ယၡါယၤ ၅:၁-၃၀
၅ ယကသးဝံၣ်ထီၣ်တၢ်လၢ ပှၤလၢ ယအဲၣ်တဂၤအအိၣ်.
ယကသးဝံၣ်ထီၣ် တၢ်သးဝံၣ် ဘၣ်ဃးဒီး ပှၤလၢယအဲၣ်တဂၤ ဒီးအစပံးကျီးလီၤ.+
ပှၤလၢယအဲၣ်တဂၤန့ၣ် အိၣ်ဒီး စပံးကျီး တကျီးလၢ တၢ်လူၢ်လၢ ဟီၣ်ခိၣ်ညၣ်ဂ့ၤ အလိၤလီၤ.
၂ အဝဲခူၣ်ထီၣ် ဟီၣ်ခိၣ် ဒီးမၤပျီကွံာ်လၢၢ်တဖၣ်လီၤ.
အဝဲသူၣ်လီၤဝဲ စပံးမုၢ်လၢအဂ့ၤကတၢၢ်တမုၢ်,တ့ထီၣ်ဝဲ တၢးတဖျၢၣ်လၢ စပံးကျီး အခၢၣ်သးဒီးတ့ထီၣ်ဝဲ တၢ်လီၢ်တခါ ဒ်သိးကစံၢ်စပံးသၣ်အဂီၢ်လီၤ.+
ဒီးအဝဲမုၢ်လၢ်ဝဲလၢ အစပံးကျီးအံၤ ကသၣ်ထီၣ် စပံးသၣ်လၢအဂ့ၤ,ဘၣ်ဆၣ် အသၣ်ထီၣ်ထဲ စပံးသၣ် အမံၤတဖၣ်လီၤ.+
၃ အဃိ အဝဲတဲဝဲလၢ “သုဝဲလၢ အအိၣ်လၢ ဝ့ၢ်ယရူၤၡလ့ၣ် ဒီးယူဒၤ အပှၤဂီၢ်မုၢ်သ့ၣ်ဧၢ,ဝံသးစူၤ စံၣ်ညီၣ်ဆၢတဲာ်န့ၢ်တၢ်လၢ ယၤဒီးယစပံးကျီး အဂီၢ်တက့ၢ်.+
၄ တၢ်လၢ ယမၤတ့ၢ်လၢ ယစပံးကျီးအဂီၢ်န့ၣ်တလၢပှဲၤဒံးဧီၤ.+
ဒီးယမုၢ်လၢ်လၢ စပံးကျီးတကျီးအံၤ ကသၣ်ထီၣ် စပံးသၣ်လၢ အဂ့ၤတဖၣ်,ဘၣ်ဆၣ် ဘၣ်မနုၤအဃိ အသၣ်ထီၣ်ထဲ စပံးသၣ်အမံၤတဖၣ်လဲၣ်.
၅ ယကမၤ ယစပံးကျီး ဒ်လဲၣ်န့ၣ်ခဲအံၤ ယကတဲဘၣ်သုလီၤ.
ယကထုးထီၣ်ကွံာ် အကရၢဒီးစပံးကျီးန့ၣ် ကဘၣ်တၢ်ဒွဲၣ်အူ ကွံာ်အီၤလီၤ.+
ယကမၤလီၤပှီၢ် အတၢ်ဒူၣ်လၢ ဘၣ်တၢ်တ့အီၤလၢလၢၢ်ဒီးစပံးကျီးန့ၣ် ကဘၣ်တၢ် ယီၢ်တံၢ်လီၤအီၤလီၤ.
၆ ယကဒုးကဲထီၣ်အီၤ ဒ်သိးဒီး တၢ်လီၢ်လၢ ပှၤပာ်တ့ၢ်ကွံာ်အီၤ,+ပှၤတကျီပျီ ဒီးမၤပျီအီၤဘၣ်.
