လီၣ်ဖျါ ၁၇:၁-၁၈
-
တၢ်စံၣ်ညီၣ် “ဘၤဘူၤလိၣ်ဖးဒိၣ်” (၁-၁၈)
-
ပိာ်မုၣ်ဆါလီၤအီၣ်သးတဂၤလၢ အဆ့ၣ်နီၤလၢ ဆၣ်ဖိကီၢ်ဖိလၢ အအၢလၢ အလွဲၢ်ဂီၤဆှုၣ်ကလာ်တဒု အလိၤ (၁-၃)
-
ဆၣ်ဖိကီၢ်ဖိလၢ အအၢတဒုလၢ ‘အအိၣ်ဝဲလၢညါန့ၣ် တအိၣ်လၢၤဘၣ် ဘၣ်ဆၣ် အကဟဲထီၣ်လၢ တၢ်ပူၤယိာ်’ (၈)
-
တၢ်အနၢၤအဘိတဆံ ကဒုးတၢ်ဒီးသိဖိ (၁၂-၁၄)
-
တၢ်အနၢၤအဘိတဆံ ကသးဟ့ဝဲ ပိာ်မုၣ်ဆါလီၤအီၣ်သး (၁၆, ၁၇)
-
၁၇ မူခိၣ်ကလူးနွံဂၤလၢ အအိၣ်ဒီး လီခီဖျၢၣ်နွံဖျၢၣ်+ အကျါတဂၤ ဟဲတဲဘၣ်ယၤလၢ “ဟဲ, ယကဒုးနဲၣ်နၤ တၢ်စံၣ်ညီၣ်လၢ အကဘၣ် ပိာ်မုၣ်ဆါလီၤအီၣ်သး* တဂၤလၢ အဆ့ၣ်နီၤလၢ ထံအါအါဂီၢ်ဂီၢ် အဖီခိၣ်လီၤ.+
၂ ဟီၣ်ခိၣ်အစီၤပၤတဖၣ် မၤကမၣ်မုၣ်ကမၣ်ခွါဒီးအီၤ+ ဒီးပှၤဟီၣ်ခိၣ်ဖိတဖၣ် အီမူၤအသးလၢ အတၢ်မၤ ကမၣ်မုၣ်ကမၣ်ခွါ*+ အစပံးထံလီၤ.”
၃ ဒီးမူခိၣ်ကလူးတဂၤန့ၣ် စိာ်ကွံာ်ယၤ ဆူပှၢ်မုၢ်ကနၢအပူၤ ခီဖျိလၢ သးစီဆှံအတၢ်စိတၢ်ကမီၤလီၤ. ဒီးယထံၣ်ဘၣ် ပိာ်မုၣ်တဂၤ ဆ့ၣ်နီၤလၢ ဆၣ်ဖိကီၢ်ဖိလၢ အအၢလၢ အလွဲၢ်ဂီၤဆှုၣ်ကလာ်တဒု အလိၤလီၤ. ဒီးဆၣ်ဖိကီၢ်ဖိလၢ အအၢတဒုအံၤအလိၤ အိၣ်ပှဲၤဝဲဒီး တၢ်အမံၤတဖၣ်လၢ အကတိၤထီဒါကစၢ်ယွၤ ဒီးအအိၣ်ဝဲဒီး အခိၣ်သၣ်ဃံနွံဖျၢၣ် ဒီးအနၢၤအိၣ်ဝဲ အဘိတဆံလီၤ.
၄ ဒီးပိာ်မုၣ်တဂၤန့ၣ် ကူကၤဝဲ တၢ်ကူတၢ်ကၤလၢအလုး+ ဒီးအဂီၤဆှုၣ်ကလာ်လီၤ. အဝဲ မၤဃံမၤလၤထီၣ်အသးလၢ ထူဒီးလၢၢ်လၢ အလုၢ်ဒိၣ်ပှ့ၤဒိၣ် ဒီးပလဲတဖၣ်လီၤ.+ ဒီးခွးထူလၢ အပှဲၤဝဲဒီး တၢ်လၢအလီၤသးဘၣ်အၢတဖၣ် ဒီးတၢ်လၢအဘၣ်အၢဘၣ်သီ ဘၣ်ဃးဒီးအတၢ်မၤ ကမၣ်မုၣ်ကမၣ်ခွါန့ၣ် အိၣ်ဝဲလၢ အစုပူၤလီၤ.
၅ လၢအမဲာ်တူၢ်ခိၣ်အလိၤန့ၣ် မံၤအိၣ်ကွဲးလီၤအသး လၢအမ့ၢ် တၢ်ခူသူၣ်တခါလၢ အတဲဝဲလၢ “ဘၤဘူၤလိၣ်ဖးဒိၣ် လၢအမ့ၢ် ပိာ်မုၣ်ဆါလီၤအီၣ်သးတဖၣ်အမိၢ်+ ဒီးဟီၣ်ခိၣ် အတၢ်လီၤသးဘၣ်အၢတဖၣ် အမိၢ်လီၤ.”+
၆ ဒီးယထံၣ်ဘၣ်လၢ ပိာ်မုၣ်တဂၤန့ၣ် အီမူၤအသးလၢ ပှၤစီဆှံတဖၣ်အသွံၣ် ဒီးယ့ၣ်ၡူး+ အပှၤအုၣ်အသးတဖၣ် အသွံၣ်လီၤ.
