ဧၤမိၣ် ၇:၁-၁၇
၇ တၢ်ပၢကစၢ် ယဟိဝၤယွၤ ဒုးထံၣ်ယၤ တၢ်ထံၣ်လၢညါခီလီၤ. ယထံၣ်လၢ ဖဲတၢ်မုၢ်တၢ်ဘိလၢ ပှၤဖှံလီၤပာ်စၢၤအချံလၢ တၢ်ဂိၢ်အကတီၢ် ဒိၣ်ထီၣ်ဝဲ အခါ အဝဲဆှၢလီၤ ဒွဲၣ်တဖၣ်လီၤ. တၢ်မုၢ်တၢ်ဘိတဖၣ်န့ၣ် ပှၤဖှံလီၤအချံ ဖဲပှၤကူးန့ၢ်စီၤပၤအနီၣ် ဝံၤအလီၢ်ခံလီၤ.
၂ ဖဲဒွဲၣ်တဖၣ်အီၣ်ကွံာ် တၢ်မုၢ်တၢ်ဘိတဖၣ်လၢ ကီၢ်ပူၤဝံၤအခါ ယတဲလၢ “အိ တၢ်ပၢကစၢ် ယဟိဝၤယွၤဧၢ, ဝံသးစူၤပျၢ်ကွံာ် နပှၤဂီၢ်မုၢ် အတၢ်ကမၣ်နီၤ.+ မ့ၢ်လၢ စီၤယၤကိာ် အစၢၤအသွဲၣ်တဖၣ်န့ၣ် အဂံၢ်စၢ်ဒံးအဃိ အတူၢ်ဝဲ ကပှဲၤဧါ.”+
၃ အဃိ ယဟိဝၤယွၤ က့ၤဆိကမိၣ်ကဒါက့ၤ* တၢ်ဂ့ၢ်တခါအံၤ+ ဒီးယဟိဝၤယွၤ တဲဝဲလၢ “တၢ်လၢနထံၣ်ဘၣ်အီၤန့ၣ် တကဲထီၣ်အသးလၢၤဘၣ်.”
၄ တၢ်ပၢကစၢ် ယဟိဝၤယွၤ ဒုးထံၣ်ယၤ တၢ်ထံၣ်လၢညါခီလီၤ. ယထံၣ်လၢ တၢ်ပၢကစၢ် ယဟိဝၤယွၤ မၤလိာ်ဝဲလၢ တၢ်ကစံၣ်ညီၣ်တၢ်လၢ မ့ၣ်အူလီၤ. ဒီးမ့ၣ်အူအံၤ အီၣ်ကွံာ်ဝဲပီၣ်လဲၣ် ဒီးအီၣ်ကွံာ်စ့ၢ်ကီး ဟီၣ်ခိၣ်တနီၤလီၤ.
၅ ဒီးယတဲလၢ “တၢ်ပၢကစၢ် ယဟိဝၤယွၤဧၢ, ဝံသးစူၤ တဘၣ်မၤဒံးတဂ့ၤ.+ မ့ၢ်လၢ စီၤယၤကိာ် အစၢၤအသွဲၣ်တဖၣ်န့ၣ် အဂံၢ်စၢ်ဒံးအဃိ အတူၢ်ဝဲ ကပှဲၤဧါ.”+
၆ အဃိ ယဟိဝၤယွၤ က့ၤဆိကမိၣ်ကဒါက့ၤ တၢ်ဂ့ၢ်တခါအံၤလီၤ.+ ဒီးတၢ်ပၢကစၢ် ယဟိဝၤယွၤ တဲဝဲလၢ “တၢ်လၢနထံၣ်ဘၣ်အီၤ တခါအံၤစ့ၢ်ကီး တကဲထီၣ်အသးလၢၤဘၣ်.”
၇ ဒီးအဝဲဒုးထံၣ်ယၤ ဒ်အံၤလီၤ. လၢတၢ်ဒူၣ်လၢ ပှၤသူနီၣ်ထိၣ်ပျံၤ* ဒီးပှၤတ့ထီၣ်ပာ်စၢၤအီၤဘျၢဘျၢအလိၤန့ၣ် ယထံၣ်ဘၣ် ယဟိဝၤယွၤ ဆၢထၢၣ်ဖဲန့ၣ်လီၤ. ဒီးနီၣ်ထိၣ်ပျံၤ အိၣ်ဝဲလၢ အစုပူၤလီၤ.
