လူၤကၣ် ၂၁:၁-၃၈
၂၁ ဖဲယ့ၣ်ၡူး ကွၢ်ထီၣ်တၢ်အခါ အဝဲထံၣ်ဝဲပှၤထူးပှၤတီၤတဖၣ် ထၢနုာ်လီၤဝဲ တၢ်မၤဘူၣ်လၢ တိၢ်မၤဘူၣ် အတလါတဖၣ်အပူၤလီၤ.+
၂ ဝံၤဒီးအဝဲထံၣ်ဝဲ မုၣ်ကမဲလၢအဖှီၣ်တဂၤ ထၢနုာ်လီၤဝဲ စ့ခံဘ့ၣ် လၢအလုၢ်အပှ့ၤ အိၣ်ထဲတစဲးဖိလီၤ.*+
၃ ဒီးယ့ၣ်ၡူးတဲဝဲလၢ “ယကတဲဘၣ်သုတီတီလၢ မုၣ်ကမဲလၢ အဖှီၣ်တဂၤအံၤ ထၢနုာ်တၢ်အါန့ၢ်ဒံး အဝဲသ့ၣ်ခဲလၢာ်လီၤ.+
၄ အဝဲသ့ၣ် ကိးဂၤဒဲး ဟံးန့ၢ်ဝဲ အတၢ်ထူးတၢ်တီၤ အဘျဲၣ်အစဲၢ်တဖၣ် ဒီးထၢနုာ်လီၤဝဲ တၢ်မၤဘူၣ်လီၤ. မ့မ့ၢ် မုၣ်ကမဲတဂၤအံၤ ဖှီၣ်ဒိၣ်မး သနာ်က့ အထၢနုာ်ဝဲ တၢ်ခဲလၢာ်လၢ အအိၣ်ဒီးအီၤလၢ အကလုၢ်အီၣ်လုၢ်အီ အသးသမူအဂီၢ်လီၤ.”+
၅ လၢခံ ဖဲပှၤတနီၤ တဲဝဲဘၣ်ဃး တၢ်လုၢ်ဟံၣ်အဂ့ၢ်လၢ အဘၣ် တၢ်မၤဃံမၤလၤအီၤလၢ လၢၢ်လၢအဃံလၤ ဒီးတၢ်လၢအဘၣ် တၢ်ဟ့ၣ်လုၢ်ထီၣ်အီၤလၢ ယွၤအဂီၢ်တဖၣ်အခါ+
၆ ယ့ၣ်ၡူး တဲဝဲလၢ “မုၢ်နံၤတဖၣ်ကဟဲဝဲလၢ တၢ်လၢသုထံၣ် ခဲအံၤတဖၣ်န့ၣ် အကဘၣ်တၢ်မၤ လီၤပှီၢ်ကွံာ်အီၤခဲလၢာ် ဒီးလၢၢ်တဖၣ်အံၤ တအိၣ်လၢ တဖျၢၣ်ဒီးတဖျၢၣ် အဖီခိၣ်လၢၤဘၣ်.”+
၇ ဝံၤဒီးအဝဲသ့ၣ်သံကွၢ်အီၤလၢ “သရၣ်ဧၢ, တၢ်သ့ၣ်တဖၣ်န့ၣ် ကမၤအသး ဆံးယံာ်လဲၣ်. ဒီးဖဲတၢ်သ့ၣ်တဖၣ်န့ၣ် ကကဲထီၣ်အခါ တၢ်ပနီၣ် ကအိၣ်ဒ်လဲၣ်.”+
၈ ယ့ၣ်ၡူးတဲဝဲလၢ “ဒ်သိး ပှၤသုတကွဲန့ၢ်လွဲန့ၢ်သု နီတဂၤတဂ့ၤအဂီၢ်+ ပလီၢ်သုသးတက့ၢ်. ပှၤအါဂၤ ကဟဲလၢယမံၤ ဒီးကတဲဝဲလၢ အမ့ၢ်ခရံာ် ဒီးကတဲဝဲလၢ ‘တၢ်ဆၢကတီၢ်န့ၣ် ဘူးထီၣ်လံ’ ဘၣ်ဆၣ် ပိာ်အဝဲသ့ၣ် အခံတဂ့ၤ.+
၉ တကးဒံးဘၣ် ဖဲသုနၢ်ဟူဘၣ် တၢ်ဒုးတၢ်ယၤအသီၣ် ဒီးတၢ်တၢထီၣ်တၢလီၤအခါ တဘၣ်ပျံၤတၢ်တဂ့ၤ. တၢ်သ့ၣ်တဖၣ်န့ၣ် ကဘၣ် ဟဲကဲထီၣ်ဆိအသး ဘၣ်ဆၣ် တၢ်အကတၢၢ်န့ၣ် တကဲထီၣ်အသး တဘျီဃီဒံးဘၣ်.”+