ဖဲယထံၣ်အီၤအခါ ယကမၢကမၣ်ဒိၣ်မးလီၤ.
၇ အဃိ မူခိၣ်ကလူး တဲဘၣ်ယၤလၢ “ဘၣ်မနုၤအဃိ နကမၢကမၣ်လဲၣ်. ယကတဲဘၣ်နၤ တၢ်ခူသူၣ် ဘၣ်ဃးဒီးပိာ်မုၣ်တဂၤအံၤ+ ဒီးဘၣ်ဃးဒီး ဆၣ်ဖိကီၢ်ဖိလၢ အအၢတဒုလၢ အအိၣ်ဒီး အခိၣ်သၣ်ဃံနွံဖျၢၣ် ဒီးအနၢၤအိၣ်ဝဲ အဘိတဆံလၢ+ ပိာ်မုၣ်ဆ့ၣ်နီၤလၢအလိၤန့ၣ် အဂ့ၢ်လီၤ.
၈ ဆၣ်ဖိကီၢ်ဖိလၢ အအၢတဒုလၢ နထံၣ်ဘၣ်အီၤန့ၣ် လၢညါအအိၣ်ဝဲ ဒီးအတအိၣ်လၢၤဘၣ်. ဘၣ်ဆၣ် အကဟဲထီၣ်လၢ တၢ်ပူၤယိာ်န့ၣ်+ ဘူးထီၣ်လံ. ဒီးအကဘၣ်တၢ်မၤဟးဂီၤကွံာ်အီၤလီၤ. စးထီၣ်ဖဲ တချုး ပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ် လံၤလံၤ* ပှၤလၢအမံၤ တဘၣ်တၢ်ကွဲးအသးလၢ လံာ်မူအပူၤဘၣ်န့ၣ်+ ဖဲအဝဲသ့ၣ် ထံၣ်ဘၣ်လၢ ဆၣ်ဖိကီၢ်ဖိလၢ အအၢအံၤန့ၣ် လၢညါအအိၣ်ဝဲ ဒီးအတအိၣ်လၢၤဘၣ် ဘၣ်ဆၣ် အကအိၣ်ဖျါထီၣ်ကဒီးဝဲအခါ အဝဲသ့ၣ် ကကမၢကမၣ်ဝဲ ဒိၣ်မးလီၤ.
၉ “ဒ်သိးပှၤကနၢ်ပၢၢ် တၢ်ဂ့ၢ်အံၤအဂီၢ် ပှၤလိၣ်ဘၣ်တၢ်ကူၣ်သ့လီၤ. အခိၣ်သၣ်ဃံ နွံဖျၢၣ်န့ၣ်+ အခီပညီမ့ၢ်ဝဲ ကစၢၢ်နွံဖျၢၣ်လၢ ပိာ်မုၣ်ဆ့ၣ်နီၤဝဲလၢ အဖီခိၣ်လီၤ.
၁၀ ဒီးအခီပညီမ့ၢ်ဝဲ စီၤပၤနွံဂၤလီၤ. ယဲၢ်ဂၤန့ၣ် လီၤလံ. ဒီးတဂၤန့ၣ်အိၣ်ဒံး ဒီးလၢအဝဲတဂၤန့ၣ် ဟဲတတုၤဒံးဘၣ်. ဘၣ်ဆၣ် ဖဲအဝဲဟဲတုၤအခါ အကအိၣ်ဘၣ်ဝဲ ထဲတစိၢ်ဖိလီၤ.
၁၁ ဒီးဆၣ်ဖိကီၢ်ဖိလၢ အအၢလၢ လၢညါအအိၣ်ဝဲ ဒီးအတအိၣ်လၢၤဘၣ်န့ၣ်+ မ့ၢ်စ့ၢ်ကီး စီၤပၤဃိးဂၤတဂၤ ဘၣ်ဆၣ် အဟဲအိၣ်ထီၣ် ခီဖျိလၢ စီၤပၤနွံဂၤအံၤအဃိ ဒီးအကဘၣ် တၢ်မၤဟးဂီၤကွံာ်အီၤလီၤ.
၁၂ “တၢ်အနၢၤ အဘိတဆံလၢ နထံၣ်အီၤန့ၣ် အခီပညီမ့ၢ်ဝဲ စီၤပၤအဂၤတဆံ လၢအတဒိးန့ၢ်ဘၣ် ဘီမုၢ်ဒံးဘၣ်. ဘၣ်ဆၣ်အဝဲသ့ၣ် ကဒိးန့ၢ်ဘၣ် တၢ်ခွဲးတၢ်ယာ်လၢ အကပၢတၢ် ဒ်စီၤပၤတဖၣ်အသိး ဃုာ်ဒီး ဆၣ်ဖိကီၢ်ဖိလၢ အအၢတဒုန့ၣ် တနၣ်ရံၣ်လီၤ.