သပှီာ်တၤဆှုၣ် ဒီးနီၣ်တဖၣ် ကခဲဘၢအီၤ+ဒီးယကမၤလိာ် တၢ်အၢၣ်ဒ်သိး အသုတဒုးစူၤလီၤ မူခိၣ်လၢ အပူၤတဂ့ၤ အဂီၢ်လီၤ.+
၇ ယမ့ၢ်တၢ်သုးမုၢ်ဂီၢ်မုၢ် အကစၢ် ယဟိဝၤယွၤ ဒီးပှၤအံၣ်စရ့လးဖိ မ့ၢ်ယစပံးကျီးလီၤ.+
ယူဒၤအပှၤဂီၢ်မုၢ်န့ၣ် မ့ၢ်ဝဲ တၢ်မုၢ်တၢ်ဘိလၢ ယဘၣ်သူၣ် ဘၣ်သးအီၤလီၤ.
ယမုၢ်လၢ်လၢ အဝဲသ့ၣ် ကစံၣ်ညီၣ်တၢ် တီတီလိၤလိၤ+ဘၣ်ဆၣ် အဝဲသ့ၣ် တစံၣ်ညီၣ်တၢ် တီတီလိၤလိၤဘၣ်.
ဒီးယမုၢ်လၢ်လၢ အဝဲသ့ၣ် ကမ့ၢ်ပှၤတီပှၤလိၤဘၣ်ဆၣ် ယနၢ်ဟူ ပှၤလၢအဘၣ်တၢ်ရ့ဒီးအီၤ အၢအၢသီသီတဖၣ် အတၢ်ကိးပသူလီၤ.”+
၈ ပှၤတနီၤန့ၣ် အပာ်ဖှိၣ် ဟံၣ်တဖျၢၣ်ဝံၤတဖျၢၣ်+ဒီးဟံးန့ၢ်စံာ်ပျီ တဘ့ၣ်ဝံၤတဘ့ၣ်+တုၤလၢ တၢ်လီၢ်လၢ ပှၤဂၤကအိၣ်ဝဲအဂီၢ် တအိၣ်လၢၤဘၣ် ဒီးလၢကီၢ်ပူၤန့ၣ် ကအိၣ်တ့ၢ်က့ၤထဲ အဝဲသ့ၣ်လီၤ.
ပှၤသ့ၣ်တဖၣ်န့ၣ် ကဘၣ်ကီဘၣ်ခဲ သပှၢ်တၢၢ်လီၤ.
၉ ယနၢ်ဟူ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အၢၣ်လီၤဝဲလၢဟံၣ်အါဖျၢၣ်န့ၣ် မ့ၢ်ဒိၣ်ဒီးဃံလၤဝဲ ဘၣ်ဆၣ်အကကဲထီၣ် တၢ်လီၤပျံၤလီၤဖုးအလီၢ်ဒီးပှၤတအိၣ်လၢအပူၤ နီတဂၤဘၣ်.+
၁၀ စပံးကျီးလၢ အအိၣ်ပှဲၤဝဲ ဟီၣ်ခိၣ် အအ့ကၢၢ်တဆံန့ၣ် ကဒုးအိၣ်ထီၣ် စပံးထံထဲ တဘၤသၤလီၤ.*
ဒီးတၢ်ချံ တဃိမ့ၢ်န့ၣ်* ကဒုးအိၣ်ထီၣ်ထဲ ဘုကၠူၣ် တအ့ဖးလီၤ.*+
၁၁ ပှၤတနီၤန့ၣ် အဝဲသ့ၣ် ပၢၢ်ထီၣ်ဂီၤဂီၤဒ်သိး ကစးထီၣ်အီသံးအဂီၢ်+ဒီးဆဲးအီဝဲတုၤလၢ မုၢ်ဟါတၢ်ခံး ဒီးမူၤစပံးထံ နးမးလီၤ. ပှၤတဖၣ်န့ၣ် ကဘၣ်ကီဘၣ်ခဲ သပှၢ်တၢၢ်လီၤ.
၁၂ လၢအဝဲသ့ၣ် အတၢ်အီၣ်တၢ်အီ အမူးအပူၤန့ၣ်အဝဲသ့ၣ်အိၣ်ဒီး တနၢ်, သီတူၢ်, တၢ်ခြ့ခြ့, ပံ ဒီးစပံးထံလီၤ.
မ့မ့ၢ် ယဟိဝၤယွၤ အတၢ်ဖံးတၢ်မၤန့ၣ် အဝဲသ့ၣ် တဆိကမိၣ်ထံဝဲဘၣ်ဒီးတၢ်လၢ ကစၢ်ယွၤ မၤဝဲန့ၣ် အဝဲသ့ၣ်တထံၣ်ဝဲဘၣ်.
