လီၣ်ဖျါ ၁၁:၁-၁၉
၁၁ ဒီးတၢ်ဟ့ၣ်လီၤယၤလၢ တပိၢ်တဘိလၢ အလီၤဂာ်ဒီးနီၣ်ထိးဘိ+ ဒီးအဝဲတဲယၤလၢ “ဂဲၤဆၢထၢၣ် ဒီးထိၣ် ကစၢ်ယွၤအတၢ်လုၢ်ဟံၣ်, တၢ်လုၢ်လီၢ် ဒီးဂံၢ်ပှၤလၢအဘူၣ်ထီၣ်ဘါထီၣ် တၢ်လၢ တၢ်လုၢ်ဟံၣ်အပူၤတက့ၢ်.
၂ ဘၣ်ဆၣ် မ့မ့ၢ် တၢ်ပျီလၢအအိၣ်လၢ ကရၢၢ်ပူၤလၢ တၢ်လုၢ်ဟံၣ်အချၢန့ၣ် မ့ၢ်လၢ ကစၢ်ယွၤဟ့ၣ်လီၤအီၤလၢ ပှၤကလုာ်တဖၣ်အစုပူၤ ဒီးအဝဲသ့ၣ် ကယီၢ်တံၢ် ဝ့ၢ်စီဆှံလၢ+ ၄၂ လါအတီၢ်ပူၤအဃိ+ ပာ်တ့ၢ်အီၤ ဒီးတဘၣ်ထိၣ်အီၤတဂ့ၤ.
၃ ယကဆှၢလီၤ ယပှၤအုၣ်အသးခံဂၤလၢ အကၤဝဲ ထၢၣ်တၢ်ကံးညာ်* ဒ်သိးအဝဲသ့ၣ် ကတဲတၢ်ဒ် ဝံအသိးလၢ အသီ ၁,၂၆၀ အတီၢ်ပူၤလီၤ.”
၄ အဝဲသ့ၣ်န့ၣ် ဘၣ်တၢ်ဒိလီၤအီၤလၢ သ့ၣ်စၤယံးခံထူၣ်+ ဒီးမ့ၣ်အူဒၢခံဖျၢၣ်လီၤ.+ ဒီးအဝဲသ့ၣ် ဆၢထၢၣ်ဝဲလၢ ဟီၣ်ခိၣ်အကစၢ်တဂၤန့ၣ် အမဲာ်ညါလီၤ.+
၅ ပှၤတဂၤဂၤ မ့ၢ်အဲၣ်ဒိးမၤဘၣ်ဒိ အဝဲသ့ၣ်န့ၣ် မ့ၣ်အူဟဲဖျိးထီၣ်လၢ အဝဲသ့ၣ်အကိာ်ပူၤ ဒီးအီၣ်ကွံာ် အဝဲသ့ၣ် အဒုၣ်အဒါတဖၣ်လီၤ. အဃိ ပှၤတဂၤဂၤ မ့ၢ်အဲၣ်ဒိးမၤဘၣ်ဒိအဝဲသ့ၣ်န့ၣ် အဝဲကဘၣ်တၢ်မၤသံအီၤလၢ ကျဲဒ်န့ၣ်လီၤ.
၆ အဝဲသ့ၣ်အိၣ်ဒီး တၢ်စိတၢ်ကမီၤလၢ ကကးပံးဃာ်မူခိၣ်+ ဒ်သိး ဖဲမုၢ်နံၤတဖၣ်လၢ အဝဲသ့ၣ်တဲတၢ် ဒ်ဝံအသိးအတီၢ်ပူၤန့ၣ် မူခိၣ်သုတစူၤ နီတစဲးတဂ့ၤအဂီၢ်လီၤ.+ ဒီးအဝဲသ့ၣ်အိၣ်ဒီး တၢ်စိတၢ်ကမီၤလၢ ထံအဖီခိၣ်ဒ်သိး ကဒုးကဲထီၣ်ထံလၢ တၢ်သွံၣ်အဂီၢ်+ ဒီးဒ်သိးကတီၢ် ဟီၣ်ခိၣ်လၢ တၢ်နးတၢ်ဖှီၣ် အကလုာ်ကလုာ် အဘျီတဖၣ်အဘျီ ဖဲအဝဲသ့ၣ်အသးလီၤ.
