ယၡါယၤ ၆၃:၁-၁၉
၆၃ ပှၤတဂၤလၢ အဟးထီၣ်လၢ ဝ့ၢ်ဘိးစရၤလၢ+ ကီၢ်အဒိၣ်အပူၤ+ ဒီးဟဲဝဲန့ၣ် မ့ၢ်မတဂၤလဲၣ်.
ပှၤတဂၤအံၤ ကူကၤဝဲ တၢ်ကူတၢ်ကၤလၢ အကပီၤဂ့ၤမး,တၢ်ကူတၢ်ကၤလၢ အလီၤကဟုကညီၢ်ဒီးအဟးဝဲလၢ အစိကမီၤဖးဒိၣ် အပူၤလီၤ.
“ပှၤတဂၤန့ၣ် မ့ၢ်ဝဲယၤ, ယမ့ၢ်ပှၤလၢ အတဲတၢ်လၢ တၢ်တီတၢ်လိၤအပူၤဒီးယမ့ၢ်ပှၤတဂၤလၢ အအိၣ်ဒီး တၢ်စိတၢ်ကမီၤဖးဒိၣ် လၢကမၤပူၤဖျဲးတၢ်အဂီၢ်လီၤ.”
၂ ဘၣ်မနုၤအဃိ နကူနကၤန့ၣ် အလွဲၢ်ဂီၤလဲၣ်.
ဒီးဘၣ်မနုၤအဃိ နကူနကၤတဖၣ် လီၤဂာ်ဒ်သိးဒီး ပှၤယီၢ်စပံးသၣ် အကူအကၤလဲၣ်.+
၃ “ယဘၣ်ယီၢ် စပံးသၣ် လၢပှၤယီၢ်စပံးထံအကျီးပူၤ ထဲတဂၤဒီးလၢပှၤဟီၣ်ခိၣ်ဖိအကျါန့ၣ် ပှၤတအိၣ်ဒီးယၤ နီတဂၤဘၣ်.
ယဆဲးယီၢ် ပှၤတဖၣ်န့ၣ်လၢ တၢ်သးထီၣ်အပူၤဒီးယဆဲးယီၢ်တံၢ်လီၤ အဝဲသ့ၣ်လၢ တၢ်သးဒိၣ်အပူၤလီၤ.+
အဝဲသ့ၣ် အသွံၣ်ဖျိးထီၣ်ဘၣ် ယတၢ်ကူတၢ်ကၤဒီးယတၢ်ကူတၢ်ကၤ ဘၣ်အၢလၢာ်လံ.
၄ ယပာ်ပနီၣ်ဃာ် တၢ်ဟ့ၣ်ကၣ် အမုၢ်နံၤလံ.+
တၢ်ဆၢကတီၢ်လၢ ယကပှ့ၤက့ၤ ယပှၤဂီၢ်မုၢ်န့ၣ် ဟဲတုၤဝဲလံ.
၅ ယကွၢ်တၢ်ဘၣ်ဆၣ် ယတထံၣ်န့ၢ် ပှၤလၢအအိၣ်ဃူယၤ နီတဂၤဘၣ်.
ပှၤဆီၣ်ထွဲ ယတၢ်ဘၣ်သး တအိၣ်နီတဂၤဘၣ်အဃိ ယကမၢကမၣ်လီၤ.
အဃိ ယအုၣ်က့ၤခီၣ်က့ၤတၢ်လၢ ယနီၢ်ကစၢ်အစု+ဒီးယနီၢ်ကစၢ် အတၢ်သးဒိၣ်ထီၣ် ထိၣ်ဟူးထိၣ်ဂဲၤထီၣ်ယၤလၢ ယကမၤဒ်န့ၣ်လီၤ.
၆ ယယီၢ်လီၤ ပှၤဂီၢ်မုၢ်လၢ တၢ်သးထီၣ်အပူၤ,ယမၤမူၤ အဝဲသ့ၣ်လၢ ယတၢ်သးဒိၣ်ထီၣ်+ဒီးယလူလီၤ အဝဲသ့ၣ် အသွံၣ်လၢ ဟီၣ်ခိၣ်လိၤလီၤ.”