၁၃ မ့ၢ်လၢယပှၤဂီၢ်မုၢ်အံၤ အတၢ်သ့ၣ်ညါ တအိၣ်ဘၣ်အဃိ+ပှၤကက့ၤဖီၣ်အဝဲသ့ၣ်လီၤ.
အပှၤပိာ်ခွါလၢ ပှၤပာ်ကဲအီၤတဖၣ်န့ၣ် ကလီၤဒိဝဲ+ဒီးအဝဲသ့ၣ် အပှၤတဖၣ် ကလီၤဘဲအီထံ* ကိးဂၤဒဲးလီၤ.
၁၄ တၢ်သွၣ်ခိၣ်* မၤလဲၢ်ထီၣ်အသး ဒီးအိးထီၣ်အကိာ်ပူၤ ဖးလဲၢ်လံ.+
ဒီးဝ့ၢ်ယရူၤၡလ့ၣ် အပှၤဒိၣ်ပှၤပှၢ်တဖၣ် ဒီးအပှၤဂီၢ်မုၢ်လၢအသီၣ်သဲဖးဒိၣ် ဒီးမၤမူးပွဲလၢ အလီၤရၢၢ်လီၤစၢၢ်တဖၣ်န့ၣ်ကလဲၤလီၤလၢအပူၤ သပှၢ်တၢၢ်လီၤ.
၁၅ အဝဲသ့ၣ် ကဘၣ်တၢ်ဆီၣ်လီၤအီၤဒီးကဘၣ်တၢ်မၤမဲာ်ဆှးအီၤလီၤ.
ဒီးပှၤလၢ အပာ်ကဖၢလၢအသးန့ၣ် ကဘၣ်တၢ်မၤမဲာ်ဆှးအီၤလီၤ.
၁၆ တၢ်သုးမုၢ်ဂီၢ်မုၢ် အကစၢ်ယဟိဝၤယွၤ ကဘၣ်တၢ်ပာ်ဒိၣ်ပာ်ထီအီၤ ခီဖျိ အတၢ်စံၣ်ညီၣ်တီအဃိလီၤ.
ယွၤလၢအမ့ၢ်အတီ လၢအမ့ၢ် ပှၤစီဆှံတဂၤန့ၣ်+ ကပာ်စီဆှံအသး ခီဖျိ တၢ်တီတၢ်လိၤ အဃိလီၤ.+
၁၇ ဒီးဖဲန့ၣ်န့ၣ် သိဖိတဖၣ် ကအီၣ်နီၣ်ဒ် အအီၣ်နီၣ်လၢ အနီၢ်ကစၢ် တၢ်အီၣ်ဆၣ်အလီၢ်ပူၤအသိးလီၤ.ဒီးဖဲတၢ်လီၢ်တဖၣ်လၢ လၢညါ ဆၣ်ဖိကီၢ်ဖိ အီၣ်အဆၣ် ဘျဲဘျဲ အလီၢ် ဒီးအအိၣ်သယုၢ်က့ၤဝဲန့ၣ် ပှၤထံဂၤကီၢ်ဂၤဖိတဖၣ် ကအီၣ်တၢ်ဖဲန့ၣ်လီၤ.
၁၈ ပှၤလၢအလံၣ်တၢ်လီတၢ်န့ၣ် ကဘၣ်ကီဘၣ်ခဲ သပှၢ်တၢၢ်လီၤ.
ဒ်ဆၣ်ဖိကီၢ်ဖိ တွံၢ်လ့ၣ် ဒီးပျံၤတဖၣ်အသိး အဝဲသ့ၣ်တွံၢ်ဝဲ အတၢ်ဒဲးဘး ဒီးအတၢ်ကမၣ်တဖၣ် ခီဖျိ တၢ်လံၣ်တၢ်လီတဖၣ်လီၤ.
၁၉ ပှၤသ့ၣ်တဖၣ်န့ၣ် တဲဝဲလၢ “မ်ကစၢ်ယွၤ မၤချ့ထီၣ် အတၢ်မၤသၢၤ.
ဒ်သိးပကထံၣ်ဘၣ် အတၢ်မၤအဂီၢ် မ်အမၤဝဲ မ့ၢ်ချ့သၢၤ.
