ဧ့စြၤ ၃:၁-၁၃
၃ ဖဲလါနွံလါတလါန့ၣ်+ ပှၤအံၣ်စရ့လးဖိလၢ အအိၣ်လၢ အနီၢ်ကစၢ် အဝ့ၢ်ပူၤတဖၣ်န့ၣ် ပာ်ဖှိၣ်ထီၣ်အသးလၢ ဝ့ၢ်ယရူၤၡလ့ၣ်အပူၤ လၢတၢ်သးတဖျၢၣ်ဃီ အပူၤလီၤ.
၂ စီၤယိၤစါဒး အဖိခွါ စီၤယ့ၤၡူ+ ဒီးပှၤလုၢ်တၢ်ဒိၣ် လၢအဂၤတဖၣ် ဒီးစီၤၡၤလတံၤအ့လး+ အဖိခွါ စီၤစရူဘၤဘ့လး+ ဒီးအဒီပုၢ်ဝဲၢ်တဖၣ် တ့ထီၣ်ဝဲ အံၣ်စရ့လး အကစၢ်ယွၤ အတၢ်လုၢ်လီၢ်လီၤ. အဝဲသ့ၣ် တ့ထီၣ် တၢ်လုၢ်လီၢ် ဒ်သိး အဝဲသ့ၣ် ကလုၢ်ထီၣ် တၢ်လုၢ်ဒွဲၣ်အူတဖၣ် ဒ်ယွၤလၢအမ့ၢ်အတီ အခ့အပှၤ စီၤမိၤၡ့ အတၢ်သိၣ်တၢ်သီ အိၣ်ကွဲးအသး အသိးလီၤ.+
၃ အဝဲသ့ၣ် ပျံၤဝဲ ပှၤကလုာ်လၢ အခိၣ်အဃၢၤတဖၣ်+ ဘၣ်ဆၣ် အဝဲသ့ၣ် တ့ထီၣ်ကဒီးဝဲ တၢ်လုၢ်လီၢ် ဖဲလၢညါ အအိၣ်ပာ်စၢၤဝဲ အလီၢ်လီၤ. ဒီးအဝဲသ့ၣ် လုၢ်ထီၣ် ဂီၤခီ အတၢ်လုၢ်ဒွဲၣ်အူ ဒီးဟါခီ အတၢ်လုၢ်ဒွဲၣ်အူလၢ ယဟိဝၤယွၤအအိၣ် လၢတၢ်လုၢ်လီၢ် တဖျၢၣ်အံၤ အဖီခိၣ်လီၤ.+
၄ ဝံၤဒီး အဝဲသ့ၣ် မၤဝဲဘူၣ်ဒဲ ဒ်တၢ်ကွဲးအသး အိၣ်ဝဲအသိး+ ဒီးတနံၤဘၣ်တနံၤန့ၣ် အဝဲသ့ၣ် လုၢ်ထီၣ်ဝဲ တၢ်လုၢ်ဒွဲၣ်အူတဖၣ် ဒ်တၢ်ပာ်ပနီၣ်ဝဲလၢ တနံၤအဂီၢ် တနံၤအဂီၢ် အသိးန့ၣ်လီၤ.+
၅ စးထီၣ်ဖဲန့ၣ်န့ၣ် အဝဲသ့ၣ်လုၢ်ထီၣ်ဝဲ ကိးနံၤဒဲးအတၢ်လုၢ်ဒွဲၣ်အူ+ ဒီးလါထီၣ်သီ အတၢ်လုၢ်တဖၣ်+ ဒီးတၢ်လုၢ်တဖၣ်လၢ ယဟိဝၤယွၤ အဘူၣ်စီဆှံတဖၣ်အဂီၢ်+ ဒီးတၢ်လုၢ်တဖၣ်လၢ ပှၤဟ့ၣ်လီၤဝဲ ယဟိဝၤယွၤလၢ တၢ်သးအိၣ်အပူၤလီၤ.+
၆ အဝဲသ့ၣ် တဆီလီၤဘၣ်ဝဲ ယဟိဝၤယွၤအတၢ်လုၢ်ဟံၣ်အခီၣ်ထံး ဒံးဘၣ်သနာ်က့ စးထီၣ်ဖဲ လါနွံလါတလါ, အဆိကတၢၢ်တသီန့ၣ်+ အဝဲသ့ၣ် လုၢ်ထီၣ်ဝဲ တၢ်လုၢ်ဒွဲၣ်အူ လၢယဟိဝၤယွၤ အအိၣ်လီၤ.
