ဧၤမိၣ် ၄:၁-၁၃
၄ “သုပှၤပိာ်မုၣ်တဖၣ်လၢ အအိၣ်ဝဲလၢ ၡၤမရံ အကစၢၢ်လိၤသ့ၣ်ဧၢ,+ ဒိကနၣ် တၢ်ကတိၤသ့ၣ်တဖၣ်အံၤတက့ၢ်.
သုလီၤဂာ် ဒ်သိးဒီး ဘၤၡၣ် အကျီၢ်မိၢ်တဖၣ်ခီဖျိလၢ သုလံၣ်အီၣ်လီအီၣ် ပှၤလၢအပတီၢ်ဖုၣ်တဖၣ်+ ဒီးသုမၤသဘှံး ပှၤဖှီၣ်ဖိယာ်ဖိလီၤ.
ဒီးသုတဲသုဝၤ* လၢ ‘ဟဲစိာ်ဒုးအီပှၤ တၢ်တမံၤမံၤသၢၤ.’
၂ ဒ်တၢ်ပၢကစၢ် ယဟိဝၤယွၤ မ့ၢ်ပှၤလၢအစီဆှံအသိး အဝဲ အၢၣ်လီၤဝဲလၢ“‘ဆၢကတီၢ်ကဟဲဝဲလၢ အဝဲကဘျးထီၣ်သုလၢ ပှၤဘျးထီၣ်တၢ်ညၣ် အနီၣ်ဘျးတဖၣ်ဒီးပှၤလၢအအိၣ်တ့ၢ်တဖၣ်န့ၣ် အဝဲကဘျးဝဲလၢ တခွဲကနၣ်လီၤ.’”
၃ ‘ယဟိဝၤယွၤ တဲဝဲလၢ “သုဝဲတဂၤစုာ်စုာ်န့ၣ် သုကဘၣ် ဟးထီၣ်လၢ တၢ်အဒူၣ်ဖျိအပူၤ လၢအအိၣ်လၢသုမဲာ်ညါ တီတီလီၤ.
ဒီးပှၤကနီလဲၤသုလၢ ဟါမိၤလီၤ.’”
၄ ‘ဟဲလၢ ဝ့ၢ်ဘ့ၤသ့လး ဒီးမၤတၢ်ဒဲးဘး+ဒီးဟဲလၢ ဝ့ၢ်ကံးလကၤလး ဒီးမၤအါထီၣ် တၢ်ဒဲးဘးသၢၤ.+
ဟဲစိာ်သုတၢ်လုၢ်တဖၣ်+ လၢဂီၤခီဒီးတၢ်ဆံဆဲၣ်ပူတပူ+ လၢသၢသီတသီသၢၤ.’
၅ တၢ်ပၢကစၢ် ယဟိဝၤယွၤတဲဝဲလၢ ‘ဒွဲၣ်ထီၣ် ကိၣ်လၢ အပၣ်ဒီးကိၣ်မံၣ် လၢသုကစံးဘျုးစံးဖှိၣ် ကစၢ်ယွၤအဂီၢ်သၢၤ.+
သုလုၢ်ထီၣ်တၢ်လၢ တၢ်သးအိၣ်အပူၤန့ၣ် ဘိးဘၣ်သ့ၣ်ညါလီၤပှၤဂၤ လၢသုကလုၢ်ဖးဒိၣ်သၢၤ.
အိ အံၣ်စရ့လး အပှၤဂီၢ်မုၢ်သ့ၣ်ဧၢ, သုမၤဒ်န့ၣ် မုာ်ဒိၣ်မးလီၤ.’
၆ ဒီးယဟိဝၤယွၤ တဲဝဲလၢ ‘ယဒုးအိၣ်ထီၣ် တၢ်သၣ်ဝံၤလီၤဒိလၢ သုဝ့ၢ်ကိးဖျၢၣ်ဒဲးအပူၤဒီးလၢသုဟံၣ်ကိးဖျၢၣ်ဒဲးအပူၤန့ၣ် တၢ်အီၣ် အိၣ်တယၢဘၣ်.*+
ဘၣ်ဆၣ် သုတဟဲက့ၤကဒါက့ၤလၢ ယအိၣ်ဘၣ်.’+
၇ ‘တချုးလၢ ကူးတၢ်အဆၢကတီၢ် ဘၣ်ဒံးဘၣ်သၢလါန့ၣ် ယတဒုးစူၤလီၤန့ၢ်သု မူခိၣ်ထံဘၣ်.+
ဒီးယဒုးစူၤလီၤမူခိၣ်ထံလၢ ဝ့ၢ်တဖျၢၣ်အပူၤ ဘၣ်ဆၣ် ယတဒုးစူၤလီၤအီၤလၢ ဝ့ၢ်အဂၤတဖျၢၣ်အပူၤဘၣ်.
