ရိမ့ၤ ၁၀:၁-၂၁
၁၀ ဒီပုၢ်ဝဲၢ်သ့ၣ်ဧၢ, ယဃ့ကညးကစၢ်ယွၤ ဒီးလၢယသူၣ်ကံၢ်သးလဲအပူၤ ယမုၢ်လၢ်သပှၢ်တၢၢ်လၢ ယပှၤကလုာ် ကတုၤလၢ တၢ်အုၣ်က့ၤခီၣ်က့ၤလီၤ.+
၂ ယအုၣ်ယသး လၢအဝဲသ့ၣ် အသးဆူၣ်လၢ ကစၢ်ယွၤအဂီၢ်+ ဘၣ်ဆၣ် အဝဲသ့ၣ် တသ့ၣ်ညါ တၢ်မ့ၢ်တၢ်တီ လီၤတံၢ်လီၤဆဲးဘၣ်.
၃ ဒီးအဝဲသ့ၣ် တသ့ၣ်ညါ ကစၢ်ယွၤ အတၢ်တီတၢ်လိၤဘၣ်အဃိ+ အဝဲသ့ၣ်ဂုာ်ကျဲးစၢး ဒုးအိၣ်ထီၣ် အနီၢ်ကစၢ် အတၢ်တီတၢ်လိၤလီၤ.+ အဃိ အဝဲသ့ၣ် တမၤထွဲဝဲကစၢ်ယွၤ အတၢ်တီတၢ်လိၤလၢၤဘၣ်.+
၄ ခရံာ်မၤကတၢၢ်ကွံာ်ဝဲ စီၤမိၤၡ့ အတၢ်သိၣ်တၢ်သီလံ.+ ခဲအံၤ ပှၤကိးဂၤဒဲးလၢ အစူၢ်က့ၤနာ်က့ၤတၢ်န့ၣ် ကဘၣ် တၢ်ပာ်ပနီၣ်အီၤ ဒ်ပှၤတီပှၤလိၤအသိးလီၤ.+
၅ ဘၣ်ဃးဒီး တၢ်တီတၢ်လိၤလၢ အဒိးသန့ၤထီၣ်အသးလၢ တၢ်သိၣ်တၢ်သီန့ၣ် စီၤမိၤၡ့ကွဲးဝဲလၢ “ပှၤလၢအမၤထွဲ တၢ်သ့ၣ်တဖၣ်အံၤန့ၣ် ကမူဝဲလၢ တၢ်သ့ၣ်တဖၣ်အံၤအဃိလီၤ.”+
၆ ဘၣ်ဆၣ် ဘၣ်ဃးဒီး တၢ်တီတၢ်လိၤလၢ အဟဲခီဖျိ တၢ်နာ်အဃိန့ၣ် တၢ်ကွဲးအသးအိၣ်ဝဲလၢ “လၢနသးပူၤန့ၣ် တဘၣ်တဲလၢ+ ‘မ့ၢ်မတဂၤ ကလဲၤထီၣ်လၢမူခိၣ်’+ ဒ်သိး ကဟဲက့ၤကိးလီၤ ခရံာ်န့ၣ်လဲၣ်,
၇ ဒီး ‘မ့ၢ်မတဂၤ ကလဲၤလီၤလၢ တၢ်ပူၤယိာ်’+ ဒ်သိး ကဟဲက့ၤကိးထီၣ်ခရံာ် လၢတၢ်သံအဂီၢ်လဲၣ်.”
၈ ဘၣ်ဆၣ် တၢ်ကွဲးအသး အိၣ်ဝဲဒ်လဲၣ်. “တၢ်ကတိၤအံၤ အိၣ်လၢ သုထးခိၣ် ဒီးသုသးပူၤအဃိ အအိၣ်ဘူးဒီးသုလီၤ.”+ မ့ၢ်ဝဲ “တၢ်ကတိၤ” လၢအဘၣ်ဃးဒီး တၢ်နာ်လၢ ပစံၣ်တဲၤတဲလီၤအီၤလီၤ.
