ဧၤမိၣ် ၆:၁-၁၄
၆ “ပှၤလၢအအိၣ် လၢစံယိၣ် လၢအနာ်န့ၢ်လီၤအသးဒီးပှၤလၢအဆိကမိၣ်လၢ အအိၣ်ဘၣ် ဘံၣ်ဘံၣ်ဘၢဘၢလၢ ၡၤမရံ အကစၢၢ်န့ၣ် ကဘၣ်ကီဘၣ်ခဲလီၤ.+
အဝဲသ့ၣ်မ့ၢ် ပှၤတကလုာ်လၢ အမံၤဟူသၣ်ဖျါ အပှၤခိၣ်ပှၤနၢ်တဖၣ်ဒီးအံၣ်စရ့လး အပှၤဂီၢ်မုၢ်* လဲၤလၢအဝဲသ့ၣ် အအိၣ်လီၤ.
၂ လဲၤခီဂာ်တၢ်ဆူ ကၤလန့ၤတၢ်လီၢ်ဒီးဆဲးလဲၤလၢ ဝ့ၢ်ဃမါသးဖးဒိၣ်+ဝံၤဒီး လဲၤလီၤလၢ ပှၤဖလ့ၡသးဖိ အဝ့ၢ် ကၤသး ဒီးကွၢ်တက့ၢ်.
မ့ၢ်ဝ့ၢ်တဖၣ်အံၤန့ၣ် ဂ့ၤဒိၣ်န့ၢ်ဒံး သုဘီမုၢ်ခံဘ့ၣ်န့ၣ်ဧါ.*
မ့ၢ်အဝဲသ့ၣ် အတၢ်လီၢ်တၢ်ကျဲန့ၣ် လဲၢ်ဒိၣ်န့ၢ်ဒံး သုတၢ်လီၢ် စ့ၢ်ကီးဧါ.
၃ တၢ်ကီတၢ်ခဲ အမုၢ်နံၤလၢ ကဟဲန့ၣ် သုတထၢနုာ်အီၤလၢ သုခိၣ်နူာ်ပူၤဘၣ်.+
ဒီးပှၤလၢအမၤဆူၣ်မၤစိးတၢ်န့ၣ် သုဒုးပၢအီၤတၢ်လီၤ.+
၄ သုမံနီၤလၢ လီၢ်မံကဆီမဲ+ အဖီခိၣ် ဒီးသုစူၣ်လီၤသုပျိၢ်လၢ လီၢ်ဆ့ၣ်နီၤကပုာ်အဖီခိၣ်+ဒီးသုအီၣ်သိဖါလၢ အဂ့ၤကတၢၢ်တဖၣ် ဒီးကျီၢ်ဖိလၢ အဘီၣ် တဖၣ်လီၤ.+
၅ ဖဲပှၤဒ့တနၢ်အခါ သုထုးထီၣ် တၢ်သးဝံၣ်တဖၣ်+
ဒီးသုတ့ထီၣ် တၢ်ဒ့တၢ်အူ အတၢ်ပီးတၢ်လီတဖၣ် ဒ်စီၤဒၤဝံး အသိးလီၤ.+
၆ သုအီစပံးထံလၢ ခွးဖးဒိၣ်ပှဲၤပှဲၤ အပူၤ+ဒီးသုဖှူလီၤသုသးလၢ သိလၢအဂ့ၤကတၢၢ်လီၤ.
ဒီးဘၣ်ဃးဒီး စီၤယိၤသး အပှၤဂီၢ်မုၢ် အတၢ်ဂ့ၢ်ကီဖးဒိၣ်န့ၣ် သုတဘၣ်ယိၣ်တၢ်ဘၣ်.+
၇ အဃိ သုကမ့ၢ် ပှၤအဆိကတၢၢ်တဖၣ်လၢ ပှၤကက့ၤဖီၣ်အီၤလီၤ.+
ဒီးမူးပွဲလၢ အလီၤရၢၢ်လီၤစၢၢ်တဖၣ်န့ၣ် ကကတၢၢ်ဝဲလီၤ.
