ယၡါယၤ ၃၈:၁-၂၂
၃၈ ဖဲန့ၣ်အဆၢကတီၢ် စီၤဃံးစကံယၤ ဆိးက့ဝဲ ဘူးထီၣ်လၢအကသံလီၤ.+ စီၤအၤမိးအဖိခွါ ဝံယၡါယၤ+ လဲၤတဲအီၤလၢ “ယဟိဝၤယွၤ တဲဝဲဒ်အံၤ, ‘နတဘျါက့ၤလၢၤဘၣ် ဒီးနကသံလီၤ. အဃိ ရဲၣ်လီၤကျဲၤလီၤတၢ်ဒီး နဟံၣ်ဖိဃီဖိတက့ၢ်.’”*+
၂ ဒီးစီၤဃံးစကံယၤ ဃၣ်အသးလၢ တၢ်ဒူၣ်ကပၤ ဒီးဃ့ဘါထုကဖၣ်တၢ်လၢ ယဟိဝၤယွၤ အအိၣ်လၢ
၃ “အိ ယဟိဝၤယွၤဧၢ, ယဃ့ကညးနၤလၢ ဝံသးစူၤ သ့ၣ်နီၣ်ထီၣ်က့ၤလၢ+ ယလဲၤတၢ်လၢ နမဲာ်ညါ လၢတၢ်သးတီအပူၤ ဒီးလၢယသးဒီဖျၢၣ်+ ဒီးယမၤတၢ်လၢ နထံၣ်လၢ အဂ့ၤန့ၣ်တက့ၢ်.” ဒီးစီၤဃံးစကံယၤ ဟီၣ်ဝဲနးမးလီၤ.
၄ ဝံၤဒီး ယဟိဝၤယွၤ တဲဘၣ် စီၤယၡါယၤလၢ
၅ “က့ၤတဲဘၣ် စီၤဃံးစကံယၤလၢ+ ‘နဖုဖးဒိၣ် စီၤဒၤဝံး အကစၢ် ယဟိဝၤယွၤ တဲဝဲဒ်အံၤ, “ယနၢ်ဟူနတၢ်ထုကဖၣ်လံ,+ ယထံၣ်ဘၣ် နမဲာ်ထံလံ.+ ယကမၤထီထီၣ် နသးသမူ ၁၅ နံၣ်+
၆ ဒီးယကမၤပူၤဖျဲးနၤ ဒီးဝ့ၢ်တဖျၢၣ်အံၤလၢ ကီၢ်အၤၡူၢ်အစီၤပၤ အစုပူၤ ဒီးယကဒီသဒၢ ဝ့ၢ်အံၤလီၤ.+
၇ ယဟိဝၤယွၤ ကဟ့ၣ်လီၤ တၢ်ပနီၣ်တမံၤ လၢအကပာ်ဖျါထီၣ်န့ၢ်နၤလၢ ယဟိဝၤယွၤ ကမၤလၢပှဲၤအတၢ်ကတိၤ ဒ်အတဲပာ်စၢၤဝဲ အသိးလီၤ.+
၈ တၢ်အကဒုလၢ စီၤအၤဃး အဃီသွါအလိၤန့ၣ် ယကဒုးဟဲက့ၤ ကဒါက့ၤအီၤ အခါတဆံလီၤ.”’”+ အဃိ တၢ်အကဒုလၢ အလဲၤလီၤတ့ၢ်လံလၢ စီၤအၤဃး အဃီသွါအလိၤန့ၣ် က့ၤကဒါက့ၤလၢအလီၢ်ခံ အခါတဆံလီၤ.
၉ ဖဲယူဒၤ အစီၤပၤဃံးစကံယၤ ဆိးက့ ဒီးအတၢ်ဆါ ဘျါက့ၤ ဝံၤအလီၢ်ခံ တၢ်လၢအကွဲးဝဲတဖၣ်န့ၣ် အိၣ်ဝဲဒ်လၢလာ်အံၤအသိးလီၤ.
