ယၤကိာ် ၁:၁-၂၇
၁ ယၤ, စီၤယၤကိာ်+ လၢအမ့ၢ် ကစၢ်ယွၤ ဒီးယ့ၣ်ၡူးခရံာ်အကုၢ်န့ၣ် ဆၢဂ့ၤဆၢဝါဘၣ် သုဝဲပှၤ ၁၂ ဒူၣ်လၢ အအိၣ်လီၤပြံလီၤပြါတဖၣ်လီၤ.
၂ ယဒီပုၢ်ဝဲၢ်သ့ၣ်ဧၢ, ဖဲသုထံၣ်ဘၣ်တၢ်မၤကွၢ် အကလုာ်ကလုာ် အဆၢကတီၢ်န့ၣ်+ ပာ်အီၤဒ်တၢ်သးခု သပှၢ်တၢၢ်တက့ၢ်.
၃ ဒ်သုသ့ၣ်ညါအသိး တၢ်မၤကွၢ်သုတၢ်နာ်ဒ်အံၤန့ၣ် ဒုးအိၣ်ထီၣ်ဝဲ တၢ်တူၢ်န့ၢ်ခီၣ်ကဲလီၤ.+
၄ မ်တၢ်တူၢ်န့ၢ်ခီၣ်ကဲ မၤဝံၤအတၢ်မၤ ဒ်သိးသုကကဲထီၣ် ပှၤလၢအလၢအပှဲၤ လၢတၢ်ခဲလၢာ်အပူၤ ဒီးဒ်သိးသု သုတလီၤတူာ်လီၤကာ်လၢ တၢ်နီတမံၤတဂ့ၤ အဂီၢ်တက့ၢ်.+
၅ ကစၢ်ယွၤသးအိၣ်ဟ့ၣ်ဝဲ ပှၤခဲလၢာ်လၢ တၢ်အါအါဂီၢ်ဂီၢ် ဒီးအတဒူပှၤဘၣ်.+ အဃိ သုဝဲတဂၤဂၤ မ့ၢ်လိၣ်ဘၣ်အါထီၣ် တၢ်ကူၣ်သ့န့ၣ် မ်အဆဲးဃ့တၢ်လၢ ကစၢ်ယွၤအအိၣ်+ ဒီးကစၢ်ယွၤ ကဟ့ၣ်လီၤအီၤလီၤ.+
၆ ဘၣ်ဆၣ် မ်အဆဲးဃ့တၢ်လၢ တၢ်နာ်အပူၤ+ ဒီးအတဘၣ် သးဒ့ဒီနီတစဲးဘၣ်.+ ပှၤလၢအသးဒ့ဒီန့ၣ် မၤအသးဒ် လပီလၢပီၣ်လဲၣ်ပူၤ လၢကလံၤအူဘၣ်အီၤအဃိ ဟူးဝးဝဲ လၢအံၤလၢန့ၣ်လီၤ.
၇ ပှၤတဂၤန့ၣ် တကြၢးမုၢ်လၢ်ဝဲလၢ အကဒိးန့ၢ်ဘၣ်တၢ်လၢ ယဟိဝၤယွၤ* အအိၣ်နီတမံၤဘၣ်.
၈ အဝဲမ့ၢ်ပှၤလၢ အသးဒ့ဒီ+ ဒီးကဒံကဒါဝဲလၢ အကျဲခဲလၢာ်အပူၤလီၤ.
၉ ဒီပုၢ်ဝဲၢ်လၢ အဖှီၣ်န့ၣ် မ်အသးခုခီဖျိလၢ အဒိးန့ၢ်ဘၣ်တၢ်လၤကပီၤ အဃိတက့ၢ်.+
၁၀ မ့မ့ၢ်ပှၤထူးပှၤတီၤတဂၤန့ၣ် အဝဲကဟးဂီၤဝဲ ဒ်သိးဒီးဖီလၢတၢ်ပျီပူၤအဃိ မ်အသးခု ခီဖျိလၢ အတၢ်ဆီၣ်လီၤသး+ အိၣ်ထီၣ်အဃိတက့ၢ်.
