ရိမ့ၤ ၃:၁-၃၁
၃ ပှၤယူဒၤဖိမ့ၢ်ဂ့ၤ, တၢ်ဒိးတၢ်ကူးတရံးမ့ၢ်ဂ့ၤ အဂ့ၤဒိၣ်လၢကျဲဒ်လဲၣ်.
၂ ဂ့ၤဒိၣ်ဝဲလၢ ကျဲကိးဘိဒဲးလီၤ. အဆိကတၢၢ်န့ၣ် ကစၢ်ယွၤအးလီၤ ပှၤယူဒၤဖိလၢ အကလုၢ်ကထါစီဆှံလီၤ.+
၃ ဘၣ်ဆၣ် ပှၤယူဒၤဖိတနီၤ မ့ၢ်တအိၣ်ဒီး တၢ်နာ်ဘၣ်န့ၣ် တၢ်ကမၤအသးဒ်လဲၣ်. မ့ၢ်လၢအဝဲသ့ၣ် အတၢ်နာ် တအိၣ်ဘၣ်အဃိ အခီပညီမ့ၢ်ဝဲ ပှၤနာ်န့ၢ် ကစၢ်ယွၤ တသ့လၢၤဘၣ်ဧါ.
၄ လ့ၤတက့ၤ တမ့ၢ်ဘၣ်. ပှၤဟီၣ်ခိၣ်ဖိ ကိးဂၤဒဲး မ့မ့ၢ် ပှၤလံၣ်တၢ်လီတၢ် သနာ်က့+ ကစၢ်ယွၤန့ၣ် အကလုၢ်တီဝဲလီၤ.+ ဒ်တၢ်ကွဲးအသး အိၣ်ဝဲအသိး “နတၢ်ကတိၤတဖၣ် ကပာ်ဖျါထီၣ်ဝဲလၢ နတဲတၢ်တီတီလိၤလိၤ ဒီးနမ့ၢ်ဘၣ် တၢ်ပာ်ဒ့ၣ်ပာ်ကမၣ်နၤ သနာ်က့ နကမၤနၢၤတၢ်လီၤ.”+
၅ ဘၣ်ဆၣ် ပတတီတလိၤဘၣ်အဃိ ကစၢ်ယွၤ အတၢ်တီတၢ်လိၤ ဖျါဒိၣ်ထီၣ်ဝဲလီၤ. မ့မ့ၢ်ဒ်န့ၣ်န့ၣ် ပကတဲလၢ ကစၢ်ယွၤ စံၣ်ညီၣ်ပှၤန့ၣ် တတီတလိၤဘၣ်ဧါ. (ယတဲတၢ်ဒ် ပှၤတနီၤ အတၢ်ထံၣ်အသိး.)
၆ လ့ၤတက့ၤ တမ့ၢ်ဒ်န့ၣ်ဘၣ်. ကစၢ်ယွၤ မ့မ့ၢ်ပှၤတတီတလိၤဘၣ်န့ၣ် အဝဲစံၣ်ညီၣ် ဟီၣ်ခိၣ်ကသ့ဒ်လဲၣ်.+
၇ ဘၣ်ဆၣ် ခီဖျိလၢ ယတၢ်လံၣ်တၢ်လီအဃိ ကစၢ်ယွၤ မ့ၢ်ဘၣ်တၢ်ပာ်ဖျါထီၣ်အီၤ ဒ်ပှၤလၢ အကလုၢ်တီအသိး ဒီးမ့ၢ်ကဲထီၣ် တၢ်လၤကပီၤလၢအဂီၢ်န့ၣ် ဘၣ်မနုၤအဃိ တၢ်စံၣ်ညီၣ်ယၤဒ် ပှၤတၢ်ဒဲးဘးဖိတဂၤ အသိးလဲၣ်.
