ဧ့စြၤ ၈:၁-၃၆
၈ ဖဲစီၤပၤ အၢ်တၤၡါၡတၤ ပၢတၢ်အဆၢကတီၢ် ပှၤလၢအအိၣ်လၢ ဘၤဘူၤလိၣ် ဒီးဟဲက့ၤပိာ်ယခံန့ၣ် အိၣ်ဝဲလီၤ. အဝဲသ့ၣ် အဒူၣ်ဖိထၢဖိ အခိၣ်အနၢ်တဖၣ် ဒီးအတၢ်ဟဲလီၤစၢၤလီၤသွဲၣ် အတၢ်ကွဲးနီၣ်ကွဲးဃါတဖၣ်န့ၣ် ဘၣ်တၢ်ပာ်ဖျါထီၣ်အီၤ ဒ်လၢလာ်အံၤအသိးလီၤ.+
၂ စီၤက့းရၡိၣ် လၢအပၣ်ဃုာ်လၢ စီၤဖံၤနဃၣ်+ အဖိခွါတဖၣ်* အကျါ, စီၤဒၤနံးယ့လး လၢအပၣ်ဃုာ်လၢ စီၤအံသမၢ်+ အဖိခွါတဖၣ်အကျါ, စီၤဃးတူၣ် လၢအပၣ်ဃုာ်လၢ စီၤဒၤဝံး အဖိခွါတဖၣ်အကျါ,
၃ စီၤစကၤရယၤ လၢအပၣ်ဃုာ်လၢ စီၤပးရိာ် ဒီးစီၤၡကါနယၤ အဖိခွါတဖၣ် အကျါလီၤ. ဒီးပှၤပိာ်ခွါလၢ အအိၣ်ဒီးအီၤလၢ အပၣ်ဃုာ်လၢ တၢ်ဟဲလီၤစၢၤလီၤသွဲၣ် အတၢ်ကွဲးနီၣ်ကွဲးဃါ အကျါန့ၣ် အိၣ်ဝဲအဂၤ ၁၅၀ လီၤ.
၄ စီၤစရၤဃယၤ အဖိခွါ စီၤအ့လံၤဧ့နံၤန့ၣ် ပၣ်ဃုာ်လၢ စီၤပးဃးမိၤအး အဖိခွါတဖၣ်+ အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၂၀၀ လီၤ.
၅ စီၤယၤဃစအ့လး အဖိခွါ စီၤၡကါနယၤန့ၣ် ပၣ်ဃုာ်လၢ စီၤစးတူၤ အဖိခွါတဖၣ်+ အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၃၀၀ လီၤ.
၆ စီၤယိနၤသၣ် အဖိခွါ စီၤဧ့ဘ့းန့ၣ် ပၣ်ဃုာ်လၢ စီၤဧၤဒံၣ် အဖိခွါတဖၣ်+ အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၅၀ လီၤ.
၇ စီၤဧသၤလယၤ အဖိခွါ စီၤယၡၤယါန့ၣ် ပၣ်ဃုာ်လၢ စီၤဧ့ၤလၣ် အဖိခွါတဖၣ်+ အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၇၀ လီၤ.
၈ စီၤမံၤက့လး အဖိခွါ စီၤစဘၤဒယၤန့ၣ် ပၣ်ဃုာ်လၢ စီၤၡဖးတယၤ အဖိခွါတဖၣ်+ အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၈၀ လီၤ.
၉ စီၤယဃံအ့လး အဖိခွါ စီၤဧိၤဘါဒယၤန့ၣ် ပၣ်ဃုာ်လၢ စီၤယိၤအာ် အဖိခွါတဖၣ်အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၂၁၈ လီၤ.
၁၀ စီၤယိၤစံးဖယၤ အဖိခွါ စီၤၡလိမံးန့ၣ် ပၣ်ဃုာ်လၢ စီၤဘၤနံ အဖိခွါတဖၣ်အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၁၆၀ လီၤ.
