ယၡါယၤ ၅၁:၁-၂၃
၅၁ “သုဝဲလၢ အလူၤတၢ်တီတၢ်လိၤ,သုဝဲလၢအဃု ယၤ, ယဟိဝၤယွၤ န့ၣ် ဒိကနၣ် ယကလုၢ်တက့ၢ်.
ဆိကမိၣ်ထီၣ်က့ၤ လၢၢ်လၢ သုဟဲထီၣ်လၢအပူၤဒီးတၢ်ခူၣ်လၢၢ်ခူၣ်လ့ အတၢ်ပူၤလၢ သုဘၣ်တၢ်ခူၣ်ထုးထီၣ်သု န့ၣ်တက့ၢ်.
၂ ဆိကမိၣ်ထီၣ်က့ၤ သုပၢ် စီၤအၤဘြၤဟၣ်ဒီးနီၢ်စၤရါလၢ+ အအိၣ်ဖျဲၣ်ထီၣ်သု န့ၣ်တက့ၢ်.
ဖဲယကိး စီၤအၤဘြၤဟၣ်အခါ အအိၣ်ထဲ တဂၤဒံးလီၤ.+
ဘၣ်ဆၣ် ယဆိၣ်ဂ့ၤအီၤ ဒီးမၤအါထီၣ် အချံအသၣ် ဒီဒူၣ်လီၤ.+
၃ ယဟိဝၤယွၤ ကမၤမုာ်ထီၣ်က့ၤ စံယိၣ်+ဒီးကစၢ်ယွၤ ကမၤဂ့ၤထီၣ်က့ၤ* စံယိၣ် အတၢ်လီၢ်တၢ်ကျဲလၢ အဟးဂီၤ ခဲလၢာ်လီၤ.+
ကစၢ်ယွၤ ကမၤကဲထီၣ်က့ၤ စံယိၣ် အပှၢ်မုၢ်ကနၢ ဒ်သိးဒီး ဧ့ၤဒ့ၣ်တၤသၣ်အလီၢ်+ဒီးအမဲးမုၢ်ပျီန့ၣ် ကကဲထီၣ်က့ၤ ဒ်သိးဒီး ယဟိဝၤယွၤ အကရၢၢ်လီၤ.+
တၢ်သူၣ်ခုသးခု, တၢ်သူၣ်ဖှံသးညီ,တၢ်စံးဘျုးစံးဖှိၣ် ဒီးတၢ်သူၣ်ဝံၣ်သးဆၢ လၢအမုာ် ကအိၣ်ဝဲဖဲန့ၣ်လီၤ.+
၄ အိ ယပှၤဂီၢ်မုၢ်သ့ၣ်ဧၢ, ဒိကနၣ်ယၤ ထံထံတက့ၢ်.
ပှၤကလုာ်လၢ ယဃုထၢထီၣ်ဧၢ, ဒိကနၣ်ယၤတက့ၢ်.+
လၢယအိၣ်န့ၣ် တၢ်သိၣ်တၢ်သီ ကဟဲအိၣ်ထီၣ်+ဒီးယတၢ်စံၣ်ညီၣ်တီန့ၣ် ယကပာ်အီၤ ဒ်သိးဒီး တၢ်ကပီၤတခါလၢ ပှၤဂီၢ်မုၢ်အဂီၢ်လီၤ.+
၅ ယတၢ်တီတၢ်လိၤ ဟဲဘူးထီၣ်လံ.+
ယတၢ်အုၣ်က့ၤခီၣ်က့ၤ ကဟဲလၢ သုအိၣ်+ဒီးယကစံၣ်ညီၣ် ပှၤဂီၢ်မုၢ်လၢ ယစိယကမီၤလီၤ.+
ကီးတဖၣ် ကမုၢ်လၢ်တၢ်လၢယၤ+ဒီးအဝဲသ့ၣ် ကခိးကွၢ်လၢ် ယစိယကမီၤလီၤ.
၆ ကွၢ်ထီၣ်တၢ် ဆူမူခိၣ်ဒီးကွၢ်ဟီၣ်ခိၣ်လၢ အအိၣ်လၢ လာ်ခီတက့ၢ်.
မူခိၣ် ကလီၤမၢ်ကွံာ်ဝဲ ဒ်သိးဒီး မ့ၣ်အူခုၣ်ဒီးဟီၣ်ခိၣ် ကလီၢ်လံၤကွံာ်ဝဲ ဒ်သိးဒီး တၢ်ကူတၢ်ကၤလီၤ.