၇ ခီဖျိလၢ ယဟိဝၤယွၤ အိၣ်ဒီး တၢ်သးကညီၤ ဒီးတၢ်အဲၣ်လၢအတီ ဒိၣ်ဒိၣ်မုၢ်မုၢ်အဃိအဝဲမၤန့ၢ်တၢ်လၢပဂီၢ် ဒီဒူၣ်ဒီးအမၤဂ့ၤတၢ်လၢ ပှၤအံၣ်စရ့လးဖိတဖၣ် အဖီခိၣ် အါမံၤလီၤ.+
အဃိ ယကတဲဖျါထီၣ် ယဟိဝၤယွၤ အတၢ်အဲၣ်လၢအတီဒီးယဟိဝၤယွၤ အတၢ်မၤလၢ အလီၤစံးပတြၢၤတဖၣ်လီၤ.
၈ ကစၢ်ယွၤတဲဝဲလၢ “အဝဲသ့ၣ် မ့ၢ်ယပှၤဂီၢ်မုၢ် နီၢ်ကီၢ် ဒီးအဝဲသ့ၣ် မ့ၢ်ယဖိခွါတဖၣ်လၢ အကသးတီဒီးယၤ သပှၢ်တၢၢ်လီၤ.”+
အဃိ ကစၢ်ယွၤ ကဲထီၣ်အဝဲသ့ၣ် အပှၤအုၣ်က့ၤခီၣ်က့ၤတၢ်လီၤ.+
၉ ဖဲအဝဲသ့ၣ် ဘၣ်ကိၢ်ဘၣ်ဂီၤ ဒီတကတီၢ်န့ၣ် ကစၢ်ယွၤ ဘၣ်ကိၢ်ဘၣ်ဂီၤ စ့ၢ်ကီးလီၤ.+
ဒီးအမူခိၣ်ကလူး လီၤဆီတဂၤ မၤပူၤဖျဲး အဝဲသ့ၣ်လီၤ.+
လၢအတၢ်အဲၣ် ဒီးတၢ်သးကညီၤအပူၤန့ၣ် အဝဲပှ့ၤက့ၤ အဝဲသ့ၣ်,+စိာ်ထီၣ်အဝဲသ့ၣ် ဒီးအံးထွဲကွၢ်ထွဲ အဝဲသ့ၣ်လၢ နံၣ်လၢအပူၤကွံာ်တဖၣ် ဒီတကတီၢ်လီၤ.+
၁၀ ဘၣ်ဆၣ် အဝဲသ့ၣ် ထီဒါက့ၤအီၤ+ ဒီးမၤသးအုး အသးစီဆှံလီၤ.+
လၢခံ ကစၢ်ယွၤ ကဲထီၣ်က့ၤ အဝဲသ့ၣ် အဒုၣ်အဒါ+ဒီးကစၢ်ယွၤ ဒုးအဝဲသ့ၣ်လီၤ.+
၁၁ အဝဲသ့ၣ် နီၣ်ဘၣ်က့ၤ တၢ်လၢ အပူၤကွံာ်ဖဲကစၢ်ယွၤ အခ့အပှၤ စီၤမိၤၡ့ အစိၤလီၤ. ဒီးအဝဲသ့ၣ် တဲဝဲလၢ“ပှၤတဂၤလၢ အဒုးခီဂာ် ပှၤတဖၣ်န့ၣ်လၢ ပီၣ်လဲၣ်+ ဃုာ်ဒီးပှၤလၢ အကွၢ်အသိတဖၣ်န့ၣ် ခဲအံၤ အအိၣ်ဖဲလဲၣ်.+
ပှၤတဂၤလၢ အပာ်အသးစီဆှံလၢ စီၤမိၤၡ့* အပူၤန့ၣ် ခဲအံၤအအိၣ် ဖဲလဲၣ်.+
၁၂ ပှၤတဂၤန့ၣ် ဆီၣ်ထွဲ စီၤမိၤၡ့ ခီဖျိလၢ အစိကမီၤဖးဒိၣ်*+ဒီးအဝဲနီၤဖး ပီၣ်လဲၣ်အထံ လၢအဝဲသ့ၣ် အမဲာ်ညါ+ဒ်သိး အမံၤ ကဘၣ်တၢ်သ့ၣ်နီၣ်ထီၣ်အီၤ လီၤထူလီၤယိာ် အဂီၢ်လီၤ.+
၁၃ ပှၤတဂၤလၢ အဒုးခီဂာ်အဝဲသ့ၣ်လၢ ထံယိာ်ပူၤဒီးအဝဲသ့ၣ် အခီၣ်တဘၣ်တိၢ်ဘၣ် လီၤဂာ်ဒ်သိးဒီးကသ့ၣ်တဒု ဃ့ၢ်ဘၣ်ဝဲလၢ တၢ်ပၢၤခိၣ်ညီညီန့ၣ် ခဲအံၤ အအိၣ်ဖဲလဲၣ်.
