ဧ့ၤဘြံၤ ၅:၁-၁၄
၅ ပှၤလုၢ်တၢ်ခိၣ် အဒိၣ်ကတၢၢ် ကိးဂၤဒဲးန့ၣ် ဘၣ်တၢ်ပာ်ထီၣ်အီၤလၢ ကမၤကစၢ်ယွၤ အတၢ်မၤလၢ အကဲဘျုးလၢ ပှၤဟီၣ်ခိၣ်ဖိ အဂီၢ်လီၤ.+ အဃိ အဝဲလုၢ်ထီၣ်တၢ်ဟ့ၣ် ဒီးတၢ်လုၢ်တၢ်ပာ်တဖၣ်လၢ တၢ်ဒဲးဘးအဂီၢ်လီၤ.+
၂ ဒီးပှၤလၢ အတသ့ၣ်ညါဝဲအဃိ မၤဘၣ်ဝဲ တၢ်ကမၣ်န့ၣ် အဝဲရ့ဝဲလၢ တၢ်သးကညီၤအပူၤသ့ ခီဖျိလၢ အနီၢ်ကစၢ်စ့ၢ်ကီး အိၣ်ဒီးတၢ်ဂံၢ်စၢ်ဘါစၢ်တဖၣ် အဃိလီၤ.
၃ မ့ၢ်လၢ အအိၣ်ဒီး တၢ်ဂံၢ်စၢ်ဘါစၢ်တဖၣ်အဃိ အဝဲကဘၣ် လုၢ်ထီၣ်တၢ်လၢ အနီၢ်ကစၢ် အတၢ်ဒဲးဘးအဂီၢ် ဒ်အလုၢ်ထီၣ်န့ၢ်တၢ်လၢ ပှၤဂီၢ်မုၢ်တဖၣ် အတၢ်ဒဲးဘး အဂီၢ်အသိးလီၤ.+
၄ ပှၤတဂၤပာ်ထီၣ် အနီၢ်ကစၢ်လၢ ပှၤလုၢ်တၢ်ခိၣ် အဒိၣ်ကတၢၢ်န့ၣ် တသ့ဘၣ်. ကစၢ်ယွၤ ကဘၣ်ပာ်ထီၣ်အီၤ ဒ်အပာ်ထီၣ် စီၤအၤဟရိၣ် အသိးလီၤ.+
၅ ဒ်န့ၣ်အသိး ခရံာ်တဒုးကဲထီၣ် အနီၢ်ကစၢ်လၢ ပှၤလုၢ်တၢ်ခိၣ် အဒိၣ်ကတၢၢ်ဘၣ် အဃိ အဝဲတမၤလၤကပီၤ အနီၢ်ကစၢ်ဘၣ်.+ အဝဲဘၣ်တၢ်မၤလၤကပီၤအီၤ ခီဖျိကစၢ်ယွၤလၢ အတဲအီၤလၢ “နမ့ၢ်ယဖိခွါ ဒီးတနံၤညါအံၤ ယကဲထီၣ်နပၢ်လံ.”+
၆ ဒီးလၢတၢ်ကွဲးအသး အဂၤတတီၤန့ၣ် အဝဲတဲဝဲလၢ “နမ့ၢ်ပှၤလုၢ်တၢ်ဒိၣ် ဒ်စီၤမၤလကံစဒ့းအသိး လီၤထူလီၤယိာ်လီၤ.”+
၇ ဖဲခရံာ်အိၣ်မူလၢ ဟီၣ်ခိၣ်ချၢ အဆၢကတီၢ်န့ၣ် အဝဲဟ့ၣ်လုၢ်ထီၣ် တၢ်ဃ့ကညးတဖၣ် ဒီးတၢ်ဃ့တဖၣ်လၢ အကလုၢ်ဖးဒိၣ် ပှဲၤဒီးမဲာ်ထံမဲာ်နိဆူ+ ကစၢ်ယွၤလၢ အမၤပူၤဖျဲးထီၣ်အီၤလၢ တၢ်သံသ့တဂၤ အအိၣ်လီၤ. ဒီးအပျံၤကစၢ်ယွၤအဃိ ကစၢ်ယွၤ ဒိကနၣ်အီၤလီၤ.
၈ အဝဲမ့ၢ် ဖိခွါဘၣ်ဆၣ် အဝဲမၤလိန့ၢ်တၢ်ဒိကနၣ် ခီဖျိတၢ်လၢ အတူၢ်ဘၣ်ဝဲတဖၣ်အဃိလီၤ.+
၉ ဒီးအဝဲကဲထီၣ် ပှၤလၢအတုၤထီၣ်ထီၣ်ဘး လၢလၢပှဲၤပှဲၤ ဝံၤအလီၢ်ခံ+ ပှၤလၢ အဒိကနၣ် အကလုၢ်ကိးဂၤဒဲး ဒိးန့ၢ်ဘၣ် တၢ်အုၣ်က့ၤခီၣ်က့ၤ ခီဖျိလၢအီၤကသ့,+
၁၀ မ့ၢ်လၢ ကစၢ်ယွၤ ပာ်ထီၣ်အီၤလၢ ပှၤလုၢ်တၢ်ခိၣ် အဒိၣ်ကတၢၢ် ဒ်စီၤမၤလကံစဒ့း+ အသိးအဃိလီၤ.
၁၁ တၢ်လၢပကတဲဘၣ်ဃးဒီး ခရံာ်အဂ့ၢ်န့ၣ် အိၣ်ဝဲဒီဒူၣ်လီၤ. ဘၣ်ဆၣ် မ့ၢ်လၢသုနၢ်ဃၢထီၣ်လံအဃိ ပကတဲနၢ်ပၢၢ်သုအဂီၢ် ကီဝဲလီၤ.
၁၂ နီၢ်ကီၢ်န့ၣ် ဆၢကတီၢ်ခဲအံၤ သုကြၢးကဲထီၣ် ပှၤလၢအသိၣ်လိတၢ်လံ. ဘၣ်ဆၣ် ပှၤကဘၣ်သိၣ်လိက့ၤသု ကစၢ်ယွၤ အကလုၢ်ကထါ အခီၣ်ထံးခီၣ်ဘိတဖၣ်+ စးထီၣ်လၢအခီၣ်ထံးလီၤ. ဒီးသုကဲထီၣ်ကဒါက့ၤပှၤလၢ အလိၣ်ဘၣ်တၢ်နုၢ်ထံ ဒီးတမ့ၢ်တၢ်အီၣ် အသံးအကာ်ဘၣ်.
၁၃ ပှၤလၢ အဆဲးအီ တၢ်နုၢ်ထံကိးဂၤဒဲးန့ၣ် မ့ၢ်ဒံးဖိသၣ်+ အဃိ အတသ့ၣ်ညါ ကစၢ်ယွၤ အကလုၢ်ကထါ လၢအတီအလိၤဒံးဘၣ်.
၁၄ ဘၣ်ဆၣ် တၢ်အီၣ်အသံးအကာ်န့ၣ် မ့ၢ်ဝဲလၢပှၤလၢ အဒိၣ်တုာ်ခိၣ်ပှဲၤတဖၣ်အဂီၢ်လီၤ. အဝဲသ့ၣ်န့ၣ် မ့ၢ်ပှၤလၢ အမၤလိသ့ထီၣ်အသးလၢ အကဆိကမိၣ်ထံတၢ် ဒ်သိးကပဲာ်ထံနီၤဖး တၢ်ဂ့ၤဒီးတၢ်အၢအဆၢလီၤ.