၁၁ စီၤဘ့ဘဲၤ အဖိခွါ+ စီၤစကၤရယၤန့ၣ် ပၣ်ဃုာ်လၢ စီၤဘ့ဘဲၤ အဖိခွါတဖၣ်အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၂၈ ဂၤလီၤ.
၁၂ စီၤဟးကၤတၣ် အဖိခွါ စီၤယိဃၤနၣ်န့ၣ် ပၣ်ဃုာ်လၢ စီၤဧၤစကး အဖိခွါတဖၣ်+ အကျါလီၤ. ဒီးပှၤပိာ်ခွါလၢ အအိၣ်ဒီးအီၤန့ၣ် အဂၤ ၁၁၀ လီၤ.
၁၃ စီၤအဒိၤနံကၣ် အဖိခွါတဖၣ်+ လၢအမ့ၢ် ပှၤလၢအဟဲက့ၤလၢ အလီၢ်ခံကတၢၢ်န့ၣ် အဝဲသ့ၣ် အမံၤမ့ၢ်ဝဲ စီၤအလံၤဖလ့း, စီၤယံၤအ့လး ဒီးစီၤၡမါယၤလီၤ. ဒီးပှၤပိာ်ခွါလၢ အအိၣ်ဒီး အဝဲသ့ၣ်န့ၣ် အိၣ်ဝဲအဂၤ ၆၀ လီၤ.
၁၄ စီၤဧူသဲၤ ဒီးစီၤစၤဘူန့ၣ် ပၣ်ဃုာ်လၢ စီၤဘံးကဝဲၤ အဖိခွါတဖၣ်+ အကျါလီၤ. ဒီးပှၤပိာ်ခွါလၢ အအိၣ်ဒီး အဝဲသ့ၣ်န့ၣ် အိၣ်ဝဲအဂၤ ၇၀ လီၤ.
၁၅ ဒီးယကိးဖှိၣ် အဝဲသ့ၣ်ဖဲ ထံကျိလၢ အယွၤလီၤတုၤလၢ အၤဟဝၤ အကၢၢ်နံၤ+ ဒီးပသူၣ်လီၤဒဲဖဲန့ၣ် သၢသီလီၤ. ဖဲယကွၢ်ထံကွၢ်ဆး ပှၤဂီၢ်မုၢ်တဖၣ် ဒီးပှၤလုၢ်တၢ်ဒိၣ်တဖၣ်အခါ ယတထံၣ် ပှၤလ့ၤဝံဖိ* နီတဂၤဘၣ်.
၁၆ ဒီးယကိးန့ၢ် ပှၤခိၣ်ပှၤနၢ်တဖၣ် လၢအမ့ၢ် စီၤအလံၤဧ့စ့ၢ်, စီၤအရံၤအ့လး, စီၤၡမါယၤ, စီၤအ့လနၤသၣ်, စီၤယၤရံၤ, စီၤအ့လနၤသၣ်, စီၤနၤသၣ်, စီၤစကၤရယၤ ဒီးစီၤမၡူလၣ် ဒီးပှၤလၢအသိၣ်လိတၢ် လၢအမ့ၢ် စီၤယိၤရံာ် ဒီးစီၤအ့လနၤသၣ်လီၤ.
၁၇ ဒီးယမၢအဝဲသ့ၣ် လဲၤလၢ စီၤဧံးဒိၤ လၢအကဲခိၣ်ကဲနၢ် လၢတၢ်လီၢ် လၢအမ့ၢ် ကၤစဖၤယၤ အပူၤလီၤ. ယမၢအဝဲသ့ၣ် လဲၤတဲ စီၤဧံးဒိၤ ဒီးအဒီပုၢ်ဝဲၢ်တဖၣ်လၢ ကဆှၢလီၤန့ၢ်ပှၤ ပှၤလၢအကမၤတၢ်လၢ ပကစၢ်ယွၤ အဟံၣ်လီၤ. စီၤဧံးဒိၤ အဒီပုၢ်ဝဲၢ်တဖၣ်န့ၣ် မ့ၢ်ဝဲ တၢ်လုၢ်ဟံၣ်အခ့အပှၤတဖၣ်* ဒီးအဝဲသ့ၣ် အိၣ်ဝဲလၢ ကၤစဖၤယၤအပူၤလီၤ.
