ယၡါယၤ ၄၉:၁-၂၆
၄၉ ကီးတဖၣ်ဧၢ, ကနၣ်ယၤတက့ၢ်.
ပှၤကလုာ် လၢအအိၣ်လၢ တၢ်လီၢ်ယံၤသ့ၣ်ဧၢ, ကနၣ် ထံထံဆးဆးတက့ၢ်.+
တချုးလၢ ယအိၣ်ဖျဲၣ်ထီၣ်ဒံးဘၣ်န့ၣ် ယဟိဝၤယွၤ ကိးန့ၢ်ယၤ+ဒီးလၢယအိၣ်လၢ ယမိၢ်ဒၢလီၢ်ပူၤ လံၤလံၤန့ၣ် ကစၢ်ယွၤ ကိးယၤလၢ ယမံၤလီၤ.
၂ အဝဲဒုးကဲထီၣ် ယထးခိၣ်ဒ် နးလၢအကနၣ်အ့ၣ်တဘ့ၣ်ဒီးအဝဲပာ်ခူသူၣ်ယၤလၢ အစုအကဒု ဖီလာ်လီၤ.+
အဝဲဒုးကဲထီၣ်ယၤ ဒ်ပျၢ်တဘိလၢ ပှၤမၤအ့ၣ်ထီၣ်အကနၣ်ဒီးအဝဲပာ်ခူသူၣ်ယၤလၢ အပျၢ်ပီၤ ပူၤလီၤ.
၃ ကစၢ်ယွၤ တဲယၤလၢ “အိ အံၣ်စရ့လးဧၢ, နမ့ၢ် ယခ့ယပှၤ+ဒီးယကပာ်ဖျါထီၣ် ယတၢ်လၤကပီၤ ခီဖျိလၢ နၤလီၤ.”+
၄ ဘၣ်ဆၣ် ယတဲလၢ “ယမၤတ့ၢ်တၢ် ကလီကလီလီၤ.
ယသူလၢာ် ယဂံၢ်ယဘါ ခီလီလီ ဒီးအတကဲဘျုးဘၣ်.
ဘၣ်ဆၣ် ဘၣ်ဃးဒီးယၤန့ၣ် ယဟိဝၤယွၤ ကစံၣ်ညီၣ်ဆၢတဲာ်ဝဲဒီးယကန့ၢ်ဘၣ် ယဘူးယလဲလၢ* ယကစၢ်ယွၤ အအိၣ်လီၤ.”+
၅ ဖဲယအိၣ်လၢ ယမိၢ်ဒၢလီၢ်ပူၤအခါ ယဟိဝၤယွၤ မ့ၢ်ပှၤလၢ အတ့ယၤ ဒ်အခ့အပှၤ အသိးလီၤ.
ဒီးအဝဲမၢယကိးက့ၤ စီၤယၤကိာ် အစၢၤအသွဲၣ်တဖၣ် လၢအအိၣ်ဒ်သိး ပှၤအံၣ်စရ့လးဖိတဖၣ် ကဘၣ်တၢ်ပာ်ဖှိၣ်ထီၣ်အီၤလၢ အအိၣ်အဂီၢ်လီၤ.+
ယကအိၣ်ဒီး တၢ်လၤကပီၤလၢ ယဟိဝၤယွၤ အမဲာ်ညါဒီးယကစၢ်ယွၤ ကကဲထီၣ် ယဂံၢ်ယဘါလီၤ.
