လီၣ်ဖျါ ၁၀:၁-၁၁
၁၀ ဒီးယထံၣ် မူခိၣ်ကလူးလၢ အဂံၢ်ဆူၣ်ဘါဆူၣ် အဂၤတဂၤ ဟဲလီၤလၢမူခိၣ်လီၤ. အဝဲဘိၣ်ဘံအသးလၢ တၢ်အၢၣ်တလိၣ် ဒီးတၢၢ်ကွဲၤအိၣ်လၢ အခိၣ်သၣ်ဃံအလိၤ ဒီးအမဲာ်သၣ်န့ၣ် မၤအသးဒ်မုၢ်အသိး+ ဒီးအခီၣ်မၤအသးဒ် မ့ၣ်အူအထူၣ်အသိးလီၤ.
၂ ဒီးလၢအစုပူၤန့ၣ် လံာ်ထူဆံးဆံးဖိလၢ အအိးထီၣ်ပာ်စၢၤအသး အိၣ်ဝဲတဘ့ၣ်လီၤ. ဒီးအဝဲပာ် အခီၣ်ထွဲတခီလၢ ပီၣ်လဲၣ် ဒီးအခီၣ်စ့ၣ်တခီလၢ ခိသူခိၣ်လီၤ.
၃ ဒီးအဝဲကိးပသူထီၣ်လၢ အကလုၢ်ဖးဒိၣ် ဒ်ခ့ယုၢ်ကညီၤတၢ် သီၣ်ဝဲအသိးလီၤ.+ ဖဲအဝဲကိးပသူထီၣ်အခါ ယနၢ်ဟူ လီသီၣ်နွံထံၣ် အကလုၢ်တဖၣ်+ တဲထီၣ်တၢ်လီၤ.
၄ ဒီးဖဲလီသီၣ်နွံထံၣ် တဲတၢ်အခါ ယဘူးကကွဲးလီၤတၢ် ဘၣ်ဆၣ် ယနၢ်ဟူ တၢ်ကလုၢ်သီၣ်ထီၣ်လၢ မူခိၣ်တဲဝဲလၢ+ “စဲပနီၣ်ဃာ်တၢ်လၢ လီသီၣ်နွံထံၣ် တဲဝဲတဖၣ် ဒီးတဘၣ်ကွဲးလီၤအီၤတဂ့ၤ.”
၅ မူခိၣ်ကလူးတဂၤလၢ ယထံၣ် အဆၢထၢၣ်လၢပီၣ်လဲၣ် ဒီးလၢခိသူခိၣ်န့ၣ် ယူာ်ထီၣ် အစုထွဲတခီ ဆူမူခိၣ်လီၤ.
၆ ဒီးအဝဲအၢၣ်လီၤတၢ်လၢ ပှၤတဂၤလၢအမူဝဲ အစိၤစိၤအဃၣ်ဃၣ်လၢ+ အတ့လီၤမူခိၣ်, ဟီၣ်ခိၣ်, ပီၣ်လဲၣ် ဒီးတၢ်အိၣ်လၢအပူၤခဲလၢာ်န့ၣ်+ အမဲာ်ညါလၢ “တၢ်တထုးယံာ် တၢ်ဆၢကတီၢ်လၢၤဘၣ်.
၇ ဘၣ်ဆၣ် ဖဲမုၢ်နံၤတဖၣ်လၢ မူခိၣ်ကလူး နွံဂၤတဂၤ+ ဘူးကအူထီၣ် အကွဲၤအခါ+ ကစၢ်ယွၤ အတၢ်ခူသူၣ်စီဆှံ+ ကဘၣ်တၢ်မၤ လၢထီၣ်ပှဲၤထီၣ်အီၤ သပှၢ်တၢၢ်လီၤ. တၢ်ခူသူၣ်စီဆှံအံၤ မ့ၢ်ဝဲတၢ်သးခုကစီၣ်လၢ ကစၢ်ယွၤ ဘိးဘၣ်သ့ၣ်ညါ အကုၢ်လၢအမ့ၢ် ဝံတဖၣ်လီၤ.”+
၈ ဒီးယနၢ်ဟူ တၢ်ကလုၢ်သီၣ်လၢ မူခိၣ်န့ၣ်+ တဲကဒီးယၤလၢ “လဲၤဟံးန့ၢ် လံာ်ထူတဘ့ၣ်လၢ အအိးထီၣ် ပာ်စၢၤအသးလၢ မူခိၣ်ကလူးလၢ အဆၢထၢၣ်လၢ ပီၣ်လဲၣ်ဒီး ခိသူခိၣ်တဂၤန့ၣ် အစုပူၤတက့ၢ်.”+
၉ ယလဲၤလၢ မူခိၣ်ကလူးတဂၤန့ၣ်အအိၣ် ဒီးယမၢအဟ့ၣ်လီၤယၤ လံာ်ထူဆံးဆံးဖိ တဘ့ၣ်အံၤလီၤ. အဝဲတဲယၤလၢ “ဟံးန့ၢ်အီၤ ဒီးအီၣ်ကွံာ်အီၤတက့ၢ်.+ ဖဲအအိၣ်လၢ နကိာ်ပူၤအခါန့ၣ် ကဆၢဝဲဒ်ကနဲစီ အသိး ဘၣ်ဆၣ် အကမၤခၣ်ထီၣ် နဟၢဖၢလီၤ.”
၁၀ ယဟံးန့ၢ် လံာ်ထူဆံးဆံးဖိ တဘ့ၣ်အံၤလၢ မူခိၣ်ကလူးတဂၤန့ၣ် အစုပူၤ ဒီးယအီၣ်အီၤလီၤ.+ လၢယကိာ်ပူၤန့ၣ် ဆၢဝဲဒ် ကနဲစီအသိး+ ဘၣ်ဆၣ် ဖဲယအီၣ်အီၤဝံၤအခါ လၢယဟၢဖၢအပူၤန့ၣ် ခၣ်ဝဲလီၤ.
၁၁ ဒီးယနၢ်ဟူ တၢ်ကလုၢ် တဲဘၣ်ယၤလၢ “နကဘၣ်တဲကဒီး ဝံအတၢ်စံးပာ် ဘၣ်ဃးဒီးပှၤအဒူၣ်တဖၣ်, ပှၤကလုာ်တဖၣ်, ပှၤတဲတၢ်အကျိာ်တဖၣ် ဒီးစီၤပၤအါဂၤ အဂ့ၢ်လီၤ.”
