ယၡါယၤ ၆၆:၁-၂၄
၆၆ ယဟိဝၤယွၤ တဲဝဲလၢ“မူခိၣ် မ့ၢ်ယလီၢ်ပစိာ် ဒီးဟီၣ်ခိၣ် မ့ၢ်ယခီၣ်ယီၢ်လီၤ အလီၢ်လီၤ.+
သုတ့ထီၣ်ဟံၣ်လၢ ယဂီၢ် ကသ့ ဖဲလဲၣ်.+
ဒီးယတၢ်အိၣ်တၢ်ဆိးအလီၢ် ကအိၣ်လၢ တၢ်လီၢ်ဖဲလဲၣ်.”+
၂ ယဟိဝၤယွၤ တဲဝဲလၢ “ယတ့လီၤတၢ်သ့ၣ်တဖၣ်အံၤခဲလၢာ် လၢ ယနီၢ်ကစၢ်အစုဒီးတၢ်သ့ၣ်တဖၣ်အံၤခဲလၢာ် ဟဲကဲထီၣ်အသးလီၤ.+
အဃိ ယကကွၢ်လီၤ ပှၤလၢ အဆီၣ်လီၤသးဒီးအသးဘၣ်ဒိတဂၤလၢ အကနိးကစုာ်လၢ* ယတၢ်ကတိၤ အဃိလီၤ.+
၃ ပှၤလၢ အမၤသံကျီၢ်ဖါန့ၣ် ကဘၣ်တၢ်ပာ်အီၤ ဒ်သိးဒီး ပှၤလၢ အမၤသံပှၤကညီ,+ပှၤလၢ အလုၢ်ထီၣ်သိတဒုန့ၣ် ကဘၣ်တၢ်ပာ်အီၤ ဒ်သိးဒီး ပှၤလၢအမၤကၢ် ထွံၣ်အကိာ်ဘိ,+ပှၤလၢ အဟ့ၣ်လုၢ်ထီၣ်တၢ်လုၢ်န့ၣ် ကဘၣ်တၢ်ပာ်အီၤ ဒ်သိးဒီး ပှၤလၢ အဟ့ၣ်လုၢ်ထီၣ် ထီးအသွံၣ်+ဒီးပှၤလၢ အလုၢ်ထီၣ် လီၢ်ဘၣ်*+ န့ၣ်ကဘၣ်တၢ်ပာ်အီၤ ဒ်သိးဒီး ပှၤလၢ အဆိၣ်ဂ့ၤပှၤဂၤလၢ တၢ်ကတိၤလၢ အဘၣ်ထွဲဒီး တၢ်အူတၢ်သမူတၢ်လီၤ.*+
အဝဲသ့ၣ်ဃုထၢ အနီၢ်ကစၢ်အကျဲဒီးတၢ်လၢအလီၤသးဘၣ်အၢန့ၣ် အဝဲသ့ၣ် မၤဝဲမုာ်မးလီၤ.
၄ ဖဲယကိးထီၣ်အခါ ပှၤတစံးဆၢယၤ နီတဂၤဘၣ်ဒီးဖဲယတဲတၢ်အခါ ပှၤတဒိကနၣ်ယၤ နီတဂၤဘၣ်.+
အဝဲသ့ၣ် ဆဲးမၤတၢ်လၢ ယထံၣ်လၢ အအၢဒီးအဝဲသ့ၣ် ဃုထၢတၢ်လၢ အတဘၣ်ယသးဘၣ်လီၤ.+
အဃိ ယကဃုထၢ ကျဲလၢ ယကစံၣ်ညီၣ်အဝဲသ့ၣ်+ဒီးတၢ်လၢ အဝဲသ့ၣ် ပျံၤဝဲတဖၣ်န့ၣ် ယကဒုးလီၤဘၣ် အဝဲသ့ၣ်လီၤ.”
