ဧ့ၤဘြံၤ ၇:၁-၂၈
၇ စီၤအၤဘြၤဟၣ် မၤသံဝဲစီၤပၤတဖၣ် ဝံၤအလီၢ်ခံ ဖဲအဟဲက့ၤဝဲအခါ ဝ့ၢ်ၡၤလ့ၣ်အစီၤပၤ စီၤမၤလကံစဒ့း လၢအမ့ၢ် ကစၢ်ယွၤလၢ အထီကတၢၢ်တဂၤ အပှၤလုၢ်တၢ်ဒိၣ်န့ၣ် ဟဲသဂၢၢ်အီၤ ဒီးဆိၣ်ဂ့ၤအီၤလီၤ.+
၂ ဒီးစီၤအၤဘြၤဟၣ် ဟ့ၣ်အီၤ တၢ်ဆံဆဲၣ်ပူတပူ လၢကယဲၢ်တၢ်လၢ အဒိးန့ၢ်ဘၣ်က့ၤဝဲတဖၣ် အကျါလီၤ. အဆိကတၢၢ်န့ၣ် အမံၤအခီပညီမ့ၢ်ဝဲ “တၢ်တီတၢ်လိၤ အစီၤပၤ” ဝံၤဒီးအဝဲမ့ၢ်စ့ၢ်ကီး ဝ့ၢ်ၡၤလ့ၣ်အစီၤပၤ လၢအခီပညီမ့ၢ်ဝဲ “တၢ်ဃူတၢ်ဖိး အစီၤပၤလီၤ.”
၃ တၢ်ကွဲးနီၣ်ကွဲးဃါ ဘၣ်ဃးဒီး အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အတၢ်ဟဲလီၤစၢၤလီၤသွဲၣ်မ့ၢ်ဂ့ၤ, အတၢ်အိၣ်ဖျဲၣ်မ့ၢ်ဂ့ၤ, အတၢ်သံမ့ၢ်ဂ့ၤ တအိၣ်ဘၣ်. အဃိ အလီၤဂာ်လၢ ကစၢ်ယွၤအဖိခွါ ဒီးမ့ၢ်ဝဲ ပှၤလုၢ်တၢ်ဒိၣ်တဂၤ အစိၤစိၤအဃၣ်ဃၣ်လီၤ.+
၄ အဝဲမ့ၢ်ပှၤလၢ အရ့ဒိၣ်ဖးဒိၣ်တဂၤ အဃိ တၢ်လၢအဂ့ၤကတၢၢ်လၢ ဖုဖးဒိၣ် စီၤအၤဘြၤဟၣ် မၤန့ၢ်ဝဲလၢ တၢ်ဒုးအပူၤန့ၣ် စီၤအၤဘြၤဟၣ်ဟ့ၣ်လီၤအီၤ တၢ်ဆံဆဲၣ်ပူတပူလီၤ.+
၅ နီၢ်ကီၢ်န့ၣ် ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိး တၢ်မၤလိာ်အိၣ်ဝဲလၢ ပှၤလုၢ်တၢ်ဒိၣ်တဖၣ်လၢ အဘၣ်တၢ်ဃုထၢထီၣ်အီၤလၢ ပှၤလ့ၤဝံဖိတဖၣ်အကျါန့ၣ်+ ကဘၣ်ထၢဝဲ တၢ်ဆံဆဲၣ်ပူတပူ လၢပှၤလၢအမ့ၢ်+ အဝဲသ့ၣ် အဒီပုၢ်ဝဲၢ်တဖၣ် လၢအဟဲလီၤစၢၤလီၤသွဲၣ်လၢ စီၤအၤဘြၤဟၣ်လီၤ.
၆ ဘၣ်ဆၣ် ပှၤတဂၤအံၤ တဟဲလီၤစၢၤလီၤသွဲၣ်လၢ ပှၤလ့ၤဝံဖိအအိၣ်ဘၣ် သနာ်က့ အဝဲဟံးန့ၢ်ဝဲ တၢ်ဆံဆဲၣ်ပူတပူလၢ စီၤအၤဘြၤဟၣ်အအိၣ် ဒီးဆိၣ်ဂ့ၤဝဲ ပှၤတဂၤလၢအဒိးန့ၢ်ဘၣ် တၢ်စံးပာ်တဖၣ်လီၤ.+
၇ ဒီးပှၤလၢအဆိၣ်ဂ့ၤတၢ်တဂၤန့ၣ် မ့ၢ်ပှၤလၢအဒိၣ်န့ၢ်ဒံး ပှၤလၢအဒိးန့ၢ်ဘၣ် တၢ်ဆိၣ်ဂ့ၤန့ၣ် မ့ၢ်တၢ်လၢ ပဝဲခဲလၢာ်တူာ်လိာ်သ့လီၤ.