၆ ဒီးအဝဲတဲယၤလၢ “နမ့ၢ် ယခ့ယပှၤလၢကဝံၣ်ဆၢထၢၣ် စီၤယၤကိာ် အဒူၣ်တဖၣ်ဒီးဘှီဂ့ၤထီၣ်က့ၤ* ပှၤအံၣ်စရ့လးဖိ လၢအဘၣ်တၢ်ပာ်မူအီၤတဖၣ်တကးဒံးဘၣ် ယဒုးကဲထီၣ်စ့ၢ်ကီးနၤလၢ တၢ်ကပီၤလၢ ပှၤကလုာ်တဖၣ် အဂီၢ်လီၤ.+
ဒီးယမၤဒ်န့ၣ်န့ၣ် ဒ်သိးယတၢ်အုၣ်က့ၤခီၣ်က့ၤ ကတုၤလၢ ဟီၣ်ခိၣ် ဒီဘ့ၣ်အဂီၢ်လီၤ.”+
၇ ပဒိၣ်တဖၣ်အခ့အပှၤတဂၤ လၢအမ့ၢ် ပှၤတဂၤလၢ ပှၤဂၤသးဘၣ်အၢဝဲ+ ဒီးပှၤကလုာ်တကလုာ်သးဟ့ဝဲန့ၣ် အံၣ်စရ့လး အကစၢ်ယဟိဝၤယွၤ လၢအစီဆှံတဂၤ+ လၢအမ့ၢ် ပှၤလၢအပှ့ၤက့ၤ ပှၤအံၣ်စရ့လးဖိန့ၣ် တဲဘၣ်အီၤဒ်အံၤ,“စီၤပၤတဖၣ် ကထံၣ်ဘၣ် ဒီးကဂဲၤဆၢထၢၣ်ဒီးပဒိၣ်ဖးဒိၣ်တဖၣ် ကချံးလီၤအခီၣ်ခီဖျိလၢ ယဟိဝၤယွၤအဃိလီၤ. အဝဲမ့ၢ် ကစၢ်လၢ ပှၤနာ်န့ၢ် အီၤသ့တဂၤ+ဒီးမ့ၢ်ဝဲ အံၣ်စရ့လး အကစၢ်ယွၤ လၢအစီဆှံတဂၤလၢ အဃုထၢထီၣ် နၤလီၤ.”+
၈ ယဟိဝၤယွၤ တဲဝဲလၢ“ဆၢကတီၢ်ဖဲ ယပာ်ဖျါထီၣ် တၢ်ဂ့ၤတၢ်ဝါ အကတီၢ်န့ၣ် ယကစံးဆၢနၤ+ဒီးဖဲတၢ်အုၣ်က့ၤခီၣ်က့ၤ အမုၢ်နံၤအတီၢ်ပူၤန့ၣ် ယကမၤစၢၤနၤလီၤ.+
ယကဆဲးဒီသဒၢနၤ ဒ်သိးနကလီၤဂာ်ဒီး တၢ်အၢၣ်လီၤအီလီၤတခါလၢ ယၤဒီးပှၤဂီၢ်မုၢ်တဖၣ် အဘၢၣ်စၢၤလီၤ.+
ကီၢ်ကအိၣ်က့ၤ ဒ်သိးဒီးလၢညါဒီးယပှၤဂီၢ်မုၢ် ကန့ၢ်ဘၣ်က့ၤ အတၢ်န့ၢ်သါလၢ အအိၣ်သယုၢ် တဖၣ်လီၤ.+
၉ နကတဲဘၣ် ပှၤဃိာ်ဖိတဖၣ်လၢ ‘ဟးထီၣ်တက့ၢ်.’+
ဒီးနကတဲဘၣ် ပှၤအိၣ်လၢ တၢ်ခံးကျါလၢ+ ‘ဟဲပာ်ဖျါထီၣ် သုသးတက့ၢ်.’
ဒ်သိတဖၣ်အသိး အဝဲသ့ၣ် ကအီၣ်တၢ်လၢ ကျဲအဃၢၤဒီးအဝဲသ့ၣ် အတၢ်အီၣ်ဆၣ်လီၢ်တဖၣ်န့ၣ် ကမ့ၢ်ဝဲလၢ ကျဲဖိတဖၣ် အကပိာ်ကပၤလီၤ.