၉ ဒီးလၢပှၤဂၤအမဲာ်ညါ နမ့ၢ်အၢၣ်လီၤလၢ နထးခိၣ်လၢ ယ့ၣ်ၡူးမ့ၢ်ဝဲကစၢ်+ ဒီးလၢနသးပူၤ နမ့ၢ်နာ်လၢ ကစၢ်ယွၤ ဒုးဂဲၤဆၢထၢၣ်က့ၤအီၤလၢ တၢ်သံန့ၣ် နကဒိးန့ၢ်ဘၣ် တၢ်အုၣ်က့ၤခီၣ်က့ၤလီၤ.
၁၀ ခီဖျိလၢ နနာ်တၢ်လၢ နသးပူၤအဃိ တၢ်ကပာ်ပနီၣ်နၤ ဒ်ပှၤတီပှၤလိၤအသိးလီၤ. ဘၣ်ဆၣ် ခီဖျိ နအၢၣ်လီၤတၢ်လၢ ပှၤဂၤအမဲာ်ညါလၢ နထးခိၣ်အဃိ+ နကတုၤလၢ တၢ်အုၣ်က့ၤခီၣ်က့ၤလီၤ.
၁၁ ဒီးတၢ်ကွဲးအသးအိၣ်ဝဲလၢ “ပှၤလၢ အစူၢ်က့ၤနာ်က့ၤအီၤန့ၣ် အသးတဟးဂီၤ နီတဂၤဘၣ်.”+
၁၂ ပှၤယူဒၤဖိမ့ၢ်ဂ့ၤ, ပှၤကြံးဖိမ့ၢ်ဂ့ၤ တလီၤဆီလိာ်အသးဘၣ်.+ ပဝဲခဲလၢာ် ပကစၢ်မ့ၢ်တဂၤဃီလီၤ. ဒီးပှၤလၢ အကိးထီၣ်အီၤခဲလၢာ်န့ၣ် အဝဲဆိၣ်ဂ့ၤဝဲ ထူးထူးတီၤတီၤလီၤ.
၁၃ “ပှၤလၢအကိးထီၣ် ယဟိဝၤယွၤ* အမံၤ ကိးဂၤဒဲးန့ၣ် ကတုၤလၢ တၢ်အုၣ်က့ၤခီၣ်က့ၤလီၤ.”+
၁၄ ဘၣ်ဆၣ် အဝဲသ့ၣ် မ့ၢ်တနာ်အီၤဘၣ်န့ၣ် အဝဲသ့ၣ် ကကိးထီၣ်အီၤဒ်လဲၣ်. ဒီးအဝဲသ့ၣ် မ့ၢ်တနၢ်ဟူဘၣ်ဝဲ အဂ့ၢ်ဘၣ်န့ၣ် အဝဲသ့ၣ် ကနာ်အီၤဒ်လဲၣ်. ဒီးပှၤလၢ အစံၣ်တဲၤတဲလီၤတၢ် မ့ၢ်တအိၣ်ဘၣ်န့ၣ် အဝဲသ့ၣ် ကနၢ်ဟူဘၣ်ဝဲဒ်လဲၣ်.
