ဧၤမိၣ် ၅:၁-၂၇
၅ “အိ အံၣ်စရ့လး အပှၤဂီၢ်မုၢ်* သ့ၣ်ဧၢ, ကနၣ်ထါဟီၣ်တယုၢ်လၢ ယကတဲအီၤလၢ သုဂီၢ်န့ၣ်တက့ၢ်.
၂ ‘မုၣ်ကနီၤအံၣ်စရ့လး လီၤဃံၢ်လၢ အနီၢ်ကစၢ်အကီၢ်ပူၤလံဒီးအဂဲၤဆၢထၢၣ်က့ၤ တန့ၢ်ဘၣ်.
အဘၣ်တၢ်ပာ်တ့ၢ်ကွံာ်အီၤဒီးပှၤလၢ ကဝံၣ်ဆၢထၢၣ်အီၤန့ၣ် တအိၣ်နီတဂၤဘၣ်.’
၃ “တၢ်ပၢကစၢ် ယဟိဝၤယွၤ တဲဝဲလၢ‘တၢ်ကကဲထီၣ်သးဒီး အံၣ်စရ့လး အပှၤဂီၢ်မုၢ် ဒ်အံၤလီၤ. လၢဝ့ၢ်တဖျၢၣ်အပူၤ ပှၤမ့ၢ်လဲၤဒုးတၢ် အဂၤတကထိန့ၣ် အဝဲသ့ၣ် ကအိၣ်မူတ့ၢ်က့ၤထဲ အဂၤတကယၤလီၤ.
ဒီးပှၤမ့ၢ်လဲၤဒုးတၢ် အဂၤတကယၤန့ၣ် အဝဲသ့ၣ်ကအိၣ်မူတ့ၢ်က့ၤထဲ အဂၤတဆံလီၤ.’+
၄ “ယဟိဝၤယွၤတဲ အံၣ်စရ့လး အပှၤဂီၢ်မုၢ်လၢ‘ဃုယၤ ဒီးဆဲးမူတက့ၢ်.+
၅ တဘၣ်လဲၤလၢ ဝ့ၢ်ဘ့ၤသ့လး ဒ်သိးသုကန့ၢ်ဘၣ် တၢ်မၤစၢၤ အဂီၢ်တဂ့ၤ.+
တဘၣ်လဲၤလၢ ဝ့ၢ်ကံးလကၤလး+ ဒီးတဘၣ်လဲၤခီဂာ် တၢ်လီၢ်အဆၢ ဒ်သိးသုကလဲၤလၢ ဝ့ၢ်ဘ့ၢ်ၡဘၤအဂီၢ်တဂ့ၤ.+
ပှၤကံးလကၤလးဖိန့ၣ် ကဘၣ်တၢ်က့ၤဖီၣ်အီၤ သပှၢ်ကတၢၢ်+ဒီးဝ့ၢ်ဘ့ၤသ့လးန့ၣ် ကဟးဂီၤကွံာ်လီၤ.
၆ ဃုယၤ ယဟိဝၤယွၤ ဒီးဆဲးမူတက့ၢ်.+
သုမ့ၢ်တမၤ ဒ်န့ၣ်ဘၣ်န့ၣ် ယကမၤဟးဂီၤဘၣ်ဖုး စီၤယိၤသး အစၢၤအသွဲၣ် ဒ်မ့ၣ်အူအီၣ်တၢ်အသိးဒီးကအီၣ်ကွံာ် ဝ့ၢ်ဘ့ၤသ့လး ဒီးပှၤမၤပံာ်မ့ၣ်အူအံၤ တန့ၢ်နီတဂၤဘၣ်.
၇ သုမၤကဲထီၣ်က့ၤ တၢ်စံၣ်ညီၣ်တီ ဒ်တၢ်မုၢ်တၢ်ဘိလၢအခၣ်ဒီးသုကွံာ်လီၤ တၢ်တီတၢ်လိၤ လၢဟီၣ်ခိၣ်လိၤလီၤ.+
၈ ပှၤလၢအတ့လီၤ ဆၣ်ဒၢမုၢ် အကရူၢ် ဒီးဆၣ်ယိးမါ အကရူၢ်,+ဒီးအမၤကဲထီၣ် တၢ်ခံးသူ ဒ်ဂီၤခီအသိးဒီးအမၤခံးလီၤမုၢ်နံၤ ဒ်မုၢ်နၤခီအသိး+ဒီးပာ်ဖှိၣ်ထီၣ် ပီၣ်လဲၣ်အထံဒ်သိး ကလူလီၤက့ၤဝဲလၢ ဟီၣ်ခိၣ်လိၤတဂၤန့ၣ်+အမံၤမ့ၢ်ဝဲ ယဟိဝၤလီၤ.
၉ ဒီးအဝဲ ကမၤဟးဂီၤကွံာ် ပှၤလၢအဂံၢ်ဆူၣ်တဖၣ် သတူၢ်ကလာ်အဃိ တၢ်အိၣ်သဒၢအလီၢ်တဖၣ် ကဟးဂီၤဝဲလီၤ.