ဒီးပှၤလၢ အအိၣ်ဝဲဆိးဝဲ ဖဲန့ၣ်တဖၣ် ကသံဝဲ ဒ်သိးဒီး ဃးသူတဖၣ်လီၤ.*
ဘၣ်ဆၣ် ယတၢ်အုၣ်က့ၤခီၣ်က့ၤန့ၣ် ကအိၣ်ဝဲလီၤထူလီၤယိာ်+ဒီးယတၢ်တီတၢ်လိၤန့ၣ် ကအိၣ်ဝဲ ထီဘိလီၤ.+
၇ သုဝဲလၢ အသ့ၣ်ညါ တၢ်တီတၢ်လိၤဒီးပှၤဂီၢ်မုၢ်လၢ ယတၢ်သိၣ်တၢ်သီ* အိၣ်လၢ အသးပူၤသ့ၣ်ဧၢ, ကနၣ်တက့ၢ်.+
တဘၣ်ပျံၤ ပှၤဟီၣ်ခိၣ်ဖိ အတၢ်ဒုၣ်ဒွဲၣ်တဖၣ်တဂ့ၤ.
ဒီးတဘၣ်ကနိးကစုာ် ခီဖျိလၢ အဝဲသ့ၣ်အတၢ်တဲဆါတၢ်အဃိတဂ့ၤ.
၈ တၢ်အဃၢ် ကအီၣ်ကွံာ် အဝဲသ့ၣ် ဒ်အအီၣ်ကွံာ် တၢ်ကူတၢ်ကၤအသိးဒီးတၢ်အဃၢ် ကအီၣ်ကွံာ် အဝဲသ့ၣ် ဒ်အအီၣ်ကွံာ် သိဆူၣ်အသိးလီၤ.+
ဘၣ်ဆၣ် ယတၢ်တီတၢ်လိၤ ကအိၣ်ဂၢၢ်အိၣ်ကျၢၤဝဲ လီၤထူလီၤယိာ်ဒီးယတၢ်အုၣ်က့ၤခီၣ်က့ၤ ကအိၣ်ဝဲ အစိၤစိၤအဃၣ်ဃၣ်လီၤ.”+
၉ မ်ယဟိဝၤယွၤ ယၤထီၣ်အစုတက့ၢ်.+
မ်အဝဲ ယၤထီၣ်အစု ဒီးပာ်ဖျါထီၣ် အစိကမီၤတက့ၢ်.
မ်အဝဲ ယၤထီၣ်အစု ဒ်အမၤဝဲလၢပျၢၤ အသိးတက့ၢ်.
လၢညါန့ၣ် န* ဆဲးဖျိ ဒီးမၤလီၤကလဲကွံာ် ရၤဃး*+လၢအမ့ၢ် တၢ်သးသမူဖးဒိၣ်လၢ ပီၣ်လဲၣ်ပူၤန့ၣ် တမ့ၢ်ဧီၤ.+
၁၀ နမ့ၢ် ပှၤတဂၤလၢ အမၤလီၤသံး ပီၣ်လဲၣ်ထံ ဒီးထံလၢ အအိၣ်လၢ ထံယိာ်ပူၤန့ၣ် တမ့ၢ်ဧီၤ.+
နမ့ၢ် ပှၤတဂၤလၢ အဒုးကဲထီၣ် ပီၣ်လဲၣ်ယိာ်လၢ ကျဲမုၢ်လၢ ပှၤလၢ အဘၣ်တၢ်ပှ့ၤက့ၤအီၤတဖၣ် ကခီဂာ်ဝဲအဂီၢ် တမ့ၢ်ဧီၤ.+
၁၁ ပှၤလၢ ယဟိဝၤယွၤ ပှ့ၤက့ၤအီၤတဖၣ် ကဟဲက့ၤဝဲ,+အဝဲသ့ၣ် ကဟဲက့ၤလၢ ဝ့ၢ်စံယိၣ် ဒီးကိးပသူထီၣ်လၢ တၢ်သးခုအပူၤ+ဒီးအဝဲသ့ၣ် အတၢ်သးခုန့ၣ် တကတၢၢ် နီတဘျီလၢၤဘၣ်.*+
အဝဲသ့ၣ် ကပှဲၤဒီး တၢ်သူၣ်ခုသးခု ဒီးတၢ်သူၣ်ဖှံသးညီ,မ့မ့ၢ် တၢ်သးအုးဒီး တၢ်ကအုကစွါန့ၣ် ကလီၤမၢ်ကွံာ်ဝဲလီၤ.+
၁၂ ကစၢ်ယွၤ တဲဝဲလၢ “ယမ့ၢ် ပှၤတဂၤလၢ အမၤမုာ်ထီၣ်က့ၤနၤလီၤ.*+
မ့ၢ်နကြၢးပျံၤ ပှၤဟီၣ်ခိၣ်ဖိ လၢအကသံ+ဒီးပှၤဟီၣ်ခိၣ်ဖိ လၢအကဃ့ထီကွံာ် ဒ်နီၣ်လါဟ့ဃ့ထီကွံာ် အသိးန့ၣ်ဧါ.