၁၀ ယတဲလၢ “ယသးတပှၢ်ဒံးဘၣ် သနာ်က့ယကဘၣ် လဲၤလီၤခီဂာ် တၢ်သွၣ်ခိၣ်* အတြဲၤတဖၣ်လီၤ.
ဒီးယကဘၣ်တူၢ်ၡူကွံာ် ယနံၣ်လၢ အအိၣ်တ့ၢ်တဖၣ်လီၤ.”
၁၁ ဒီးယတဲလၢ “ယတထံၣ်ဘၣ် ယဟိဝၤယွၤလၢၤဘၣ်. ယတထံၣ်ဘၣ် ယဟိဝၤယွၤလၢ ပှၤမူ အကီၢ်ပူၤလၢၤဘၣ်.+
ဖဲယလဲၤအိၣ်ဒီး ပှၤလၢ အအိၣ်ဝဲဆိးဝဲလၢ တၢ်သံအကီၢ်ပူၤ အဆၢကတီၢ်ယတထံၣ်ဘၣ် ပှၤကညီလၢၤဘၣ်.
၁၂ ယတၢ်အိၣ်တၢ်ဆိးအလီၢ် လီၤဂာ်ဒီး ပှၤကွၢ်သိအဒဲလၢပှၤဃဲၣ်လီၤကွံာ်အီၤ ဒီးက့ၤစိာ်ကွံာ်အီၤလီၤ.+
ဒ်ပှၤထါထၣ်ဖိတဂၤ ထူထီၣ် တၢ်ကံးညာ်လၢ အထါဝဲဝံၤအသိး ယထူထီၣ်ယသးသမူလံ.
ကစၢ်ယွၤ မၤတဲာ်ကွံာ်ယသးသမူ ဒ်ပှၤမၤတဲာ်ကွံာ် လုၣ်တဖၣ်လၢ ထၣ်အလိၤအသိးလီၤ.
စးထီၣ်လၢဂီၤခီ တုၤလၢ မုၢ်နၤခီန့ၣ် အဝဲမၤကတၢၢ်ကွံာ် ယတၢ်အိၣ်မူလီၤ.+
၁၃ ယဂုာ်ကျဲးစၢး ပာ်ယသး မုာ်မုာ်ခုၣ်ခုၣ် တုၤလၢဂီၤခီထီၣ်လီၤ.
ဘၣ်ဆၣ် ဒ်ခ့ယုၢ်အသိး ကစၢ်ယွၤ ဆဲးမၤကၢ်ယဃံခဲလၢာ်လီၤ.
စးထီၣ်လၢဂီၤခီ တုၤလၢ မုၢ်နၤခီန့ၣ် အဝဲမၤကတၢၢ်ကွံာ် ယတၢ်အိၣ်မူလီၤ.+
၁၄ ယဆဲးဟီၣ်လၢ တၢ်သးအုးအပူၤ ဒ်ထိၣ်ဘျ့ၣ်ဘျီၣ် ဒီးထိၣ်ဖိအသိး+ဒီးယကအု ဒ်ထိၣ်လွံၢ်အသိးလီၤ.+
လၢတၢ်သူၣ်လီၤဘှံး သးလီၤတီၤအပူၤ ယကွၢ်ထီၣ်တၢ်လၢ ထးခီလီၤ.+
‘အိ ယဟိဝၤယွၤဧၢ, ယဘၣ်ကိၢ်ဘၣ်ဂီၤနးမး,မၤစၢၤယၤတက့ၢ်.’+
၁၅ ကစၢ်ယွၤ တဲယၤဝံၤလံ ဒီးမၤဝဲလံအဃိ ယကဘၣ် တဲဒံးဒ်လဲၣ်.