မူခိၣ်စူၤလီၤလၢ ဟီၣ်ခိၣ်တကဝီၤအပူၤဘၣ်ဆၣ် လၢဟီၣ်ခိၣ်ကဝီၤအဂၤန့ၣ် မူခိၣ်တစူၤလီၤဘၣ်အဃိ ဟီၣ်ခိၣ် ဃ့ထီကွံာ်လီၤ.’
၈ ယဟိဝၤယွၤ တဲဝဲလၢ ‘ပှၤဝ့ၢ်ဖိလၢ ဝ့ၢ်ခံဖျၢၣ်သၢဖျၢၣ် အပူၤန့ၣ် ဘၣ်လဲၤဝဲ ကပံၢ်ကပၢ်လၢ ဝ့ၢ်အဂၤတဖျၢၣ် ဒ်သိး ကအီဘၣ်ထံအဂီၢ်+ဒီးအဝဲသ့ၣ် တအီဘၣ်ဝဲ ဘျဲဘျဲဘၣ်.
ဘၣ်ဆၣ် သုတဟဲက့ၤကဒါက့ၤလၢ ယအိၣ်ဘၣ်.’+
၉ ယဟိဝၤယွၤ တဲဝဲလၢ ‘ယမၤဒ်သိး ကလံၤကိၢ်ကလီၤဘၣ် သုတၢ်မုၢ်တၢ်ဘိ ဒီးအဃၢ်ကလီၤ အဂီၢ်လီၤ.+
သုသူၣ်လီၤအါထီၣ် တၤသၣ်လီၢ်တဖၣ် ဒီးစပံးကျီးတဖၣ်ဘၣ်ဆၣ် ဒွဲၣ်တဖၣ် မၤဟးဂီၤကွံာ် သုချၢၣ်ဒၢအထူၣ် ဒီးသ့ၣ်စၤယံးအထူၣ်တဖၣ်လီၤ.+
ဘၣ်ဆၣ် သုတဟဲက့ၤကဒါက့ၤလၢ ယအိၣ်ဘၣ်.’+
၁၀ ဒီးယဟိဝၤယွၤ တဲဝဲလၢ ‘ယဆှၢလီၤ တၢ်ဆါသံသတြိာ် လၢသုကျါ ဒ်လၢကီၢ်အဲၤကူပတူးပူၤ အသိးလီၤ.+
ယကျီသံကွံာ် သုပှၤပိာ်ခွါသးစၢ်တဖၣ် လၢနး+ ဒီးယကဂုာ်န့ၢ်ကွံာ် သုကသ့ၣ်တဖၣ်လီၤ.+
ဒီးယမၤဒ်သိး သုဒဲကဝီၤတဖၣ် ကနၢအုၣ်လၢ ပှၤသံအစိၣ်+ဘၣ်ဆၣ် သုတဟဲက့ၤကဒါက့ၤလၢ ယအိၣ်ဘၣ်.’
၁၁ ဒီးယဟိဝၤယွၤ တဲဝဲလၢ ‘ယမၤဟးဂီၤကွံာ်သုဒ်ယမၤဟးဂီၤ ဝ့ၢ်စဒိၣ်ဒီး ဂမိရၤ အသိးလီၤ.+
ဒီးသုဝဲလၢ အမူဒံးန့ၣ် လီၤဂာ် ဒ်သိးဒီး သ့ၣ်မုၣ်တကျီၣ်လၢ ပှၤထုးထီၣ်ကွံာ်အီၤလၢ မ့ၣ်အူအပူၤဘၣ်ဆၣ် သုတဟဲက့ၤကဒါက့ၤလၢ ယအိၣ်ဘၣ်.’+
၁၂ အိ အံၣ်စရ့လးဧၢ, ယကမၤကဒီးသု ဒ်န့ၣ်လီၤ.
အိ အံၣ်စရ့လးဧၢ, မ့ၢ်လၢယကမၤသု ဒ်န့ၣ်အဃိအိၣ်ကတဲာ်ကတီၤသုသးလၢ သုကကွၢ်ဆၢၣ်မဲာ်လိာ်သး ဒီးသုကစၢ်ယွၤတက့ၢ်.
၁၃ အဝဲမ့ၢ်ပှၤလၢ အဒုးအိၣ်ထီၣ် ကစၢၢ်ကလိတဖၣ်+ ဒီးအတ့လီၤ ကလံၤလီၤ.+
အဝဲတဲဘၣ် ပှၤဟီၣ်ခိၣ်ဖိလၢ အတၢ်ဆိကမိၣ်တဖၣ်ဒီးမၤကဲထီၣ်က့ၤ ဂီၤခီအတၢ်ကပီၤ လၢတၢ်ခံးလီၤ.+
ဒီးအဝဲယီၢ်လီၤဝဲ ဟီၣ်ခိၣ် အတၢ်လီၢ်ထီၣ်ထီတဖၣ်+ဒီးအမံၤမ့ၢ်ဝဲ တၢ်သုးမုၢ်ဂီၢ်မုၢ် အကစၢ် ယဟိဝၤယွၤလီၤ.”
