ဧ့စြၤ ၁:၁-၁၁
၁ ဒ်သိး ယဟိဝၤယွၤ အတၢ်ကတိၤ ခီဖျိလၢ ဝံယံးရမံယၤ+ ကလၢထီၣ်ပှဲၤထီၣ်အဂီၢ် ယဟိဝၤယွၤ ထိၣ်ဟူးထိၣ်ဂဲၤထီၣ် ဖၢၡၢၣ်အစီၤပၤ ကိရ့ၣ်အသး ဒ်သိး အကဘိးဘၣ်သ့ၣ်ညါ တၢ်ဂ့ၢ်တမံၤလၢ အဘီမုၢ်ဒီဘ့ၣ်ညါ အပူၤလီၤ. တၢ်မၤအသးဒ်အံၤန့ၣ် ဘၣ်ဖဲဖၢၡၢၣ် အစီၤပၤကိရ့ၣ်+ ပၢတၢ်အဆိကတၢၢ်တနံၣ် အတီၢ်ပူၤလီၤ. ဒီးအတၢ်ဘိးဘၣ်သ့ၣ်ညါအံၤန့ၣ် အဝဲကွဲးလီၤစ့ၢ်ကီးဝဲ+ ဒ်လၢလာ်အံၤ အသိးလီၤ.
၂ “ကီၢ်ဖၢၡၢၣ် အစီၤပၤ ကိရ့ၣ်တဲဝဲလၢ ‘မူခိၣ်အကစၢ် ယဟိဝၤယွၤ ဟ့ၣ်လီၤယၤ ဘီမုၢ်ခဲလၢာ်လၢ ဟီၣ်ခိၣ်ချၢ+ ဒီးအဟ့ၣ်လီၤယၤ မူဒါလၢ ယကတ့ထီၣ်န့ၢ်အီၤ ဟံၣ်တဖျၢၣ်ဖဲ ဝ့ၢ်ယရူၤၡလ့ၣ်လၢ+ ယူဒၤ အဟီၣ်ကဝီၤ အပူၤလီၤ.
၃ သုဝဲ ကိးဂၤဒဲးလၢ အပၣ်ဃုာ်လၢ အပှၤဂီၢ်မုၢ် အကျါန့ၣ် မ်သုလဲၤထီၣ်လၢ ဝ့ၢ်ယရူၤၡလ့ၣ်လၢ အအိၣ်ဝဲလၢ ယူဒၤ အဟီၣ်ကဝီၤအပူၤ တက့ၢ်. ဒီးမ်သုတ့ထီၣ်က့ၤ အံၣ်စရ့လး အကစၢ် ယဟိဝၤယွၤအဟံၣ် ဒီးမ်သုကစၢ်ယွၤ အိၣ်ဒီးသုတက့ၢ်. အဝဲမ့ၢ် ယွၤလၢ အမ့ၢ်အတီတဂၤ ဒီးလၢညါန့ၣ် အဟံၣ်အိၣ်ဝဲလၢ ဝ့ၢ်ယရူၤၡလ့ၣ် အပူၤလီၤ.*
၄ ပှၤတဂၤဂ့ၤ တဂၤဂ့ၤလၢ အကက့ၤအိၣ် ဖဲန့ၣ်န့ၣ်+ မ်ပှၤလၢ အခိၣ်အဃၢၤလၢ အအိၣ်တ့ၢ်တဖၣ် မၤစၢၤအီၤတက့ၢ်. မ်အဝဲသ့ၣ် ဟ့ၣ်လီၤအီၤ ထူ, စ့ညၣ်, တၢ်ဖိတၢ်လံၤ ဒီးဆၣ်ဖိကီၢ်ဖိတဖၣ် ဃုာ်ဒီးတၢ်ဟ့ၣ်လၢ တၢ်သးအိၣ်အပူၤလၢ ကစၢ်ယွၤလၢ အမ့ၢ်အတီတဂၤ အဟံၣ်+ လၢအိၣ်လၢ ယရူၤၡလ့ၣ်အပူၤ အဂီၢ်န့ၣ်တက့ၢ်.’”
