ဧိၤဘါဒယၤ ၁:၁-၂၁
၁ အဝဲအံၤ မ့ၢ်ဝဲ စီၤဧိၤဘါဒယၤ* အတၢ်ထံၣ်လၢညါခီဒီးတၢ်လၢ တၢ်ပၢကစၢ် ယဟိဝၤယွၤတဲဝဲ ဘၣ်ဃးဒီး ကီၢ်အဒိၣ် အဂ့ၢ်လီၤ.+
စီၤဧိၤဘါဒယၤ တဲဝဲလၢ “ပနၢ်ဟူဘၣ် တၢ်ကစီၣ်လၢ အဟဲလၢ ယဟိဝၤယွၤအအိၣ်ဒီးအဝဲဆှၢလီၤ ပှၤခၢၣ်စးတၢ်လၢ ပှၤကလုာ်တဖၣ် အအိၣ် ဒ်သိး အကတဲဝဲလၢ‘ဂဲၤဆၢထၢၣ်, ပကကတဲာ်ကတီၤထီၣ်ပသးလၢ ပကလဲၤဒုး ပှၤအဒိၣ်ဖိ အဂီၢ်လီၤ.’”+
၂ ကစၢ်ယွၤတဲဝဲလၢ “ယမၤကဲထီၣ်သုလၢ ပှၤလၢအရ့တဒိၣ်ဘၣ်လၢ ပှၤကလုာ်တဖၣ်အကျါလံ.
ပှၤဆိမိၣ်ဆံးသု သပှၢ်ကတၢၢ်လီၤ.+
၃ သုတၢ်ပာ်ထီၣ်ထီသးန့ၣ် လီန့ၢ်သုလံ.+
ပှၤလၢအအိၣ်အဆိးလၢ လ့ဖးထီဒီးလၢတၢ်လီၢ်ထီၣ်ထီဧၢ, သုတဲလၢသုသးပူၤလၢ‘မတဂၤ ကထုးလီၤပှၤလၢ ဟီၣ်ခိၣ်လိၤလဲၣ်.’”
၄ ယဟိဝၤယွၤ တဲဝဲလၢ “သုမ့ၢ်တ့ထီၣ်သုလီၢ်လၢ တၢ်လီၢ်ထီၣ်ထီ ဒ်သိးဒီး လံာ်ကြီကြာ်ဒီးသုမ့ၢ်ပာ်ထီၣ် သုသွံလၢ ဆၣ်တဖၣ်အကျါ သနာ်က့ယကထုးလီၤသု ဖဲန့ၣ်လီၤ.”
၅ “တၢ်ဟုၣ်တၢ်ဘျၣ် ဒီးတမျာ် မ့ၢ်ဟဲလၢနအိၣ် လၢမုၢ်နၤခီန့ၣ်အဝဲသ့ၣ် ကဟုၣ်ထဲ တၢ်လၢ အလီကီဝဲတဖၣ် တမ့ၢ်ဧီၤ.
ဒီးပှၤဒဲးစပံးသၣ်ဖိတဖၣ် မ့ၢ်ဟဲလၢ နအိၣ်န့ၣ်အဝဲသ့ၣ် ကပာ်တ့ၢ် စပံးသၣ်တနီၤဒံး, တမ့ၢ်ဧီၤ.+
(ဘၣ်ဆၣ် မ့မ့ၢ်သုန့ၣ် တၢ်ကမၤဟးဂီၤကွံာ်သု လၢာ်လၢာ်ဆ့ဆ့လီၤ.)
၆ ပှၤကဟးဃု သုဝဲ စီၤဧ့ၡီၤအစၢၤအသွဲၣ်တဖၣ် လီၤတံၢ်လီၤဆဲးဒီးအဝဲသ့ၣ် ကထံၣ်န့ၢ်ဝဲ သုတၢ်လုၢ်ဒိၣ်ပှ့ၤဒိၣ်လၢ သုပာ်ခူသူၣ်အီၤတဖၣ် ခဲလၢာ်ခဲဆ့လီၤ.