ခီဖျိလၢ ယတၢ်လဲၤခီဖျိ လၢအနးတခါအံၤအဃိ ယကလဲၤတၢ်လၢ တၢ်ဆီၣ်လီၤသးအပူၤဖဲယအိၣ်မူဒံး ဆူညါအနံၣ်တဖၣ် အတီၢ်ပူၤလီၤ.
၁၆ ‘အိ ယဟိဝၤယွၤဧၢ, ပှၤကိးဂၤဒဲး ဆဲးမူဝဲ ခီဖျိလၢ တၢ်သ့ၣ်တဖၣ်န့ၣ်* အဃိဒီးလၢတၢ်သ့ၣ်တဖၣ်န့ၣ်အဃိ ယကသါထီၣ် ကသါလီၤလီၤ.
နကမၤဂ့ၤထီၣ်က့ၤ ယတၢ်အိၣ်ဆူၣ်အိၣ်ချ့ ဒီးပာ်မူယၤလီၤ.+
၁၇ ကွၢ်မီၤ, လၢယကသူၣ်မံသးမုာ်အလီၢ် ယဘၣ်ကိၢ်ဘၣ်ဂီၤ နးမးလီၤ.
ဘၣ်ဆၣ် နအဲၣ်ယၤအဃိနမၤပူၤဖျဲးယၤလၢ တၢ်သံ+ဒီးနသုးကွံာ် ယတၢ်ကမၣ်ခဲလၢာ် လၢနမဲာ်ညါလီၤ.+
၁၈ ပှၤအိၣ်လၢ တၢ်သွၣ်ခိၣ်အပူၤန့ၣ် မၤလၤကပီၤနၤ တသ့ဘၣ်.+
ပှၤသံတဖၣ် စံးထီၣ်ပတြၢၤနၤ တသ့ဘၣ်.+
ဒီးပှၤလၢ အလဲၤလီၤလၢ တၢ်ပူၤန့ၣ် မုၢ်လၢ်ဝဲလၢ ကထံၣ်ဘၣ် နတၢ်သးတီ တသ့လၢၤဘၣ်.+
၁၉ ဒ်ယစံးထီၣ်ပတြၢၤနၤခဲအံၤသ့အသိးထဲဒၣ် ပှၤလၢအမူတဖၣ် စံးထီၣ်ပတြၢၤနၤသ့လီၤ.
ပၢ်တဂၤ ဒုးသ့ၣ်ညါ အဖိတဖၣ် ဘၣ်ဃးဒီး နတၢ်သးတီ အဂ့ၢ်သ့လီၤ.+
၂၀ အိ ယဟိဝၤယွၤဧၢ, မၤပူၤဖျဲးယၤတက့ၢ်.
ယဟိဝၤယွၤဧၢ, နမ့ၢ်မၤ ဒ်န့ၣ်န့ၣ် ပကဒ့တနၢ်တဖၣ် ဒီးသးဝံၣ် ယတၢ်သးဝံၣ်တဖၣ်+လၢနဟံၣ်ပူၤ တစိၤလၢပသးလီၤ.’”+
၂၁ ဒီးဝံယၡါယၤ တဲဝဲလၢ “ဟဲစိာ်ကိၣ်တလိၣ်လၢ အဘၣ်တၢ်တ့အီၤလၢ ချၢၣ်ဒၢသၣ်အဃ့ ဒီးပာ်လီၤအီၤလၢ စီၤဃံးစကံယၤ အတၢ်ဝ့အလိၤ ဒ်သိးအကဘျါက့ၤ အဂီၢ်တက့ၢ်.”+
၂၂ စီၤဃံးစကံယၤ သံကွၢ်ဝဲလၢ “ယကလဲၤလၢ ယဟိဝၤယွၤ အဟံၣ်န့ၣ် အတၢ်ပနီၣ်ကမ့ၢ် မနုၤလဲၣ်.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤလၢအအိၣ်လၢ နနီပူၤ.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ မ့ၢ်ဝဲ ကစၢ်ယွၤ အတၢ်ကတိၤ ဒီးအတၢ်မၤတဖၣ်.