၁၈ မ့ၢ်လၢ ပကစၢ်ယွၤလၢအသးဂ့ၤတဂၤ အိၣ်ဒီးပှၤအဃိ အဝဲသ့ၣ် ဆှၢလီၤပှၤတဂၤလၢ အကူၣ်တၢ်သ့ လၢအမ့ၢ် စီၤၡ့ရ့ဘယၤ ဃုာ်ဒီး အဖိခွါတဖၣ် ဒီးအဒီပုၢ်ဝဲၢ်ခွါတဖၣ် လၢအအိၣ်ဝဲ ၁၈ ဂၤလီၤ. စီၤၡ့ရ့ဘယၤ+ ဟဲလီၤစၢၤလီၤသွဲၣ်လၢ စီၤမးဃလံ,+ စီၤမးဃလံမ့ၢ်ဝဲ စီၤလ့ၤဝံ အလံၤခွါ ဒီးစီၤလ့ၤဝံ မ့ၢ်ဝဲ စီၤအံၣ်စရ့လး အဖိခွါလီၤ.
၁၉ အဝဲသ့ၣ် ဆှၢလီၤစ့ၢ်ကီး စီၤဃၡၤဘယၤလီၤ. ဒီးပှၤလၢ အဟဲပိာ် အခံန့ၣ် ပၣ်ဃုာ်ဒီး ပှၤမရၤရံၤဖိ+ စီၤယၡၤယါ ဒီးအဒီပုၢ်ဝဲၢ်ခွါတဖၣ် ဒီးအဝဲသ့ၣ် အဖိခွါတဖၣ် လၢအအိၣ်ဝဲ အဂၤ ၂၀ လီၤ.
၂၀ တၢ်လုၢ်ဟံၣ် အခ့အပှၤတဖၣ်န့ၣ်* အိၣ်ဝဲအဂၤ ၂၂၀ ဒီးအဝဲသ့ၣ် အမံၤဘၣ်တၢ်ကွဲးလီၤအီၤလၢ လံာ်ပူၤလီၤ. လၢညါန့ၣ် စီၤဒၤဝံး ဒီးပဒိၣ်ဖးဒိၣ်တဖၣ် ဟ့ၣ်လီၤဝဲ တၢ်လုၢ်ဟံၣ် အခ့အပှၤတဖၣ် ဒ်သိးကမၤစၢၤ ပှၤလ့ၤဝံဖိအဂီၢ်လီၤ.
၂၁ ဖဲအၤဟဝၤ အထံကျိကပၤန့ၣ် ယဟ့ၣ်လီၤတၢ်ကလုၢ်လၢ ပဝဲခဲလၢာ် ပကဒုၣ်တၢ်အီၣ်တၢ်အီ ဒီးဆီၣ်လီၤပသးလၢ ပကစၢ်ယွၤ အမဲာ်ညါ ဒီးပကဃ့ အတၢ်ဟံးစုနဲၣ်ကျဲ လၢပတၢ်လဲၤ တဘျီအံၤအဂီၢ် ဒ်သိး တၢ်ကလဲၤအသး ဘျ့ဘျ့ဆှီဆှီ လၢပဝဲဒီး ပဖိပလံၤတဖၣ် ဒီးကယဲၢ်တၢ်လၢ အအိၣ်ဒီး ပှၤတဖၣ် အဂီၢ်လီၤ.
