.”+
၂၁ စီၤအၤမိး အဖိခွါ စီၤယၡါယၤ ဆှၢဝဲတၢ်ကစီၣ်လၢ စီၤဃံးစကံယၤ အအိၣ်လၢ “အံၣ်စရ့လး အကစၢ် ယဟိဝၤယွၤ တဲဝဲဒ်အံၤ, ‘ခီဖျိလၢ နဃ့ထုကဖၣ်လၢ အဘၣ်ဃးဒီး ကီၢ်အၤၡူၢ် အစီၤပၤစၤနဃ့ရံာ်အဃိ+
၂၂ ဘၣ်ဃးဒီးအီၤန့ၣ် ယၤ, ယဟိဝၤယွၤ တဲဒ်အံၤ,“စံယိၣ်အဖိမုၣ် မုၣ်ကနီၤစီဆှံ တပာ်ကဲနၤဘၣ် ဒီးထံၣ်ဆံးနၤလံ.
ယရူၤၡလ့ၣ် အဖိမုၣ် ဂံၤဂုၤ အခိၣ်လၢနၤလံ.
၂၃ မ့ၢ်နတဲဆဲးအဲး+ ဒီးကတိၤထီဒါ မတဂၤလဲၣ်.
ဒီးနမၤဒိၣ်ထီၣ် နကလုၢ်လၢမတဂၤ အဖီခိၣ်လဲၣ်.+
ဒီးလၢတၢ်ပာ်ကဖၢလၢသးအပူၤ နကျ့ၣ်ထီၣ်နမဲာ်လၢ မတဂၤ အအိၣ်လဲၣ်.
မ့ၢ်ဒၣ် နထီဒါ အံၣ်စရ့လး အကစၢ်ယွၤလၢ အစီဆှံတဂၤလီၤ.+
၂၄ နတဲဆဲးအဲး ယဟိဝၤယွၤ+ ခီဖျိလၢ နခ့နပှၤတဖၣ် ဒီးတဲလၢနကလဲၤဒီး နလ့ၣ်ကဟၣ်သုး အါအါဂီၢ်ဂီၢ်ဒီးလဲၤထီၣ် ကစၢၢ်လၢအထီတဖၣ်+ဒီးလဘၤနိၣ် အတၢ်လီၢ်လၢ အအိၣ်ဖးယံၤတဖၣ်ဒီးနကကူာ်လီၤကွံာ် အသ့ၣ်ဆှိအ့ရ့း လၢအထီတဖၣ် ဒီးအသ့ၣ်ကၠူနံးဖၢၤလၢ အဂ့ၤကတၢၢ်တဖၣ်လီၤ.
ဒီးနကလဲၤနုာ်လီၤလၢ တၢ်လီၢ်ဖဲန့ၣ်လၢ အထီကတၢၢ် ဒီးပှၢ်လၢ်ကျါလၢ အယိာ်ကတၢၢ်တဖၣ် အပူၤလီၤ.
၂၅ နကခူၣ်လီၤထံကမျၢတဖၣ် ဒီးနကအီထံ,နကမၤလီၤသံးကွံာ် ကီၢ်အဲၤကူပတူး အထံကျိဖိတဖၣ် လၢနခီၣ် ညါသးလီၤ.
၂၆ မ့ၢ်နတနၢ်ဟူဘၣ်ဧီၤ. ယဆၢတဲာ်ပာ်စၢၤလီၤယသး လၢပျၢၤ လံၤလံၤလံ.
ယရဲၣ်ကျဲၤပာ်စၢၤ လၢအပူၤကွံာ် ဖးယံာ်လံ.+
ခဲအံၤယကမၤလၢပှဲၤအီၤလီၤ.+
ဝ့ၢ်တဖၣ်လၢ အအိၣ်ဒီးအဒူၣ်လၢ အကျၢၤန့ၣ် နကဒုးကဲထီၣ်အီၤလၢ တၢ်ဟးဂီၤ အပူၣ်တဖၣ်လီၤ.+
၂၇ ပှၤလၢအအိၣ်ဖဲန့ၣ်တဖၣ်န့ၣ် ကကဲထီၣ် ပှၤလၢအမၤတၢ် တဘၣ်နီတမံၤလၢၤဘၣ်.