၇ ပှၤလၢအဖီၣ်လိာ်သးစုဒီးသုတဖၣ်န့ၣ် ကနီဟးထီၣ်သုလၢ အကီၢ်ပူၤဒီးအဝဲသ့ၣ် ကလီန့ၢ်သုလီၤ.
ပှၤလၢအအိၣ်ဃူအိၣ်ဖိးဒီးသုန့ၣ် ကမၤနၢၤသုဒီးပှၤလၢအအီၣ်ကိၣ်ဒီးသုန့ၣ် ကပာ်လီၤ ပျံၤသကွီၤလၢ သုဖီလာ်ဘၣ်ဆၣ် သုတသ့ၣ်ညါထွဲဘၣ်.”
၈ ယဟိဝၤယွၤ တဲဝဲလၢ“ဖဲတၢ်တနံၤန့ၣ် ယကမၤဟးဂီၤကွံာ် ပှၤလၢအကူၣ်တၢ်သ့ လၢကီၢ်အဒိၣ်အပူၤ+ဒီးယကမၤဟးဂီၤကွံာ် ပှၤလၢအသူၣ်ဆးသးဆးလၢ အအိၣ်လၢ စီၤဧ့ၡီၤ အကစၢၢ်ကလိတဖၣ် အကျါလီၤ.
၉ အိ ဝ့ၢ်တ့ၤမၣ်ဧၢ,+ နပှၤသုးဖိတဖၣ် ကပျံၤတၢ်+မ့ၢ်လၢ ပှၤလၢအအိၣ်လၢ စီၤဧ့ၡီၤ အကစၢၢ်ကလိကျါန့ၣ် ကဘၣ်တၢ်မၤသံအီၤကိးဂၤဒဲး အဃိလီၤ.+
၁၀ ဒီးမ့ၢ်လၢ သုမၤအၢမၤသီ သုဒီပုၢ်ဝဲၢ် စီၤယၤကိာ်အစၢၤအသွဲၣ်တဖၣ်အဃိ+သုကတူၢ်ဘၣ် တၢ်မဲာ်ဆှး+ဒီးသုကတုၤလၢ တၢ်ဟးဂီၤ လီၤထူလီၤယိာ်လီၤ.+
၁၁ မုၢ်တနံၤဖဲ ဒုၣ်ဒါတဖၣ်* က့ၤဖီၣ် သုဒီပုၢ်ဝဲၢ် အသုးမုၢ်အခါ+သုအိၣ်ဆၢထၢၣ်လၢ တၢ်ကပၤလီၤ.
ဒီးဖဲပှၤထံဂၤကီၢ်ဂၤဖိ လဲၤနုာ်လီၤလၢ အဝဲသ့ၣ် အဝ့ၢ်ပူၤ ဒီးဖးတၢ်လၢ+ တၢ်ဂုာ်န့ၢ်လၢ ဝ့ၢ်ယရူၤၡလ့ၣ် အပူၤအခါသုမၤထီၣ်သုသး ဒ်သိးဒီး ပှၤတဖၣ်န့ၣ်လီၤ.
၁၂ ဖဲသုဒီပုၢ်ဝဲၢ် ဘၣ်ကီဘၣ်ခဲ အမုၢ်နံၤန့ၣ် သုတကြၢးတဲဆဲးအဲးတၢ်ဘၣ်.+
ဖဲယူဒၤအပှၤဂီၢ်မုၢ် တုၤလၢ တၢ်ဟးဂီၤအနံၤန့ၣ် သုတကြၢး သူၣ်ဖှံသးညီဘၣ်.+
ဒီးဖဲအဝဲသ့ၣ် ဘၣ်ကိၢ်ဘၣ်ဂီၤအနံၤန့ၣ် သုတကြၢးတဲတၢ်လၢ တၢ်ပာ်ကဖၢလၢသး အပူၤဘၣ်.