ဒ်သိးပကသ့ၣ်ညါဘၣ် အံၣ်စရ့လး အကစၢ်ယွၤလၢ အစီဆှံတဂၤ အတၢ်တိာ်ပာ်* အဂီၢ်မ်အမၤလၢပှဲၤထီၣ်ဝဲ မ့ၢ်ချ့သၢၤ.”+
၂၀ ပှၤလၢအကိး တၢ်ဂ့ၤလၢတၢ်အၢ ဒီးတၢ်အၢလၢတၢ်ဂ့ၤ,+ပှၤလၢအပာ် တၢ်ခံးလၢတၢ်ကပီၤ ဒီးတၢ်ကပီၤလၢတၢ်ခံးဒီးပှၤလၢ အပာ်တၢ်အခၣ် လၢတၢ်အဆၢ ဒီးတၢ်အဆၢလၢ တၢ်အခၣ်န့ၣ် ကဘၣ်ကီဘၣ်ခဲ သပှၢ်တၢၢ်လီၤ.
၂၁ ပှၤလၢအထံၣ်လီၤအသးလၢ အမ့ၢ်ပှၤကူၣ်တၢ်သ့ဒီးပှၤလၢအဆိကမိၣ်လီၤအသးလၢ အမ့ၢ် ပှၤသူၣ်ဆးသးဆးန့ၣ် ကဘၣ်ကီဘၣ်ခဲ သပှၢ်တၢၢ်လီၤ.+
၂၂ ပှၤလၢ အမံၤဟူသၣ်ဖျါလၢ တၢ်အီစပံးထံတကပၤဒီးပှၤလၢ အကျဲၣ်ကျီသံး ဖၠဲးမးန့ၣ် ကဘၣ်ကီဘၣ်ခဲ သပှၢ်တၢၢ်လီၤ.+
၂၃ ပှၤလၢအပျဲပူၤ ပှၤအၢပှၤသီ ခီဖျိ တၢ်ထီးကျိၣ်ထီးစ့အဃိ+ဒီးပှၤလၢ အပာ်တၢ်ကမၣ်လၢ ပှၤတီပှၤလိၤအလိၤန့ၣ် ကဘၣ်ကီဘၣ်ခဲ သပှၢ်တၢၢ်လီၤ.+
၂၄ အဃိ ဒ်မ့ၣ်အူအီၣ်ကွံာ် လီၢ်ဘိဒီးနီၣ်အဃ့တဖၣ်အသိး အဝဲသ့ၣ် ကဘၣ် တၢ်မၤဟးဂီၤကွံာ်အီၤ ဒ်န့ၣ်လီၤ.
အဝဲသ့ၣ် အဂံၢ်တဖၣ် ကအုၣ်ကကျၣ်ဝဲဒီးအဖီတဖၣ် ကဃ့ထီၣ် ဒီးဒံကွံာ်ဝဲ ဒ်ဟီၣ်ခိၣ်ကမူၣ်အသိးမ့ၢ်လၢ အဝဲသ့ၣ် တတူၢ်လိာ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အတၢ်သိၣ်တၢ်သီဘၣ်*ဒီးအဝဲသ့ၣ် တပာ်ကဲ အံၣ်စရ့လး အကစၢ်ယွၤလၢ အစီဆှံတဂၤ အကလုၢ်ကထါဘၣ်အဃိလီၤ.+
၂၅ အဃိ ယဟိဝၤယွၤ သးဒိၣ်ထီၣ် အပှၤဂီၢ်မုၢ်ဒီးအဝဲကယၤထီၣ်အစု ဒ်သိးက စံၣ်ညီၣ် အဝဲသ့ၣ်လီၤ.+
ကစၢၢ်တဖၣ် ကဟူးဝးဝဲဒီးပှၤဂီၢ်မုၢ်တဖၣ် အစိၣ်န့ၣ် ကလီၤဂာ်ဒ် တၢ်ကမှံၤ လၢကျဲပူၤ အသိးလီၤ.+
ဘၣ်ဆၣ် ကစၢ်ယွၤ ကသးဒိၣ်ထီၣ်ဒံး အဝဲသ့ၣ်ဒီးအဝဲကယၤထီၣ်ဒံးအစု ဒ်သိးက စံၣ်ညီၣ် အဝဲသ့ၣ်အဂီၢ်လီၤ.
