ရူၤသး ၄:၁-၂၂
၄ စီၤဘိၤဧး လဲၤဝဲလၢ ဝ့ၢ်အတြဲၤ+ ဒီးဆ့ၣ်နီၤဝဲ ဖဲန့ၣ်လီၤ. ဒီးပှၤပှ့ၤက့ၤတၢ် လၢစီၤဘိၤဧးတဲဝဲတဂၤန့ၣ်+ ဟဲဝဲလီၤ. ဒီးစီၤဘိၤဧး တဲဝဲလၢ “ခွါဧၢ, ဟဲလၢအံၤ ဒီးဆ့ၣ်နီၤဖဲအံၤ” ဒီးပှၤတဂၤန့ၣ် ဟဲဆ့ၣ်နီၤဝဲလီၤ.
၂ ဒီးစီၤဘိၤဧး ကိးန့ၢ်ဝဲ ဝ့ၢ်အပှၤသူၣ်က့သးပှၢ် အဂၤတဆံ+ ဒီးတဲဝဲလၢ “ဆ့ၣ်နီၤဖဲအံၤ” ဒီးအဝဲသ့ၣ် ဆ့ၣ်နီၤဝဲလီၤ.
၃ စီၤဘိၤဧး တဲဘၣ် ပှၤပှ့ၤက့ၤတၢ်တဂၤလၢ+ “နီၢ်နၤဧမံ လၢအဟဲက့ၤလၢ ကီၢ်မိၤအးတဂၤန့ၣ်+ အကဘၣ်ဆါကွံာ် အဟီၣ်ခိၣ်တကဝီၤ လၢအမ့ၢ်ဝဲ ပဒီပုၢ်ဝဲၢ်ခွါ စီၤအလံၤမ့လ့းအတၢ်လီၤ.+
၄ အဃိ ယဆိကမိၣ်လၢ ယကဘၣ်တဲနၤ တၢ်ဂ့ၢ်တခါအံၤ ဒီးမၢနပှ့ၤအီၤလၢ ပှၤလၢအအိၣ်ဖဲအံၤတဖၣ် ဒီးပပှၤသူၣ်က့သးပှၢ်တဖၣ် အမဲာ်ညါလီၤ.+ နမ့ၢ်ကပှ့ၤအီၤန့ၣ် ပှ့ၤအီၤဟီ. ဘၣ်ဆၣ် နမ့ၢ်တပှ့ၤဘၣ်န့ၣ် တဲယၤဒ်သိး ယကသ့ၣ်ညါအဂီၢ်တက့ၢ်. နမ့ၢ်ပှၤအဆိကတၢၢ်တဂၤလၢ ကဘၣ်ပှ့ၤဝဲ ဒီးမ့မ့ၢ်ယၤန့ၣ်ယမ့ၢ် ပှၤခံဂၤတဂၤလၢ ကဘၣ်ပှ့ၤဝဲလီၤ.” ဒီးပှၤတဂၤန့ၣ် တဲဆၢက့ၤအီၤလၢ “ယကပှ့ၤအီၤလီၤ.”+
၅ ဒီးစီၤဘိၤဧး တဲဝဲလၢ “မုၢ်တနံၤလၢ နပှ့ၤဟီၣ်ခိၣ်လၢ နီၢ်နၤဧမံအအိၣ်န့ၣ် နကဘၣ်ပှ့ၤစ့ၢ်ကီးအီၤလၢ ပှၤမိၤအးမုၣ်ဖိ နီၢ်ရူၤသးအအိၣ် လၢအမ့ၢ်ပှၤသံတဂၤအမါ ဒ်သိးပှၤလၢအသံတဂၤန့ၣ် အမံၤသုတလီၤမၢ်လၢ အတၢ်န့ၢ်သါတဂ့ၤအဂီၢ်န့ၣ်လီၤ.”+
၆ လၢတၢ်ဂ့ၢ်အံၤအဃိ ပှၤပှ့ၤက့ၤတၢ်တဂၤ တဲဝဲလၢ “ယတၢ်န့ၢ်သါ ကလီၤမၢ်ဘၣ်ဖုးအဃိ ယပှ့ၤက့ၤအီၤတသ့ဘၣ်. မ့ၢ်လၢယပှ့ၤက့ၤအီၤ တသ့ဘၣ်အဃိ ယကတူၢ်ၡူ ယတၢ်ခွဲးတၢ်ယာ်လၢ ယကပှ့ၤက့ၤအီၤအဂီၢ်လီၤ. ပှ့ၤက့ၤအီၤလၢ ယလီၢ်တက့ၢ်.”