၅ သုဝဲလၢ အကနိးကစုာ်လၢ* ယဟိဝၤယွၤ အတၢ်ကတိၤအဃိသ့ၣ်ဧၢ, ဒိကနၣ် အတၢ်ကတိၤအံၤတက့ၢ်.
“သုဒီပုၢ်ဝဲၢ်တဖၣ်လၢ အသးဟ့သု ဒီးနီဟးထီၣ်သု လၢယမံၤအဃိန့ၣ် အဝဲသ့ၣ် တဲဆဲးအဲးဝဲလၢ ‘မ်ပှၤမၤလၤကပီၤ ယဟိဝၤယွၤသၢၤ.’+
ဘၣ်ဆၣ် ယကလီၣ်ဖျါထီၣ်ယသး ဒီးဟ့ၣ်သုတၢ်သးခုဒီးပှၤတဖၣ်န့ၣ် မ့ၢ်ပှၤလၢ အကဒိးန့ၢ်ဘၣ် တၢ်မဲာ်ဆှးလီၤ.”+
၆ ယဟိဝၤယွၤ ဟ့ၣ်ကၣ်က့ၤ အဒုၣ်အဒါတဖၣ် ဒ်တၢ်လၢအဝဲသ့ၣ် ကြၢးဒိးန့ၢ်ဘၣ်ဝဲအသိးအဃိတၢ်တၢထီၣ်တၢလီၤအသီၣ် အိၣ်ထီၣ်ဝဲလၢဝ့ၢ်ပူၤ ဒီးလၢ တၢ်လုၢ်ဟံၣ်လီၤ.
၇ ပိာ်မုၣ် စံယိၣ် အိၣ်ဖျဲၣ်ထီၣ် သတူၢ်ကလာ်ဒီး တလဲၤခီဖျိဘၣ် တၢ်ဟုးဆါဘၣ်.+
တချုးလၢ အဟုးဆါထီၣ်ဒံးဘၣ်န့ၣ် အဝဲအိၣ်ဖျဲၣ်ထီၣ် ဖိခွါတဂၤလီၤ.
၈ တၢ်ကဲထီၣ်အသး ဒ်အံၤန့ၣ် မ့ၢ်ပှၤနၢ်ဟူဘၣ် အိၣ်တဂၤဂၤဧါ.
တၢ်မၤအသး ဒ်အံၤတဖၣ်န့ၣ် မ့ၢ်ပှၤထံၣ်ဘၣ် အိၣ်တဂၤဂၤဧါ.
မ့ၢ်ထံကီၢ် ကဟဲအိၣ်ဖျဲၣ်ထီၣ်လၢ တသီဃီအတီၢ်ပူၤဧါ.
မ့ၢ်ပှၤတကလုာ် ကဟဲအိၣ်ဖျဲၣ်ထီၣ် ခဲလၢာ်တဘျီဃီဧါ.
ဘၣ်ဆၣ် ဖဲပိာ်မုၣ် စံယိၣ် အဟုးဆါထီၣ်တဘျီဃီန့ၣ် အအိၣ်ဖျဲၣ်ထီၣ် အဖိခွါတဖၣ် သတူၢ်ကလာ်လီၤ.
၉ ယဟိဝၤယွၤ တဲဝဲလၢ “မ့ၢ်ယကအိးထီၣ် အဒၢလီၢ် ဝံၤဒီး မၤပံးက့ၤ အဒၢလီၢ်ဧါ.”
နကစၢ်ယွၤ တဲဝဲလၢ “မ့ၢ်ယကမၤဒ်သိးဖိသၣ် ဘူးကအိၣ်ဖျဲၣ်ထီၣ် ဝံၤဒီး တပျဲအအိၣ်ဖျဲၣ်ထီၣ်ဘၣ်ဧါ.”