၁၀ သုသးဟ့ စံၣ်ညီၣ်ကွီၢ်တဖၣ်လၢ အသိၣ်က့ၤသီက့ၤတၢ် လၢဝ့ၢ်အတြဲၤဒီးသးဘၣ်အၢ ပှၤလၢအတဲ တၢ်မ့ၢ်တၢ်တီလီၤ.+
၁၁ မ့ၢ်လၢသုဃ့န့ၢ်ဆူၣ် ပှၤဖှီၣ်ဖိယာ်ဖိတဖၣ် အစံာ်ပှ့ၤဒီးသုဟံးန့ၢ် အဝဲသ့ၣ်အဘု ဒ်တၢ်ခိတၢ်သွဲအသိးအဃိ+သုတဆဲးအိၣ်ဘၣ်လၢ သုဟံၣ်လၢ သုတ့အီၤဒီး လၢၢ်တဖၣ်လၢၤဘၣ်.+
ဒီးသုတအီဘၣ် စပံးထံလၢ သုဒိးန့ၢ်ဘၣ်အီၤလၢ သုစပံးကျီးလၢအဂ့ၤလၢ သုသူၣ်လီၤအီၤ တဖၣ်လၢၤဘၣ်.+
၁၂ သုထီဒါတၢ် ထဲလဲၣ်ဒီးသုတၢ်ဒဲးဘး ဒိၣ်ထဲလဲၣ်န့ၣ် ယသ့ၣ်ညါလီၤ.
သုမၤနးမၤဖှီၣ် ပှၤတီပှၤလိၤဒီးသုတူၢ်လိာ် တၢ်ထီးကျိၣ်ထီးစ့*ဒီးသုတဟ့ၣ် ပှၤဖှီၣ်ဖိယာ်ဖိ တၢ်ခွဲးတၢ်ယာ် လၢဝ့ၢ်အတြဲၤန့ၣ်ဘၣ်.+
၁၃ ဖဲန့ၣ်အဆၢကတီၢ် တၢ်ကီတၢ်ခဲ ကဘၣ်ဝဲအဃိ+ပှၤလၢအအိၣ်ဒီး တၢ်သ့ၣ်ညါနၢ်ပၢၢ်န့ၣ် ကအိၣ်ဘှ့ၣ်ဝဲလီၤ.
၁၄ ဒ်သိး သုကဆဲးအိၣ်မူဘၣ်အဂီၢ်+မၤတၢ်လၢအဂ့ၤ ဒီးတဘၣ်မၤ တၢ်အၢတဂ့ၤ.+
သုမ့ၢ်မၤထွဲဒ်န့ၣ်န့ၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ ကအိၣ်ဒီးသုဒ်သုတဲလၢ အအိၣ်ဒီးသု အသိးလီၤ.+
၁၅ သးဟ့တၢ်အၢ ဒီးအဲၣ်တၢ်ဂ့ၤတက့ၢ်.+
မ်စံၣ်ညီၣ်ကွီၢ်တဖၣ် လၢဝ့ၢ်အတြဲၤန့ၣ် စံၣ်ညီၣ်တၢ်တီတီလိၤလိၤ တက့ၢ်.+
ဘၣ်သ့ၣ်သ့ၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤကသးကညီၤ စီၤယိၤသး အစၢၤအသွဲၣ်လၢ အအိၣ်တ့ၢ်တဖၣ်လီၤ.’+
၁၆ “လၢတၢ်န့ၣ်အဃိ ယဟိဝၤယွၤ လၢအမ့ၢ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ‘လၢတၢ်ဆါတၢ်ပှ့ၤအလီၢ် ခဲလၢာ်န့ၣ် တၢ်ဟီၣ်တၢ်ယၢၤ ကအိၣ်ထီၣ်ဝဲဒီးလၢကျဲခဲလၢာ် အပူၤန့ၣ် အဝဲသ့ၣ် ကတဲဝဲလၢ “အၣ်လါ, အၣ်လါ.”
အဝဲသ့ၣ် ကမၢ ပှၤမၤစံာ်ဖိတဖၣ် ဟီၣ်ဝဲယၢၤဝဲဒီးအဝဲသ့ၣ်ကမၢပှၤလၢအဟီၣ်သ့တဖၣ် ဟီၣ်ကိးပသူထီၣ်လီၤ.’
