ယၡါယၤ ၅၄:၁-၁၇
၅၄ ယဟိဝၤယွၤ တဲဝဲလၢ “ပှၤပိာ်မုၣ်လၢ အအိၣ်သယုၢ်တဂၤ အဖိခွါတဖၣ်*ကအိၣ်အါန့ၢ်ဒံး ပိာ်မုၣ်တဂၤလၢ အဝၤ* အိၣ်ဝဲန့ၣ် အဖိခွါတဖၣ်လီၤ.+
အဃိ ပိာ်မုၣ်တူာ်ဖိတဂၤလၢ အဟုးတဆါ+ ဒီးတအိၣ်ဖျဲၣ်ထီၣ်အဖိ နီတဘျီဒံးဘၣ်ဧၢ,+သူၣ်ဖှံသးညီ ဒီးကိးပသူထီၣ်လၢ တၢ်သးခုအပူၤတက့ၢ်.”+
၂ “မၤဒိၣ်ထီၣ် နဒဲ+ဒီးမၤလဲၢ်ထီၣ် နဒဲစီဆှံဖးဒိၣ် အတၢ်ကံးညာ်တဖၣ်တက့ၢ်.
မၤသပှၢ်တၢၢ်, မၤထီထီၣ် နဒဲအပျံၤတဖၣ်ဒီးထးခိၣ်စူတဖၣ်လၢ နဒဲအဂီၢ်န့ၣ် မၤကျၢၤထီၣ်အီၤတက့ၢ်.+
၃ နဟီၣ်ခိၣ်လီၢ်အဆၢ လၢစုစ့ၣ်မ့ၢ်ဂ့ၤ လၢစုထွဲမ့ၢ်ဂ့ၤ ကလဲၢ်ထီၣ်ဝဲလီၤ.
ဒီးနချံနသၣ် ကဒိၣ်စိလၢ ပှၤကလုာ်ဂၤတဖၣ်အဖီခိၣ်ဒီးအဝဲသ့ၣ် ကအိၣ်ဘၣ်လၢ ဝ့ၢ်လၢပှၤပာ်တ့ၢ်ကွံာ်ဝဲတဖၣ်န့ၣ်လီၤ.+
၄ နတၢ်မုၢ်လၢ်ကဟဲလၢထီၣ် ပှဲၤထီၣ်လီၤ.
အဃိ တဘၣ်ပျံၤတၢ်တဂ့ၤ+ ဒီးတဘၣ်မဲာ်ဆှးတဂ့ၤ.+
တၢ်မဲာ်ဆှးလၢ နတူၢ်ဘၣ်ဖဲ နသးစၢ်အခါန့ၣ် နကသးပ့ၤနီၣ်ကွံာ်အီၤဒီးတၢ်မဲာ်ဆှးလၢ နတူၢ်ဘၣ်ဖဲ နအိၣ်ကမဲအခါန့ၣ် နတသ့ၣ်နီၣ်ထီၣ်က့ၤအီၤလၢၤဘၣ်.”
၅ “ကစၢ်ယွၤ ဖးဒိၣ်တဂၤလၢ အတ့လီၤနၤန့ၣ်+ အလီၤဂာ်ဒ်သိးဒီး နဝၤလီၤ.*+
အမံၤမ့ၢ်ဝဲ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ်အံၣ်စရ့လး အကစၢ်ယွၤလၢ အစီဆှံတဂၤ လၢအပှ့ၤက့ၤနၤန့ၣ်လီၤ.+
ပှၤကကိးအီၤလၢ ဟီၣ်ခိၣ်ဒီဘ့ၣ် အကစၢ်ယွၤလီၤ.+
၆ ဖဲယၤ, ယဟိဝၤယွၤ ကိးနၤအခါ နလီၤဂာ်ဒီးမါလၢ အဘၣ်တၢ်ပာ်တ့ၢ်အီၤ ဒီးအသးဟးဂီၤတဂၤ+ဒီးဒ်မါတဂၤလၢ အဖျီသးလၢ အသးစၢ်ခါ ဒီးလၢခံ ဘၣ်တၢ်တၢၤကွံာ်အီၤ အသိးလီၤ.” ကစၢ်ယွၤတဲဝဲ ဒ်န့ၣ်လီၤ.
၇ “ယပာ်တ့ၢ်ကွံာ်နၤ တစိၢ်ဖိဘၣ်ဆၣ် ခီဖျိလၢ ယတၢ်သးကညီၤ အဒိၣ်အမုၢ်အဃိ ယကဟဲက့ၤကိးက့ၤနၤလီၤ.+
၈ ယသးပှံၢ်ထီၣ်နၤ ဒိၣ်မးအဃိ ယဃၣ်ကွံာ်ယမဲာ်လၢ နအိၣ်တစိၢ်ဖိလီၤ.+
ဘၣ်ဆၣ် ခီဖျိလၢ ယတၢ်အဲၣ်လၢအတီ အိၣ်ဝဲ လီၤထူလီၤယိာ်အဃိ ယကသးကညီၤနၤလီၤ.”+ ယဟိဝၤယွၤ လၢအမ့ၢ်ပှၤလၢ အပှ့ၤက့ၤနၤန့ၣ်+ တဲဝဲဒ်န့ၣ်လီၤ.