၇ အဝဲသ့ၣ် ဟ့ၣ်လီၤဝဲ ပှၤကူးတဲာ်လၢၢ်တဖၣ်+ ဒီးပှၤစုသ့ဖိလၢ+ စ့လီၤ. ဒီးအဝဲသ့ၣ် ဟ့ၣ်လီၤစ့ၢ်ကီးဝဲ ပှၤစံဒိၣ်ဖိ ဒီးပှၤစိၢ်ဖိတဖၣ် လၢတၢ်အီၣ်တၢ်အီ ဒီးသိ ဒ်သိး ပှၤသ့ၣ်တဖၣ်န့ၣ် ကထိၣ်ထွံလီၤန့ၢ် အဝဲသ့ၣ်လၢ လဘၤနိၣ် အသ့ၣ်ဆှိအ့ရ့း အသ့ၣ်ဘၣ်တဖၣ်လၢ ပီၣ်လဲၣ်ပူၤ ဆူယၤဖိၤ+ အကဘီသန့ ဒ်ဖၢၡၢၣ် အစီၤပၤ ကိရ့ၣ် ဟ့ၣ်လီၤတၢ်ခွဲးတၢ်ယာ် အသိးလီၤ.+
၈ ဖဲအဝဲသ့ၣ် ဟဲက့ၤလၢ ယွၤလၢအမ့ၢ်အတီအဟံၣ် လၢယရူၤၡလ့ၣ် ဝံၤအလီၢ်ခံ ခံနံၣ်တနံၣ်, လါခံလါတလါန့ၣ် စီၤၡၤလတံၤအ့လး အဖိခွါ စီၤစရူဘၤဘ့လး ဒီးစီၤယိၤစါဒး အဖိခွါ စီၤယ့ၤၡူ ဒီးအဝဲသ့ၣ် အဒီပုၢ်ဝဲၢ် လၢအမ့ၢ် ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် ဒီးပှၤလၢ အဘၣ်တၢ်က့ၤဖီၣ်အီၤတဖၣ်* လၢအဟဲက့ၤလၢ ဝ့ၢ်ယရူၤၡလ့ၣ်န့ၣ်+ စးထီၣ်ဝဲတၢ်မၤအံၤလီၤ. ဒီးအဝဲသ့ၣ် ပာ်ထီၣ်ဝဲ ပှၤလ့ၤဝံဖိ လၢအသးအိၣ် အနံၣ် ၂၀ ဒီးဆူအဖီခိၣ်တဖၣ် ဒ်ပှၤလၢအတီခိၣ်ရိၤမဲ တၢ်မၤလၢ အဘၣ်ဃးဒီး ယဟိဝၤယွၤ အဟံၣ်န့ၣ်လီၤ.
၉ စီၤယူဒၤ* အစၢၤအသွဲၣ်တဖၣ် လၢအမ့ၢ် စီၤယ့ၤၡူ ဒီးအဖိခွါတဖၣ် ဒီးအဒီပုၢ်ဝဲၢ်တဖၣ် ဒီးစီၤကးမံၤအ့လး ဒီးအဖိခွါတဖၣ် ဒီးပှၤလ့ၤဝံဖိတဖၣ် လၢအမ့ၢ် စီၤဃ့နါဒး အဖိအလံၤတဖၣ်+ ဒီးအဝဲသ့ၣ် အဒီပုၢ်ဝဲၢ်တဖၣ်န့ၣ် ပာ်ဖှိၣ်မၤသကိးတၢ် ဒ်သိးကတီခိၣ်ရိၤမဲ တၢ်မၤလၢ ဘၣ်ဃးဒီး ယွၤလၢအမ့ၢ်အတီ အဟံၣ်လီၤ.
