ယၡါယၤ ၆၅:၁-၂၅
၆၅ “ပှၤလၢ အတသံကွၢ် ယဂ့ၢ်ဘၣ်န့ၣ် ယလီၣ်ဖျါထီၣ်ယသးလၢ အဝဲသ့ၣ်အအိၣ်,ပှၤလၢ အတဃုယၤဘၣ်န့ၣ် ယပျဲလၢအဝဲသ့ၣ် ကထံၣ်န့ၢ်ယၤလီၤ.+
ဒီးပှၤတကလုာ်လၢ အတကိးထီၣ် ယမံၤဘၣ်န့ၣ် ယတဲအဝဲသ့ၣ်လၢ ‘ယအိၣ်ဖဲအံၤ, ယအိၣ်ဖဲအံၤလီၤ.’+
၂ ပှၤတဒူၣ်လၢ အခိၣ်ကိၤ,+အလူၤဘၣ်အသး+ဒီးလဲၤလၢ ကျဲလၢတဂ့ၤဘၣ်တဖၣ်န့ၣ်+ ယယူာ်ဃီၤယစုလၢ အဝဲသ့ၣ်အအိၣ် ဒီတနံၤညါ.
၃ ပှၤသ့ၣ်တဖၣ်အံၤ မၤဆါယသးဒူဒူ ခဲအံၤခဲအံၤ,+လုၢ်ထီၣ်တၢ်လၢ ကရၢၢ်ပူၤ+ ဒီးဒွဲၣ်ခုၣ်ထီၣ်တၢ်လုၢ်လၢ အူးခဲတဖၣ် အဖီခိၣ်လီၤ.
၄ အဝဲသ့ၣ် ဆ့ၣ်နီၤလၢ တၢ်သွၣ်ခိၣ် အကျါ+ဒီးအိၣ်ဝဲလၢ တၢ်အိၣ်ခူသူၣ် အလီၢ်တဖၣ် ဒီတနၤကျၢၤလီၤ.
အဝဲသ့ၣ် အီၣ်ထီးညၣ်+ဒီးကသူထံလၢ အပၣ်ဃုာ်ဒီး တၢ်လၢ အတကဆှီဘၣ်န့ၣ် အိၣ်ဝဲလၢ အဝဲသ့ၣ် အသပၢၤ ဒီးလီခီတဖၣ် အပူၤလီၤ.+
၅ ဝံၤဒီး အဝဲသ့ၣ် တဲပှၤဂၤလၢ ‘ပစီဆှံဒိၣ်န့ၢ်ဒံးသု,* အိၣ်မ့ၢ်ယံၤ ဟဲမၤဘူးပှၤတဂ့ၤ.’
ပှၤတဖၣ်န့ၣ် လီၤဂာ်ဒ်သိးဒီး မ့ၣ်အူခုၣ်လၢ ယနါဒ့အပူၤဒီးဒ်မ့ၣ်အူလၢ အကဲၤဝဲဒီတနံၤညါ အသိးလီၤ.
၆ တၢ်တဖၣ်န့ၣ် ဘၣ်တၢ်ကွဲးလီၤအီၤလၢ ယမဲာ်ညါလံ.
ယတအိၣ်ဃိဒိဘၣ်,ယကမၤဆၢက့ၤ အဝဲသ့ၣ်,+ယကမၤဆၢက့ၤ အဝဲသ့ၣ်လၢ တၢ်လၢအဝဲသ့ၣ်မၤဝဲအဃိ ခဲလၢာ်လီၤ.”
၇ ယဟိဝၤယွၤ တဲဝဲလၢ “ယကမၤဒ်န့ၣ်လၢ အဝဲသ့ၣ် အတၢ်ကမၣ် ဒီးအဝဲသ့ၣ် အမိၢ်ပၢ်ဖံဖု လၢပျၢၤတဖၣ် အတၢ်ကမၣ် အဃိလီၤ.+
မ့ၢ်လၢ အဝဲသ့ၣ် ဒွဲၣ်ခုၣ်ထီၣ်တၢ်လုၢ်လၢ ကစၢၢ်ကလိကျါဒီးဒုၣ်ဒွဲၣ်ယၤလၢ တၢ်လူၢ်တဖၣ်အလိၤအဃိ+အဆိကတၢၢ်န့ၣ် ယကသိၣ်ဃီၣ် အဝဲသ့ၣ်လၢ အတၢ်မၤအအၢအသီ ခဲလၢာ်အဃိလီၤ.”