၈ ဒီးယဟိဝၤယွၤ တဲဝဲလၢ “စီၤဧၤမိၣ်ဧၢ, နထံၣ်တၢ်မနုၤလဲၣ်.” ဒီးယတဲအီၤလၢ “ယထံၣ်ဘၣ် နီၣ်ထိၣ်ပျံၤ.” ဒီးယဟိဝၤယွၤတဲဝဲလၢ “ယထိၣ် ယပှၤဂီၢ်မုၢ် အံၣ်စရ့လးလၢ နီၣ်ထိၣ်ပျံၤလံ. ယတဝံသးစူၤ အဝဲသ့ၣ်လၢၤဘၣ်.+
၉ ဒီးစီၤအံၤစဲး အစၢၤအသွဲၣ် အတၢ်လီၢ်ထီၣ်ထီတဖၣ်+ ကအိၣ်သယုၢ် ဒီးစီၤအံၣ်စရ့လး အစၢၤအသွဲၣ် အတၢ်ဘူၣ်ထီၣ်ဘါထီၣ် အလီၢ်တဖၣ် ကဟးဂီၤစ့ၢ်ကီးလီၤ.+ မ့မ့ၢ် စီၤယၤရၤဘၣ် အစၢၤအသွဲၣ်တဖၣ်န့ၣ် ယကကျီကွံာ်အီၤ လၢနးလီၤ.”+
၁၀ ဝ့ၢ်ဘ့ၤသ့လး အပှၤလုၢ်တၢ်ဒိၣ် စီၤအမၤစယါ+ ဆှၢလီၤတၢ်ကစီၣ် လၢအံၣ်စရ့လး အစီၤပၤ စီၤယၤရၤဘၣ်အအိၣ်လၢ+ “စီၤဧၤမိၣ် ကူၣ်အၢနၤလၢ အံၣ်စရ့လး အပှၤဂီၢ်မုၢ်* အကျါလံ.+ ဒီးပှၤထံဖိကီၢ်ဖိတဖၣ် တူၢ်အတၢ်ကတိၤတဖၣ် တပှဲၤလၢၤဘၣ်.+
၁၁ စီၤဧၤမိၣ်န့ၣ် တဲဝဲလၢ ‘စီၤယၤရၤဘၣ် ကဘၣ်သံလၢနး ဒီးပှၤအံၣ်စရ့လးဖိတဖၣ်န့ၣ် ပှၤကက့ၤဖီၣ်အဝဲသ့ၣ် လၢကီၢ်အဂၤတဘ့ၣ်အပူၤ သပှၢ်ကတၢၢ်လီၤ.’”+
၁၂ ဒီးစီၤအမၤစယါ တဲစီၤဧၤမိၣ်လၢ “ပှၤလၢအထံၣ် တၢ်ထံၣ်လၢညါခီဧၢ, လဲၤဃ့ၢ်အိၣ်လၢ ယူဒၤ အတၢ်လီၢ်တၢ်ကျဲ ဒီးလုၢ်အီၣ်နသးသမူဖဲန့ၣ်* ဒီးတဲတၢ်ဒ်ဝံအသိး ဖဲန့ၣ်သၢၤ.+
၁၃ မ့မ့ၢ်ဖဲ ဝ့ၢ်ဘ့ၤသ့လးန့ၣ် မ့ၢ်လၢ စီၤပၤ အတၢ်လီၢ်စီဆှံ+ ဒီးဘီမုၢ် အတၢ်လုၢ်ဟံၣ် အိၣ်ဝဲအဃိ နတဘၣ်တဲတၢ်ဒ် ဝံအသိးဖဲအံၤလၢၤဘၣ်.”+
၁၄ စီၤဧၤမိၣ် တဲဆၢ စီၤအမၤစယါလၢ “လၢညါန့ၣ် ယတမ့ၢ်ဝံဘၣ် ဒီးယတမ့ၢ် ဝံအဖိခွါ စ့ၢ်ကီးဘၣ်.+ လၢညါ ယကဲ ပှၤကွၢ်သိ ဒီးယကွၢ်ထွဲ သ့ၣ်သိးဝံာ်ဒၢတဖၣ်လီၤ.
၁၅ ဘၣ်ဆၣ် ယဟိဝၤယွၤ တမၢယကွၢ် သိလၢၤဘၣ်. ယဟိဝၤယွၤ တဲယၤလၢ ‘လဲၤကဲဝံလၢ ယပှၤဂီၢ်မုၢ် အံၣ်စရ့လးအကျါနီၤ.’+
၁၆ အဃိ ခဲအံၤန့ၣ် ကနၣ် တၢ်လၢယဟိဝၤယွၤ တဲဝဲသၢၤ. ‘နတဲလၢ “တဘၣ်တဲဝံအတၢ်စံးပာ်လၢ အထီဒါ အံၣ်စရ့လးအဘီမုၢ်တဂ့ၤ.+ ဒီးတဘၣ်စံၣ်တဲၤတဲလီၤ+ တၢ်စံၣ်ညီၣ်ကစီၣ် ဘၣ်ဃးဒီး စီၤအံၤစဲး အစၢၤအသွဲၣ်တဂ့ၤ.”
၁၇ အဃိ ယဟိဝၤယွၤတဲဝဲလၢ “လၢဝ့ၢ်ပူၤန့ၣ် နမါကကဲထီၣ် ဒ်ပိာ်မုၣ်ဆါလီၤအီၣ်အသးအသိး ဒီးနဖိမုၣ်ဖိခွါတဖၣ်န့ၣ် ကသံလၢနးလီၤ. နဟီၣ်ခိၣ်လီၢ်တဖၣ်န့ၣ် တၢ်ကထိၣ်အီၤလၢ တၢ်ထိၣ်ပျံၤတဘိ ဒီးတၢ်ကနီၤလီၤအီၤလီၤ. ဒီးနနီၢ်ကစၢ်န့ၣ် ကဘၣ်သံလၢ ကီၢ်လၢ အတကဆှီဘၣ်တဘ့ၣ် အပူၤလီၤ. ဒီးပှၤအံၣ်စရ့လးဖိတဖၣ်န့ၣ် ပှၤကက့ၤဖီၣ် အဝဲသ့ၣ် ဆူကီၢ်အဂၤတဘ့ၣ်လီၤ.”’”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သးအုးလၢအဃိ.”
^ မ့ၢ်စ့ၢ်ကီး “စၢၢ်သၣ်အနီၣ်ထိၣ်.”
^ အခီပညီလိၤလိၤ “ဟံၣ်.”
^ အခီပညီလိၤလိၤ “အီၣ်ကိၣ်ဖဲန့ၣ်.”