အဝဲသ့ၣ် ကပျံၤတၢ်ဖုးတၢ်ဒိၣ်မး ဒီးကမဲာ်ဆှးဝဲလီၤ.
အဝဲသ့ၣ်ကကဲထီၣ် ဒ်တၢ်မုၢ်တၢ်ဘိ လၢပျီပူၤ ဒီးဒ်နီၣ်လါဟ့အသိး,ဒ်နီၣ်လၢ အအိၣ်လၢ ဟံၣ်ခိၣ်ဒုး လၢမုၢ်ထီၣ်ကလံၤကိၢ် ဟဲဘၣ်အီၤ အသိးလီၤ.
၂၈ ဘၣ်ဆၣ် ဖဲနဆ့ၣ်နီၤ အခါမ့ၢ်ဂ့ၤ, နဟးထီၣ် အခါမ့ၢ်ဂ့ၤ, နဟဲက့ၤနုာ်လီၤ အခါမ့ၢ်ဂ့ၤ+ဒီးဖဲနသးဒိၣ်ထီၣ်ယၤ အခါမ့ၢ်ဂ့ၤ ယသ့ၣ်ညါခဲလၢာ်လီၤ.+
၂၉ မ့ၢ်လၢ နတၢ်သးဒိၣ်ထီၣ်လၢ ယဖီခိၣ်+ ဒီးနသီၣ်သထြုးန့ၣ် ဟူထီၣ်လၢ ယနၢ်ပူၤလံ.+
အဃိ ယကပာ် ယတခွဲကနၣ်လၢ နနါဒ့ပူၤ ဒီးယထးအ့ၣ်အပျံၤလၢ+ နကိာ်ပူၤဒီးယကက့ၤမူၤ ကဒါက့ၤနၤလၢ ကျဲလၢနဟဲန့ၣ်လီၤ.”
၃၀ “‘တၢ်ပနီၣ် လၢန* ဂီၢ်န့ၣ် ကမ့ၢ်ဒ်အံၤ, တနံၣ်ညါအံၤ နကအီၣ်ဘုလၢ အမဲထီၣ် ဒၣ်အတၢ် ဒီးလၢခံတနံၣ် စ့ၢ်ကီး နကအီၣ် ဘုလၢအမဲထီၣ် ဒၣ်အတၢ်လီၤ. ဘၣ်ဆၣ် လၢသၢနံၣ်တနံၣ်န့ၣ် နကဖှံလီၤတၢ်ချံ ဒီးနကကူးဘၣ်က့ၤ ဒီးနကသူၣ်လီၤ စပံးကျီးတဖၣ် ဒီးနကအီၣ်ဘၣ် အသၣ်လီၤ.+
၃၁ ပှၤလၢ ယူဒၤဘီမုၢ်* အပူၤ လၢအပူၤဖျဲး ဒီးအိၣ်မူဒံးတဖၣ်န့ၣ်+ အဝဲသ့ၣ်အဂံၢ်ကစဲၤလီၤ ဒီးကဖီထီၣ်သၣ်ထီၣ်ဝဲလီၤ.