၂၆ ကစၢ်ယွၤ ဟ့ၣ်တၢ်ပနီၣ် ဒ်သိး ကကိးဖှိၣ် ပှၤတကလုာ်လၢ အအိၣ် ဖးယံၤအဂီၢ်လီၤ.+
အဝဲကွ့ကလံၤ ဒ်သိး ပှၤတဖၣ်လၢ အအိၣ်လၢ ဟီၣ်ခိၣ်အနၢၣ် အကတၢၢ်န့ၣ် ကဟဲဝဲအဂီၢ်+ဒီးကွၢ်သၢၤ, အဝဲသ့ၣ် ဟဲဝဲချ့ချ့လီၤ.+
၂၇ လၢအဝဲသ့ၣ် အကျါန့ၣ် ပှၤတဂၤမး တလီၤဘှံးဒီး လီၤဃံၢ်ဘၣ်.
အဝဲသ့ၣ် တဂၤမး တမံခ့ ဒီးမံဘၣ်အသးဘၣ်.
အဝဲသ့ၣ် အယီၢ်တကိး လၢအယီၢ်ဒ့လိၤန့ၣ် တလီၤကျီဘၣ်ဒီးအဝဲသ့ၣ် အခီၣ်ဖံးပျံၤ တထီၣ်တဲာ်ဘၣ်.
၂၈ အဝဲသ့ၣ် အပျၢ်ဘိခဲလၢာ်န့ၣ် အကနၣ်အ့ၣ်ဝဲဒီးအဝဲသ့ၣ် ဖ့ၣ်ထီၣ်ဃာ်ဝဲ အချံၣ် ခဲလၢာ်လီၤ.
အဝဲသ့ၣ် အကသ့ၣ်အခီၣ်မ့ၣ်တဖၣ်န့ၣ် လီၤဂာ်ဒ်သိးဒီး လၢၢ်လၢ အကနၣ်အ့ၣ်ဒီးအဝဲသ့ၣ် အလ့ၣ်ကဟၣ်အပၣ်တဖၣ်န့ၣ် လီၤဂာ်ဒ်သိးဒီး ကလံၤမုၢ်လီၤ.+
၂၉ အဝဲသ့ၣ် အကလုၢ်န့ၣ် သီၣ်လီၤဂာ် ဒ်သိးဒီး ခ့ယုၢ် ကညီၤတၢ်ဒီးဒ် ခ့ယုၢ်ဖိ ကညီၤတၢ်အသိးလီၤ.+
အဝဲသ့ၣ် ကကညီၤတၢ်, ပှီၤန့ၢ်ဝဲအဆၣ်ဒီးက့ၤစိာ်ဝဲ ဒီးပှၤမၤပူၤဖျဲးဝဲ တအိၣ် နီတဂၤဘၣ်.
၃၀ ဖဲတၢ်တနံၤန့ၣ် အဝဲသ့ၣ် ဖီၣ်န့ၢ်ဝဲ အဆၣ်ဝံၤအလီၢ်ခံအဝဲသ့ၣ် အကလုၢ်ကသီၣ်သထြုးဝဲ ဒ်သိးဒီး ပီၣ်လဲၣ်လီၤ.+
ပှၤတဂၤဂ့ၤတဂၤဂ့ၤလၢ အကွၢ်ဝဲတၢ်လီၢ်န့ၣ် ကထံၣ်ဝဲ တၢ်ခံးသူလၢ အမၤတံာ်တာ်ပှၤသးဒီးတၢ်ကပီၤဒၣ်လဲာ် ကခံးလီၤဝဲလၢ တၢ်အၢၣ်အဃိလီၤ.+
တၢ်ဂ့ၢ်အဘျဲၣ်တဖၣ်
^ ကအိၣ်ဝဲ ၂၂ လံးထၢၣ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “၁၆၀ ကံလိ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “၁၆ ကံလိ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “အဲၣ်ဒိးအီထံ.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “တၢ်ဆၢတဲာ်, တၢ်ဟ့ၣ်ကူၣ်.”
^ မ့ၢ်စ့ၢ်ကီး “တၢ်ဟံးစုနဲၣ်ကျဲ.”
