ရိမ့ၤ ၁၂:၁-၂၁
၁၂ ဒီပုၢ်ဝဲၢ်သ့ၣ်ဧၢ, မ့ၢ်လၢကစၢ်ယွၤ ပာ်ဖျါထီၣ်အတၢ်သးကညီၤလၢ သုဖီခိၣ်အဃိ ယဃ့ကညးသုလၢ သုကဟ့ၣ်လုၢ်ထီၣ်သုနီၢ်ခိ+ ဒ်တၢ်လုၢ်လၢအမူဝဲ, စီဆှံဝဲ+ ဒီးကစၢ်ယွၤ တူၢ်လိာ်ဝဲလီၤ. ဒီးဖဲသုမၤ အတၢ်မၤစီဆှံအခါ သူသုတၢ်သ့တၢ်ဘၣ်လၢ သုကပဲာ်ထံနီၤဖးတၢ်တက့ၢ်.+
၂ တဘၣ်ကွၢ်လိမၤဒိး ပှၤတၢ်ချၢ* လၢၤတဂ့ၤ. မ့မ့ၢ် လဲလိာ် သုတၢ်ဆိကမိၣ်တဖၣ် ဒ်သိး သုကဆီတလဲထီၣ် သုသးအဂီၢ်တက့ၢ်.+ သုမ့ၢ်မၤဒ်န့ၣ်န့ၣ် သုကသ့ၣ်ညါလီၤသုသး လီၤတံၢ်လီၤဆဲးလၢ+ ကစၢ်ယွၤ အတၢ်ဘၣ်သးန့ၣ် မ့ၢ်တၢ်လၢအဂ့ၤ, တၢ်လၢအကြၢးဝဲဘၣ်ဝဲ ဒီးတၢ်လၢအလၢအပှဲၤလီၤ.
၃ ခီဖျိလၢ ယဒိးန့ၢ်ဘၣ် ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်အဃိ ယတဲဘၣ် ပှၤအိၣ်လၢသုကျါ ကိးဂၤဒဲးလၢ တဘၣ် ဆိကမိၣ်ဒိၣ်လီၤသုသး အါန့ၢ်ဒံး သုကြၢးဆိကမိၣ်တဂ့ၤ.+ ဒ်ကစၢ်ယွၤ ဟ့ၣ်လီၤသု တၢ်နာ် တဂၤစုာ်စုာ်အသိးန့ၣ် ဆိကမိၣ်လီၤသုသး ဖဲအကြၢးအဘၣ်တက့ၢ်.+
၄ ပနီၢ်ခိအက့ၢ်အဂီၤ အိၣ်ဝဲအါမံၤ+ ဘၣ်ဆၣ် အက့ၢ်အဂီၤတဖၣ်အံၤ အတၢ်မၤန့ၣ် တမ့ၢ်တၢ်တမံၤဃီဘၣ်.
၅ ဒ်န့ၣ်အသိး ပဝဲဒၣ်အံၤ ပမ့ၢ်အိၣ်အါဂၤသနာ်က့ ပမ့ၢ်နီၢ်ခိတဂၤဃီလၢ အအိၣ်ဃူအိၣ်ဖိးဒီးခရံာ်လီၤ. ဒီးပဝဲတဂၤဒီးတဂၤ ပမ့ၢ်တၢ်အက့ၢ်အဂီၤတဖၣ် လၢအဘၣ်ထွဲလိာ်သးလီၤ.+
၆ တၢ်ဟ့ၣ်လၢ ပဒိးန့ၢ်ဘၣ်အီၤတဖၣ်န့ၣ် ဒိးသန့ၤထီၣ်အသးလၢ တၢ်သးကညီၤ ဒိၣ်ဒိၣ်မုၢ်မုၢ်အဖီခိၣ် အဃိ+ အတဒ်သိးလိာ်အသးဘၣ်. အဃိ ပမ့ၢ်ဒိးန့ၢ်ဘၣ် တၢ်ဟ့ၣ်လၢ ပကတဲတၢ် ဒ်ဝံအသိးန့ၣ် မ်ပတဲတၢ်ဒ်ဝံအသိး ဒ်ပတၢ်နာ်အိၣ်ဝဲအသိး တက့ၢ်.