၈ မ့ၢ်ပကတဲလၢ “ဒ်သိး တၢ်ဂ့ၤတဖၣ် ကဟဲအဂီၢ် ပကမၤ တၢ်အၢတၢ်သီဟီ” န့ၣ်ဧါ. ပှၤတနီၤနီၤ တဲဟးဂီၤပှၤလၢ ပတဲတၢ်ဒ်အံၤလီၤ. နီၢ်ကီၢ်န့ၣ် ပှၤတဖၣ်အံၤ ကြၢးဒီးတၢ်စံၣ်ညီၣ်လီၤ.+
၉ မ့မ့ၢ်ဒ်န့ၣ်န့ၣ် ပဝဲပှၤယူဒၤဖိန့ၣ် မ့ၢ်ပတၢ်အိၣ်သး ဂ့ၤဒိၣ်န့ၢ်ပှၤဂၤဒံးဧါ. လ့ၤတက့ၤ တမ့ၢ်ဒ်န့ၣ်ဘၣ်. ဒ်ပပာ်ဖျါထီၣ်တ့ၢ်အသိး ပှၤယူဒၤဖိ ဒီးပှၤကြံးဖိကိးဂၤဒဲးန့ၣ် အိၣ်လၢ တၢ်ဒဲးဘး အဖီလာ်လီၤ.+
၁၀ ဒ်တၢ်ကွဲးအသး အိၣ်ဝဲအသိး “ပှၤတီပှၤလိၤ တအိၣ်နီတဂၤဘၣ်, ထဲတဂၤဒၣ်လဲာ် တအိၣ်ဘၣ်.+
၁၁ ပှၤလၢအသးဆးန့ၣ် တအိၣ်နီတဂၤဘၣ် ဒီးပှၤလၢ အဃုကစၢ်ယွၤန့ၣ် တအိၣ်နီတဂၤဘၣ်.
၁၂ ပှၤကိးဂၤဒဲး ဃၣ်ကွံာ်အသးလၢအအိၣ်, အဝဲသ့ၣ်ခဲလၢာ် ကဲထီၣ် ပှၤလၢအလုၢ်အပှ့ၤ တအိၣ်ဘၣ်. ပှၤလၢအမၤဂ့ၤတၢ် တအိၣ်နီတဂၤဘၣ်, ထဲတဂၤဒၣ်လဲာ် တအိၣ်ဘၣ်.”+
၁၃ “အဝဲသ့ၣ် အကိာ်ယူၢ်ဘိန့ၣ် လီၤဂာ်ဒ်သိးဒီး တၢ်သွၣ်ခိၣ်လၢ အအိၣ်အိးထီၣ်အသး ဒီးအဝဲသ့ၣ် သူအပျ့ၤဒ်သိး ကလံၣ်တၢ်လီတၢ် အဂီၢ်လီၤ.”+ “တၢ်လၢအဟဲထီၣ်လၢ အဝဲသ့ၣ် အထးခိၣ်န့ၣ် မၤအသးဒ်သိးဒီး ဂုၢ်ဘၣ်အၢ အစုၣ်အပျၢ်လီၤ.”+
၁၄ “အဝဲသ့ၣ် အကိာ်ပူၤန့ၣ် ပှဲၤဝဲဒီးတၢ်ဆိၣ်အၢ ဒီးတၢ်အခၣ်တဖၣ်လီၤ.”+
၁၅ “အဝဲသ့ၣ် အခီၣ်န့ၣ် ကရီလဲၤတၢ်ဒ်သိး ကလူလီၤတၢ်သွံၣ် အဂီၢ်လီၤ.”+
၁၆ “အဝဲသ့ၣ် အကျဲခဲလၢာ်န့ၣ် ဒုးအိၣ်ထီၣ် တၢ်ကိၢ်တၢ်ဂီၤဒီး တၢ်ဟးဂူာ်ဟးဂီၤ