၇ လၢညါ လၢကီၢ်အံၣ်စရ့လးအပူၤန့ၣ် ဖဲပှၤပှ့ၤက့ၤတၢ် ဒီးခီလဲလိာ်သးတၢ် တမံၤဂ့ၤတမံၤဂ့ၤအခါ လုၢ်လၢ်အိၣ်လၢ ပှၤကဘၣ်ဘ့ၣ်လီၤကွံာ် အခီၣ်ဖံး+ ဒီးဟ့ၣ်လီၤဝဲလၢ အဝဲတဂၤလီၤ. လၢအံၣ်စရ့လး အကီၢ်ပူၤန့ၣ် အဝဲအံၤမ့ၢ် တၢ်တခါလၢ အပာ်ဂၢၢ်ပာ်ကျၢၤဝဲလၢ အဝဲသ့ၣ် အသးလီၤပလိာ်လိာ်အသးလီၤ.
၈ အဃိ ပှၤပှ့ၤက့ၤတၢ်တဂၤ တဲဘၣ်စီၤဘိၤဧးလၢ “ပှ့ၤက့ၤလၢ နၤဟီ.” ဒီးပှၤပှ့ၤက့ၤတၢ်တဂၤ ဘ့ၣ်လီၤဝဲ အခီၣ်ဖံး ဒီးဟ့ၣ်အီၤလီၤ.
၉ ဝံၤဒီးစီၤဘိၤဧး တဲဘၣ်ပှၤသူၣ်က့သးပှၢ်တဖၣ် ဒီးပှၤခဲလၢာ်လၢ “တၢ်ခဲလၢာ်လၢ အဘၣ်ဃးဒီး စီၤအလံၤမ့လ့း ဒီးစီၤကံးလယိၣ် ဒီးစီၤမၤဃလိၣ်န့ၣ် ယကပှ့ၤ လၢနီၢ်နၤဧမံအအိၣ် ဒီးတနံၤညါအံၤ သုမ့ၢ် ပှၤအုၣ်အသးလီၤ.+
၁၀ တကးဒံးဘၣ် ဒ်သိးပှၤလၢအသံတဂၤန့ၣ် အမံၤသုတလီၤမၢ်လၢ အတၢ်န့ၢ်သါအပူၤ,+ လၢအဒီပုၢ်ဝဲၢ်အကျါ ဒီးလၢအပှၤဝ့ၢ်ဖိအကျါတဂ့ၤအဂီၢ် ယကဟံးန့ၢ်စ့ၢ်ကီး ပှၤမိၤအးမုၣ် နီၢ်ရူၤသး လၢအမ့ၢ် စီၤမၤဃလိၣ်အမါ ဒ်ယမါအသိးလီၤ. တနံၤအံၤ သုမ့ၢ် ပှၤအုၣ်အသးတဖၣ်လီၤ.”+
၁၁ ဒီးကယဲၢ်ပှၤလၢ အအိၣ်လၢ ဝ့ၢ်အတြဲၤ ဒီးပှၤသူၣ်က့သးပှၢ်တဖၣ် တဲဝဲလၢ “ပဝဲသ့ၣ်တဖၣ်အံၤ ပမ့ၢ်ပှၤအုၣ်အသးလီၤ. နမါလၢ အကနုာ်လီၤလၢ နဟံၣ်ပူၤတဂၤအံၤ မ်ယဟိဝၤယွၤဆိၣ်ဂ့ၤအီၤ ဒီးမ်အလီၤဂာ်ဒ် နီၢ်ရၤဃ့လး ဒီးနီၢ်လ့ၤအၤ လၢအသူၣ်ထီၣ်ဝဲ အံၣ်စရ့လးအဟံၣ်အသိးတက့ၢ်.+ မ်နကဘီၣ်ထီၣ်ညီထီၣ်လၢ အ့ဖရးသးအပူၤ+ ဒီးအိၣ်ဒီးမံၤဂ့ၤသၣ်ဂ့ၤ လၢဝ့ၢ်ဘ့ၤသလ့ဃ့ၣ်အပူၤတက့ၢ်.+
၁၂ ယဟိဝၤယွၤ ကဟ့ၣ်လီၤနၤလၢ နချံနသၣ် ခီဖျိလၢ ပိာ်မုၣ်သးစၢ်တဂၤအံၤလီၤ.+ မ်နဟံၣ်ဖိဃီဖိလီၤဂာ်ဒ် နီၢ်တၤမၢ်ဒီး စီၤယူဒၤအဖိခွါ လၢအမ့ၢ် စီၤဖ့ၤရ့း အဟံၣ်ဖိဃီဖိ+ အသိးတက့ၢ်.”