၁၁ မုၢ်ဟဲထီၣ်ဒီး တၢ်ကိၢ်ဆူၣ်ထီၣ် အဃိ မၤဃ့ထီဝဲတၢ်မုၢ်တၢ်ဘိ ဒီးအဖီတဖၣ်လီၤဆှုဝဲ ဒီးအတၢ်ဃံတၢ်လၤ လၢအအိၣ်ဖျါလၢခိန့ၣ် လီၤမၢ်ကွံာ်ဝဲလီၤ. ဒ်န့ၣ်အသိး ပှၤထူးပှၤတီၤန့ၣ် ဖဲအလူၤဒံး တၢ်ထူးတၢ်တီၤ အဆၢကတီၢ်န့ၣ် အဝဲကဟါမၢ်ကွံာ်ဝဲလီၤ.+
၁၂ ပှၤလၢ အဆဲးအိၣ်ဂၢၢ်ဆိးကျၢၤ ဖဲအဘၣ်တၢ်မၤကွၢ်အီၤအခါန့ၣ် ကသးခုဝဲလီၤ.+ ဖဲအကဲထီၣ်ပှၤလၢ အဘၣ်တၢ်တူၢ်လိာ်အီၤအခါ အကဒိးန့ၢ်ဘၣ် တၢ်မူအခိၣ်သလုးလၢ+ ယဟိဝၤယွၤ အၢၣ်လီၤပာ်စၢၤဝဲ ပှၤလၢအအဲၣ်အီၤတဖၣ်လီၤ.+
၁၃ ဖဲပှၤဘၣ် တၢ်မၤကွၢ်အခါ မ်ပှၤသုတတဲလၢ “ကစၢ်ယွၤမၤကွၢ်ယၤ” န့ၣ်နီတဂၤတဂ့ၤ. ပှၤမၤကွၢ် ကစၢ်ယွၤလၢ တၢ်အၢတၢ်သီတသ့ဘၣ် ဒီးကစၢ်ယွၤ တမၤကွၢ်ပှၤဂၤလၢ တၢ်အၢတၢ်သီနီတဂၤ စ့ၢ်ကီးဘၣ်.
၁၄ ဘၣ်ဆၣ် ပှၤတဂၤစုာ်စုာ်န့ၣ် ဘၣ်တၢ်မၤကွၢ်အီၤခီဖျိလၢ အနီၢ်ကစၢ် အတၢ်သူၣ်လီသးကွံ ကွဲန့ၢ်လွဲန့ၢ်အီၤ ဒီးလ့ပစီအီၤအဃိလီၤ.+
၁၅ ဒီးဖဲတၢ်သူၣ်လီသးကွံန့ၣ် ဒၢထီၣ်ဝဲအခါ အိၣ်ဖျဲၣ်ထီၣ်ဝဲ တၢ်ဒဲးဘးလီၤ. ဒီးဖဲပှၤမၤတၢ်ဒဲးဘးအခါ အဒုးအိၣ်ထီၣ်ဝဲတၢ်သံလီၤ.+
၁၆ ယဒီပုၢ်ဝဲၢ်သးဘိသ့ၣ်ဧၢ, တဘၣ်လံၣ်န့ၢ်လီန့ၢ်လီၤ သုနီၢ်ကစၢ်အသးတဂ့ၤ.
၁၇ တၢ်ဟ့ၣ်လၢအဂ့ၤ ဒီးတၢ်ဟ့ၣ်လၢအလၢအပှဲၤ ခဲလၢာ်န့ၣ် ဟဲလၢထးခီ+ ဒီးဟဲလီၤဝဲလၢ ပၢ်လၢအတ့လီၤ မူခိၣ် အတၢ်ကပီၤတဖၣ် အအိၣ်လီၤ.+ ဒီးအဝဲတကဒံကဒါ ဒီးတဆီတလဲအသးဒ် တၢ်အကဒုလၢ အသုးအသးအသိးဘၣ်.+
၁၈ ဒ်အတၢ်ဘၣ်သးအိၣ်ဝဲအသိး အဝဲဒုးမူပှၤခီဖျိလၢ တၢ်မ့ၢ်တၢ်တီအကလုၢ်ကထါ+ ဒ်သိးပကကဲထီၣ် တၤသၣ်ဆိတကလုာ်လၢ အတၢ်ဘၣ်တ့တဖၣ် အကျါအဂီၢ်လီၤ.+
၁၉ ဒီပုၢ်ဝဲၢ်သးဘိသ့ၣ်ဧၢ, သ့ၣ်ညါတၢ်ဂ့ၢ်အဝဲအံၤတက့ၢ်. ပှၤကိးဂၤဒဲး ကဘၣ်သးအိၣ် ဒိကနၣ်တၢ် ဘၣ်ဆၣ် တဘၣ်ကရီတဲတၢ်ဘၣ်+ ဒီးတဘၣ်သးဒိၣ်ထီၣ်တၢ် ချ့ချ့ဘၣ်.+
၂၀ ပှၤဟီၣ်ခိၣ်ဖိ မ့ၢ်သးဒိၣ်ထီၣ်တၢ်န့ၣ် အတမၤတၢ်လၢ အတီအလိၤလၢ ကစၢ်ယွၤ အမဲာ်ညါဘၣ်.+
၂၁ အဃိ မၤလီၤမၢ်ကွံာ် တၢ်ဘၣ်အၢဘၣ်သီ ဒီးတၢ်အၢတၢ်သီခဲလၢာ်လၢ+ သုတၢ်အိၣ်မူအပူၤတက့ၢ်. ဒီးကစၢ်ယွၤ အကလုၢ်ကထါလၢ အအုၣ်က့ၤခီၣ်က့ၤသုန့ၣ် တူၢ်လိာ်အီၤလၢ တၢ်သူၣ်စူၤသးစူၤအပူၤ ဒီးပျဲလၢ ကစၢ်ယွၤကသူၣ်လီၤအီၤလၢ သုပူၤတက့ၢ်.
