ယၡါယၤ ၃၉:၁-၈
-
ပှၤစိာ်တၢ်ကစီၣ်ဖိတဖၣ် လၢအအိၣ်ဟဲလၢ ဝ့ၢ်ဘၤဘူၤလိၣ် (၁-၈)
၃၉ ဖဲန့ၣ်အခါ စီၤဘၤလဒၣ် အဖိခွါ စီၤမရိဒးဘၤလဒၣ် လၢအမ့ၢ် ကီၢ်ဘၤဘူၤလိၣ် အစီၤပၤန့ၣ် နၢ်ဟူဘၣ်ဝဲလၢ စီၤဃံးစကံယၤ+ ဆိးက့ ဒီးဘျါက့ၤဝဲလံအဃိ အဝဲဆှၢလီၤ လံာ်ပရၢတဖၣ် ဒီးတၢ်ဟ့ၣ်ဆူ စီၤဃံးစကံယၤ အအိၣ်လီၤ.+
၂ စီၤဃံးစကံယၤ တူၢ်လိာ်မုာ် ပှၤစိာ်တၢ်ကစီၣ်ဖိတဖၣ် လၢတၢ်သးခုအပူၤ ဒီးဒုးနဲၣ်အဝဲသ့ၣ်လၢ အတၢ်လုၢ်ဒိၣ်ပှ့ၤဒိၣ် အဒၢးဒီတဖျၢၣ်+ လၢအအိၣ်ဒီး ထူ, စ့ညၣ်, သ့ၣ်စရံအထုး ဒီးသိလၢ အလုၢ်ဒိၣ်ပှ့ၤဒိၣ်တဖၣ်, အစုကဝဲၤခဲလၢာ် ဒီးကယဲၢ်တၢ်လၢ အအိၣ်လၢ အတၢ်လုၢ်ဒိၣ်ပှ့ၤဒိၣ် အလီၢ်တဖၣ် အပူၤလီၤ. တၢ်လၢ စီၤဃံးစကံယၤ တဒုးနဲၣ်အဝဲသ့ၣ်လၢ အနီၢ်ကစၢ်အဟံၣ်ပူၤ* မ့ၢ်ဂ့ၤ အဘီမုၢ်ပူၤမ့ၢ်ဂ့ၤန့ၣ် တအိၣ်နီတမံၤဘၣ်.
၃ လၢခံ ဝံယၡါယၤ ဟဲသံကွၢ် စီၤပၤဃံးစကံယၤလၢ “ပှၤသ့ၣ်တဖၣ်န့ၣ် ဟဲတဲတၢ်မနုၤလဲၣ် ဒီးအဝဲသ့ၣ်ဟဲဖဲလဲၣ်.” စီၤဃံးစကံယၤ တဲဆၢက့ၤအီၤလၢ “အဝဲသ့ၣ်ဟဲလၢ တၢ်လီၢ်ဖးယံၤ လၢကီၢ်ဘၤဘူၤလိၣ်လီၤ.”+
၄ ဝံၤဒီး ဝံယၡါယၤ သံကွၢ်ဝဲလၢ “လၢနဟံၣ်ပူၤန့ၣ် အဝဲသ့ၣ် ထံၣ်တၢ်မနုၤလဲၣ်.” စီၤဃံးစကံယၤ တဲဆၢဝဲလၢ “အဝဲသ့ၣ်ထံၣ် တၢ်အိၣ်လၢယဟံၣ်ပူၤ ကိးမံၤဒဲးလီၤ. တၢ်လၢအအိၣ်လၢ ယတၢ်လုၢ်ဒိၣ်ပှ့ၤဒိၣ် အလီၢ်တဖၣ်အပူၤ လၢယတဒုးနဲၣ် အဝဲသ့ၣ်ဘၣ်န့ၣ် တအိၣ်နီတမံၤဘၣ်.”
၅ အဃိ ဝံယၡါယၤ တဲဘၣ် စီၤဃံးစကံယၤလၢ “ကနၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အတၢ်ကတိၤတက့ၢ်.
၆ ယဟိဝၤယွၤ တဲဝဲလၢ+ ‘ဆၢကတီၢ်ကဟဲလၢ တၢ်ကိးမံၤဒဲးလၢ နဟံၣ်ပူၤ ဒီးတၢ်ကိးမံၤဒဲးလၢ နမိၢ်ပၢ်ဖံဖု လၢပျၢၤတဖၣ် ပာ်ဖှိၣ်ထီၣ် တုၤလၢ မုၢ်မဆါတနံၤအံၤန့ၣ် ကဘၣ်တၢ်က့ၤစိာ်အီၤလၢ ကီၢ်ဘၤဘူၤလိၣ်လီၤ. ဒီးတၢ်တအိၣ်တ့ၢ် နီတမံၤဘၣ်.’+
၇ ‘ဒီးနစၢၤနသွဲၣ်တနီၤလၢ ကဟဲအိၣ်ဖျဲၣ်ထီၣ်န့ၣ် ကဘၣ်တၢ်က့ၤဖီၣ်အီၤ ဒီးအဝဲသ့ၣ်ကကဲထီၣ် ပဒိၣ်တဖၣ်လၢ ကီၢ်ဘၤဘူၤလိၣ် အစီၤပၤအနီပူၤလီၤ.’”+
၈ ဒီးစီၤဃံးစကံယၤ တဲဆၢက့ၤ ဝံယၡါယၤလၢ “ယဟိဝၤယွၤ အတၢ်ကတိၤလၢ နတဲတဖၣ်န့ၣ် ဂ့ၤလီၤမၢၤ.” ဒီးအဝဲဆဲးတဲဝဲလၢ “ဖဲယအိၣ်မူ အဆၢကတီၢ် တၢ်မုာ်တၢ်ခုၣ် ဒီးတၢ်ဂၢၢ်တၢ်ကျၢၤ ကအိၣ်ဝဲအဃိ ဂ့ၤလီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “နီပူၤ.”