၁၃ ဒီးစီၤဘိၤဧး ဟံးန့ၢ်ဝဲ နီၢ်ရူၤသး ဒီးနီၢ်ရူၤသး ကဲထီၣ်ဝဲအမါလီၤ. အဝဲမံဃုာ်ဒီးအီၤ ဒီးယဟိဝၤယွၤ ပျဲလၢနီၢ်ရူၤသး ကဒၢထီၣ် ဒီးအိၣ်ဖျဲၣ်ထီၣ်ဝဲ အဖိခွါတဂၤလီၤ.
၁၄ ဒီးပိာ်မုၣ်သ့ၣ်တဖၣ်န့ၣ် တဲဘၣ်နီၢ်နၤဧမံလၢ “တနံၤအံၤ ယဟိဝၤယွၤဟ့ၣ်နၤ ပှၤပှ့ၤက့ၤတၢ်အဃိ မ်အဘၣ် တၢ်စံးထီၣ်ပတြၢၤအီၤတက့ၢ်. မ်ဖိသၣ်အံၤ အမံၤဟူသၣ်ဖျါလၢ အံၣ်စရ့လးအပူၤတက့ၢ်.
၁၅ နဒဲၣ်မုၣ်လၢ အအဲၣ်နၤတဂၤအံၤ+ ဂ့ၤဒိၣ်န့ၢ်ဒံး ဖိခွါနွံဂၤလီၤ. အအိၣ်ဖျဲၣ်ထီၣ် ဖိခွါတဂၤ ဒီးအဝဲ* ကမၤမုာ်ထီၣ်က့ၤ နတၢ်အိၣ်မူ ဒီးကအံးထွဲကွၢ်ထွဲနၤ ဖဲနသးပှၢ်ထီၣ် အဆၢကတီၢ်န့ၣ်လီၤ.”
၁၆ ဒီးနီၢ်နၤဧမံ ဟံးန့ၢ်ဝဲဖိသၣ် ဒီးပာ်ထီၣ်အီၤလၢ အသးနါပှၢ်အလိၤလီၤ. ဒီးနီၢ်နၤဧမံ အံးထွဲကွၢ်ထွဲအီၤလီၤ.
၁၇ ဒီးပိာ်မုၣ်လၢ အခိၣ်အဃၢၤတဖၣ်န့ၣ် ယုၢ်န့ၢ်အမံၤလီၤ. အဝဲသ့ၣ်တဲဝဲလၢ “ဖိခွါတဂၤ အိၣ်ဖျဲၣ်ထီၣ်လၢ နီၢ်နၤဧမံအဂီၢ်လံ.” ဒီးအဝဲသ့ၣ် ယုၢ်န့ၢ်အမံၤလၢ စီၤဧိၤဘ့းလီၤ.+ အဝဲကဲထီၣ်စီၤယံးၡဲအပၢ် ဒီးစီၤယံးၡဲန့ၣ်+ ကဲထီၣ်စီၤဒၤဝံးအပၢ်လီၤ.
၁၈ အဝဲအံၤမ့ၢ်ဝဲ စီၤဖ့ၤရ့း အစၢၤအသွဲၣ်လီၤ.+ စီၤဖ့ၤရ့း အဖိခွါမ့ၢ်ဝဲ စီၤဃ့ၤစရိၣ်+
၁၉ ဒီးစီၤဃ့ၤစရိၣ် အဖိခွါမ့ၢ်ဝဲ စီၤအ့ရၣ် ဒီးစီၤအ့ရၣ် အဖိခွါမ့ၢ်ဝဲ စီၤဧးမံၤနဒးလီၤ.+
၂၀ စီၤဧးမံၤနဒး+ အဖိခွါမ့ၢ်ဝဲ စီၤနးၡိၣ် ဒီးစီၤနးၡိၣ် အဖိခွါမ့ၢ်ဝဲ စီၤစၤလမိၣ်လီၤ.
၂၁ စီၤစၤလမိၣ် အဖိခွါမ့ၢ်ဝဲ စီၤဘိၤဧး ဒီးစီၤဘိၤဧး အဖိခွါမ့ၢ်ဝဲ စီၤဧိၤဘ့း
၂၂ ဒီးစီၤဧိၤဘ့း အဖိခွါမ့ၢ်ဝဲ စီၤယံးၡဲ+ ဒီးစီၤယံးၡဲ အဖိခွါမ့ၢ်ဝဲ စီၤဒၤဝံးလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ နီၢ်နၤဧမံ အလံၤခွါ.