၇ ဖဲအဝဲသ့ၣ်အုၣ်အသး ဝံၤအလီၢ်ခံ ဆၣ်ဖိကီၢ်ဖိလၢအအၢတဒု လၢအဟဲထီၣ် လၢတၢ်ပူၤယိာ်န့ၣ် ကဒုးတၢ်ဒီးအဝဲသ့ၣ်, ကမၤနၢၤအဝဲသ့ၣ် ဒီးကမၤသံအဝဲသ့ၣ်လီၤ.+
၈ ဒီးအဝဲသ့ၣ်အစိၣ် ကအိၣ်လၢ ဝ့ၢ်လၢအရ့ဒိၣ်တဖျၢၣ် အကျဲမုၢ်ခိၣ်လီၤ. ဒီးဖဲန့ၣ်န့ၣ် အဝဲသ့ၣ်အကစၢ်စ့ၢ်ကီး ဘၣ်တၢ်မၤသံအီၤလၢ သ့ၣ်တၢၣ်အလိၤလီၤ. ဝ့ၢ်တဖျၢၣ်အံၤ ဘၣ်တၢ်ဒိလီၤအီၤလၢ ဝ့ၢ်စဒိၣ် ဒီးကီၢ်အဲၤကူပတူးလီၤ.
၉ ဒီးပှၤအိၣ်လၢ ပှၤအဒူၣ်တဖၣ်, ကလုာ်ဒူၣ်တဖၣ်, ပှၤတဲတၢ်အကျိာ်တဖၣ် ဒီးပှၤကလုာ်တဖၣ်အကျါန့ၣ် ကကွၢ်အဝဲသ့ၣ်အစိၣ် သၢသီတဝာ်+ ဒီးတပျဲပှၤလဲၤပာ်လီၤ အဝဲသ့ၣ်အစိၣ်လၢ တၢ်သွၣ်ခိၣ်အပူၤဘၣ်.
၁၀ ဒီးပှၤလၢ အအိၣ်လၢဟီၣ်ခိၣ်ချၢန့ၣ် သးခုဒီးမၤတၢ်သူၣ်ဖှံသးညီ ဒီးကဆှၢန့ၢ်လိာ်သးတၢ်ဟ့ၣ် တဂၤဒီးတဂၤ မ့ၢ်လၢ ဝံခံဂၤအံၤလၢ အမၤနးမၤဖှီၣ်ပှၤလၢ အအိၣ်လၢ ဟီၣ်ခိၣ်ချၢန့ၣ် သံလံအဃိလီၤ.
၁၁ ဖဲသၢသီတဝာ် ဝံၤအလီၢ်ခံန့ၣ် တၢ်သါလၢ အဟ့ၣ်တၢ်မူလၢ အဟဲလၢ ကစၢ်ယွၤအအိၣ်န့ၣ် နုာ်လီၤလၢ ဝံခံဂၤန့ၣ်အပူၤ+ ဒီးအဝဲသ့ၣ်ဂဲၤဆၢထၢၣ် ဒီးပှၤလၢ အထံၣ်ဘၣ်အဝဲသ့ၣ်န့ၣ် အသူၣ်ပျံၤသးဖုးတၢ် ဒိၣ်မးလီၤ.
၁၂ ဒီးဝံခံဂၤန့ၣ် နၢ်ဟူဝဲ တၢ်ကလုၢ်သီၣ်ဖးဒိၣ် လၢမူခိၣ် တဲအဝဲသ့ၣ်လၢ “ဟဲထီၣ်လၢအံၤ.” ဒီးအဝဲသ့ၣ်လဲၤထီၣ်လၢ မူခိၣ် လၢတၢ်အၢၣ်အပူၤ ဒီးအဒုၣ်အဒါတဖၣ် ထံၣ်အဝဲသ့ၣ်လီၤ.
၁၃ ဒီးဖဲနၣ်ရံၣ်အဝဲန့ၣ် ဟီၣ်ခိၣ်ဟူးဖးဒိၣ် ဒီးဝ့ၢ်ဆံဆဲၣ်ပူတပူန့ၣ် လီၤပှီၢ်ဝဲ ဒီးပှၤအဂၤ ၇,၀၀၀ သံဝဲလၢ ဟီၣ်ခိၣ်ဟူးအဃိလီၤ. မ့မ့ၢ် ပှၤအဂၤလၢ အအိၣ်တ့ၢ်တဖၣ်န့ၣ် ပျံၤတၢ်ဖုးတၢ် ဒီးဟ့ၣ်ဝဲတၢ်လၤကပီၤ ဆူမူခိၣ်အကစၢ်ယွၤ အအိၣ်လီၤ.