၉ “တၢ်မၤအသးအံၤ လီၤဂာ်ဒ် စီၤနိအၤ အစိၤအသိးလီၤ.+
ဖဲန့ၣ်အခါ ယအၢၣ်လီၤပာ်စၢၤလၢ ထံတလုၢ်ဘၢဟီၣ်ခိၣ် နီတဘျီလၢၤဘၣ်.+
ဒ်န့ၣ်အသိး ယအၢၣ်လီၤလၢ ယတသးပှံၢ်ထီၣ်နၤ ဒီးသိၣ်ဃီၣ်နၤ နီတဘျီလၢၤဘၣ်.+
၁၀ ကစၢၢ်ကလိတဖၣ် မ့ၢ်လီၤမၢ်ဒီးတၢ်လူၢ်တဖၣ် မ့ၢ်ဟူးဝဲဒၣ်လဲာ်ယတၢ်အဲၣ်လၢအတီ လၢနဖီခိၣ်န့ၣ် တလီၤမၢ်ဘၣ်.+
ဒီးယတၢ်အၢၣ်လီၤအီလီၤ ဘၣ်ဃးဒီး တၢ်ဃူတၢ်ဖိးန့ၣ် ကအိၣ်ဂၢၢ်ကျၢၤဝဲလီၤ.”+ ယဟိဝၤယွၤ လၢအသးကညီၤ နၤန့ၣ် တဲဝဲဒ်န့ၣ်လီၤ.+
၁၁ “အိ ပိာ်မုၣ်တဂၤလၢ အဘၣ်နးဘၣ်ဖှီၣ်,+ အတူၢ်ဘၣ်တၢ်နးမး ဒီးပှၤတမၤမုာ်ထီၣ် အသးဘၣ်ဧၢ,+ယကသူၣ်ထီၣ်က့ၤနၤလၢ လၢၢ်တဖၣ် ဒီးဘံလၣ်မၠ့ၤဒီးယကသူၣ်လီၤ နခီၣ်ထံးလၢ တၢ်မျၢ်နံၤလါအဲးတဖၣ်လီၤ.+
၁၂ ယကတ့ထီၣ် နဝ့ၢ်ဒူၣ်လၢ တၢ်မျၢ်ဆီသွံၣ်တဖၣ်,ယကတ့ထီၣ် နတြဲၤတဖၣ်လၢ လၢၢ်လၢ အကပြုၢ်ကပြီၤတဖၣ်ဒီးယကတ့ထီၣ် နတၢ်လီၢ်အဆၢလၢ လၢၢ်လၢ အလုၢ်ဒိၣ်ပှ့ၤဒိၣ်တဖၣ်လီၤ.
၁၃ နဖိခွါ* ခဲလၢာ် ကမ့ၢ်ပှၤလၢ ယဟိဝၤယွၤ သိၣ်လိအီၤ+ဒီးနဖိခွါတဖၣ်* ကအိၣ်ဒီး တၢ်ဃူ တၢ်ဖိး* အါအါဂီၢ်ဂီၢ်လီၤ.+
၁၄ တၢ်ကသူၣ်ထီၣ်နၤလၢ တၢ်တီ တၢ်လိၤအပူၤ ကျၢၤကျၢၤလီၤ.+
ပှၤတဆီၣ်တံၢ်မၤနၢၤနၤ နီတဂၤဘၣ်.+
တၢ်မၤပျံၤမၤဖုး တအိၣ်ဘူးဒီး နၤဘၣ်အဃိတၢ်လၢကမၤပျံၤမၤဖုးနၤ တအိၣ်နီတမံၤဘၣ်+ ဒီးနတပျံၤ တၢ်နီတမံၤဘၣ်.
၁၅ ပှၤမ့ၢ်ဟဲဒုးနၤတဂၤဂၤန့ၣ်တမ့ၢ်လၢ ယမၢလီၤအီၤအဃိဘၣ်.
ဒီးပှၤလၢ အဒုးနၤတဂၤဂ့ၤ တဂၤဂ့ၤန့ၣ် ကၡူကွံာ်ဝဲလီၤ.”+
၁၆ “ယမ့ၢ် ပှၤလၢအတ့လီၤ ပှၤပိာ်ထးဖိတဖၣ်လၢအမၤကဲၤထီၣ် မ့ၣ်အူဒ်သိးကတ့ထီၣ် စုကဝဲၤန့ၣ်လီၤ.
ယမ့ၢ် ပှၤလၢအတ့လီၤစ့ၢ်ကီး ပှၤလၢအမၤဟးဂီၤတၢ်တဖၣ်လီၤ.+
၁၇ တၢ်စုကဝဲၤလၢ ပှၤတ့ထီၣ်အီၤ ဒ်သိးကထီဒါနၤအဂီၢ်န့ၣ် ကကဲထီၣ် တၢ်ကလီကလီခဲလၢာ်လီၤ.+
ပှၤတဂၤဂ့ၤ တဂၤဂ့ၤ အပျ့ၤလၢ အပာ်ဒ့ၣ်ပာ်ကမၣ်နၤန့ၣ် နကပာ်ဖျါထီၣ် အတၢ်ကမၣ်လီၤ.
တၢ်ဒီသဒၢအံၤ မ့ၢ်ဝဲ ယဟိဝၤယွၤ အခ့အပှၤတဖၣ် အတၢ်န့ၢ်သါဒီးယထံၣ် အဝဲသ့ၣ် ဒ်ပှၤတီပှၤလိၤအသိးလီၤ.” ယဟိဝၤယွၤ တဲဝဲ ဒ်န့ၣ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ကစၢ်.”
^ မ့ၢ်စ့ၢ်ကီး “ဖိ.”
^ မ့ၢ်စ့ၢ်ကီး “ကစၢ်.”
^ မ့ၢ်စ့ၢ်ကီး “တၢ်သူၣ်မံသးမုာ်.”
^ မ့ၢ်စ့ၢ်ကီး “ဖိ.”
^ မ့ၢ်စ့ၢ်ကီး “ဖိ.”