၁၅ ဒီးပှၤ* မ့ၢ်တမၢလီၤ အဝဲသ့ၣ်ဘၣ်န့ၣ် အဝဲသ့ၣ် ကစံၣ်တဲၤတဲလီၤတၢ်ဒ်လဲၣ်.+ ဒ်တၢ်ကွဲးအသး အိၣ်ဝဲအသိး “ပှၤလၢ အစံၣ်တဲၤတဲလီၤ တၢ်သးခုကစီၣ်တဖၣ်အခီၣ်န့ၣ် ဃံလၤဝဲဒိၣ်မးလီၤ.”+
၁၆ ဘၣ်ဆၣ် ပှၤတတူၢ်လိာ် တၢ်သးခုကစီၣ် ကိးဂၤဒဲးဘၣ်. ဝံယၡါယၤ တဲဝဲလၢ “ယဟိဝၤယွၤဧၢ, မတဂၤနာ်ဝဲ တၢ်လၢအနၢ်ဟူဘၣ်လၢ ပအိၣ်လဲၣ်.”+
၁၇ အဃိ တၢ်နာ်န့ၣ် ဟဲခီဖျိလၢ တၢ်နၢ်ဟူ+ ဒီးတၢ်နၢ်ဟူန့ၣ် ဟဲခီဖျိလၢ တၢ်ကတိၤလၢ အဘၣ်ဃးဒီး ခရံာ်အဂ့ၢ်လီၤ.
၁၈ ဘၣ်ဆၣ် ယကသံကွၢ်လၢ မ့ၢ်ပှၤအံၣ်စရ့လးဖိ တနၢ်ဟူဝဲဧီၤ. နၢ်ဟူဝဲသၢၤ. တၢ်ကွဲးအသးအိၣ်ဝဲလၢ “ပှၤအကလုၢ်န့ၣ် ဟူထီၣ်လၢ ဟီၣ်ခိၣ်ဒီဘ့ၣ် ဒီးအဝဲသ့ၣ် အတၢ်ကစီၣ်န့ၣ် ရၤလီၤအသးတုၤလၢ ဟီၣ်ခိၣ်အနၢၣ် အကတၢၢ်လီၤ.”+
၁၉ တကးဒံးဘၣ် ယကသံကွၢ်လၢ မ့ၢ်ပှၤအံၣ်စရ့လးဖိ တနၢ်ပၢၢ်ဝဲဧီၤ. နၢ်ပၢၢ်ဝဲသၢၤ.+ အဆိကတၢၢ်န့ၣ် စီၤမိၤၡ့ တဲဝဲ ကစၢ်ယွၤ အတၢ်ကတိၤလၢ “ယကထိၣ်ဟူးထိၣ်ဂဲၤထီၣ် သုတၢ်သးက့ၣ် ခီဖျိ ပှၤတဖၣ်လၢ အတမ့ၢ် ပှၤတကလုာ်ဘၣ်န့ၣ်လီၤ. ဒီးယကထိၣ်ဟူးထိၣ်ဂဲၤထီၣ် သုတၢ်သးထီၣ် ခီဖျိ ပှၤတကလုာ်လၢ အတၢ်နၢ်ပၢၢ် တအိၣ်ဘၣ်န့ၣ်လီၤ.”+
၂၀ ဒီးလၢတၢ်သူၣ်ဒူသးဒူအပူၤ ဝံယၡါယၤ တဲဝဲ ကစၢ်ယွၤ အတၢ်ကတိၤလၢ “ပှၤလၢ အတဃုယၤဘၣ်န့ၣ် ထံၣ်န့ၢ်ယၤ+ ဒီးပှၤလၢ အတသံကွၢ်ယဂ့ၢ်ဘၣ်န့ၣ် ယလီၣ်ဖျါထီၣ်ယသးလၢ အဝဲသ့ၣ်အအိၣ်လီၤ.”+
၂၁ ဘၣ်ဆၣ် ဘၣ်ဃးဒီး ပှၤအံၣ်စရ့လးဖိတဖၣ်န့ၣ် အဝဲတဲဝဲလၢ “ယယူာ်ဃီၤယစုဆူ ပှၤလၢအခိၣ်ကိၤ ဒီးပှၤထီဒါတၢ်တဖၣ်အအိၣ် ဒီတနံၤညါလီၤ.”+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ဘၣ်သ့ၣ်သ့ၣ် အခီပညီမ့ၢ်ဝဲ “ကစၢ်ယွၤ မ့ၢ်တမၢလီၤ အဝဲသ့ၣ်ဘၣ်န့ၣ်.”