၈ ဘၣ်ဃးဒီး ပှၤလ့ၤဝံဖိတဖၣ် လၢအဒိးန့ၢ်ဘၣ် တၢ်ဆံဆဲၣ်ပူတပူန့ၣ် အဝဲသ့ၣ်မ့ၢ်ပှၤလၢ အကသံလီၤ. မ့မ့ၢ် လၢအဝဲတဂၤ လၢအဒိးန့ၢ်ဘၣ်ဝဲ တၢ်ဆံဆဲၣ်ပူတပူန့ၣ် တၢ်အုၣ်အသး အိၣ်ဝဲလၢအမူဝဲလီၤ.+
၉ ဒီးပတဲသ့လၢ စီၤလ့ၤဝံလၢ အဒိးန့ၢ်ဘၣ် တၢ်ဆံဆဲၣ်ပူတပူန့ၣ် ဟ့ၣ်ဝဲတၢ်ဆံဆဲၣ်ပူတပူ ခီဖျိလၢ စီၤအၤဘြၤဟၣ်,
၁၀ မ့ၢ်လၢ ဖဲစီၤမၤလကံစဒ့း ထံၣ်လိာ်သးဒီး စီၤအၤဘြၤဟၣ်အခါ+ စီၤလ့ၤဝံ မ့ၢ်ဝဲပှၤလၢ အကအိၣ်ဖျဲၣ်ထီၣ် ဒ်အဖုဖးဒိၣ် စီၤအၤဘြၤဟၣ် အစၢၤအသွဲၣ်တဂၤ အသိးအဃိလီၤ.
၁၁ စီၤမိၤၡ့ အတၢ်သိၣ်တၢ်သီလၢ ပှၤအံၣ်စရ့လးဖိ ဒိးန့ၢ်ဘၣ်ဝဲန့ၣ် ပၣ်ဃုာ်စ့ၢ်ကီးဒီး တၢ်ရဲၣ်တၢ်ကျဲၤလၢ ပှၤလုၢ်တၢ်ဒိၣ်တဖၣ် ကဘၣ်ဟဲလီၤစၢၤလီၤသွဲၣ်လၢ ပှၤလ့ၤဝံဖိတဖၣ်+ အအိၣ်လီၤ. ပှၤလုၢ်တၢ်ဒိၣ်လၢ အဟဲလီၤစၢၤလီၤသွဲၣ်လၢ ပှၤလ့ၤဝံဖိတဖၣ် ဒုးအိၣ်ထီၣ် တၢ်လၢတၢ်ပှဲၤမ့ၢ်သ့န့ၣ် မ့ၢ်ပကလိၣ်ဘၣ် ပှၤလုၢ်တၢ်ဒိၣ်တဂၤဒ် စီၤမၤလကံစဒ့း+ အသိးဒံးဧါ. ဒီးပမ့ၢ်အိၣ်ဒီး ပှၤလုၢ်တၢ်ဒိၣ်ဒ် စီၤအၤဟရိၣ်အသိးန့ၣ် တလၢပှဲၤဒံးဘၣ်ဧါ.
၁၂ ဖဲပှၤလုၢ်တၢ်ဒိၣ်တဒူၣ် မ့ၢ်ဆီတလဲအခါ တၢ်သိၣ်တၢ်သီစ့ၢ်ကီး ကဘၣ်ဆီတလဲလီၤ.+
၁၃ နီၢ်ကီၢ်န့ၣ် တၢ်ဂ့ၢ်တဖၣ်အံၤ ပာ်ဖျါထီၣ်ဝဲ ပှၤတဂၤလၢ အဟဲလီၤစၢၤလၢ ပှၤအဂၤတဒူၣ်အကျါန့ၣ် အဂ့ၢ်လီၤ. ဒီးပှၤလၢ အပၣ်ဃုာ်လၢ ပှၤတဒူၣ်အံၤအကျါန့ၣ် တတီခိၣ်ရိၤမဲတၢ်လၢ တၢ်လုၢ်လီၢ်နီတဂၤဘၣ်.+
၁၄ ပကစၢ် ဟဲလီၤစၢၤလီၤသွဲၣ်လၢ စီၤယူဒၤအဒူၣ်န့ၣ်+ ဖျါဝဲၡဲၡဲလီၤ. ဘၣ်ဆၣ် စီၤမိၤၡ့တတဲဝဲလၢ ပှၤလုၢ်တၢ်ဒိၣ်တဖၣ်န့ၣ် ကဟဲလီၤစၢၤလီၤသွဲၣ်လၢ ပှၤတဒူၣ်အံၤအအိၣ်ဘၣ်.
