ရိမ့ၤ ၁၃:၁-၁၄
၁၃ ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်တဖၣ်န့ၣ် မ်ပှၤကိးဂၤဒဲး ဒိးပၢအသးလၢ အဝဲသ့ၣ် အဖီလာ်တက့ၢ်.+ မ့တမ့ၢ်လၢ ကစၢ်ယွၤ ဟ့ၣ်အခွဲးဘၣ်န့ၣ် ပှၤလၢအအိၣ် ဒီးတၢ်စိတၢ်ကမီၤတဖၣ် အိၣ်ဝဲတသ့ဘၣ်.+ ဒီးပှၤလၢအအိၣ်ဒီး တၢ်စိတၢ်ကမီၤလၢ အအိၣ်ခဲအံၤတဖၣ်န့ၣ် ကစၢ်ယွၤ ပာ်အီၤလၢ အလီၢ်အလၤ အကလုာ်ကလုာ်လီၤ.+
၂ အဃိ ပှၤလၢအထီဒါ တၢ်စိတၢ်ကမီၤလၢ အပၢတၢ်တဖၣ်န့ၣ် မ့ၢ်ဝဲအထီဒါ ကစၢ်ယွၤ အတၢ်ရဲၣ်တၢ်ကျဲၤလီၤ. ဒီးပှၤလၢ အထီဒါ တၢ်ရဲၣ်တၢ်ကျဲၤအံၤန့ၣ် ကဘၣ်တၢ်စံၣ်ညီၣ်အီၤလီၤ.
၃ ပှၤလၢ အမၤတၢ်ဂ့ၤန့ၣ် တပျံၤပှၤလၢ အပၢတၢ်တဖၣ်ဘၣ်. မ့မ့ၢ်ပှၤလၢ အမၤတၢ်အၢတဖၣ်န့ၣ်+ ပျံၤဝဲလီၤ. နမ့ၢ်တအဲၣ်ဒိး ပျံၤတၢ်စိတၢ်ကမီၤ လၢအပၢတၢ်တဖၣ်ဘၣ်န့ၣ် ဆဲးမၤတၢ်ဂ့ၤတက့ၢ်.+ ဒီးအဝဲသ့ၣ် ကပတြၢၤနၤလီၤ.
၄ အဝဲသ့ၣ်မ့ၢ် ကစၢ်ယွၤအခ့အပှၤလၢ သုဘျုးအဂီၢ်လီၤ. ဘၣ်ဆၣ် သုမ့ၢ်မၤတၢ်အၢန့ၣ် သုကဘၣ်ပျံၤတၢ်လီၤ. အဝဲသ့ၣ်အိၣ်ဒီး တၢ်ခွဲးတၢ်ယာ် ဒီးတၢ်စိတၢ်ကမီၤ* လၢကစံၣ်ညီၣ်တၢ် အဂီၢ်လီၤ. အဝဲသ့ၣ်မ့ၢ် ကစၢ်ယွၤ အခ့အပှၤ ဒီးအလီၤဂာ်ဒ် ပှၤဟ့ၣ်ကၣ်တၢ်လၢ ကစံၣ်ညီၣ်ပှၤလၢ အဆဲးမၤ တၢ်အၢတၢ်သီတဖၣ်လီၤ.
၅ အဃိ သုကဘၣ် ဒိးပၢသုသးလၢ အဝဲသ့ၣ်အဖီလာ်န့ၣ် တမ့ၢ်ထဲလၢ တၢ်စံၣ်ညီၣ်အဝဲန့ၣ် အဃိဘၣ် ကဘၣ်မ့ၢ်လၢ သုသးလၢ အသ့ၣ်ညါဒၣ်တၢ်အဃိ စ့ၢ်ကီးလီၤ.+
၆ လၢတၢ်ဂ့ၢ်အံၤအဃိ သုဟ့ၣ်တၢ်ခိတၢ်သွဲစ့ၢ်ကီး, မ့ၢ်လၢ အဝဲသ့ၣ်မ့ၢ် ကစၢ်ယွၤ အခ့အပှၤတဖၣ်လၢ အမၤတၢ်လၢ ကမျၢၢ်အဂီၢ် အဃိလီၤ.