၈ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘တၢ်ပၢကစၢ် ယဟိဝၤယွၤ အၢၣ်လီၤတၢ်လၢ အနီၢ်ကစၢ်လၢ+“ယသးဘၣ်အၢ စီၤယၤကိာ်အစၢၤအသွဲၣ် အတၢ်ပာ်ကဖၢလၢသး+ဒီးယသးဟ့ အတၢးလၢ အကျၢၤတဖၣ်လီၤ.+
ယကဟ့ၣ်လီၤ အဝ့ၢ်ဒီးတၢ်အိၣ်လၢအပူၤတဖၣ် လၢအဒုၣ်အဒါတဖၣ် အစုပူၤလီၤ.+
၉ “‘“ဒီးပှၤအဂၤတဆံ မ့ၢ်အိၣ်တ့ၢ်လၢ ဟံၣ်တဖျၢၣ်ဖျၢၣ်အပူၤ နာ်က့ အဝဲသ့ၣ် ကသံဝဲစ့ၢ်ကီးလီၤ.
၁၀ ဒီးအဘူးအတံၢ်တဂၤ* ကဟဲဒီး ကစိာ်ထီၣ်ကွံာ် ပှၤသံအစိၣ်တဖၣ် ဒီးကလဲၤဒွဲၣ်အူအီၣ်ကွံာ်ဝဲ တဂၤဝံၤတဂၤလီၤ. အဝဲကစိာ်ထီၣ်ကွံာ် အဝဲသ့ၣ် အဃံတဖၣ်လၢ ဟံၣ်ချၢ ဒီးကသံကွၢ်ဝဲ ပှၤအိၣ်လၢ ဒၢးပူၤတဖၣ်လၢ ‘ပှၤအိၣ်ဒီးနၤ တဂၤဂၤဒံးဧါ.’ ဒီးအကတဲဆၢဝဲလၢ ‘တအိၣ်နီတဂၤဘၣ်.’ ဒီးပှၤတဂၤန့ၣ် ကတဲအီၤလၢ ‘အိၣ်ဘှ့ၣ်သၢၤ, ခဲအံၤ တမ့ၢ် တၢ်ဆၢကတီၢ်လၢ ပှၤကဘၣ်ယၢၤထီၣ် ယဟိဝၤယွၤ အမံၤဘၣ်.’”
၁၁ ဖဲယဟိဝၤယွၤ ဟ့ၣ်လီၤတၢ်ကလုၢ်အခါ+ဟံၣ်ဖးဒိၣ်တဖၣ် ကကဲထီၣ် လၢၢ်အက့အခီတဖၣ်ဒီးဟံၣ်ဆံးဆံးဖိတဖၣ် ကကဲထီၣ် တၢ်ကမှံၤလီၤ.+
၁၂ မ့ၢ်ကသ့ၣ် ကဃ့ၢ်လၢ လ့အလိၤဧါ.
ဒီးဖဲန့ၣ်န့ၣ် ပှၤကထဲၣ်တၢ်လၢ ကျီၢ်စ့ၢ်ကီးဧါ.
သုမၤကဲထီၣ်က့ၤ တၢ်စံၣ်ညီၣ်တီလၢ တၢ်မုၢ်တၢ်ဘိလၢ အအိၣ်ဒီး အစုၣ်အပျၢ်ဒီးတၢ်တီတၢ်လိၤ အသၣ်လၢ တၢ်မုၢ်တၢ်ဘိလၢ အခၣ်လီၤ.+
၁၃ သုသးခုခီဖျိလၢ တၢ်လၢအဘျုးတအိၣ်ဘၣ်အဃိဒီးသုတဲလၢ “ပစိကမီၤ ဒိၣ်ထီၣ်လၢ ပနီၢ်ကစၢ် အဂံၢ်ဘါအဃိ တမ့ၢ်ဧီၤ.”’+
၁၄ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘အံၣ်စရ့လး အပှၤဂီၢ်မုၢ်ဧၢ, ယကပျဲ ပှၤတကလုာ် ဟဲထီဒါသု+ဒီးအဝဲသ့ၣ် ကဆီၣ်တံၢ်မၤနၢၤသု စးထီၣ်လၢ လံၤဘိၤဃမါသး+ တုၤလီၤလၢ ဧၤရဘၤ အတၢ်တြီၤပူၤလီၤ.’”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဟံၣ်.”
^ ဖျါလၢ အဲၣ်ဒိးတဲဝဲ ယူဒၤအဘီမုၢ် ဒီးအံၣ်စရ့လးအဘီမုၢ်.
^ အခီပညီလိၤလိၤ “အပၢ်အဒီပုၢ်ဝဲၢ်ခွါ.”