၁၀ ဝံၤဒီး ယ့ၣ်ၡူးတဲဘၣ် အဝဲသ့ၣ်လၢ “ပှၤကလုာ် တဒူၣ်ဒီးတဒူၣ် ကဒုးလိာ်အသး+ ဒီးဘီမုၢ်တဘ့ၣ် ဒီးတဘ့ၣ် ကဒုးလိာ်အသးလီၤ.+
၁၁ ဒီးဟီၣ်ခိၣ် ကဟူးဝဲဖးဒိၣ်, တၢ်သၣ်ဝံၤလီၤဒိ ဒီးတၢ်ဆါသံသတြိာ်တဖၣ်+ ကအိၣ်ထီၣ်ဝဲလၢ တၢ်လီၢ်တတီၤ ဝံၤတတီၤ ဒီးပှၤကထံၣ်ဘၣ် တၢ်လၢ အလီၤပျံၤလီၤဖုးတဖၣ် ဒီးတၢ်ပနီၣ်ဖးဒိၣ်တဖၣ် ကဟဲကဲထီၣ်အသးလၢ မူခိၣ်လီၤ.
၁၂ “ဘၣ်ဆၣ် တချုးလၢ တၢ်သ့ၣ်တဖၣ်အံၤခဲလၢာ် ကဲထီၣ်အသးဒံးဘၣ်န့ၣ် ပှၤကဖီၣ်သုဒီး မၤအၢမၤနးသု,+ ကဟ့ၣ်လီၤကွံာ်သုလၢ ဘူၣ်ဘျီၣ်ပူၤ ဒီးကထၢနုာ်သုလၢ ဃိာ်ပူၤလီၤ. ပှၤကလဲၤကိးသုလၢ စီၤပၤတဖၣ် ဒီးပဒိၣ်ပပှၢ်တဖၣ် အမဲာ်ညါ လၢယမံၤအဃိလီၤ.+
၁၃ အဃိ သုကအိၣ်ဒီး တၢ်ခွဲးတၢ်ယာ်လၢ သုကအုၣ်သုသးအဂီၢ်လီၤ.
၁၄ တလိၣ်လၢ သုကတဲလိပာ်စၢၤသုသးလၢ သုကတဲဆၢက့ၤ အဝဲသ့ၣ် ဒ်လဲၣ်ဒ်လဲၣ်ဘၣ်.+
၁၅ ယကဟ့ၣ်လီၤသု တၢ်ကတိၤဒီးတၢ်ကူၣ်သ့ အဃိပှၤလၢ အထီဒါသုမ့ၢ်ပာ်ဖှိၣ်ထီၣ် အသးကိးဂၤဒဲး သနာ်က့ အဝဲသ့ၣ် ထီဒါသုမ့ၢ်ဂ့ၤ, တဲအါသုမ့ၢ်ဂ့ၤ တနၢၤဘၣ်.+
၁၆ တကးဒံးဘၣ် သုမိၢ်သုပၢ်, သုဒီပုၢ်ဝဲၢ်တဖၣ်, သုဘူးသုတံၢ်တဖၣ် ဒီးသုသကိးတဖၣ်ဒၣ်လဲာ် ကဟ့ၣ်လီၤကွံာ်သု ဒီးအဝဲသ့ၣ် ကမၤသံသုတနီၤ+
၁၇ ဒီးပှၤခဲလၢာ် ကသးဟ့သုလၢ ယမံၤအဃိလီၤ.+
၁၈ ဘၣ်ဆၣ် သုခိၣ်ဆူၣ်တဘိဒၣ်လဲာ် တလီၤမၢ်ဘၣ်.+
၁၉ ခီဖျိလၢ သုတၢ်တူၢ်န့ၢ်ခီၣ်ကဲအဃိ သုကအုၣ်က့ၤခီၣ်က့ၤ သုသးသမူလီၤ.+
၂၀ “ဘၣ်ဆၣ် ဖဲသုထံၣ် သုးမုၢ်သံၣ်ဘိတဖၣ် ဆီလီၤအသးဒီး ကဝီၤဃာ် ဝ့ၢ်ယရူၤၡလ့ၣ်အခါ+ သ့ၣ်ညါလၢ တၢ်မၤဟးဂီၤအီၤ အဆၢကတီၢ် ဘူးထီၣ်လံန့ၣ်တက့ၢ်.+
၂၁ ဖဲန့ၣ်အခါ မ်ပှၤအိၣ်လၢ ယူဒၤအဟီၣ်ကဝီၤအပူၤန့ၣ် လဲၤဃ့ၢ်ထီၣ်လၢ ကစၢၢ်ကလိတဖၣ်တက့ၢ်.+ ဒီးပှၤလၢအအိၣ်လၢ ယရူၤၡလ့ၣ်အပူၤန့ၣ် မ်အဟးထီၣ်ကွံာ်တက့ၢ်. ဒီးပှၤလၢအအိၣ်လၢ ခိခိၣ်န့ၣ် တဘၣ်နုာ်လီၤလၢ ယရူၤၡလ့ၣ်အပူၤတဂ့ၤ.