၁၅ ဒီးတၢ်ဂ့ၢ်အဝဲအံၤ ဟဲဖျါၡဲဒိၣ်ထီၣ်ဝဲ ခီဖျိလၢ ပှၤလုၢ်တၢ်ဒိၣ်အဂၤတဂၤ+ ဟဲအိၣ်ထီၣ်ဝဲ ဒီးအလီၤဂာ်ဒ် စီၤမၤလကံစဒ့းအသိး+ အဃိလီၤ.
၁၆ ဒီးအဝဲကဲထီၣ် ပှၤလုၢ်တၢ်ဒိၣ် တမ့ၢ်ခီဖျိလၢ တၢ်သိၣ်တၢ်သီလၢ အဒိးသန့ၤထီၣ်အသးလၢ တၢ်ဟဲလီၤစၢၤလီၤသွဲၣ်လၢ နီၢ်ခိတကပၤအဃိဘၣ်. အကဲထီၣ်ဝဲခီဖျိ တၢ်စိတၢ်ကမီၤလၢ အဟ့ၣ်အီၤ သးသမူလၢ အဟးဂီၤတသ့ဘၣ်အဃိလီၤ.+
၁၇ ဘၣ်ဃးဒီးအီၤန့ၣ် တၢ်ကွဲးအသးတဲဝဲလၢ “နမ့ၢ်ပှၤလုၢ်တၢ်ဒိၣ် ဒ်စီၤမၤလကံစဒ့းအသိး+ လီၤထူလီၤယိာ်လီၤ.”
၁၈ အဃိ တၢ်မၤလိာ်လၢ အပူၤကွံာ်န့ၣ် အဂံၢ်စၢ်ဘါစၢ် ဒီးအဘျုးတအိၣ်ဘၣ်အဃိ ဘၣ်တၢ်မၤကတၢၢ်ကွံာ်အီၤလီၤ.+
၁၉ စီၤမိၤၡ့ အတၢ်သိၣ်တၢ်သီန့ၣ် တမၤလၢထီၣ်ပှဲၤထီၣ် တၢ်နီတမံၤဘၣ်.+ ဘၣ်ဆၣ် ကစၢ်ယွၤဟ့ၣ်ပှၤ တၢ်မုၢ်လၢ်လၢ အဂ့ၤဒိၣ်ဝဲတခါလၢ+ အမၤလၢထီၣ်ပှဲၤထီၣ်တၢ်လီၤ. ဒီးလၢတၢ်မုၢ်လၢ်အံၤအဃိ ပဘူးထီၣ်ဒီးကစၢ်ယွၤလီၤ.+
၂၀ ဖဲယ့ၣ်ၡူးဘၣ်တၢ်ပာ်အီၤ ဒ်ပှၤလုၢ်တၢ်ဒိၣ်အသိးအခါ အဒိးန့ၢ်ဘၣ်ဝဲ တၢ်စံးပာ်လၢ ဘၣ်တၢ်ပာ်ဂၢၢ်ပာ်ကျၢၤအီၤ
၂၁ (နီၢ်ကီၢ်န့ၣ် ပှၤလၢအကဲထီၣ် ပှၤလုၢ်တၢ်ဒိၣ်တဖၣ် လၢအတဒိးန့ၢ်ဘၣ် တၢ်စံးပာ်လၢ အဘၣ်တၢ်ပာ်ဂၢၢ်ပာ်ကျၢၤအီၤဘၣ်န့ၣ် အိၣ်ဝဲလီၤ. မ့မ့ၢ် ပှၤတဂၤအံၤ ကဲထီၣ်ဝဲ ပှၤလုၢ်တၢ်ဒိၣ် ခီဖျိလၢကစၢ်ယွၤ အတၢ်စံးပာ်လၢ အဘၣ်တၢ်ပာ်ဂၢၢ်ပာ်ကျၢၤအီၤလီၤ. အတဲဝဲလၢ “ယဟိဝၤယွၤ* ပာ်ဂၢၢ်ပာ်ကျၢၤဝဲဝံၤလံ ဒီးအဝဲတဆီတလဲအသးဘၣ်, ‘နမ့ၢ်ပှၤလုၢ်တၢ်ဒိၣ် လီၤထူလီၤယိာ်’”)+
၂၂ အဃိ ယ့ၣ်ၡူးကဲထီၣ် တၢ်အုၣ်ကီၤဘၣ်ဃးဒီး တၢ်အၢၣ်လီၤအီလီၤလၢ အဂ့ၤဒိၣ်ဝဲတခါလီၤ.+
၂၃ တကးဒံးဘၣ် ပှၤလုၢ်တၢ်ဒိၣ်တဖၣ် သံဝဲအဃိ အဝဲသ့ၣ် ဆဲးမၤပှၤလုၢ်တၢ်ဒိၣ် အတၢ်မၤတသ့လၢၤဘၣ်. လၢတၢ်န့ၣ်အဃိ ပှၤလုၢ်တၢ်ဒိၣ် လၢအဂၤတဖၣ် ကဘၣ်ထီၣ်လၢအလီၢ်+ ဒီးဆဲးမၤက့ၤတၢ်လီၤ.