၁၇ ယဟိဝၤယွၤ တဲဝဲလၢ ‘မ့ၢ်လၢ ယကလဲၤခီဂာ်တၢ်လၢ သုကျါအဃိတၢ်ဟီၣ်ကိးပသူထီၣ် ကအိၣ်လၢ သုစပံးကျီး ကိးကျီးဒဲး အပူၤလီၤ.’+
၁၈ ‘ပှၤလၢအဆၢထံၣ်ဘၣ် ယဟိဝၤယွၤ အမုၢ်နံၤန့ၣ် ကဘၣ်ကီဘၣ်ခဲ နးမးလီၤ.+
ဖဲယဟိဝၤယွၤအမုၢ်နံၤန့ၣ် သုဆိကမိၣ် တၢ်ကမၤအသးဒီးသု ဒ်လဲၣ်.+
ဖဲန့ၣ်န့ၣ် တၢ်ကခံး ဒီးတၢ်ကပီၤ တအိၣ်ဘၣ်.+
၁၉ ဖဲတၢ်တနံၤန့ၣ် သုကမၤသးဒ် ပိာ်ခွါတဂၤလၢ အဃ့ၢ်ပူၤဖျဲးအသးလၢ ခ့ယုၢ်အအိၣ် ဒီးအဝဲ ဘၣ်သဂၢၢ်ဒီးတၤသူဒီးဖဲအဝဲက့ၤနုာ်လီၤလၢ အဟံၣ်ပူၤ ဒီးတီၣ်ထီၣ်အစုလၢ အဟံၣ်ဒူၣ်လိၤအခါ ဂုၢ်ဖျးအီၤလီၤ.
၂၀ ယဟိဝၤယွၤ အမုၢ်နံၤန့ၣ် တၢ်ကခံး ဒီးတၢ်ကပီၤတအိၣ်ဘၣ်,တၢ်ကခံးသူ ဒီးတၢ်တကပီၤဘၣ်.
၂၁ ယသးဟ့ ဒီးယသးဘၣ်အၢ သုဘူၣ်တဖၣ်+ဒီးယတဘၣ်သူၣ်ဘၣ်သး သုတၢ်အိၣ်ဖှိၣ်လီၤဆီတဖၣ် အတၢ်နၢမူ နီတစဲးဘၣ်.
၂၂ သုမ့ၢ်လုၢ်ထီၣ် တၢ်လုၢ်ဒွဲၣ်အူဒီတဒု ဒီးတၢ်လုၢ်တဖၣ် သနာ်က့ယတဘၣ်သူၣ်ဘၣ်သး တၢ်သ့ၣ်တဖၣ်န့ၣ် နီတစဲးဘၣ်.+
ဒီးသုမ့ၢ်လုၢ်ထီၣ် ဆၣ်ဖိကီၢ်ဖိလၢ အဘီၣ်အသိ ဒ်တၢ်လုၢ်အိၣ်ဃူအိၣ်ဖိးလၢ ယအိၣ် သနာ်က့ တမ့ၢ်လၢ ယကဘၣ်သူၣ်ဘၣ်သးဘၣ်.+
၂၃ တဘၣ်သးဝံၣ်န့ၢ်ယၤ တၢ်သးဝံၣ်လၢ အက့ၣ်နၢ်လၢၤတဂ့ၤ.
ဒီးတဘၣ်ဒုးနၢ်ဟူယၤလၢသု သီတူၢ် အတၢ်ဒ့လၢၤတဂ့ၤ.+
၂၄ မ်တၢ်စံၣ်ညီၣ်တီ ယွၤလီၤဒ် ထံအသိး+ဒီးတၢ်တီတၢ်လိၤ ယွၤလီၤ ဒ်ထံကျိဖိလၢ အလီၤသံးတသ့ဘၣ် အသိးန့ၣ်တက့ၢ်.
၂၅ အိ အံၣ်စရ့လး အပှၤဂီၢ်မုၢ်ဧၢ, ဖဲသုအိၣ်လၢ ပှၢ်မုၢ်ကနၢပူၤ အနံၣ် ၄၀ အခါမ့ၢ်သုလုၢ်ထီၣ်န့ၢ်ယၤ ဆၣ်ဖိကီၢ်ဖိ ဒီးတၢ်လုၢ်တဖၣ် တဘျီဘျီဧါ.+
၂၆ တၢ်ဂီၤတၢ်ဖှီၣ် စၤကူး ဒီးကံၣ်ယူၣ် လၢအမ့ၢ် ဆၣ်အယွၤ လၢသုတ့အီၤလၢ သုနီၢ်ကစၢ်န့ၣ်သုကဘၣ်စိာ်ထီၣ်အီၤ
၂၇ ဒီးယကမၤဒ်သိး ပှၤကက့ၤဖီၣ်သုဆူတၢ်လီၢ်လၢ အတလၢ ဝ့ၢ်ဒၤမ့ၤစ့းလီၤ.’+ တၢ်သုးမုၢ်ဂီၢ်မုၢ် အကစၢ်ယွၤ လၢအမံၤမ့ၢ် ယဟိဝၤန့ၣ် တဲဝဲဒ်န့ၣ်လီၤ.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဟံၣ်.”
^ မ့ၢ်စ့ၢ်ကီး “ကျိၣ်စ့လၢပှၤဟ့ၣ်ဝဲ ဒ်သိးကကျၢၢ်ဘၢတၢ်ကမၣ်အဂီၢ်.”
