ဧ့ၤဘြံၤ ၄:၁-၁၆
၄ အဃိ တၢ်အၢၣ်လီၤလၢ ပှၤကနုာ်လီၤဘၣ်လၢ အတၢ်အိၣ်ဘှံးအပူၤန့ၣ် အိၣ်ဒံးဝဲအဃိ ဒ်သိးပသု တကဲထီၣ်ပှၤလၢ အတကြၢးဒီး တၢ်အၢၣ်လီၤအံၤ နီတဂၤတဂ့ၤအဂီၢ် မ်ပပလီၢ်ပသးတက့ၢ်.+
၂ ပဝဲစ့ၢ်ကီး ပနၢ်ဟူဘၣ် တၢ်သးခုကစီၣ်+ ဒ်ပမိၢ်ပၢ်ဖံဖုလၢပျၢၤတဖၣ် နၢ်ဟူဘၣ်ဝဲအသိးလီၤ. ဘၣ်ဆၣ် မ့ၢ်လၢ အဝဲသ့ၣ်တအိၣ်ဒီး တၢ်နာ်တမံၤဃီဒီး ပှၤလၢ အဒိကနၣ်တၢ်တဖၣ်ဘၣ်အဃိ တၢ်လၢအဝဲသ့ၣ် နၢ်ဟူဘၣ်ဝဲတဖၣ်န့ၣ် တကဲဘျုးလၢ အဝဲသ့ၣ်အဂီၢ်ဘၣ်.
၃ ပဝဲလၢ အစူၢ်က့ၤနာ်က့ၤတၢ်တဖၣ်န့ၣ် ပနုာ်လီၤဘၣ်လၢ အတၢ်အိၣ်ဘှံးအပူၤလီၤ. ဘၣ်ဆၣ် ဘၣ်ဃးဒီးအဝဲသ့ၣ်န့ၣ် ကစၢ်ယွၤတဲဝဲလၢ “အဃိ လၢတၢ်သးဒိၣ်ထီၣ်အပူၤ ယအၢၣ်လီၤလၢ ‘အဝဲသ့ၣ် တနုာ်လီၤဘၣ်လၢ ယတၢ်အိၣ်ဘှံးအပူၤဘၣ်.’”+ နီၢ်ကီၢ်န့ၣ် ကစၢ်ယွၤ အတၢ်မၤတဖၣ်ဝံၤဝဲ တချုးပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ်လီၤ.*+
၄ ဒီးဘၣ်ဃးဒီး မုၢ်နွံနံၤတနံၤန့ၣ် တၢ်ကွဲးအသး အိၣ်ဝဲတတီၤလၢ အတဲဝဲလၢ “ဒီးကစၢ်ယွၤ အိၣ်ဘှံးဝဲလၢ အတၢ်မၤခဲလၢာ် လၢမုၢ်နွံနံၤတနံၤလီၤ.”+
၅ ဒီးအဝဲတဲကဒီးဝဲလၢ “အဝဲသ့ၣ် တနုာ်လီၤဘၣ်လၢ ယတၢ်အိၣ်ဘှံးအပူၤဘၣ်.”+
၆ အဃိ ပှၤလၢ အနၢ်ဟူဘၣ် တၢ်သးခုကစီၣ် အဆိကတၢၢ်န့ၣ် မ့ၢ်လၢအဝဲသ့ၣ် အတၢ်ဒိကနၣ် တအိၣ်ဘၣ်အဃိ အဝဲသ့ၣ် တနုာ်လီၤဘၣ်လၢ အတၢ်အိၣ်ဘှံးအပူၤဘၣ်.+ ဘၣ်ဆၣ် တၢ်ခွဲးတၢ်ယာ်အိၣ်ဒံးလၢ ပှၤတနီၤန့ၣ် ကနုာ်လီၤဘၣ်လၢ အတၢ်အိၣ်ဘှံးအပူၤလီၤ.
၇ လၢတၢ်န့ၣ်အဃိ ဖဲတၢ်ဆၢကတီၢ် ပူၤကွံာ်ဖးယံာ် ဝံၤအလီၢ်ခံ ဒ်တၢ်ပာ်ဖျါလၢထးအသိး လၢစီၤဒၤဝံး အထါစံးထီၣ်ပတြၢၤအပူၤန့ၣ် ကစၢ်ယွၤတဲဝဲလၢ “မုၢ်တနံၤအံၤ သုမ့ၢ်ဒိကနၣ် ယကလုၢ်န့ၣ် တဘၣ်မၤကိၤ သုခိၣ်တဂ့ၤ.”+ အဃိ အဝဲပာ်ပနီၣ်ကဒီး မုၢ်နံၤလီၤဆီတနံၤ ခီဖျိလၢ အသူတၢ်ကတိၤလၢအမ့ၢ် “မုၢ်တနံၤအံၤ” လီၤ.
၈ စီၤယိၤၡူ+ ဆှၢနုာ်အဝဲသ့ၣ်လၢ တၢ်အိၣ်ဘှံးအလီၢ် မ့ၢ်ဝံၤလံန့ၣ် လၢခံ တမ့ၢ်လၢ ကစၢ်ယွၤကတဲဝဲ ဘၣ်ဃးဒီး မုၢ်နံၤအဂၤတနံၤ အဂ့ၢ်လၢၤဘၣ်.