၇ ပမ့ၢ်ဒိးန့ၢ်ဘၣ် တၢ်အခ့အပှၤတၢ်မၤန့ၣ် မ်ပမၤတၢ်အခ့အပှၤ တၢ်မၤအံၤတက့ၢ်. ဒီးပတၢ်ဟ့ၣ်မ့မ့ၢ် လၢ ပကသိၣ်လိတၢ်န့ၣ် မ်ပသိၣ်လိတၢ်တက့ၢ်.+
၈ ပတၢ်ဟ့ၣ်မ့မ့ၢ်လၢ ပကဟ့ၣ်ဂံၢ်ဟ့ၣ်ဘါတၢ်န့ၣ် မ်ပဟ့ၣ်ဂံၢ်ဟ့ၣ်ဘါ ပှၤဂၤတက့ၢ်.+ ဒီးပှၤလၢ အဟ့ၣ်နီၤလီၤတၢ်န့ၣ် မ်အဝဲ ဟ့ၣ်နီၤလီၤတၢ်လၢ တၢ်သူၣ်အိၣ်သးအိၣ် အပူၤတက့ၢ်.+ ဒီးပှၤလၢ အတီခိၣ်ရိၤမဲတၢ်န့ၣ် မ်အမၤဝဲလၢ တၢ်သးဆူၣ်အပူၤတက့ၢ်.+ ဒီးပှၤလၢ အပာ်ဖျါထီၣ် တၢ်သးကညီၤန့ၣ် မ်အမၤဝဲလၢ တၢ်သးခုအပူၤတက့ၢ်.+
၉ သုတၢ်အဲၣ်လၢ ပှၤဂၤအဖီခိၣ်န့ၣ် မ်အမ့ၢ် တၢ်အဲၣ်နီၢ်ကီၢ်တက့ၢ်.*+ သးဟ့တၢ်အၢ+ ဒီးဟံးဃာ်တၢ်ဂ့ၤတက့ၢ်.
၁၀ အဲၣ်လိာ်သုသး ဒ်ဒီပုၢ်ဝဲၢ်တံၢ်နီၢ်အသိး ဒီးကဟုကယာ်လိာ်သုသး တဂၤဒီးတဂၤလၢ တၢ်သူၣ်အိၣ်သးအိၣ် အပူၤတက့ၢ်. ပာ်ဖျါထီၣ်ဆိ တၢ်ယူးယီၣ်ပာ်ကဲ လၢပှၤဂၤအဖီခိၣ်တက့ၢ်.+
၁၁ မၤတၢ်ဆူၣ်ဆူၣ် ဒီးတဘၣ်ကၢၣ်တဂ့ၤ.+ ပျဲသးစီဆှံ မၤဆူၣ်ထီၣ်သုသးတက့ၢ်.+ ဒီးမၤတၢ်ဒ် ကုၢ်အသိးလၢ ယဟိဝၤယွၤ* အဂီၢ်တက့ၢ်.+
၁၂ မ်သုတၢ်မုၢ်လၢ်န့ၣ် မၤသးခုသုသးတက့ၢ်. ဖဲသုဘၣ်ကီဘၣ်ခဲအခါ အိၣ်ဂၢၢ်ဆိးကျၢၤတက့ၢ်.+ ဆဲးဃ့ထုကဖၣ်တၢ် ထီဘိတက့ၢ်.+
၁၃ ဟ့ၣ်နီၤလီၤတၢ်လၢ ပှၤစီဆှံတဖၣ်အအိၣ် ဒ်အဝဲသ့ၣ် အတၢ်လိၣ်ဘၣ် အိၣ်ဝဲအသိးတက့ၢ်.+ ပာ်ဖျါထီၣ် တၢ်သးအိၣ်တူၢ်လိာ် ပှၤတမှံၤ ထီဘိတက့ၢ်.+
၁၄ ဆဲးဆိၣ်ဂ့ၤ ပှၤလၢ အမၤအၢမၤနးသုတက့ၢ်.+ ဆိၣ်ဂ့ၤတၢ်ဒီး တဘၣ် ဆိၣ်အၢတၢ်တဂ့ၤ.+
၁၅ ပှၤလၢအသးခုန့ၣ် သးခုဃုာ်ဒီးအီၤတက့ၢ်. ဒီးပှၤလၢအဟီၣ်န့ၣ် ဟီၣ်ဃုာ်ဒီးအီၤတက့ၢ်.