၁၀ အဝဲသ့ၣ် တလီၤဘဲ* အီၣ်တၢ် ဒီးတလီၤဘဲအီထံဘၣ်.+
တၢ်ကိၢ်ဆါမ့ၢ်ဂ့ၤ မုၢ်ဆဲးလီၤမ့ၢ်ဂ့ၤ တမၤဘၣ်ဒိ အဝဲသ့ၣ်ဘၣ်,+
မ့ၢ်လၢ ယၤ, ကစၢ်ယွၤလၢ အသးကညီၤအဝဲသ့ၣ်န့ၣ် ကဆှၢအဝဲသ့ၣ်+ဒီးကဟံးစုနဲၣ်ကျဲအဝဲသ့ၣ်လၢ ထံထီၣ်ပၢၢ်တဖၣ် အဃၢၤလီၤ.+
၁၁ ယကမၤဒ်သိး ကစၢၢ်ခဲလၢာ် ကကဲထီၣ်က့ၤ ကျဲတဖၣ်ဒီးယကျဲမုၢ်တဖၣ်န့ၣ် ကအိၣ်ဝဲလၢ တၢ်လီၢ်ထီၣ်ထီလီၤ.+
၁၂ ကွၢ်မီၤ, ပှၤဂီၢ်မုၢ် အိၣ်ဝဲလၢ တၢ်လီၢ်ဖးယံၤန့ၣ် ဟဲဝဲလီၤ.+
တနီၤန့ၣ် အိၣ်လၢကလံၤစိး ဒီးမုၢ်နုာ်ဒီးအဂၤတနီၤန့ၣ် အိၣ်ဝဲလၢ ကီၢ်စံၣ်နံၤလီၤ.”+
၁၃ မူခိၣ်ဧၢ, ကိးပသူထီၣ်လၢ တၢ်သးခုတက့ၢ်. ဟီၣ်ခိၣ်ဧၢ, သူၣ်ဖှံသးညီတက့ၢ်.+
မ်ကစၢၢ်ကလိတဖၣ် သးခု ဒီးကိးပသူထီၣ်လၢ တၢ်သူၣ်ခုသးခု အပူၤတက့ၢ်.+
ယဟိဝၤယွၤ မၤမုာ်ထီၣ်က့ၤ အပှၤဂီၢ်မုၢ်+ဒီးအဝဲပာ်ဖျါထီၣ် တၢ်သးကညီၤလၢ အပှၤလၢ အဘၣ်နးဘၣ်ဖှီၣ်တဖၣ် အဖီခိၣ်လံ.+
၁၄ ဘၣ်ဆၣ် စံယိၣ်တဲဝဲ တလီၢ်လီၢ်လၢ“ယဟိဝၤယွၤ ပာ်တ့ၢ်ကွံာ်ယၤလံ.+ ယဟိဝၤယွၤ သးပ့ၤနီၣ်ကွံာ် ယၤလံ.”+
၁၅ မ့ၢ်မိၢ်တဂၤ ကသးပ့ၤနီၣ်ကွံာ် အဖိလၢ အဒုးအီနုၢ်ဝဲ တဂၤန့ၣ်ဧါ.
မ့ၢ်အတသးကညီၤ အဖိလၢ အအိၣ်ဖျဲၣ်ထီၣ်သီသီဘၣ်ဧါ.
မိၢ်တဂၤ မ့ၢ်သးပ့ၤနီၣ်ဝဲဒၣ်လဲာ် ယတသးပ့ၤနီၣ်နၤ နီတဘျီဘၣ်.+
၁၆ ကွၢ်မီၤ, ယကွဲးလီၤနမံၤလၢ ယစုညါသးအလိၤလီၤ.
နဝ့ၢ်ဒူၣ်တဖၣ် အိၣ်ဝဲလၢ ယမဲာ်ညါ ထီဘိလီၤ.
၁၇ နဖိတဖၣ် ဟဲက့ၤဝဲ ချ့မးလီၤ.