၇ ဟ့ၣ်ပှၤကိးဂၤဒဲး တၢ်လၢအဝဲသ့ၣ် ကြၢးဒိးန့ၢ်ဘၣ်ဝဲတက့ၢ်. ပှၤလၢအကြၢးဒိးန့ၢ်ဘၣ် တၢ်ခိတၢ်သွဲန့ၣ် ဟ့ၣ်အီၤတၢ်ခိတၢ်သွဲတက့ၢ်.+ ပှၤလၢ အကြၢးဒိးန့ၢ်ဘၣ် တၢ်အဘူးအလဲန့ၣ် ဟ့ၣ်အီၤအဘူးအလဲတက့ၢ်. ပှၤလၢ သုကြၢးပျံၤအီၤန့ၣ် ပျံၤအီၤတက့ၢ်.+ ပှၤလၢ သုကြၢးပာ်ကဲန့ၣ် ပာ်ကဲအီၤတက့ၢ်.+
၈ တဘၣ်မၤထီၣ်ကမၢ်ဒီး ပှၤနီတဂၤတဂ့ၤ. သုကမၢ်အိၣ်ထဲတမံၤလၢ သုကဘၣ်အဲၣ်လိာ်သုသး တဂၤဒီးတဂၤလီၤ.+ ပှၤလၢ အအဲၣ်ပှၤဂၤန့ၣ် မ့ၢ်အမၤလၢထီၣ်ပှဲၤထီၣ် တၢ်သိၣ်တၢ်သီလီၤ.+
၉ တၢ်သိၣ်တၢ်သီလၢ အတဲဝဲလၢ “နတဘၣ် အဲၣ်ဘၢမါ အဲၣ်ဘၢဝၤတဂ့ၤ,+ နတဘၣ် မၤသံပှၤနီတဂၤတဂ့ၤ,+ နတဘၣ် ဟုၣ်တၢ်တဂ့ၤ,+ နတဘၣ် သးကွံပှၤတၢ်တဂ့ၤ”+ ဒီးတၢ်မၤလိာ် လၢအဂၤခဲလၢာ်န့ၣ် ပၣ်ဃုာ်လၢ တၢ်မၤလိာ်တထံၣ်အံၤအပူၤ လၢအမ့ၢ် “နကဘၣ် အဲၣ်ပှၤလၢနဃၢၤ ဒ်နအဲၣ်လီၤ နနီၢ်ကစၢ်အသး အသိးလီၤ.”+
၁၀ တၢ်အဲၣ်တၢ်ကွံန့ၣ် တမၤအၢဝဲ ပှၤလၢအခိၣ်အဃၢၤဘၣ်.+ အဃိ တၢ်အဲၣ်တၢ်ကွံန့ၣ် မ့ၢ်တၢ်လၢ အမၤလၢထီၣ်ပှဲၤထီၣ် စီၤမိၤၡ့ အတၢ်သိၣ်တၢ်သီလီၤ.+
၁၁ သုကြၢးမၤဒ်အံၤ မ့ၢ်လၢ သုသ့ၣ်ညါလၢ တၢ်ဆၢကတီၢ်ဘၣ်လၢ သုကဘၣ်မံပၢၢ်ထီၣ်လံ.+ ဒီးပတၢ်အုၣ်က့ၤခီၣ်က့ၤန့ၣ် ဘူးထီၣ်ဒိၣ်န့ၢ်ဒံး ဖဲပကဲထီၣ် ပှၤစူၢ်က့ၤနာ်က့ၤတၢ်အခါလီၤ.
၁၂ မုၢ်နၤဘူးကဝံၤ ဒီးမုၢ်ဆါ ဘူးကဟဲတုၤလံ. အဃိ ပကြၢးပာ်တ့ၢ်ကွံာ် တၢ်မၤလၢ အဘၣ်ထွဲလိာ်သးဒီး တၢ်ခံး+ ဒီးပကြၢးဟံးထီၣ် စုကဝဲၤတဖၣ်လၢ အဘၣ်ထွဲလိာ်သးဒီး တၢ်ကပီၤလီၤ.+
၁၃ ဒ်ပှၤအိၣ်မူဂ့ၤဂ့ၤဘၣ်ဘၣ်လၢ မုၢ်ဆါခီအသိးန့ၣ် မ်ပကအိၣ်မူ ဂ့ၤဂ့ၤဘၣ်ဘၣ်+ ဒ်န့ၣ်စ့ၢ်ကီးတက့ၢ်. ပတကြၢး ပၣ်ဃုာ်လၢ မူးပွဲလၢ အလီၤရၢၢ်လီၤစၢၢ်မ့ၢ်ဂ့ၤ, တၢ်အီမူၤသံးမ့ၢ်ဂ့ၤ, တၢ်မၤကမၣ်မုၣ်ကမၣ်ခွါမ့ၢ်ဂ့ၤ, တၢ်မၤကမၣ်တၢ်လၢ တအိၣ်ဒီးတၢ်မဲာ်ဆှးမ့ၢ်ဂ့ၤ,*+ တၢ်အ့ၣ်လိာ်ဆိးက့မ့ၢ်ဂ့ၤ, တၢ်သူၣ်က့ၣ်သးကါမ့ၢ်ဂ့ၤန့ၣ်ဘၣ်.+
၁၄ လၢတၢ်န့ၣ်အလီၢ် အိၣ်မူမၤထွဲ ဒ်သိးဒီး ပကစၢ် ယ့ၣ်ၡူးခရံာ် အဒိအတဲာ်+ ဘူးဘူးတံၢ်တံၢ်* ဒီးတဘၣ်ရဲၣ်ကျဲၤဆိပာ်စၢၤ ဒ်သိးကမၤထွဲ တၢ်သူၣ်လီသးကွံလၢ အကမၣ်တဖၣ် န့ၣ်တဂ့ၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “နး.”
^ ကြံးကျိာ် မ့ၢ်ဝဲ အဲၤ(လ်)စံယၤ. ကွၢ် တၢ်ကတိၤအခီပညီ.
^ အခီပညီလိၤလိၤ “ကူထီၣ်သိးထီၣ် ကစၢ်ယ့ၣ်ၡူးခရံာ်.”