၁၄ ယဟိဝၤယွၤ အသးစီဆှံ ဒုးအိၣ်ဘှံးအဝဲသ့ၣ်ဒ်သိးဒီး ဆၣ်ဖိကီၢ်ဖိလၢ အလဲၤလီၤအိၣ်ဘှံးလၢ တၢ်ပၢၤခိၣ်လီၤ.”+
ကစၢ်ယွၤဧၢ, ဒ်သိး နမံၤဃံလၤ ကဘၣ်တၢ်မၤလၤကပီၤအီၤအဂီၢ်+နဆှၢ နပှၤဂီၢ်မုၢ် ဒ်န့ၣ်လီၤ.
၁၅ နအိၣ်လၢမူခိၣ် လၢနတၢ်အိၣ်တၢ်ဆိးအလီၢ်စီဆှံ လၢအအိၣ်ထီၣ်ထီ ဒီးအပှဲၤဒီး အလၤကပီၤလီၤ.
ဝံသးစူၤ ကွၢ်လီၤဒီး နကထံၣ်လီၤ.
နတၢ်သူၣ်ဆူၣ်သးဆူၣ် ဒီးနဂံၢ်ဘါလၢအဆူၣ်,နတၢ်ဒိသူၣ်ဒိသး+ ဒီးနတၢ်သးကညီၤန့ၣ်+ လဲၤဖဲလဲၣ်.
နထုးထီၣ်ကွံာ် တၢ်သ့ၣ်တဖၣ်န့ၣ် လၢပအိၣ်လံ.
၁၆ နမ့ၢ်ပပၢ်လီၤ.+
စီၤအၤဘြၤဟၣ် မ့ၢ်တသ့ၣ်ညါ ပှၤဘၣ်ဒီးစီၤအံၣ်စရ့လး မ့ၢ်တသ့ၣ်ညါပှၤဘၣ် သနာ်က့အိ ယဟိဝၤယွၤဧၢ, နမ့ၢ်ပပၢ်လီၤ.
နမ့ၢ်ပှၤတဂၤလၢ အပှ့ၤက့ၤပှၤ လၢပျၢၤလံၤလံၤလံ.+
၁၇ အိ ယဟိဝၤယွၤဧၢ, ဘၣ်မနုၤအဃိ နပျဲလၢ ပကဟးဖျိးကွံာ် လၢနကျဲတဖၣ်လဲၣ်.
ဘၣ်မနုၤအဃိ နပျဲလၢ ပခိၣ်ကကိၤ ဒ်သိး ပသုတပျံၤနၤလၢၤတဂ့ၤ အဂီၢ်လဲၣ်.+
ဟဲက့ၤမၤစၢၤ ပဝဲနခ့နပှၤတဖၣ်လၢအမ့ၢ် နတၢ်န့ၢ်သါန့ၣ်တက့ၢ်.+
၁၈ ပဝဲနပှၤစီဆှံတကလုာ်အံၤ ဒိးန့ၢ်ဘၣ်ကီၢ် လၢတၢ်ဆၢကတီၢ် ထဲ တစိၢ်ဖိလီၤ.
ပဒုၣ်ပဒါတဖၣ် ယီၢ်တံၢ်လီၤ နတၢ်စီဆှံအလီၢ်လံ.+
၁၉ ပကဲထီၣ် ဒ်သိးဒီး ပှၤလၢ နတပၢအီၤ နီတဘျီဘၣ်ဒီးဒ်သိးဒီး ပှၤလၢ ပှၤတကိးအီၤလၢ နမံၤနီတဘျီဘၣ်န့ၣ် ဖးယံာ်လံ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အဝဲ.”
^ မ့ၢ်စ့ၢ်ကီး “ဒုးလဲၤအစုဃံလၤဒီး စီၤမိၤၡ့ အစုထွဲ.”