၃၂ ဒီးပှၤလၢအအိၣ်တ့ၢ်တဖၣ် ကဟးထီၣ်လၢ ဝ့ၢ်ယရူၤၡလ့ၣ်အပူၤ ဒီးပှၤလၢ အမူဒံးတဖၣ်န့ၣ် ကဟးထီၣ်ကွံာ်လၢ ကစၢၢ်စံယိၣ်လီၤ.+ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အသးဆူၣ်လၢ ကမၤဝဲဒ်အံၤ သပှၢ်ကတၢၢ်လီၤ.+
၃၃ “‘လၢတၢ်န့ၣ်အဃိ ဘၣ်ဃးဒီး ကီၢ်အၤၡူၢ်အစီၤပၤန့ၣ် ယဟိဝၤယွၤ တဲဝဲဒ်အံၤ,+“အဝဲတဟဲနုာ်လီၤလၢ ဝ့ၢ်တဖျၢၣ်အံၤအပူၤဘၣ်+ဒီးအတခးလီၤ ပျၢ်ဘိဖဲန့ၣ်ဘၣ်ဒီးအတဟဲထီၣ် စိာ်ကတီၤ ဒီးဒုးတၢ်ဘၣ်ဒီးအတပာ်ပူၣ်ထီၣ်ဟီၣ်ခိၣ် ဒ်သိးကဒုးဝ့ၢ်အံၤအဂီၢ်ဘၣ်.”’+
၃၄ ‘အဝဲကက့ၤကဒါက့ၤဖဲ ကျဲတဘိလၢအဟဲဝဲန့ၣ်လီၤ.
အဝဲတဟဲနုာ်လီၤလၢ ဝ့ၢ်တဖျၢၣ်အံၤအပူၤဘၣ်.’ ယဟိဝၤယွၤ တဲဝဲဒ်န့ၣ်လီၤ.
၃၅ ‘ယကဒီသဒၢ ဝ့ၢ်တဖျၢၣ်အံၤ+ ဒီးမၤပူၤဖျဲးအီၤ လၢယနီၢ်ကစၢ်အဃိ+ဒီးလၢယခ့ယပှၤ စီၤဒၤဝံး အဃိလီၤ.’”+
၃၆ ယဟိဝၤယွၤ အမူခိၣ်ကလူးတဂၤ ဟဲမၤသံကွံာ်ဝဲ ပှၤသုးဖိ ၁၈၅,၀၀၀ လၢပှၤအၤၡူၢ်ဖိ အဒဲကဝီၤပူၤလီၤ. လၢဂီၤခီဂီၤဂီၤ ဖဲပှၤဂဲၤဆၢထၢၣ်အခါ အဝဲသ့ၣ်ထံၣ်ဝဲ ပှၤသံစိၣ် အိၣ်ဝဲဝးဝးလီၤ.+
၃၇ အဃိ ကီၢ်အၤၡူၢ် အစီၤပၤစၤနဃ့ရံာ် က့ၤကဒါက့ၤလၢ ဝ့ၢ်နံၤနဝ့+ ဒီးအိၣ်ဝဲဖဲန့ၣ်လီၤ.+
၃၈ ဒီးဖဲအဝဲဘါထီၣ်တၢ်လၢ အယွၤ နံစရိး အဟံၣ်* ပူၤအခါ အဖိခွါတဖၣ် လၢအမ့ၢ် စီၤအဒြၤမ့လ့း ဒီးစီၤၡၢ်အ့စ့ၢ် ကျီသံကွံာ်အီၤလၢနး+ ဝံၤဒီးလဲၤဃ့ၢ်ပူၤဖျဲးအသးလၢ ကီၢ်အရၤရးလီၤ.+ ဒီးအဖိခွါ စီၤအ့ၤစၢ်ဃးဒိၣ်+ ကဲထီၣ်စီၤပၤ လၢအလီၢ်လီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ရၤဘၡါက့ၤ.”
^ ဘၣ်သ့ၣ်သ့ၣ် ကမ့ၢ် “အဘၢၣ်စၢၤ.”
^ မ့ၢ်ဝဲ စီၤဃံးစကံယၤ.
^ အခီပညီလိၤလိၤ “ဟံၣ်.”
^ မ့ၢ်စ့ၢ်ကီး “တၢ်လုၢ်ဟံၣ်.”