၁၀ ဖဲပှၤဆီလီၤ ယဟိဝၤယွၤ အတၢ်လုၢ်ဟံၣ် အခီၣ်ထံး+ ဝံၤအခါ ပှၤလုၢ်တၢ်ဒိၣ်တဖၣ် လၢအကၤဝဲ ဆ့ဖးထီတဖၣ် ဒီးအအိၣ်ဒီး ကွဲၤတဖၣ်+ ဒီးစီၤအၤစာ် အဖိခွါတဖၣ် လၢအမ့ၢ် ပှၤလ့ၤဝံဖိတဖၣ် လၢအအိၣ်ဒီး စှၢၣ်စှံးန့ၣ် ဆၢထၢၣ် စံးထီၣ်ပတြၢၤဝဲ ယဟိဝၤယွၤ ဒ်အံၣ်စရ့လး အစီၤပၤဒၤဝံး အတၢ်ဟံးစုနဲၣ်ကျဲ အိၣ်ဝဲအသိးလီၤ.+
၁၁ အဝဲသ့ၣ် သးဝံၣ်လိာ်န့ၢ်အသး ယၢ်ခီယၢ်ခီ+ လၢကစံးထီၣ်ပတြၢၤ ဒီးစံးဘျုးစံးဖှိၣ် ယဟိဝၤယွၤ အဂီၢ်လီၤ. အဝဲသ့ၣ် သးဝံၣ်ဝဲလၢ “ကစၢ်ယွၤ မ့ၢ်ပှၤအဂ့ၤ ဒီးအတၢ်အဲၣ်လၢအတီ လၢအံၣ်စရ့လး အဖီခိၣ်န့ၣ် အိၣ်ဂၢၢ်ဆိးကျၢၤ လီၤထူလီၤယိာ်လီၤ.”+ ဒီးပှၤခဲလၢာ် စံးထီၣ်ပတြၢၤ ယဟိဝၤယွၤ လၢအကလုၢ်ဖးဒိၣ် ခီဖျိလၢ ပှၤဆီလီၤ ယဟိဝၤယွၤ အဟံၣ်အခီၣ်ထံး ဝံၤဝဲအဃိလီၤ.
၁၂ ပှၤသးပှၢ်အါဂၤ လၢအမ့ၢ် ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ် ဒီးဒူၣ်ဖိထၢဖိ အခိၣ်အနၢ်တဖၣ်လၢ အထံၣ်တ့ၢ်ဝဲ တၢ်လုၢ်ဟံၣ်လၢညါ တဖျၢၣ်န့ၣ်+ ဖဲအဝဲသ့ၣ် ထံၣ်ဘၣ်ဝဲလၢ ပှၤဆီလီၤဝဲ တၢ်လုၢ်ဟံၣ်တဖျၢၣ်အံၤ အခီၣ်ထံး ဝံၤအခါ အဝဲသ့ၣ်ဟီၣ်ဝဲလၢ အကလုၢ်ဖးဒိၣ်လီၤ. ဘၣ်ဆၣ် ပှၤအဂၤတဖၣ်န့ၣ် ကိးပသူထီၣ်ဒိၣ်ဒိၣ်လၢ တၢ်သးခုအပူၤလီၤ.+
၁၃ ပှၤသ့ၣ်တဖၣ်န့ၣ် ကိးပသူဝဲလၢ အကလုၢ်ဖးဒိၣ် အဃိ တၢ်ကလုၢ်န့ၣ် သီၣ်ဝဲတုၤလၢ တၢ်လီၢ်ဖးယံၤလီၤ. ဒီးမ့ၢ်တၢ်ကလုၢ်သီၣ်လၢ ပှၤဟီၣ်အဃိဧါ မ့တမ့ၢ် ပှၤကိးပသူထီၣ်လၢ တၢ်သးခုပူၤ အဃိဧါန့ၣ် ပှၤနီၤဖးဝဲ တဘၣ်ဘၣ်.
တၢ်ဂ့ၢ်အဘျဲၣ်တဖၣ်
^ ပှၤတဖၣ်အံၤ ပၣ်ဃုာ်ဒီး ပှၤလၢအဘၣ်တၢ်က့ၤဖီၣ်အီၤတဖၣ် အစၢၤအသွဲၣ်.
^ မ့ၢ်ဝဲ စီၤဟိဒါယၤ လၢဧ့စြၤ ၂:၄၀ ဒီးစီၤဟိၤဒၤနယၤ လၢနဃ့မယၤ ၇:၄၃.