၁၃ ယၤ, ယဟိဝၤယွၤအံၤ မ့ၢ်ပှၤလၢ အတ့လီၤနၤ,ယမ့ၢ်ပှၤလၢ အသလၣ်ထီၣ်မူခိၣ်+ ဒီးပာ်လီၤ ဟီၣ်ခိၣ်အခီၣ်ထံးလီၤ. ဘၣ်မနုၤအဃိ နသးပ့ၤနီၣ် ယၤလဲၣ်.+
လၢညါန့ၣ် နပျံၤ ပှၤလၢ အဆီၣ်တံၢ်မၤနၢၤနၤ အတၢ်သးဒိၣ် ဒီတနံၤကျၢၤဒီးနဆိကမိၣ်လၢ အမၤဟးဂီၤနၤ ကန့ၢ်လီၤ.
ဘၣ်ဆၣ် ခဲအံၤန့ၣ် ပှၤလၢ အဆီၣ်တံၢ်မၤနၢၤနၤ အတၢ်သးဒိၣ်န့ၣ် မ့ၢ်အအိၣ်ဒံးဧါ.
၁၄ ပှၤလၢ အဘၣ်တၢ်စၢဃာ်အီၤလၢ ပျံၤထးတဖၣ်န့ၣ် တယံာ်လၢၤဘၣ် ကထူၣ်ဖျဲးထီၣ်ကွံာ်လီၤ.+
အတသံ ဒီးတလဲၤလီၤဘၣ်လၢ တၢ်ပူၤဘၣ်.
ဒီးအတလီၤဒိ ဒီးတၢ်အီၣ်ဘၣ်.
၁၅ ဘၣ်ဆၣ် ယမ့ၢ် နကစၢ် ယဟိဝၤယွၤလီၤ.
ယမ့ၢ် ပှၤလၢ အထိၣ်ဟူးထိၣ်ဂဲၤထီၣ်ပီၣ်လဲၣ် ဒီးဒုးသီၣ်ထီၣ် အလပီတဖၣ် ရုၢ်ရုၢ်လီၤ.+
ယမံၤမ့ၢ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤလီၤ.+
၁၆ ယကဒုးတဲနၤလၢ ယတၢ်ကတိၤတဖၣ်ဒီးယကဒီသဒၢနၤလၢ ယစုအကဒု+ဒ်သိး ယကပာ်လီၤမူခိၣ် ဒီးပာ်လီၤ ဟီၣ်ခိၣ်အခီၣ်ထံး+ဒီးတဲစံယိၣ်လၢ ‘နမ့ၢ် ယပှၤဂီၢ်မုၢ်’ အဂီၢ်လီၤ.+
၁၇ ဝ့ၢ်ယရူၤၡလ့ၣ်ဧၢ, ယဟိဝၤယွၤ ဟ့ၣ်လီၤနၤ အတၢ်သးဒိၣ်အခွး ဒီးနအီတၢ်အိၣ်လၢအပူၤဝံၤလံ.
နအီတၢ်အိၣ်လၢ စပံးထံ အခွးပူၤဝံၤလံ.