၁၃ စီၤပၤတဖၣ်အံၤ အိၣ်ဒီးတၢ်တိာ်ပာ် တမံၤဃီလီၤ. အဃိ အဝဲသ့ၣ် အတၢ်စိတၢ်ကမီၤ ဒီးအတၢ်ခွဲးတၢ်ယာ်လၢ အကပၢတၢ်န့ၣ် အကဟ့ၣ်လီၤဝဲလၢ ဆၣ်ဖိကီၢ်ဖိလၢ အအၢတဒုန့ၣ် အအိၣ်လီၤ.
၁၄ စီၤပၤတဖၣ်အံၤ ကဒုးတၢ်ဒီးသိဖိလီၤ.+ ဘၣ်ဆၣ် သိဖိန့ၣ် မ့ၢ်ကစၢ်တဖၣ် အကစၢ် ဒီးစီၤပၤတဖၣ် အစီၤပၤအဃိ+ သိဖိကမၤနၢၤ အဝဲသ့ၣ်လီၤ.+ တကးဒံးဘၣ် ပှၤလၢအအိၣ်ဒီးသိဖိ လၢအမ့ၢ် ပှၤလၢ အဘၣ်တၢ်ကိးန့ၢ်အီၤ ဒီးဘၣ်တၢ်ဃုထၢထီၣ်အီၤ ဒီးအသးတီတဖၣ်န့ၣ် ကမၤနၢၤတၢ် စ့ၢ်ကီးလီၤ.”+
၁၅ အဝဲတဲဘၣ်ယၤလၢ “ထံတဖၣ်လၢ နထံၣ်အီၤ ဖဲပိာ်မုၣ်ဆါလီၤအီၣ်သးတဂၤ ဆ့ၣ်နီၤဝဲလၢ အဖီခိၣ်န့ၣ် အခီပညီမ့ၢ်ဝဲ ပှၤအဒူၣ်တဖၣ်, ပှၤဂီၢ်မုၢ်တဖၣ်, ပှၤကလုာ်တဖၣ် ဒီးပှၤတဲတၢ်အကျိာ်တဖၣ်လီၤ.+
၁၆ ဆၣ်ဖိကီၢ်ဖိလၢ အအၢတဒု+ ဒီးအနၢၤအဘိတဆံ+ လၢနထံၣ်ဘၣ်အီၤန့ၣ် ကသးဟ့ဝဲ ပိာ်မုၣ်ဆါလီၤအီၣ်သးတဂၤအံၤ,+ ကဂုာ်န့ၢ်ဆူၣ် အတၢ်ဖိတၢ်လံၤခဲလၢာ်, ကဒုးအိၣ်ဘ့ၣ်ဆ့အီၤ, ကအီၣ်ကွံာ်အညၣ် ဒီးကဒွဲၣ်အူထီၣ်အီၤလၢ မ့ၣ်အူလၢာ်လၢာ်ဆ့ဆ့လီၤ.+
၁၇ အဝဲသ့ၣ် ကမၤဝဲဒ်န့ၣ် မ့ၢ်လၢ ကစၢ်ယွၤကထၢနုာ် တၢ်ကူၣ်တမံၤလၢ အဝဲသ့ၣ်အသးပူၤ ဒ်သိးအဝဲသ့ၣ် ကမၤလၢပှဲၤထီၣ် ကစၢ်ယွၤအတၢ်တိာ်ပာ်+ လၢအမ့ၢ်စ့ၢ်ကီး အဝဲသ့ၣ် အတၢ်တိာ်ပာ် တမံၤဃီအဂီၢ်လီၤ. ဒ်သိးကကဲထီၣ်အသးဒ်န့ၣ်အဂီၢ် အဝဲသ့ၣ်ကဟ့ၣ်လီၤ အဘီမုၢ်အစိကမီၤလၢ ဆၣ်ဖိကီၢ်ဖိလၢ အအၢတဒုအအိၣ်+ တုၤလီၤလၢ ကစၢ်ယွၤ အတၢ်ကတိၤတဖၣ် လၢထီၣ်ပှဲၤထီၣ်ဝဲတစုလီၤ.
၁၈ ဒီးပိာ်မုၣ်လၢ+ နထံၣ်ဘၣ်အီၤတဂၤန့ၣ် အခီပညီမ့ၢ်ဝဲ ဝ့ၢ်ဖးဒိၣ်တဖျၢၣ်လၢ အအိၣ်ဒီးအဘီအမုၢ်လၢ ဟီၣ်ခိၣ်အစီၤပၤတဖၣ် အဖီခိၣ်လီၤ.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဃဲသဲမုၣ်ဖးဒိၣ်.”
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “စးထီၣ်လၢ တၢ်ဒုးအိၣ်ထီၣ်ဟီၣ်ခိၣ်.”