၂၄ ဘၣ်ဆၣ် မ့မ့ၢ်ယ့ၣ်ၡူးန့ၣ် မူဝဲလီၤထူလီၤယိာ်အဃိ+ ပှၤတလိၣ်ကဲထီၣ် ပှၤလုၢ်တၢ်ဒိၣ် လၢအလီၢ်နီတဂၤဘၣ်.
၂၅ အဃိ ပှၤလၢအသုးဃီၤအသးဆူ ကစၢ်ယွၤအအိၣ် ခီဖျိလၢယ့ၣ်ၡူးန့ၣ် ယ့ၣ်ၡူးအုၣ်က့ၤခီၣ်က့ၤအဝဲသ့ၣ် သ့ဝဲသပှၢ်တၢၢ် မ့ၢ်လၢ အမူဝဲထီဘိ ဒီးဃ့ကညးန့ၢ်တၢ်လၢ အဝဲသ့ၣ်အဂီၢ်+ လၢကစၢ်ယွၤအအိၣ် အဃိလီၤ.
၂၆ ပကြၢးအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ်ဒ်အံၤတဂၤ လၢအသးတီ, လၢအတအိၣ်ဒီး တၢ်ကမၣ်ဘၣ်, လၢအတဘၣ်အၢဘၣ်သီဘၣ်,+ လၢအလီၤဆီဒီး ပှၤတၢ်ဒဲးဘးဖိတဖၣ် ဒီးလၢအဘၣ် တၢ်ပာ်ထီၣ်အီၤ ထီန့ၢ်ဒံးမူခိၣ်လီၤ.*+
၂၇ ယ့ၣ်ၡူးတလီၤဂာ်ဒ် ပှၤလုၢ်တၢ်ခိၣ် အဒိၣ်ကတၢၢ် အဂၤတဖၣ် အသိးဘၣ်အဃိ အဝဲတလိၣ်ဟ့ၣ်လုၢ်ထီၣ်တၢ် ကိးနံၤဒဲး,+ အဆိကတၢၢ် လၢအနီၢ်ကစၢ် အတၢ်ဒဲးဘးအဂီၢ် ဝံၤဒီးလၢပှၤဂီၢ်မုၢ် အတၢ်ဒဲးဘးအဂီၢ်န့ၣ်ဘၣ်.+ အဝဲမၤဝဲဒ်န့ၣ် ထဲတဘျီ ဖဲအဟ့ၣ်လုၢ်ထီၣ် အနီၢ်ကစၢ်အသးအခါ+ ဒီးအကကဲဘျုး လီၤထူလီၤယိာ်လီၤ.
၂၈ စီၤမိၤၡ့ အတၢ်သိၣ်တၢ်သီန့ၣ် ပာ်ထီၣ်ဝဲ ပှၤလၢအအိၣ်ဒီး တၢ်ဂံၢ်စၢ်ဘါစၢ်တဖၣ်+ လၢပှၤလုၢ်တၢ်ခိၣ် အဒိၣ်ကတၢၢ်တဖၣ်လီၤ. ဘၣ်ဆၣ် ဖဲကစၢ်ယွၤဟ့ၣ်လီၤ စီၤမိၤၡ့ အတၢ်သိၣ်တၢ်သီ ဝံၤအလီၢ်ခံ ကစၢ်ယွၤ အတၢ်စံးပာ်တခါလၢ+ အဘၣ်တၢ်ပာ်ဂၢၢ်ပာ်ကျၢၤအီၤန့ၣ် ပာ်ထီၣ်ဝဲဖိခွါလၢ အကဲထီၣ် ပှၤလၢအတုၤထီၣ်ထီၣ်ဘး လၢလၢပှဲၤပှဲၤ+ လီၤထူလီၤယိာ်တဂၤလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ဖျါလၢအဲၣ်ဒိးတဲဝဲ ပှၤဟီၣ်ခိၣ်ဖိ အတၢ်ပၢတၢ်ပြးတဖၣ်.