၈ ယဟိဝၤယွၤ တဲဝဲလၢ“ပှၤကတ့ထီၣ် စပံးထံအသီအဂီၢ် စပံးသၣ် မ့ၢ်အိၣ်တချုၣ်ချုၣ်န့ၣ်ပှၤတဂၤကတဲဝဲလၢ ‘ဖဲန့ၣ် စပံးသၣ်လၢ အဂ့ၤအိၣ်ဒံး, တဘၣ်တၢၤကွံာ်အီၤတဂ့ၤ.’
ယၤစ့ၢ်ကီး ယကမၤဒ်န့ၣ်လၢ ယခ့ယပှၤတဖၣ်အဃိဒီးယတမၤဟးဂီၤကွံာ် ယပှၤဂီၢ်မုၢ် ခဲလၢာ်ဘၣ်.+
၉ လၢစီၤယၤကိာ် ဒီးယူဒၤ အပှၤဂီၢ်မုၢ်အကျါန့ၣ်ယကဒုးအိၣ်ထီၣ် ချံသၣ်တခါ လၢအကန့ၢ်သါဘၣ် ယကစၢၢ် တဖၣ်လီၤ.+
ပှၤလၢ ယဃုထၢထီၣ်အီၤတဖၣ် ကဒိးန့ၢ်ဘၣ်ကီၢ်ဒီးယခ့ယပှၤတဖၣ် ကအိၣ်ဘၣ် ဖဲန့ၣ်လီၤ.+
၁၀ ၡၤရိၣ်+ အတၢ်ပျီ ကကဲထီၣ် တၢ်အီၣ်ဆၣ်အလီၢ်လၢ သိအဂီၢ်ဒီးဧၤကိၢ်+ အတၢ်တြီၤ ကကဲထီၣ် တၢ်အိၣ်ဘှံးအလီၢ်လၢ ကျီၢ်တဖၣ်အဂီၢ်လီၤ.
ယပှၤဂီၢ်မုၢ်လၢ အကဃုယၤန့ၣ် ယကမၤန့ၢ်တၢ်လၢ အဝဲသ့ၣ် အဂီၢ်ဒ်န့ၣ်လီၤ.
၁၁ ဘၣ်ဆၣ် သုဝဲသ့ၣ်အံၤ သုမ့ၢ်ပှၤလၢ အပာ်တ့ၢ်ကွံာ် ယၤ ယဟိဝၤယွၤ,+သုသးပ့ၤနီၣ် ယကစၢၢ်စီဆှံ,+သုဆီလီၤ စီၢ်နီၤခိၣ်လၢ တၢ်ဘူၣ်ဂ့ၤတီၢ်ဂ့ၤ အယွၤတဂၤအဂီၢ်,ဒီးသုကျဲၣ်ကျီ စပံးထံ ဒီးမၤပှဲၤထံခွးတဖၣ်လၢ တၢ်ဟဲဝံဂ့ၤ အယွၤတဂၤအဂီၢ်လီၤ.
၁၂ ယကိးတၢ် ဘၣ်ဆၣ် သုတစံးဆၢဘၣ်ဒီးယတဲတၢ် ဘၣ်ဆၣ် သုတဒိကနၣ်ဘၣ်.+
သုဆဲးမၤတၢ်လၢ ယထံၣ်လၢ အအၢဒီးသုဃုထၢတၢ်လၢ အတဘၣ် ယသးဘၣ်လီၤ.+
အဃိ ယကဟ့ၣ်လီၤကွံာ်သု လၢနးအအိၣ်+ဒီးသုဝဲခဲလၢာ် သုကချံးလီၤသုခီၣ်လၢ တၢ်ကမၤသံသု အဂီၢ်လီၤ.”+
၁၃ အဃိ တၢ်ပၢကစၢ် ယဟိဝၤ တဲဝဲလၢ“ယခ့ယပှၤတဖၣ် ကအီၣ်တၢ် ဘၣ်ဆၣ် သုကလီၤဘဲ* အီၣ်တၢ်လီၤ.+
ယခ့ယပှၤတဖၣ် ကအီတၢ်+ ဘၣ်ဆၣ် သုကလီၤဘဲ အီထံလီၤ.
ယခ့ယပှၤတဖၣ် ကသးခု+ ဘၣ်ဆၣ် သုကတူၢ်ဘၣ် တၢ်မဲာ်ဆှးလီၤ.+
၁၄ ယခ့ယပှၤ ကကိးပသူထီၣ်လၢ တၢ်သူၣ်ဖှံသးညီအပူၤ ခီဖျိလၢ အသးခုအဃိ,မ့မ့ၢ်သုဝဲန့ၣ် သုကဟီၣ်ကိးပသူထီၣ်လၢ တၢ်သူၣ်အုးသးအုးအပူၤဒီးသုကဟီၣ်ကယၢၤ ခီဖျိလၢ သုသူၣ်ဘၣ်ဒိသးဘၣ်ဒိနးမး အဃိလီၤ.