၁၃ ဖဲယပှၤဂီၢ်မုၢ်တဖၣ် ဘၣ်ကီဘၣ်ခဲ အမုၢ်နံၤန့ၣ် သုတကြၢး နုာ်လီၤလၢ အဝဲသ့ၣ် အဝ့ၢ်ပူၤဘၣ်.+
ဖဲအဝဲသ့ၣ် ဘၣ်ကီဘၣ်ခဲ အမုၢ်နံၤန့ၣ် သုတကြၢးတဲဆဲးအဲးတၢ် လၢ အဝဲသ့ၣ် ဘၣ်နးဘၣ်ဖှီၣ် အဃိဘၣ်.
ဒီးဖဲအဝဲသ့ၣ် ဘၣ်ကီဘၣ်ခဲ အမုၢ်နံၤန့ၣ် သုတကြၢး ဂုာ်န့ၢ် အဝဲသ့ၣ် အတၢ်ထူးတၢ်တီၤတဖၣ်ဘၣ်.+
၁၄ သုတကြၢး ဆၢထၢၣ်လၢကျဲပူၤ ဒ်သိး ကမၤသံ အဝဲသ့ၣ် လၢအဃ့ၢ်ပူၤဖျဲးအသးန့ၣ်ဘၣ်.+
ဒီးဖဲအဝဲသ့ၣ် ဘၣ်ကိၢ်ဘၣ်ဂီၤ အမုၢ်နံၤန့ၣ် သုတကြၢးဟ့ၣ်လီၤကွံာ် ပှၤလၢအပူၤဖျဲးမူဒံးတဖၣ် လၢဒုၣ်ဒါတဖၣ် အစုပူၤဘၣ်.+
၁၅ မုၢ်နံၤလၢ ယဟိဝၤယွၤ ကစံၣ်ညီၣ် ပှၤကလုာ်တဖၣ်ခဲလၢာ်န့ၣ် ဘူးထီၣ်လံ.+
ဒ်သုမၤတ့ၢ်အသိး တၢ်ကကဲထီၣ်အသးဒီးသု ဒ်န့ၣ်စ့ၢ်ကီးလီၤ.+
ဒီးတၢ်လၢသုမၤပှၤဂၤတဖၣ်န့ၣ် ကက့ၤဘၣ်က့ၤသုလီၤ.
၁၆ ဒ်သုအီဘၣ် စပံးထံလၢ ယကစၢၢ် စီဆှံအလိၤအသိးန့ၣ်ပှၤကလုာ်တဖၣ် ကအီဘၣ်ဝဲ ယတၢ်သးဒိၣ် ဒ်စပံးထံအသိး ထီဘိလီၤ.+
အဝဲသ့ၣ် ကအီဘၣ်ဝဲ ယတၢ်သးဒိၣ် ဒီးကယူၢ်လီၤဘၣ်ဝဲ သပှၢ်ကတၢၢ်လီၤ.
ဖဲန့ၣ်န့ၣ် အကလီၤဂာ်ဒ် အဝဲသ့ၣ်တအိၣ်မူဘၣ် နီတဘျီဘၣ်အသိးလီၤ.