၂၂ ပတဲတ့ၢ် စီၤပၤလၢ “ကစၢ်ယွၤ အစုအိၣ်ဒီး ပှၤလၢ အသန့ၤအသးလၢအီၤ ကိးဂၤဒဲး+ ဒ်သိး ကမၤဂ့ၤတၢ်လၢ အဝဲသ့ၣ် အဖီခိၣ်လီၤ. မ့မ့ၢ် ပှၤလၢအပာ်တ့ၢ်အီၤန့ၣ် အတၢ်သးဒိၣ်လၢ အဆူၣ် ကလီၤဘၣ် အဝဲသ့ၣ်လီၤ.”+ လၢတၢ်န့ၣ်အဃိ ယမဲာ်ဆှးလၢ ယကဃ့ စီၤပၤအပှၤသုးဖိ ဒီးအပှၤဒိး ကသ့ၣ်တဖၣ် လၢကဒီသဒၢပှၤလၢ ဒုၣ်ဒါတဖၣ်အစုပူၤ ဖဲပလဲၤတၢ်လၢ ကျဲအခါလီၤ.
၂၃ အဃိ ပဒုၣ်တၢ်အီၣ် ဒီးပဃ့တၢ် လၢပကစၢ်ယွၤအအိၣ် လၢဘၣ်ဃးဒီး တၢ်ဂ့ၢ်တခါအံၤ ဒီးအဝဲ ဒိကနၣ် ပတၢ်ဃ့ကညးလီၤ.+
၂၄ ဒီးယဃုထၢထီၣ် ပှၤလုၢ်တၢ်ဒိၣ်တဖၣ် အပှၤခိၣ်ပှၤနၢ် ၁၂ ဂၤလီၤ. အဝဲသ့ၣ် အမံၤမ့ၢ်ဝဲ စီၤၡ့ရ့ဘယၤ ဒီးစီၤဃၡၤဘယၤ+ ဒီးအဝဲသ့ၣ် အသကိး အဂၤတဆံလီၤ.
၂၅ ဒီးထူ, စ့ညၣ် ဒီးတၢ်ပီးတၢ်လီတဖၣ် လၢစီၤပၤ ဒီးအပှၤဟ့ၣ်ကူၣ်တၢ်တဖၣ် ဒီးအပဒိၣ်တဖၣ် ဒီးပှၤအံၣ်စရ့လးဖိ ဖဲန့ၣ်တဖၣ် ဟ့ၣ်လီၤဝဲလၢ ပကစၢ်ယွၤ အဟံၣ်အဂီၢ်န့ၣ် ယစီၤန့ၢ်အဝဲသ့ၣ်လီၤ.+
၂၆ ယစီၤန့ၢ် အဝဲသ့ၣ်ဝံၤဒီးယဟ့ၣ်လီၤ အဝဲသ့ၣ်လၢ စ့ညၣ် အတၤလၣ်* ၆၅၀, တၢ်ပီးတၢ်လီစ့ အခါ ၁၀၀ လၢအဃၢဝဲ ၂ တၤလၣ်, ထူလၢအဃၢဝဲ အတၤလၣ် ၁၀၀,
၂၇ လီခီဖျၢၣ် ဆံးဆံးဖိ အဖျၢၣ် ၂၀ လၢအပှ့ၤအိၣ်ဝဲ ဒၤရံး* အဘ့ၣ် ၁,၀၀၀ ဒီးတၢ်ပီးတၢ်လီ ၂ ခါလၢ ပှၤတ့အီၤလၢ တိၢ်ဘီလၢအဂ့ၤ လၢအကပြုၢ်ကပြီၤ ဒီးအလုၢ်ဒိၣ်ပှ့ၤဒိၣ် ဒ်ထူအသိးလီၤ.