၁၇ ဒီးအဝဲသ့ၣ် တသ့ၣ်ညါ တၢ်ဃူတၢ်ဖိးအကျဲဘၣ်.”+
၁၈ “အဝဲသ့ၣ် တပျံၤ ကစၢ်ယွၤ နီတစဲးဘၣ်.”+
၁၉ ဒီးပသ့ၣ်ညါလၢ တၢ်ခဲလၢာ်လၢ အအိၣ်လၢ စီၤမိၤၡ့ အတၢ်သိၣ်တၢ်သီအပူၤန့ၣ် ဘၣ်ထွဲလိာ်အသးဒီး ပှၤလၢအအိၣ်လၢ စီၤမိၤၡ့ အတၢ်သိၣ်တၢ်သီ အဖီလာ် ဒ်သိးပှၤကိးဂၤဒဲး အထးခိၣ် ကအိၣ်ဘှ့ၣ်ဝဲ ဒီးဟီၣ်ခိၣ်ခဲလၢာ် ကကြၢးဒီးကစၢ်ယွၤ အတၢ်စံၣ်ညီၣ်အဂီၢ်လီၤ.+
၂၀ အဃိ ပှၤ* တဘၣ် တၢ်ပာ်တီပာ်လိၤအီၤလၢ ကစၢ်ယွၤ အမဲာ်ညါ ခီဖျိလၢ အဝဲသ့ၣ် မၤတၢ်မၤလၢ အဘၣ်ထွဲဒီး တၢ်သိၣ်တၢ်သီအဃိ နီတဂၤဘၣ်.+ နီၢ်ကီၢ်န့ၣ် လၢတၢ်သိၣ်တၢ်သီအဃိ ပသ့ၣ်ညါဘၣ် လီၤတံၢ်လီၤဆဲးလၢ တၢ်ဒဲးဘး မ့ၢ်တၢ်မနုၤလဲၣ်န့ၣ်လီၤ.+
၂၁ ဘၣ်ဆၣ် ခဲအံၤ ဒ်စီၤမိၤၡ့ အတၢ်သိၣ်တၢ်သီ ဒီးဝံအတၢ်ကွဲးအသးတဖၣ် တဲပာ်စၢၤဝဲအသိး+ ကစၢ်ယွၤ အတၢ်တီတၢ်လိၤ အိၣ်ဖျါထီၣ်ဝဲလၢ+ ကျဲလၢ အတဘၣ်ထွဲလိာ်သးဒီး တၢ်သိၣ်တၢ်သီဘၣ်.
၂၂ ဒီးမ့ၢ်လၢ တၢ်ကွၢ်ဒိၣ်ဆံးအါစှၤတၢ် တအိၣ်ဘၣ်အဃိ+ ပှၤလၢ အအိၣ်ဒီးတၢ်နာ် ကိးဂၤဒဲးန့ၣ် ကစၢ်ယွၤ ပာ်တီပာ်လိၤ အဝဲသ့ၣ်ခီဖျိ တၢ်နာ်ယ့ၣ်ၡူးခရံာ် အဃိလီၤ.
၂၃ ပှၤခဲလၢာ် မၤတၢ်ဒဲးဘး ဒီးပာ်ဖျါထီၣ်က့ၤ ကစၢ်ယွၤ အလၤအကပီၤတန့ၢ်ဘၣ်.+
၂၄ ဒီးကစၢ်ယွၤ ပာ်တီပာ်လိၤ အဝဲသ့ၣ်န့ၣ် မ့ၢ်ဝဲတၢ်ဟ့ၣ်ကလီ+ ခီဖျိလၢ ယ့ၣ်ၡူးခရံာ်+ အတၢ်ပှ့ၤက့ၤလၢ ကစၢ်ယွၤ ကတဲာ်ကတီၤဝဲလၢ အတၢ်သးကညီၤ ဒိၣ်ဒိၣ်မုၢ်မုၢ်+ အဃိလီၤ.