ပှၤလၢ အမၤလီၤပှီၢ်နၤ ဒီးမၤဟးဂီၤနၤန့ၣ် ကဟးထီၣ်ကွံာ် လၢနအိၣ်လီၤ.
၁၈ ကွၢ်တရံးတၢ်တက့ၢ်.
အဝဲသ့ၣ် ပာ်ဖှိၣ်ထီၣ်အသးတပူၤဃီ+ဒီးဟဲက့ၤလၢနအိၣ်လံ.
ယဟိဝၤယွၤ တဲဝဲလၢ “ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢနကကူထီၣ်သိးထီၣ် အဝဲသ့ၣ် ဒ်တၢ်ကယၢကယဲအသိးဒီးဒ်တၢ်လၢ အဃံအလၤလၢ တလးမူးပိာ်မုၣ် စၢဃာ်ဝဲလၢအလိၤ အသိးလီၤ.
၁၉ လၢညါန့ၣ် ပှၤမၤဟးဂီၤနၤ ဒီးဒုးအိၣ်သယုၢ်နၤ ဒီးနတၢ်လီၢ်တၢ်ကျဲ ဟးဂီၤသနာ်က့+ခဲအံၤ နကအံၣ်တလၢလၢ ပှၤလၢ အအိၣ်လၢ နပူၤအဂီၢ်+ဒီးလၢညါ ပှၤလၢအယူၢ်လီၤနၤန့ၣ်+ ကအိၣ်ဖးယံၤလီၤ.+
၂၀ နဘၣ်အိၣ်သယုၢ်လၢ နဖိတဖၣ် တအိၣ်လၢၤဘၣ်အဃိ ဝံၤဒီး နဖိခွါလၢ အအိၣ်ဖျဲၣ်ထီၣ်တဖၣ် ကတဲနၤလၢ‘တၢ်လီၢ်တတီၤအံၤ အံၣ်တလၢ လၢပဂီၢ်အဃိမၤန့ၢ်ပှၤတၢ်လီၢ် ဒ်သိးပကအိၣ်ဖဲအံၤ အဂီၢ်တက့ၢ်.’+
၂၁ ဒီးနကတဲလီၤနသးလၢ‘ယဖိတဖၣ်တအိၣ်လၢၤဘၣ် ဒီးယမ့ၢ်ပိာ်မုၣ်လၢ အဖိအိၣ် တန့ၢ်လၢၤဘၣ်.
တကးဒံးဘၣ် ပှၤက့ၤဖီၣ်ယၤ ဒီးစၢဃာ်ယၤအဃိဖိလၢအဘၣ် တၢ်ဟ့ၣ်လီၤယၤတဖၣ်အံၤ အပါမ့ၢ်မတဂၤလဲၣ်.
မတဂၤ ကွၢ်လုၢ်ဒိၣ်ထီၣ် ဖိတဖၣ်အံၤလဲၣ်.+
ယအိၣ်တ့ၢ်ထဲတဂၤ+အဃိ ဖိတဖၣ်အံၤ အိၣ်ဟဲဖဲလဲၣ်.’”+
၂၂ တၢ်ပၢကစၢ် ယဟိဝၤယွၤ တဲဝဲလၢ“ကွၢ်မီၤ, ယကယူာ်ထီၣ်ယစုလၢ ပှၤကလုာ်တဖၣ် အအိၣ်ဒီးယကဆီလီၤ ယတၢ်ပနီၣ်လၢ ပှၤဂီၢ်မုၢ်တဖၣ်အအိၣ်လီၤ.+
အဝဲသ့ၣ် ကဟဲက့ၤစိာ် နဖိခွါတဖၣ်လၢ အစုလိၤ*ဒီးကဟဲက့ၤယိး နဖိမုၣ်တဖၣ်လၢ အဖံဘၣ်ခိၣ်လီၤ.+
၂၃ စီၤပၤတဖၣ် ကကွၢ်ထွဲသု+ဒီးစီၤပၤ အဖိမုၣ်တဖၣ် ကကဲထီၣ် သုခ့သုပှၤလီၤ.*
အဝဲသ့ၣ် ကဟဲထိၣ်လီၤပှီၤအသးလၢ သုမဲာ်ညါ+ဒီးကဒိးပၢသးလၢ သုဖီလာ်လီၤ.*+
ဒီးသုကသ့ၣ်ညါဘၣ်လၢ ယမ့ၢ် ယဟိဝၤယွၤလီၤ.