၁၄ တၢ်ကီတၢ်ခဲ ခံခါတခါန့ၣ်+ လဲၤပူၤကွံာ်လံ. ကွၢ်မီၤ, တၢ်ကီတၢ်ခဲသၢခါတခါ ဟဲဝဲချ့မးလီၤ.
၁၅ မူခိၣ်ကလူး နွံဂၤတဂၤ အူထီၣ်အကွဲၤလီၤ.+ ဒီးတၢ်ကလုၢ်တဖၣ်လၢမူခိၣ်န့ၣ် သီၣ်ထီၣ်ဖးဒိၣ် ဒီးတဲဝဲလၢ “ဟီၣ်ခိၣ်အဘီမုၢ်န့ၣ် ကဲထီၣ်ပကစၢ်+ ဒီးအခရံာ်+ အဘီမုၢ်လံ. ဒီးအဝဲကပၢတၢ် ဒ်စီၤပၤအသိး လီၤထူလီၤယိာ်လီၤ.”+
၁၆ ဒီးပှၤသူၣ်က့သးပှၢ် ၂၄ ဂၤလၢ+ အဆ့ၣ်နီၤဝဲလၢ အဝဲသ့ၣ် အလီၢ်ပစိာ်အလိၤလၢ ကစၢ်ယွၤအမဲာ်ညါန့ၣ် ထိၣ်လီၤပှီၤအသးဒီး ဘူၣ်ထီၣ်ဘါထီၣ် ကစၢ်ယွၤလီၤ.
၁၇ ဒီးအဝဲသ့ၣ် တဲဝဲလၢ “ယဟိဝၤယွၤ* လၢအမ့ၢ် သ့တၢ်လၢာ်ကစၢ်, ပှၤလၢအအိၣ်ဝဲ+ ဒီးလၢအအိၣ်ပာ်စၢၤဝဲတဂၤဧၢ, မ့ၢ်လၢနသူ နတၢ်စိတၢ်ကမီၤ လၢအဒိၣ်အယိာ် ဒီးစးထီၣ်ပၢတၢ်ဒ် စီၤပၤတဂၤအသိးအဃိ+ ပစံးဘျုးနၤလီၤ.
၁၈ ဘၣ်ဆၣ် ပှၤကလုာ်တဖၣ် သးဒိၣ်ထီၣ်တၢ် ဒီးနပာ်ဖျါထီၣ် နတၢ်သးဒိၣ်လီၤ. ဒီးတၢ်ဆၢကတီၢ်လၢ အဘၣ်တၢ်ပာ်ပနီၣ်အီၤန့ၣ် ဟဲတုၤလၢ တၢ်ကစံၣ်ညီၣ်ပှၤသံတဖၣ် ဒီးကဟ့ၣ်လီၤခိၣ်ဖးလၢ+ နကုၢ် လၢအမ့ၢ် ဝံတဖၣ်,+ ပှၤစီဆှံတဖၣ်, ပှၤလၢအပျံၤနမံၤ, ပှၤအဒိၣ်ဒီးပှၤအဆံးတဖၣ် ဒီးဒ်သိးကမၤဟးဂီၤ ပှၤလၢအမၤဟးဂီၤ ဟီၣ်ခိၣ်လီၤ.”+
၁၉ ဒီးကစၢ်ယွၤအတၢ်လုၢ်ဟံၣ် အတၢ်စီဆှံအလီၢ်လၢ အအိၣ်လၢမူခိၣ်န့ၣ် ဘၣ်တၢ်အိးထီၣ်အီၤ ဒီးတၢ်အၢၣ်လီၤအီလီၤအတလါ ဘၣ်တၢ်ထံၣ်န့ၢ်အီၤဖဲန့ၣ်လီၤ.+ ဒီးလီဝၢ်ဒံးကပီၤထီၣ်, တၢ်ကလုၢ်တဖၣ်သီၣ်ထီၣ်, လီသီၣ်ထီၣ်, ဟီၣ်ခိၣ်ဟူး ဒီးသူၣ်ဖးဒိၣ်လီၤဝဲလီၤ.