၁၀ သုဝဲခဲလၢာ်လၢ အအဲၣ် ဝ့ၢ်ယရူၤၡလ့ၣ်ဧၢ, သူၣ်ခုသးခု ဒီးသူၣ်ဖှံ သးညီ+ ဃုာ်ဒီးအီၤတက့ၢ်.+
သုဝဲခဲလၢာ်လၢ အသးအုးလၢ ဝ့ၢ်ယရူၤၡလ့ၣ်အဃိဧၢ, သူၣ်ဖှံသးညီဖးဒိၣ် ဃုာ်ဒီးအီၤတက့ၢ်.
၁၁ ဒ်မိၢ်တဂၤ ဒုးအီအဖိနုၢ် တုၤလၢအဖိအီဝဲ ဘျဲဘျဲအသိး ဝ့ၢ်ယရူၤၡလ့ၣ် ကကွၢ်ထွဲ ကဟုကယာ်သု ဒ်န့ၣ်လီၤ.
ဒီးခီဖျိလၢ ဝ့ၢ်ယရူၤၡလ့ၣ် ကဘၣ်တၢ်မၤလၤကပီၤအီၤအဃိ သုကသူၣ်မံသးမုာ် ဒီးသူၣ်ဖှံသးညီ ဖးဒိၣ်လီၤ.
၁၂ ယဟိဝၤယွၤ တဲဝဲလၢ“ယကဟ့ၣ်လီၤ ဝ့ၢ်ယရူၤၡလ့ၣ် တၢ်ဃူတၢ်ဖိး ဒ်သိးဒီး ထံကျိတဘိ+ဒီးယကဒုးယွၤလီၤ ပှၤကလုာ်တဖၣ် အလၤကပီၤလၢ ဝ့ၢ်ယရူၤၡလ့ၣ် အအိၣ် ဒ်ထံကျိၤလၢ အထံဒိၣ်ထီၣ်အသိးလီၤ.+
အကကွၢ်ထွဲ ကဟုကယာ်သု ဒီးအကပုသုလၢအချၢဃံလီၤ.
ဒီးသုကဖုကဆဲးလၢ အခီၣ်ကံၣ်ဒုၣ်လိၤလီၤ.
၁၃ ယကဆဲးမၤမုာ်ထီၣ်က့ၤသုဒ်မိၢ်တဂၤ မၤမုာ်ထီၣ် အဖိခွါ အသိးလီၤ.+
ဒီးသုကဘၣ် တၢ်မၤမုာ်ထီၣ်က့ၤသု ခီဖျိလၢ ဝ့ၢ်ယရူၤၡလ့ၣ်အဃိလီၤ.+
၁၄ ဒီးသုကထံၣ်ဘၣ် ဒီးသုကသးခုလီၤ.
သုကပှဲၤဒီး တၢ်ဂံၢ်တၢ်ဘါ ဒ်နီၣ်လါဟ့အသိးလီၤ.
ယဟိဝၤယွၤ ကပာ်ဖျါထီၣ်န့ၢ် အခ့အပှၤတဖၣ်လၢ အစုလီၤ.*
ဘၣ်ဆၣ် အဝဲကသးဒိၣ်ထီၣ် အဒုၣ်အဒါတဖၣ်လီၤ.”+
၁၅ “ယဟိဝၤယွၤ ကဟဲဝဲ ဒ်သိးဒီးမ့ၣ်အူ+ဒီးအလ့ၣ်ကဟၣ်တဖၣ် ကဟဲဝဲ ဒ်သိးဒီး ကလံၤမုၢ်လီၤ.+
အကဟဲလၢ တၢ်သူၣ်ဒိၣ်သးဖျိးအပူၤ ဒ်သိးကဟ့ၣ်ကၣ်က့ၤအဝဲသ့ၣ်ဒီးဒ်သိး ကသိၣ်ဃီၣ်အဝဲသ့ၣ်လၢ မ့ၣ်အူလၣ်လီၤ.+
၁၆ ယဟိဝၤယွၤ ကစံၣ်ညီၣ်တၢ်လၢ မ့ၣ်အူ,အကစံၣ်ညီၣ် ပှၤဟီၣ်ခိၣ်ဖိခဲလၢာ်လၢ အနးဒီးပှၤလၢ ယဟိဝၤယွၤ မၤသံဝဲန့ၣ် ကအိၣ်ဝဲဒီဒူၣ်လီၤ.