ပှၤလၢ အမုၢ်လၢ်တၢ်လၢယၤန့ၣ် အတဒိးန့ၢ်ဘၣ် တၢ်မဲာ်ဆှးဘၣ်.”+
၂၄ ပှၤတဖၣ်လၢ ပှၤလၢအဂံၢ်ဆူၣ်ဘါဆူၣ်တဂၤ က့ၤဖီၣ်ဝဲန့ၣ် ပှၤဟံးန့ၢ်က့ၤအီၤ ကသ့ဧါ.
ပှၤတဖၣ်လၢ ပှၤပၢဆူၣ်ပၢစိးတၢ်တဂၤ ဖီၣ်န့ၢ်အီၤန့ၣ် ပှၤမၤပူၤဖျဲးအီၤ ကသ့ဧါ.
၂၅ ဘၣ်ဆၣ် ယဟိဝၤယွၤ တဲဝဲ ဒ်အံၤလီၤ.
“ပှၤတဖၣ်လၢ ပှၤလၢအဂံၢ်ဆူၣ်ဘါဆူၣ်တဂၤ က့ၤဖီၣ်ဝဲန့ၣ် ကဘၣ်တၢ်ဟံးန့ၢ်က့ၤအီၤ+ဒီးပှၤတဖၣ်လၢ ပှၤပၢဆူၣ်ပၢစိးတၢ်တဂၤ ဖီၣ်န့ၢ်အီၤန့ၣ် ကဘၣ်တၢ်မၤပူၤဖျဲးအီၤလီၤ.+
ယကထီဒါ ပှၤလၢအထီဒါသု+ဒီးယကမၤပူၤဖျဲး သုဖိတဖၣ်လီၤ.
၂၆ ပှၤလၢ အမၤအၢမၤသီနၤန့ၣ် ယကဒုးအီၣ်အဝဲသ့ၣ်လၢ အနီၢ်ကစၢ်အညၣ်ဒီးအဝဲသ့ၣ် ကအီမူၤအနီၢ်ကစၢ်အသွံၣ် ဒ်ပှၤအီမူၤသးလၢ စပံးထံအသီ အသိးလီၤ.
ဒီးပှၤခဲလၢာ် ကသ့ၣ်ညါဘၣ်ဝဲလၢ ယမ့ၢ် ယဟိဝၤယွၤ+ဒီးယမ့ၢ်ပှၤလၢ အအုၣ်က့ၤခီၣ်က့ၤနၤ,+ ပှၤလၢ အပှ့ၤက့ၤနၤ+ဒီးစီၤယၤကိာ် အကစၢ်ယွၤလၢ အဂံၢ်ဆူၣ်ဘါဆူၣ် တဂၤလီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ခိၣ်ဖး.”
^ မ့ၢ်စ့ၢ်ကီး “ဟဲက့ၤကိး”
^ မ့ၢ်စ့ၢ်ကီး “သၣ်ဝံၤ.”
^ အခီပညီလိၤလိၤ “သးနါပှၢ်.”
^ မ့ၢ်စ့ၢ်ကီး “ကဒုးအီနုၢ် သုဖိတဖၣ်.”
^ အခီပညီလိၤလိၤ “လ့ၣ်ထီၣ်ကွံာ် ဟီၣ်ခိၣ်ကမူၣ်လၢ သုယီၢ်လီၤလၢသုခီၣ်.”