၁၇ ဘၣ်ဆၣ် ယပှၤဂီၢ်မုၢ်လၢ အပူၤဖျဲးထီၣ်န့ၣ် ကအိၣ်လၢကစၢၢ်စံယိၣ်+ဒီးကစၢၢ်စံယိၣ်န့ၣ် ကကဲထီၣ် တၢ်စီဆှံလီၤ.+
ဒီးစီၤယၤကိာ် အစၢၤအသွဲၣ်န့ၣ် ကန့ၢ်ဘၣ်က့ၤဝဲ တၢ်လၢအမ့ၢ် အဝဲသ့ၣ် အတၢ်လီၤ.+
၁၈ စီၤယၤကိာ် အစၢၤအသွဲၣ်တဖၣ်န့ၣ် ကလီၤဂာ်ဒ်သိးဒီး မ့ၣ်အူဒီးစီၤယိၤသး အစၢၤအသွဲၣ်တဖၣ်န့ၣ် ကလီၤဂာ်ဒ်သိးဒီး မ့ၣ်အူလၣ်မ့မ့ၢ် စီၤဧ့ၡီၤ အစၢၤအသွဲၣ်တဖၣ်န့ၣ် ကလီၤဂာ်ဒ်သိးဒီး လီၢ်ဘိလီၤ.*
အဝဲသ့ၣ် ကဒွဲၣ်အူအီၣ်ကွံာ် စီၤဧ့ၡီၤ အစၢၤအသွဲၣ်ဒီးစီၤဧ့ၡီၤ အစၢၤအသွဲၣ် တမူဝဲ နီတဂၤလၢၤဘၣ်,+မ့ၢ်လၢ ယဟိဝၤယွၤ တဲပာ်စၢၤဝဲလံ အဃိလီၤ.
၁၉ အဝဲသ့ၣ် ကမၤန့ၢ်ဝဲ တၢ်လီၢ်လၢနဲကဲၤ ဒီးစီၤဧ့ၡီၤ အကစၢၢ်ကလိတဖၣ်+ဒီးကမၤန့ၢ်ဝဲ ၡ့ဖလၣ် ဒီးပှၤဖလ့ၡသးဖိ အတၢ်လီၢ်လီၤ.+
ဒီးအဝဲသ့ၣ် ကမၤန့ၢ်ဝဲ အ့ဖရဲၣ် အတၢ်ပျီ ဒီးၡၤမရံ အတၢ်ပျီလီၤ.+
ဒီးဘံၣ်ယၤမံၣ်အဒူၣ် ကမၤန့ၢ်ဝဲ ကံးလဧးအဟီၣ်ကဝီၤလီၤ.
၂၀ အံၣ်စရ့လးအပှၤဂီၢ်မုၢ် လၢအမ့ၢ် ပှၤလၢအအိၣ်လၢ တၢ်သူၣ်ထီၣ်လၢအကျၢၤ+ ဒီးဘၣ်တၢ်က့ၤဖီၣ်အီၤတဖၣ်န့ၣ်ကန့ၢ်ဘၣ်ဝဲ ပှၤကနၤဧၣ်ဖိတဖၣ်အကီၢ် တုၤလီၤလၢ ဝ့ၢ်စၤရဖၤသးလီၤ.+
ဒီးပှၤလၢအိၣ်လၢ ဝ့ၢ်ယရူၤၡလ့ၣ်လၢ အဘၣ်တၢ်က့ၤဖီၣ်အီၤ ဒီးအအိၣ်လၢ စၤရဖးသး အဟီၣ်ကဝီၤန့ၣ် ကမၤန့ၢ်ဝဲ နဲကဲၤ အဝ့ၢ်တဖၣ်လီၤ.+
၂၁ ပှၤလၢအမၤပူၤဖျဲးတၢ်တဖၣ်န့ၣ် ကလဲၤထီၣ်လၢ ကစၢၢ်စံယိၣ်ဒ်သိးကစံၣ်ညီၣ် ပှၤလၢအအိၣ်လၢ စီၤဧ့ၡီၤ အကစၢၢ်ကလိတဖၣ်အကျါ+ဒီးယဟိဝၤယွၤ ကပၢတၢ် ဒ်စီၤပၤအသိးလီၤ.”+
တၢ်ဂ့ၢ်အဘျဲၣ်တဖၣ်
^ အခီပညီမ့ၢ်ဝဲ “ယဟိဝၤ အခ့အပှၤ.”
^ အခီပညီလိၤလိၤ “ပှၤစီစၣ်တဖၣ်.”
^ မ့ၢ်ဝဲ လီၢ်ခိၣ်ဆၢၣ်.