၁၅ ယၤ, တၢ်ပၢကစၢ် ယဟိဝၤယွၤအံၤ ကမၤသံသုဝဲ တဂၤစုာ်စုာ်လီၤ.
ဒီးကအိၣ်တ့ၢ်က့ၤထဲ သုမံၤလၢ ပှၤလၢ ယဃုထၢထီၣ်အီၤတဖၣ် ကသူက့ၤဝဲလၢ တၢ်ဆိၣ်အၢ အဂီၢ်လီၤ.
မ့မ့ၢ် ယခ့ယပှၤတဖၣ်န့ၣ် ယကကိးအဝဲသ့ၣ်လၢ မံၤအဂၤ တဖျၢၣ်လီၤ.+
၁၆ အဃိ ပှၤတဂၤဂ့ၤ တဂၤဂ့ၤလၢ အဃုတၢ်ဆိၣ်ဂ့ၤ လၢအနီၢ်ကစၢ်အဂီၢ် လၢဟီၣ်ခိၣ်ချၢန့ၣ်ကဘၣ်ဆိၣ်ဂ့ၤ ခီဖျိ ယၤ, ကစၢ်ယွၤ လၢအမ့ၢ်အတီလီၤ.
ဒီးပှၤတဂၤဂ့ၤ တဂၤဂ့ၤလၢ အအၢၣ်လီၤတၢ် လၢဟီၣ်ခိၣ်ချၢန့ၣ်ကအၢၣ်လီၤတၢ် ခီဖျိ ယၤ, ကစၢ်ယွၤ လၢအမ့ၢ်အတီလီၤ.+
တၢ်ကိၢ်တၢ်ဂီၤ* လၢအပူၤကွံာ်တဖၣ်န့ၣ် ကဘၣ်တၢ်သးပ့ၤနီၣ်ကွံာ်အီၤဒီးကဘၣ်တၢ်ပာ်တဒၢအီၤ လၢယမဲာ်ညါလီၤ.+
၁၇ ယကတ့လီၤ မူခိၣ်အသီ ဒီးဟီၣ်ခိၣ်အသီလီၤ.+
ဒီးတၢ်အလီၢ်လံၤတဖၣ်န့ၣ် ပှၤတသ့ၣ်နီၣ်ထီၣ်က့ၤအီၤလၢၤဘၣ်ဒီးတၢ်သ့ၣ်တဖၣ်န့ၣ် တဟဲအိၣ်ထီၣ်လၢ ပှၤသးပူၤလၢၤဘၣ်.+
၁၈ သးခု ဒီးသူၣ်ဖှံသးညီလၢ တၢ်လၢယကတ့လီၤ အဃိ လီၤထူလီၤယိာ်တက့ၢ်.
ယကတ့ထီၣ် ဝ့ၢ်ယရူၤၡလ့ၣ်လၢ ကဒုးအိၣ်ထီၣ် တၢ်သူၣ်ဖှံ သးညီအဂီၢ်ဒီးအပှၤဂီၢ်မုၢ်န့ၣ် ကဒုးအိၣ်ထီၣ် တၢ်သးခုလီၤ.+
၁၉ ဒီးယကသူၣ်ဖှံသးညီလၢ ဝ့ၢ်ယရူၤၡလ့ၣ်အဃိ ဒီးယကသးခုလၢ ယပှၤဂီၢ်မုၢ်အဃိလီၤ.+
ဒီးလၢဝ့ၢ်ယရူၤၡလ့ၣ်အပူၤန့ၣ် ပှၤတနၢ်ဟူ တၢ်ဟီၣ်တၢ်ယၢၤအသီၣ် ဒီးတၢ်ကိးပသူထီၣ်လၢ တၢ်ကိၢ်တၢ်ဂီၤ အဃိလၢၤဘၣ်.”+
၂၀ “ဖဲတၢ်လီၢ်အဝဲန့ၣ် ဖိသၣ်လၢ အိၣ်ဖျဲၣ်ထီၣ် သီသီတဖၣ် တအိၣ်မူထဲ စှၤကိာ်သီလၢၤဘၣ်.
ဒီးပှၤသးပှၢ်တဂၤလၢ အတအိၣ်မူတုၤလၢ အမုၢ်နံၤမုၢ်သီ ပှဲၤထီၣ်ခဲလၢာ်ဘၣ်န့ၣ် တအိၣ်လၢၤဘၣ်.