၂၂ ကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါ+ ဒီးတဘၣ်ကဲထီၣ် ထဲပှၤလၢ အနၢ်ဟူတၢ်န့ၣ်တဂ့ၤ. တဘၣ်လံၣ်န့ၢ်လီန့ၢ်လီၤ နနီၢ်ကစၢ်အသးလၢ တၢ်ဆိကမိၣ်လၢ အကမၣ်တဂ့ၤ.
၂၃ ပှၤတဂၤဂၤ မ့ၢ်ကဲထီၣ်ပှၤလၢ အနၢ်ဟူ ကစၢ်ယွၤ အကလုၢ်ကထါ ဒီးမ့ၢ်တမၤထွဲဝဲဘၣ်န့ၣ်+ အလီၤဂာ်ဒ်သိးဒီး ပှၤလၢ အကွၢ်လီၤအမဲာ်လၢ မဲာ်ထံကလၤပူၤလီၤ.
၂၄ အဝဲကွၢ်လီၤ အနီၢ်ကစၢ်အသးဝံၤဒီး ဟးထီၣ်ဝဲ ဒီးအဖျါမၤသးဒ်လဲၣ်န့ၣ် အသးပ့ၤနီၣ်ကွံာ်ဝဲ တဘျီဃီလီၤ.
၂၅ ဘၣ်ဆၣ် ပှၤလၢအကွၢ်ထံကွၢ်ဆး တၢ်သိၣ်တၢ်သီလၢ အလၢအပှဲၤလၢ+ အဟ့ၣ်တၢ်ပူၤဖျဲး ဒီးဆဲးမၤထွဲဝဲန့ၣ် တကဲပှၤလၢအနၢ်ဟူတၢ်ဝံၤဒီး သးပ့ၤနီၣ်ကွံာ်ဝဲဘၣ်. အကဲထီၣ် ပှၤလၢ အမၤထွဲတၢ် ဒီးခီဖျိလၢ အမၤဝဲဒ်န့ၣ်အဃိ အကသးခုဝဲလီၤ.+
၂၆ ပှၤတဂၤဂၤ မ့ၢ်ဆိကမိၣ်လၢ အကဲပှၤဘါယွၤ ဘၣ်ဆၣ် အမ့ၢ်တပၢၤ အထးခိၣ်ဂ့ၤဂ့ၤဘၣ်န့ၣ်+ အမ့ၢ်ပှၤလၢ အလံၣ်န့ၢ်လီန့ၢ်လီၤ အနီၢ်ကစၢ်အသးလီၤ. ဒီးအတၢ်ဘူၣ်ထီၣ်ဘါထီၣ်န့ၣ် ကဲထီၣ်တၢ်ကလီကလီလီၤ.
၂၇ လၢပပၢ်ကစၢ်ယွၤ အမဲာ်ညါန့ၣ် တၢ်ဘူၣ်ထီၣ်ဘါထီၣ်လၢ အစီအဆှံ ဒီးအတဘၣ်အၢဘၣ်သီဘၣ်န့ၣ် မ့ၢ်ဝဲတၢ်ကွၢ်ထွဲမၤစၢၤ ပှၤဖိၣ်ဃဲ+ ဒီးမုၣ်ကမဲ+ လၢအဘၣ်နးဘၣ်ဖှီၣ်တဖၣ်+ ဒီးတၢ်ဟးဆှဲး ပှၤဟီၣ်ခိၣ်ဖိလၢ အတဒိကနၣ်တၢ်ဘၣ်တဖၣ် အတၢ်အိၣ်မူကျဲလၢ အဘၣ်အၢဘၣ်သီတဖၣ်လီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