၁၇ ယဟိဝၤယွၤ တဲဝဲလၢ “ပှၤလၢ အမၤစီဆှံအသး ဒီးမၤကဆှီထီၣ်အသးဒ်သိးဒီး ကလဲၤနုာ် ဘူၣ်ထီၣ်ဘါထီၣ် တၢ်လၢ ကရၢၢ်တဖၣ်*+ အပူၤ ဒီးပှၤလၢ အအီၣ်ထီးညၣ်,+ ယုၢ်ညၣ် ဒီးတၢ်အဂၤလၢ အလီၤသးဘၣ်အၢန့ၣ်+ အဝဲသ့ၣ် ခဲလၢာ် ကတုၤလၢ တၢ်ဟးဂီၤ ဒ်သိးသိးလီၤ.
၁၈ ခီဖျိလၢ ယသ့ၣ်ညါ အဝဲသ့ၣ် အတၢ်မၤ ဒီးအတၢ်ဆိကမိၣ်တဖၣ်အဃိ ယကဟဲ ပာ်ဖှိၣ်ထီၣ် ပှၤလၢအအိၣ်လၢ ပှၤကလုာ်ခဲလၢာ် ဒီးပှၤတဲ ကျိာ်အကလုာ်ကလုာ်တဖၣ်အကျါလီၤ. ဒီးအဝဲသ့ၣ် ကဟဲထံၣ်ဘၣ် ယလၤကပီၤလီၤ.”
၁၉ “ယကဒုးအိၣ်ထီၣ် တၢ်ပနီၣ်တခါလၢ အဝဲသ့ၣ် အကျါလီၤ. ဒီးပှၤလၢအပူၤဖျဲး တနီၤန့ၣ် ယကဆှၢလီၤ အဝဲသ့ၣ်လၢ ပှၤကလုာ်တဖၣ် လၢအမ့ၢ် ပှၤခးချံၣ်ဖိတဖၣ်လၢ အအိၣ်လၢ တၢ်ၡံၣ်အဟီၣ်ကဝီၤ,+ ကီၢ်ပူလး ဒီးလူးအဟီၣ်ကဝီၤလီၤ.+ ဒီးယကဆှၢလီၤစ့ၢ်ကီး အဝဲသ့ၣ်လၢ တူၤဘလး အဟီၣ်ကဝီၤ, ယၤဝၣ်အဟီၣ်ကဝီၤ+ ဒီးကီးလၢ အအိၣ်ယံၤတဖၣ်လီၤ. ပှၤကလုာ်တဖၣ်အံၤ တနၢ်ဟူဘၣ် ယဂ့ၢ်ဒံးဘၣ် ဒီးတထံၣ်ဘၣ် ယလၤကပီၤဒံးဘၣ်. အဃိ အဝဲသ့ၣ် ကစံၣ်တဲၤတဲလီၤ ယလၤကပီၤလၢ ပှၤကလုာ်တဖၣ် အကျါလီၤ.”+
၂၀ ယဟိဝၤယွၤ တဲဝဲလၢ “အဝဲသ့ၣ် ကဟဲက့ၤကိးထီၣ် ကယဲၢ်သုဒီပုၢ်ဝဲၢ်တဖၣ်လၢ အအိၣ်လၢ ပှၤကလုာ်ခဲလၢာ်အကျါ+ ဒ်တၢ်ဟ့ၣ်လၢ ယဟိဝၤယွၤအအိၣ် အသိးလီၤ. ဒီးကဟဲက့ၤကိးဝဲလၢ ကသ့ၣ်လိၤ, လ့ၣ်ကဟၣ်လိၤ, လ့ၣ်လၢအအိၣ်ဒီး အခိၣ်ဒုး, ကသ့ၣ်ယီၤအလိၤ* ဒီးကီၤလၤအူး လၢအဟးချ့တဖၣ် အလိၤ ဆူယကစၢၢ်စီဆှံ ယရူၤၡလ့ၣ်လီၤ. ဒီးကလီၤဂာ် ဒ်သိးဒီး ဖဲပှၤအံၣ်စရ့လးဖိတဖၣ် ဟဲစိာ်နုာ် အတၢ်ဟ့ၣ်လၢ လီခီကဆှီအပူၤ လၢယဟိဝၤယွၤ အဟံၣ်ပူၤလီၤ.”