၂၂ မုၢ်နံၤတဖၣ်အံၤ မ့ၢ်တၢ်ဟ့ၣ်ကၣ်တၢ် အမုၢ်နံၤ ဒ်သိး တၢ်ကွဲးအသးခဲလၢာ် ကလၢထီၣ်ပှဲၤထီၣ် အဂီၢ်လီၤ.
၂၃ လၢမုၢ်နံၤတဖၣ်န့ၣ် အတီၢ်ပူၤ တၢ်ကီတၢ်ခဲဖးဒိၣ် ကဟဲဘၣ်ကီၢ်အံၤဒီး တၢ်သးဒိၣ်ထီၣ် ကဟဲဘၣ် ပှၤတဖၣ်အံၤအဃိ ပှၤမိၢ်ဒၢ ဒီးပှၤလၢအဒုးအီအဖိနုၢ်န့ၣ် ကဘၣ်ကီဘၣ်ခဲလီၤ.+
၂၄ ဒီးပှၤကမၤသံ အဝဲသ့ၣ်လၢနး ဒီးပှၤကဖီၣ်န့ၢ် အဝဲသ့ၣ် ဒီးလဲၤကိးဝဲလၢ ထံကီၢ်အဂၤခဲလၢာ်လီၤ.+ ဒီးပှၤကလုာ်တဖၣ် ကယီၢ်တံၢ် ယရူၤၡလ့ၣ်တုၤလီၤလၢ တၢ်ဆၢကတီၢ်လၢ အဘၣ် တၢ်ပာ်ပနီၣ်အီၤလၢ ပှၤကလုာ်တဖၣ်အဂီၢ်* လၢထီၣ်ပှဲၤထီၣ်ဝဲ တစုလီၤ.+
၂၅ “တကးဒံးဘၣ် တၢ်ပနီၣ်တဖၣ် ကအိၣ်ထီၣ်လၢ မုၢ်, လါ ဒီးဆၣ်တဖၣ်+ အလိၤလီၤ. ဒီးလၢဟီၣ်ခိၣ်န့ၣ် မ့ၢ်လၢ ပီၣ်လဲၣ်ကသီၣ်ဝဲ ဒီးဟူးဝးဝဲအဃိ ပှၤကလုာ်တဖၣ် ကသူၣ်ကိၢ်သးဂီၤတၢ် ဒီးအခိၣ်နူာ် ကဘံဘူဝဲလီၤ.
၂၆ ဒီးမ့ၢ်လၢ မူခိၣ်အစိကမီၤတဖၣ် ကဘၣ် တၢ်မၤဟူးမၤဝးအီၤအဃိ ပှၤကဘၣ်ယိၣ်တၢ် ဘၣ်ဃးဒီး တၢ်လၢကမၤအသးလၢ ဟီၣ်ခိၣ်ချၢ ဒီးကပျံၤတၢ် တုၤဒၣ်လဲာ် ကသးပ့ၤနီၣ်လီၤအသးလီၤ.
၂၇ ဒီးအဝဲသ့ၣ် ကထံၣ်ဘၣ် ပှၤကညီဖိခွါအံၤ+ ဟဲဝဲလၢ တၢ်အၢၣ်အကျါ ပှဲၤဒီးတၢ်စိတၢ်ကမီၤ ဒီးတၢ်လၤတၢ်ကပီၤ ဒိၣ်ဒိၣ်မုၢ်မုၢ်လီၤ.+
၂၈ ဘၣ်ဆၣ် ဖဲတၢ်သ့ၣ်တဖၣ်အံၤ စးထီၣ် ကဲထီၣ်အသးအခါ တၢ်အုၣ်က့ၤခီၣ်က့ၤသု ဘူးထီၣ်လံအဃိ ဆၢထၢၣ်ဘျၢဘျၢ ဒီးမိာ်ထီၣ် သုခိၣ်တက့ၢ်.”