၁၆ သူၣ်အိၣ်သးအိၣ် ပှၤဂၤဒ်နသးအိၣ်လီၤ နနီၢ်ကစၢ်အသး အသိးတက့ၢ်. တဘၣ်သးစၢၢ်ဆၢ တၢ်လၢအဒိၣ်အထီတဂ့ၤ. သးစၢၢ်ဆၢတၢ်လၢ အပတီၢ်ဖုၣ်တက့ၢ်.+ တဘၣ် ဆိကမိၣ်လီၤသုသးလၢ သုမ့ၢ်ပှၤကူၣ်တၢ်သ့တဂ့ၤ.+
၁၇ တဘၣ်မၤဆၢ တၢ်အၢလၢတၢ်အၢ လၢပှၤနီတဂၤတဂ့ၤ.+ ဂုာ်ကျဲးစၢး မၤတၢ်လၢ ပှၤခဲလၢာ်ထံၣ်ဝဲလၢ အဂ့ၤန့ၣ်တက့ၢ်.
၁၈ ဒ်သုမၤသ့အသိး ဂုာ်ကျဲးစၢး အဂ့ၤကတၢၢ်ဒ်သိး သုကအိၣ်ဃူအိၣ်ဖိးဒီး ပှၤကိးဂၤဒဲးတက့ၢ်.+
၁၉ ဒီပုၢ်ဝဲၢ်သးဘိသ့ၣ်ဧၢ, တဘၣ်ဟ့ၣ်ကၣ်တၢ်တဂ့ၤ. လၢတၢ်န့ၣ်အလီၢ် အးလီၤလၢ ကစၢ်ယွၤအစုပူၤလၢ အကပာ်ဖျါထီၣ် အတၢ်သးဒိၣ် တက့ၢ်.+ တၢ်ကွဲးအသးအိၣ်ဝဲလၢ “ယဟိဝၤယွၤ တဲဝဲလၢ ‘တၢ်ဟ့ၣ်ကၣ်န့ၣ် မ့ၢ်ယတၢ်လီၤ, ယကဟ့ၣ်ကၣ်တၢ်လီၤ.’”+
၂၀ ဘၣ်ဆၣ် “နဒုၣ်နဒါ မ့ၢ်လီၤဘဲန့ၣ်* ဒုးအီၣ်အီၤတၢ်တက့ၢ်. ဒီးအဝဲ မ့ၢ်အဲၣ်ဒိးအီထံန့ၣ် ဒုးအီအီၤတက့ၢ်. နမ့ၢ်မၤဒ်န့ၣ်န့ၣ် ကလီၤဂာ်ဒ်သိး နပာ်ဖှိၣ် မ့ၣ်အူအ့ၣ်လၢ အခိၣ်လိၤလီၤ.”*+
၂၁ တဘၣ်ပျဲတၢ်အၢ မၤနၢၤနၤတဂ့ၤ. ဆဲးမၤနၢၤတၢ်အၢလၢ တၢ်ဂ့ၤတက့ၢ်.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဟီၣ်ခိၣ်.”
^ အခီပညီလိၤလိၤ “ပူၤဖျဲးဒီး တၢ်ပာ်မၤသး.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “သၣ်ဝံၤ.”
^ မ့ၢ်ဝဲ ကမၤခုၣ်လီၤ ပှၤတဂၤအံၤအသး ဒီးကမၤကပုာ်လီၤအသး.