၂၈ ဒီးယတဲအဝဲသ့ၣ်လၢ “သုမ့ၢ်ပှၤလၢ အစီဆှံလၢ ယဟိဝၤယွၤ အဂီၢ်လီၤ.+ တၢ်ပီးတၢ်လီ တဖၣ်အံၤစ့ၢ်ကီး စီဆှံဝဲလီၤ. ထူဒီးစ့ညၣ် သ့ၣ်တဖၣ်အံၤန့ၣ် မ့ၢ်ဝဲ တၢ်ဟ့ၣ်လၢ တၢ်သးအိၣ်အပူၤ လၢပှၤဟ့ၣ်လီၤအီၤလၢ သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အဂီၢ်လီၤ.
၂၉ ကွၢ်ထွဲ တၢ်သ့ၣ်တဖၣ်အံၤ ဂ့ၤဂ့ၤ တုၤလၢ သုလဲၤတုၤလၢ ဝ့ၢ်ယရူၤၡလ့ၣ် တက့ၢ်.+ ဖဲန့ၣ်န့ၣ် သုကဘၣ်စီၤဝဲ တၢ်သ့ၣ်တဖၣ်အံၤလၢ ပှၤလုၢ်တၢ်ဒိၣ် ဒီးပှၤလ့ၤဝံဖိ အခိၣ်တဖၣ် ဒီးအံၣ်စရ့လး အဒူၣ်ဖိထၢဖိ အပဒိၣ်တဖၣ် အမဲာ်ညါလၢ ယဟိဝၤယွၤ အတၢ်လုၢ်ဟံၣ် အဒၢးတဖၣ်* အပူၤလီၤ.”
၃၀ ဒီးပှၤလုၢ်တၢ်ဒိၣ် ဒီးပှၤလ့ၤဝံဖိတဖၣ် ဟံးန့ၢ်ဝဲ ထူဒီးစ့ညၣ် ဒီးတၢ်ပီးတၢ်လီလၢ ပှၤစီၤန့ၢ်အီၤတဖၣ် ဒ်သိး ကဟဲက့ၤစိာ်ဝဲလၢ ပကစၢ်ယွၤအဟံၣ် လၢယရူၤၡလ့ၣ် အဂီၢ်လီၤ.
၃၁ ဖဲလါအဆိကတၢၢ်တလါ, လါထီၣ် ၁၂ သီတသီန့ၣ်+ ပဟးထီၣ်လၢ အၤဟဝၤ အထံကျိကပၤ+ ဒီးပက့ၤလၢ ဝ့ၢ်ယရူၤၡလ့ၣ်လီၤ. ဒီးပကစၢ်ယွၤ အိၣ်ဒီးပှၤ လၢကျဲဒီဘိ ဒီးဒီသဒၢပှၤလၢ ပဒုၣ်ပဒါတဖၣ် ဒီးပှၤလၢ အခိးခူသူၣ်တၢ်တဖၣ် အစုပူၤလီၤ.
၃၂ ပဟဲက့ၤတုၤလၢ ဝ့ၢ်ယရူၤၡလ့ၣ်+ ဒီးပအိၣ်ဘှံး သၢသီလီၤ.
၃၃ ဖဲလွံၢ်သီတသီန့ၣ်ပစီၤ ထူ, စ့ညၣ် ဒီးတၢ်ပီးတၢ်လီတဖၣ် လၢကစၢ်ယွၤ အဟံၣ်ပူၤ+ ဒီးပဟ့ၣ်လီၤ စီၤဧူၤရံယၤ အဖိခွါ စီၤမရ့မိး+ လၢအမ့ၢ် ပှၤလုၢ်တၢ်ဒိၣ်လီၤ. ပှၤလၢအအိၣ်ဒီးအီၤန့ၣ် မ့ၢ်ဝဲ စီၤဖံၤနဃၣ် အဖိခွါ စီၤအလၤဧစၢ် ဒီးပှၤလ့ၤဝံဖိတဖၣ် လၢအမ့ၢ် စီၤယ့ၤၡူ အဖိခွါ စီၤယိစဘး+ ဒီးစီၤဘံနူၤ+ အဖိခွါ စီၤနိဒယၤလီၤ.