၅ ယူဒၤဒီး ဘံၣ်ယၤမံၣ် အဒူၣ်ဖိထၢဖိတဖၣ် အခိၣ်အနၢ်တဖၣ်, ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ် ဒီးပှၤအဂၤတဖၣ်န့ၣ် ကတဲာ်ကတီၤထီၣ်အသးလၢ ကက့ၤဝဲလၢ ဝ့ၢ်ယရူၤၡလ့ၣ်လီၤ. အဝဲသ့ၣ် မ့ၢ်ပှၤလၢ ကစၢ်ယွၤ ထိၣ်ဟူးထိၣ်ဂဲၤထီၣ်အီၤလၢ ကတ့ထီၣ်က့ၤ ယဟိဝၤယွၤ အဟံၣ်အဂီၢ်လီၤ.
၆ ဒီးပှၤလၢ အအိၣ်လၢ အဝဲသ့ၣ် အခိၣ်အဃၢၤတဖၣ်န့ၣ် ဟ့ၣ်လီၤအဝဲသ့ၣ်လၢ တၢ်ပီးတၢ်လီလၢ ပှၤတ့အီၤလၢ ထူဒီးစ့တဖၣ်, တၢ်ဖိတၢ်လံၤတဖၣ်, ဆၣ်ဖိကီၢ်ဖိတဖၣ်, တၢ်လုၢ်ဒိၣ်ပှ့ၤဒိၣ်တဖၣ် ဒီးတၢ်ဟ့ၣ်တဖၣ်လၢ တၢ်သးအိၣ်အပူၤလီၤ.
၇ ဒီးယဟိဝၤယွၤ အဟံၣ်အတၢ်ပီးတၢ်လီလၢ စီၤနဘူၤကးန့စၢ် ဟံးန့ၢ်ဝဲလၢ ဝ့ၢ်ယရူၤၡလ့ၣ်အပူၤ ဒီးပာ်ဃာ်ဝဲလၢ အယွၤအဟံၣ်ပူၤန့ၣ် စီၤပၤကိရ့ၣ် ထုးထီၣ်က့ၤဝဲလီၤ.+
၈ ဖၢၡၢၣ်အစီၤပၤ ကိရ့ၣ် မၢပှၤပၢၤစ့ စီၤမံးသြၤဒး ထုးထီၣ် တၢ်သ့ၣ်တဖၣ်န့ၣ် ဒီးကွဲးလီၤစရီလၢ ယူဒၤအခိၣ်အနၢ် စီၤၡ့ၡဘးစၢ်*+ အဂီၢ်လီၤ.
၉ လၢစရီအံၤအပူၤန့ၣ် အိၣ်ဒီး နာ်ထူ အဖျၢၣ် ၃၀, နာ်စ့ အဖျၢၣ် ၁,၀၀၀, နာ်အဂၤ ၂၉ ဖျၢၣ်,
၁၀ လီခီဖျၢၣ်ထူ ဆံးဆံးဖိ အဖျၢၣ် ၃၀, လီခီဖျၢၣ်စ့ ဆံးဆံးဖိ အဖျၢၣ် ၄၁၀ ဒီးတၢ်ပီးတၢ်လီအဂၤ အခါ ၁,၀၀၀ လီၤ.
၁၁ ဒီးတၢ်ပီးတၢ်လီ ထူဒီးစ့ ခဲလၢာ်န့ၣ် အိၣ်ဝဲအခါ ၅,၄၀၀ လီၤ. ဖဲပှၤလၢ အဘၣ်တၢ်က့ၤဖီၣ်အီၤတဖၣ်*+ ဟးထီၣ်ဘၣ်လၢ ဘၤဘူၤလိၣ် ဒီးဟဲက့ၤဝဲလၢ ဝ့ၢ်ယရူၤၡလ့ၣ်အခါ စီၤၡ့ၡဘးစၢ် ဟဲက့ၤစိာ်ဝဲ တၢ်သ့ၣ်တဖၣ်န့ၣ် ခဲလၢာ်လီၤ.
တၢ်ဂ့ၢ်အဘျဲၣ်တဖၣ်
^ ဘၣ်သ့ၣ်သ့ၣ် ကမ့ၢ် “အဝဲအိၣ်ဝဲလၢ ဝ့ၢ်ယရူၤၡလ့ၣ်အပူၤ.”
^ ဘၣ်သ့ၣ်သ့ၣ် ကမ့ၢ် “စီၤစရူဘၤဘ့လး လၢဧ့စြၤ ၂:၂; ၃:၈ ပာ်ဖျါထီၣ်ဝဲ.”
^ ပှၤတဖၣ်အံၤ ပၣ်ဃုာ်ဒီး ပှၤလၢအဘၣ်တၢ်က့ၤဖီၣ်အီၤတဖၣ် အစၢၤအသွဲၣ်.