၉ အဃိ လၢကစၢ်ယွၤ အပှၤဂီၢ်မုၢ်တဖၣ်အဂီၢ်န့ၣ် မုၢ်အိၣ်ဘှံးနံၤ အိၣ်ဒံးတခါ,+
၁၀ မ့ၢ်လၢ ပှၤလၢ အလဲၤနုာ်လီၤလၢ ကစၢ်ယွၤ အတၢ်အိၣ်ဘှံးအပူၤန့ၣ် အဝဲသ့ၣ် အိၣ်ဘှံးစ့ၢ်ကီးလၢ အနီၢ်ကစၢ်အတၢ်မၤ ဒ်ကစၢ်ယွၤ အိၣ်ဘှံးလၢ အနီၢ်ကစၢ် အတၢ်မၤအသိးလီၤ.+
၁၁ အဃိ ဒ်သိး ပှၤသုတလီၤဃံၢ် ဒီးကွၢ်လိမၤဒိးပှၤလၢ အတၢ်ဒိကနၣ်တအိၣ်ဘၣ်တဖၣ် အဒိအတဲာ် နီတဂၤတဂ့ၤအဂီၢ်+ မ်ပဂုာ်ကျဲးစၢးလၢ အဂ့ၤကတၢၢ် ဒ်သိးပကလဲၤနုာ်လီၤဘၣ်လၢ တၢ်အိၣ်ဘှံးအဝဲန့ၣ် အပူၤတက့ၢ်.
၁၂ ကစၢ်ယွၤ အကလုၢ်ကထါန့ၣ်မူဝဲ, အိၣ်ဒီးအစိကမီၤ+ ဒီးအကနၣ်အ့ၣ်န့ၢ် ကယဲၢ်နးလၢအကနၣ် အိၣ်ခံကပၤလၢာ်လီၤ.+ ဒီးအဆဲးဖျိတၢ် ပၢၢ်တုၤလၢအနီၤဖး ပတၢ်အိၣ်ဖျါလၢခိ, တၢ်အိၣ်လၢ ပသးပူၤနီၢ်ကီၢ်, အနီၤဖးဝဲ တၢ်အကမဲာ်, တၢ်ဃံအကံၢ်, အပာ်ဖျါထီၣ် ပတၢ်ဆိကမိၣ်တဖၣ် ဒီးတၢ်လၢပလီကီအီၤ လၢပသးပူၤလီၤ.
၁၃ ဒီးလၢကစၢ်ယွၤ အမဲာ်ညါန့ၣ် တၢ်ဘၣ်တ့လၢ အအိၣ်ခူသူၣ်အသး တအိၣ်နီတမံၤဘၣ်.+ အဃိ တၢ်ခဲလၢာ်န့ၣ် အိၣ်ဖျါ ဒီးအိၣ်ပျီပျီလၢ ပှၤလၢ ပကဘၣ်ဟ့ၣ် တၢ်စံးဆၢ လၢအအိၣ်တဂၤန့ၣ် အမဲာ်ညါလီၤ.+
၁၄ ဒီးမ့ၢ်လၢပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ် လီၤဆီတဂၤ လၢအမ့ၢ် ကစၢ်ယွၤအဖိခွါ+ ယ့ၣ်ၡူးလၢ အလဲၤနုာ်လၢ မူခိၣ်အဃိ မ်ပဆဲးတဲဖျါထီၣ် ပတၢ်နာ်အီၤလၢ ပှၤဂၤအမဲာ်ညါတက့ၢ်.+
၁၅ ပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ်လၢ အဒိသူၣ်ဒိသး ပတၢ်ဂံၢ်စၢ်ဘါစၢ်တဖၣ်+ တသ့ဘၣ်န့ၣ် တမ့ၢ်ဘၣ်. ပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ်လၢ အဘၣ်တၢ်မၤကွၢ်အီၤလၢ ကျဲကိးဘိဒဲး ဒ်ပဝဲဒၣ်အသိး သနာ်က့ အတၢ်ဒဲးဘးတအိၣ်ဘၣ်.+
၁၆ အဃိ မ်ပသုးဃီၤပသးဆူ တၢ်သးကညီၤ ဒိၣ်ဒိၣ်မုၢ်မုၢ် အလီၢ်ပစိာ်အအိၣ် ဒီးဃ့တၢ်လၢ တၢ်သးဒူအပူၤပျီပျီ+ ဒ်သိးပကဒိးန့ၢ်ဘၣ် တၢ်သူၣ်အိၣ်သးအိၣ် ဒီးတၢ်သးကညီၤ ဒိၣ်ဒိၣ်မုၢ်မုၢ် ဖဲပလိၣ်ဘၣ် တၢ်မၤစၢၤ အဆၢကတီၢ်န့ၣ်တက့ၢ်.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “စးထီၣ်လၢ တၢ်ဒုးအိၣ်ထီၣ်ဟီၣ်ခိၣ်.”