၂၁ ယဟိဝၤယွၤ တဲဝဲလၢ “အဝဲသ့ၣ်တနီၤန့ၣ် ယကဒုးကဲထီၣ်အီၤလၢ ပှၤလုၢ်တၢ်ဒိၣ်တဖၣ် ဒီးအဂၤတနီၤန့ၣ် ယကဒုးကဲထီၣ်အီၤလၢ ပှၤလ့ၤဝံဖိတဖၣ်လီၤ.”
၂၂ ယဟိဝၤယွၤ တဲဝဲလၢ “ဒ်မူခိၣ်အသီ ဒီးဟီၣ်ခိၣ်အသီ+ လၢယကတ့လီၤအီၤ ကအိၣ်ဝဲ လၢယမဲာ်ညါ ထီဘိအသိး သုစၢၤသုသွဲၣ် ဒီးသုမံၤ ကအိၣ်ထီဘိလီၤ.”+
၂၃ ယဟိဝၤယွၤ တဲဝဲလၢ “ဖဲလါထီၣ်သီ ကိးလါဒဲး ဒီးအိၣ်ဘှံးနံၤ ကိးနွံဒဲးန့ၣ်ပှၤဟီၣ်ခိၣ်ဖိ ခဲလၢာ် ကဟဲဘူၣ်ထီၣ်ဘါထီၣ်ယၤလီၤ.+
၂၄ ဒီးအဝဲသ့ၣ် ကဟးထီၣ် ဒီးကထံၣ်ပှၤလၢ အထီဒါက့ၤယၤတဖၣ် အစိၣ်လီၤ.
ဒီးလၢၣ်တဖၣ်လၢ အအိၣ်လၢ ပှၤတဖၣ်န့ၣ်အစိၣ်အလိၤန့ၣ် တသံဘၣ်ဒီးမ့ၣ်အူလၢ အအီၣ်ပှၤတဖၣ်န့ၣ်အစိၣ်န့ၣ် တလီၤပံာ်ဘၣ်.+
ဒီးပှၤတဖၣ်န့ၣ် ကကဲထီၣ် တၢ်လၢအလီၤသးဘၣ်အၢ လၢပှၤခဲလၢာ်အဂီၢ်လီၤ.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဘၣ်ယိၣ်ဝဲ ဘၣ်ဃးဒီး.”
^ ဘၣ်သ့ၣ်သ့ၣ် ကမ့ၢ် “ပှၤလၢအပတြၢၤ တၢ်ဂီၤတၢ်ဖှီၣ်.”
^ မ့ၢ်ဝဲ တၢ်နၢမူတကလုာ်.
^ မ့ၢ်စ့ၢ်ကီး “ဘၣ်ယိၣ်ဝဲ ဘၣ်ဃးဒီး.”
^ မ့ၢ်စ့ၢ်ကီး “အစိကမီၤ.”
^ မ့ၢ်ဝဲ ကရၢၢ်လီၤဆီတဖၣ်လၢ တၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်အဂီၢ်.
^ ဧ့ၤဘြံၤ အတၢ်ကတိၤတဖျၢၣ်အံၤ အဲၣ်ဒိးတဲဝဲ ကသ့ၣ်လၢ အကးပြါဒီး ကသ့ၣ်ယီၤ.