တၢ်အိၣ်လၢ ခွးပူၤလၢ အဒုးဟးကနူၤကပၤတၢ်န့ၣ် နအီလၢာ်ကွံာ်အီၤ တုၤလၢ အခံဒးဝံၤလံ.+
အဃိ ပၢၢ်ထီၣ်, ပၢၢ်ထီၣ်, ဂဲၤဆၢထၢၣ်သၢၤ.+
၁၈ နဖိခွါတဖၣ်လၢ နအိၣ်ဖျဲၣ်ထီၣ်အီၤန့ၣ် တဂၤမး တဟံးစုနဲၣ်ကျဲနၤဘၣ်.
ဒီးနဖိခွါတဖၣ်လၢ နလုၢ်ဒိၣ်ထီၣ်အီၤန့ၣ် တဂၤမး တဖီၣ်ဃာ်နစုဘၣ်.
၁၉ တၢ်လၢအလီၤဘၣ်နၤန့ၣ် အိၣ်ဝဲခံမံၤလီၤ.
နဟးဂီၤကွံာ် ဒီးအိၣ်သယုၢ် ဒီးနထံၣ်ဘၣ် တၢ်သၣ်ဝံၤလီၤဒိ ဒီးနးလီၤ.+
မတဂၤ ကသးကညီၤနၤလဲၣ်.
မတဂၤ ကမၤမုာ်ထီၣ်က့ၤ နသးလဲၣ်.+
၂၀ နဖိခွါတဖၣ် သးပ့ၤနီၣ်လီၤအသး,+အဝဲသ့ၣ် မံနီၤလၢ ကျဲအနၢၣ်ထံး ကိးနၢၣ်ဒဲးလီၤဂာ်ဒ်သိးဒီး သိမံၤ လၢပျံၤသကွီၤပူၤ* အသိးလီၤ.
ယဟိဝၤယွၤ အတၢ်သးဒိၣ် ဒီးကစၢ်ယွၤ အတၢ်သိၣ်ဃီၣ်န့ၣ် ဘၣ်တၢ်လူလီၤအီၤလၢ နလိၤလၢာ်လံ.”
၂၁ အဃိ ပိာ်မုၣ်လၢ အဘၣ်နးဘၣ်ဖှီၣ် ဒီးအမူၤဝဲ ဘၣ်ဆၣ် တမူၤလၢ စပံးထံအဃိဘၣ် တဂၤဧၢ,ဝံသးစူၤ ကနၣ်တၢ်ဂ့ၢ်တခါအံၤတက့ၢ်.
၂၂ နကစၢ် ယဟိဝၤယွၤ လၢအမ့ၢ် ကစၢ်လၢ အဒီသဒၢ အပှၤဂီၢ်မုၢ်န့ၣ် တဲဝဲလၢ“ခွးလၢ အဒုးဟး ကနူၤကပၤတၢ်န့ၣ် ယကဟံးထီၣ်ကွံာ်လၢ နစုပူၤ+ဒီးနတအီတၢ်အိၣ်လၢယတၢ်သးဒိၣ်အခွးပူၤ နီတဘျီလၢၤဘၣ်.+
၂၃ ယကပာ်ခွးအံၤလၢ ပှၤလၢအမၤနးမၤဖှီၣ်နၤ အစုပူၤလီၤ.+
လၢညါ အဝဲသ့ၣ် တဲနၤလၢ ‘မံနီၤသၢၤ, ပကဟးလၢနလိၤ.’
အဃိ နဘၣ်ဒုးကဲထီၣ် နချၢဃံ ဒ်သိးဒီး ဟီၣ်ခိၣ်လၢ ပှၤဟးလၢအလိၤဒီးကျဲလၢ ပှၤဟးလၢအပူၤလီၤ.”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “မၤမုာ်ထီၣ်က့ၤ.”
^ မ့ၢ်ဝဲ တၢ်ဖိဃၢ် ဆံးဆံးဖိ တကလုာ်လၢ အအ့ၣ်တၢ် ဒ်သိးဒီး ပစိၤ.
^ မ့ၢ်စ့ၢ်ကီး “တၢ်ဟံးစုနဲၣ်ကျဲ.”
^ ကွၢ် တၢ်ကတိၤအခီပညီ.
^ အဲၣ်ဒိးတဲဝဲ ယဟိဝၤယွၤအစု.
^ အခီပညီလိၤလိၤ “ကအိၣ်လၢ အခိၣ်သၣ်ဃံလိၤ.”
^ အဲၣ်ဒိးတဲဝဲ စံယိၣ်.
^ အခီပညီလိၤလိၤ “စၤ.”