၂၅ ကစၢ်ယွၤ ဒုးအိၣ်ထီၣ်ကျဲလၢ ပကမၤဘၣ်လိာ်ဖိးဒ့က့ၤ ပသးဒီးအီၤ+ ခီဖျိလၢ တၢ်နာ်ယ့ၣ်ၡူးအသွံၣ် အဃိလီၤ.+ ကစၢ်ယွၤ မၤဝဲဒ်န့ၣ်အဃိ အဝဲပာ်ဖျါထီၣ်လၢ အမၤတၢ် တီတီလိၤလိၤ* လၢညါခါ ဖဲအဝဲ ဝံသးစူၤတၢ် ဒီးပျၢ်ကွံာ်တၢ်ကမၣ်လၢ ပှၤမၤတ့ၢ်အီၤလၢညါတဖၣ် အခါလီၤ.
၂၆ တကးဒံးဘၣ် အပာ်ဖျါထီၣ်လၢ ဆၢကတီၢ် ခဲအံၤစ့ၢ်ကီး အဝဲမၤတၢ် တီတီလိၤလိၤ+ ဖဲအဝဲပာ်တီပာ်လိၤ ပှၤလၢအစူၢ်က့ၤနာ်က့ၤ ယ့ၣ်ၡူးအခါလီၤ.+
၂၇ မ့မ့ၢ်ဒ်န့ၣ်န့ၣ် ပပာ်ကဖၢလၢပသး အလီၢ်အိၣ်ဧါ. တအိၣ်ဘၣ်. မ့ၢ်ပကြၢး ပာ်ကဖၢလၢပသး ခီဖျိ ပမၤထွဲစီၤမိၤၡ့ အတၢ်သိၣ်တၢ်သီ အဃိဧါ.+ တမ့ၢ်ဘၣ်, ပကြၢး ပာ်ကဖၢလၢပသး ခီဖျိ ပမၤထွဲတၢ်နာ် အတၢ်သိၣ်တၢ်သီ အဃိလီၤ.
၂၈ ပသ့ၣ်ညါလၢ ပှၤတဂၤ ဘၣ်တၢ်ပာ်တီပာ်လိၤအီၤ ခီဖျိ အတၢ်နာ်အဃိ ဒီးတမ့ၢ်လၢ အမၤတၢ်မၤ လၢအဘၣ်ထွဲဒီး တၢ်သိၣ်တၢ်သီအဃိဘၣ်.+
၂၉ ဒီးကစၢ်ယွၤန့ၣ် မ့ၢ်ထဲပှၤယူဒၤဖိတဖၣ် အကစၢ်ယွၤ လီၤဧါ.+ အဝဲတမ့ၢ် ပှၤကလုာ်တဖၣ် အကစၢ်ယွၤ စ့ၢ်ကီးဧီၤ.+ အဝဲမ့ၢ် ပှၤကလုာ်တဖၣ် အကစၢ်ယွၤ စ့ၢ်ကီးလီၤ.+
၃၀ ကစၢ်ယွၤ အိၣ်ထဲတဂၤအဃိ+ အဝဲကပာ်တီပာ်လိၤ ပှၤလၢအဘၣ် တၢ်ကူးတရံးတဖၣ်မ့ၢ်ဂ့ၤ,+ ပှၤလၢအတဘၣ် တၢ်ကူးတရံးတဖၣ်ဘၣ်မ့ၢ်ဂ့ၤ+ ခီဖျိအဝဲသ့ၣ် အတၢ်နာ် အဃိလီၤ.
၃၁ မ့မ့ၢ်ဒ်န့ၣ်န့ၣ် မ့ၢ်ပမၤကတၢၢ်ကွံာ် တၢ်သိၣ်တၢ်သီလၢ တၢ်နာ်အဃိဧါ. လ့ၤတက့ၤ တမ့ၢ်ဘၣ်. လၢတၢ်န့ၣ်အလီၢ် မ့ၢ်ဝဲပဆီၣ်ထွဲ တၢ်သိၣ်တၢ်သီလီၤ.+