၃၄ တၢ်သ့ၣ်တဖၣ်န့ၣ် ပှၤဂံၢ်ကွၢ်စီၤကွၢ်အီၤ ခဲလၢာ် ဒီးပှၤကွဲးနီၣ်ဃာ် အတယၢၢ်လီၤ.
၃၅ ဒီးပှၤလၢ အဘၣ်တၢ်က့ၤဖီၣ်အီၤ* ဒီးအဟဲက့ၤတဖၣ်န့ၣ် လုၢ်ထီၣ်ဝဲ တၢ်လုၢ်ဒွဲၣ်အူတဖၣ် လၢအံၣ်စရ့လး အကစၢ်ယွၤ အအိၣ်လီၤ. အဝဲသ့ၣ် လုၢ်ထီၣ်ဝဲ ကျီၢ်ဖါ ၁၂ ဒုလၢ+ အံၣ်စရ့လး ခဲလၢာ်အဂီၢ် ဒီးသိဖါ ၉၆ ဒု,+ သိဖိ ၇၇ ဒု ဒီးမဲာ်တဲးလဲးဖါ ၁၂ ဒု+ ဒ်တၢ်လုၢ်လၢ တၢ်ဒဲးဘး အဂီၢ်အသိးလီၤ. တၢ်သ့ၣ်တဖၣ်အံၤ ခဲလၢာ်န့ၣ် မ့ၢ်ဝဲ တၢ်လုၢ်ဒွဲၣ်အူလၢ ယဟိဝၤယွၤ အဂီၢ်လီၤ.+
၃၆ ဒီးပဟ့ၣ်လီၤ စီၤပၤအတၢ်မၤလိာ်တဖၣ်လၢ+ စီၤပၤ အပဒိၣ်ဖးဒိၣ်တဖၣ် ဒီးပဒိၣ်တဖၣ် လၢအပၢဟီၣ်ကဝီၤ လၢထံကျိ* အဝၢ်ဘးခီ အအိၣ်လီၤ.+ ဒီးအဝဲသ့ၣ် ဆီၣ်ထွဲ ပှၤဂီၢ်မုၢ်တဖၣ် ဒီးယွၤလၢအမ့ၢ်အတီတဂၤ အဟံၣ်လီၤ.+
တၢ်ဂ့ၢ်အဘျဲၣ်တဖၣ်
^ လၢလံာ်စီဆှံ တဆၢဒိၣ်အံၤအပူၤ တၢ်ကတိၤလၢအမ့ၢ် “ဖိခွါတဖၣ်” န့ၣ် အဲၣ်ဒိးတဲစ့ၢ်ကီး “ပှၤစၢၤပှၤသွဲၣ်.”
^ ပှၤလ့ၤဝံဖိလၢ အတမ့ၢ် ပှၤလုၢ်တၢ်ဒိၣ်ဘၣ်တဖၣ်.
^ မ့ၢ်စ့ၢ်ကီး “ပှၤနသံနးဖိ.” အခီပညီလိၤလိၤ “ပှၤလၢဘၣ်တၢ်ဟ့ၣ်လီၤအီၤ.”
^ မ့ၢ်စ့ၢ်ကီး “ပှၤနသံနးဖိ.” အခီပညီလိၤလိၤ “ပှၤလၢဘၣ်တၢ်ဟ့ၣ်လီၤအီၤ.”
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ဒၤရံးန့ၣ် မ့ၢ်ဝဲ ပှၤပၤရၣ်ဖိ အထူကရံၣ်တဘ့ၣ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “ပှၤအီၣ်တၢ်အဒၢးတဖၣ်.”
^ ပှၤတဖၣ်အံၤ ပၣ်ဃုာ်ဒီး ပှၤလၢအဘၣ်တၢ်က့ၤဖီၣ်အီၤတဖၣ် အစၢၤအသွဲၣ်.
^ မ့ၢ်ဝဲ ထံကျိဖရၤသး.