ပှၤလၢအသံ ဖဲအသးနံၣ်အိၣ် တကယၤအခါန့ၣ် ပှၤကပာ်အီၤဒ် ဖိသၣ်ဒံးလီၤ.
ဒီးပှၤတၢ်ဒဲးဘးဖိ အသးနံၣ်မ့ၢ်အိၣ် တကယၤ သနာ်က့ အကဘၣ် တၢ်ဆိၣ်အၢလီၤ.*
၂၁ ယပှၤဂီၢ်မုၢ် ကတ့ထီၣ်ဟံၣ်တဖၣ် ဒီးကအိၣ်ဝဲလၢ အပူၤလီၤ.+
ဒီးအဝဲသ့ၣ် ကသူၣ်လီၤ စပံးကျီးတဖၣ် ဒီးကအီၣ်ဝဲ အသၣ်လီၤ.+
၂၂ အဝဲသ့ၣ် တတ့ထီၣ်ဟံၣ်လၢ ပှၤဂၤကဟဲအိၣ်ဝဲအဂီၢ်ဘၣ်.
အဝဲသ့ၣ် တသူၣ်လီၤ စပံးကျီးတဖၣ်လၢ ပှၤဂၤကဟဲအီၣ်ဝဲအဂီၢ်ဘၣ်.
ယပှၤဂီၢ်မုၢ် အသးသမူ ကထီဝဲ ဒ်သိးဒီး သ့ၣ်တထူၣ်အသးသမူထီဝဲ+ဒီးပှၤလၢ ယဃုထၢထီၣ်အီၤတဖၣ် ကသူၣ်ဖှံသးညီဝဲ လၢလၢပှဲၤပှဲၤ လၢတၢ်လၢ အဝဲသ့ၣ် မၤဝဲလၢ အစုလီၤ.
၂၃ တၢ်မၤလၢ အဝဲသ့ၣ် ကမၤဝဲန့ၣ် တကဲထီၣ် တၢ်ကလီကလီဘၣ်.+
ဒီးအဝဲသ့ၣ် တအိၣ်ဖျဲၣ်ထီၣ်ဖိလၢ ကဘၣ်ကီဘၣ်ခဲ အဂီၢ်ဘၣ်,မ့ၢ်လၢ အဝဲသ့ၣ် ဒီးအစၢၤအသွဲၣ်တဖၣ်န့ၣ်+ကမ့ၢ်ဝဲပှၤလၢ ယဟိဝၤယွၤ ဆိၣ်ဂ့ၤအီၤ အဃိလီၤ.+
၂၄ တချုးလၢ အဝဲသ့ၣ် ကိးထီၣ်ဒံးဘၣ်န့ၣ် ယကစံးဆၢအီၤလီၤ.
ဒီးဖဲအဝဲသ့ၣ် တဲဒံးတၢ်အခါ ယကမၤစၢၤ အဝဲသ့ၣ်လီၤ.
၂၅ ထွံၣ်မံၤဒီးသိဖိ ကအီၣ်အဆၣ် တပူၤဃီ,ခ့ယုၢ် ကအီၣ်လီၢ်ဘိ ဒ်ကျီၢ်ဖါအသိး+ဒီးဂုၢ် အတၢ်အီၣ်န့ၣ် ကမ့ၢ်ဝဲ ဟီၣ်ခိၣ်ကမူၣ်လီၤ.
လၢယကစၢၢ် စီဆှံဒီတဖျၢၣ်အလိၤန့ၣ်+ ဆၣ်ဖိကီၢ်ဖိတဖၣ်အံၤ တမၤဘၣ်ဒိ ပှၤနီတဂၤဘၣ် ဒီးတမၤအၢတၢ်ဘၣ်.” ယဟိဝၤယွၤ တဲဝဲ ဒ်န့ၣ်လီၤ.
တၢ်ဂ့ၢ်အဘျဲၣ်တဖၣ်
^ ဘၣ်သ့ၣ်သ့ၣ် ကမ့ၢ် “ပတၢ်စီတၢ်ဆှံ ကဘၣ်ကူသု.”
^ မ့ၢ်စ့ၢ်ကီး “သၣ်ဝံၤ.”
^ မ့ၢ်စ့ၢ်ကီး “တၢ်ကီတၢ်ခဲ.”
^ ဘၣ်သ့ၣ်သ့ၣ် ကမ့ၢ် “ပှၤလၢ အတအိၣ်မူပှဲၤထီၣ် အနံၣ်တကယၤဘၣ်န့ၣ် ပှၤကပာ်အီၤဒ် ပှၤလၢ အဘၣ်တၢ်ဆိၣ်အၢအသိး.”