၂၉ ဒီးယ့ၣ်ၡူး တဲဘၣ်အဝဲသ့ၣ် တၢ်ကတိၤဒိ တခါလၢ “ပာ်သူၣ်ပာ်သး ချၢၣ်ဒၢထူၣ် ဒီးသ့ၣ်အဂၤ ခဲလၢာ်တက့ၢ်.+
၃၀ ဖဲသ့ၣ်တဖၣ်အံၤ ဒိးထီၣ်အခါ သုထံၣ်ဘၣ်လၢ သုနီၢ်ကစၢ်ဒီးသ့ၣ်ညါလၢ တၢ်ကိၢ်ခါ ဘူးကတုၤလံ.
၃၁ ဒ်န့ၣ်အသိး သုစ့ၢ်ကီး ဖဲသုထံၣ်ဘၣ် တၢ်သ့ၣ်တဖၣ်န့ၣ် မၤအသးအခါ သုကဘၣ်သ့ၣ်ညါလၢ ကစၢ်ယွၤအဘီအမုၢ်န့ၣ် ဘူးထီၣ်လံ.
၃၂ ယကတဲဘၣ်သုတီတီလၢ ပှၤတစိၤအံၤ တချုး သံလၢာ်ဒံးဘၣ်န့ၣ် တၢ်သ့ၣ်တဖၣ်န့ၣ် ကမၤအသးခဲလၢာ်လီၤ.+
၃၃ မူခိၣ်ဒီးဟီၣ်ခိၣ် ကဒံကွံာ်ဝဲ ဘၣ်ဆၣ် ယတၢ်ကတိၤတဖၣ်န့ၣ် လ့ၤတက့ၤ တဒံကွံာ်ဝဲဘၣ်.+
၃၄ “ဘၣ်ဆၣ် ဒ်သိး တၢ်အီၣ်တၢ်အီတၢ် အါတလၢ+ ဒီးတၢ်အိၣ်မူ အတၢ်ကိၢ်တၢ်ဂီၤတဖၣ်+ သုတထုးဃၢ သုတဂ့ၤအဂီၢ်န့ၣ် ပလီၢ်သုသးတက့ၢ်. မ့တမ့ၢ်ဘၣ်န့ၣ် လၢတၢ်တဆိကမိၣ်ဘၣ်အပူၤ မုၢ်နံၤအဝဲန့ၣ် ကဟဲဘၣ်သု သတူၢ်ကလာ်
၃၅ ဒ်ပျံၤသကွီၤအသိးလီၤ.+ ဒီးမုၢ်နံၤအဝဲန့ၣ် ကဟဲဘၣ်ဝဲ ပှၤလၢအအိၣ်လၢ ဟီၣ်ခိၣ်ချၢ ခဲလၢာ်လီၤ.
၃၆ အဃိ ဒ်သိးသုလဲၤခီဖျိ တၢ်သ့ၣ်တဖၣ်အံၤကန့ၢ် ဒီးဆၢထၢၣ်လၢ ပှၤကညီဖိခွါအံၤ အမဲာ်ညါကန့ၢ်အဂီၢ်+ အိၣ်ပလီၢ်သး+ ဒီးဃ့ကညးယွၤ ထီဘိတက့ၢ်.”+
၃၇ ဒီးလၢမုၢ်ဆါခီန့ၣ် ယ့ၣ်ၡူးလဲၤသိၣ်လိတၢ်လၢ တၢ်လုၢ်ဟံၣ်အပူၤ မ့မ့ၢ် လၢမုၢ်နၤခီန့ၣ် အဝဲလဲၤအိၣ်ဝဲလၢ ကစၢၢ်သ့ၣ်စၤယံး အလိၤလီၤ.
၃၈ ဒီးပှၤခဲလၢာ် ဟဲလၢအအိၣ် လၢဂီၤခီဂီၤဂီၤ ဒ်သိး ကဒိကနၣ်အီၤလၢ တၢ်လုၢ်ဟံၣ်အပူၤလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “လဲးတၤခံဘ့ၣ်.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “ပှၤတခီဘီမုၢ်ဖိ.”
