၁ ကရံၣ်သူး ၁၅:၁-၅၈
-
ခရံာ် အတၢ်ဂဲၤဆၢထၢၣ်သမူထီၣ်က့ၤ (၁-၁၁)
-
တၢ်ဂဲၤဆၢထၢၣ်သမူထီၣ်က့ၤ မ့ၢ်ဝဲ တၢ်နာ်အခီၣ်ထံးခီၣ်ဘိ (၁၂-၁၉)
-
ခရံာ် အတၢ်ဂဲၤဆၢထၢၣ်သမူထီၣ်က့ၤန့ၣ် မ့ၢ်ဝဲတၢ်အုၣ်ကီၤတခါ (၂၀-၃၄)
-
မိၢ်ပှၢ်လၢ အဘၣ်ဃးဒီးသွံၣ်ထံဖံးညၣ်, ပှၤနီၢ်သးဖိအမိၢ်ပှၢ် (၃၅-၄၉)
-
တၢ်လၢအသံတသ့ဘၣ် ဒီးတၢ်လၢအဟးဂီၤတသ့ဘၣ် (၅၀-၅၇)
-
မၤတၢ်ဆူၣ်ဆူၣ်လၢ ကစၢ်အတၢ်မၤအပူၤ (၅၈)
၁၅ ဒီပုၢ်ဝဲၢ်သ့ၣ်ဧၢ, ခဲအံၤ ယဒုးသ့ၣ်နီၣ်ထီၣ်သု ဘၣ်ဃးဒီး တၢ်သးခုကစီၣ်လၢ ယစံၣ်တဲၤတဲလီၤသု+ လၢသုတူၢ်လိာ် ဒီးလၢသုဆၢထၢၣ် ဂၢၢ်ဂၢၢ်ကျၢၤကျၢၤ လၢအပူၤလီၤ.
၂ တၢ်သးခုကစီၣ် လၢယစံၣ်တဲၤတဲလီၤသုအံၤ သုမ့ၢ်ဟံးဃာ်အီၤဃံးဃံးန့ၣ် သုဘၣ်တၢ် အုၣ်က့ၤခီၣ်က့ၤသု ခီဖျိလၢအီၤလီၤ. သုမ့ၢ်တမၤဒ်န့ၣ်ဘၣ်န့ၣ် မ့ၢ်ဒၣ်သုကဲထီၣ် ပှၤစူၢ်က့ၤနာ်က့ၤတၢ် ကလီကလီလီၤ.
၃ တၢ်လၢအရ့ဒိၣ်ကတၢၢ်လၢ ယမၤလိဘၣ်န့ၣ် ယသိၣ်လိက့ၤသုလီၤ. တၢ်ဂ့ၢ်အဝဲန့ၣ် မ့ၢ်ဝဲ ယ့ၣ်ၡူး တူၢ်သံအသးလၢ ပတၢ်ဒဲးဘးအဂီၢ် ဒ်တၢ်ကွဲးအသး အိၣ်ဝဲအသိးလီၤ.+
၄ ဒီးအဝဲဘၣ် တၢ်ခူၣ်လီၤကွံာ်အီၤ+ ဒီးလၢသၢသီတသီန့ၣ်+ အဘၣ်တၢ် ဒုးဂဲၤဆၢထၢၣ်က့ၤအီၤ+ ဒ်တၢ်ကွဲးအသး အိၣ်ဝဲအသိးလီၤ.+
၅ ဒီးအဝဲလီၣ်ဖျါထီၣ်အသးလၢ စီၤက့ၤဖး*+ အမဲာ်ညါ ဝံၤဒီး လၢပှၤတဆံခံဂၤ+ အမဲာ်ညါလီၤ.
၆ လၢခံန့ၣ် အဝဲလီၣ်ဖျါထီၣ် အသးလၢ ဒီပုၢ်ဝဲၢ်အဂၤ ၅၀၀ ဘျဲၣ်အမဲာ်ညါ တဘျီဃီလီၤ.+ ဒီးအဝဲသ့ၣ် အါတက့ၢ်န့ၣ် အိၣ်ဒီးပှၤဒံး ဘၣ်ဆၣ် အဝဲသ့ၣ်တနီၤန့ၣ် သံလံ.
၇ ဝံၤဒီး အဝဲလီၣ်ဖျါထီၣ် အသးလၢ စီၤယၤကိာ်+ အမဲာ်ညါ ဝံၤဒီး လၢတၢ်မၢဖိခဲလၢာ် အမဲာ်ညါလီၤ.+
၈ ဘၣ်ဆၣ် လၢခံကတၢၢ်န့ၣ် အဝဲလီၣ်ဖျါထီၣ်စ့ၢ်ကီး အသးလၢ ယမဲာ်ညါ,+ လီၤဂာ်ဒ် ယမ့ၢ်ဖိသၣ်လၢ အအိၣ်ဖျဲၣ်ထီၣ် တချုးလၢ အမုၢ်အလါဘၣ်ဒံးဘၣ် အသိးလီၤ.
၉ ယၤန့ၣ် ယမ့ၢ်တၢ်မၢဖိအဆံးကတၢၢ်လီၤ. မ့ၢ်လၢ ယမၤအၢမၤနး ကစၢ်ယွၤ အတၢ်အိၣ်ဖှိၣ်အဃိ+ တၢ်တကြၢးကိးယၤလၢ တၢ်မၢဖိတဂၤဘၣ်.
၁၀ ဘၣ်ဆၣ် ခီဖျိလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်အဃိ ယမ့ၢ်တၢ်မၢဖိတဂၤလီၤ. ဒီးမ့ၢ်လၢ ယမၤတၢ်အါန့ၢ်ဒံး တၢ်မၢဖိအဂၤခဲလၢာ်အဃိ တၢ်သးကညီၤ ဒိၣ်ဒိၣ်မုၢ်မုၢ် လၢကစၢ်ယွၤ ပာ်ဖျါထီၣ်လၢ ယဖီခိၣ်န့ၣ် တကဲထီၣ် တၢ်ကလီကလီဘၣ်. ဘၣ်ဆၣ် တမ့ၢ်လၢ ယနီၢ်ကစၢ် အဂံၢ်အဘါအဃိဘၣ်, မ့ၢ်ဝဲလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်လၢ အအိၣ်ဒီးယၤ အဃိလီၤ.
၁၁ အဃိ ယၤမ့ၢ်ဂ့ၤ, အဝဲသ့ၣ်မ့ၢ်ဂ့ၤ ပစံၣ်တဲၤတဲလီၤ တၢ်ဂ့ၢ်တမံၤဃီ ဒီးသုစူၢ်က့ၤနာ်က့ၤ တၢ်ဂ့ၢ်အဝဲန့ၣ်စ့ၢ်ကီးလီၤ.
၁၂ ခရံာ်အတၢ်ဂဲၤဆၢထၢၣ် လၢတၢ်သံအဂ့ၢ်+ မ့ၢ်ဘၣ်တၢ်စံၣ်တဲၤတဲလီၤအီၤန့ၣ် ဘၣ်မနုၤအဃိ ပှၤလၢသုကျါ တနီၤနီၤတဲဝဲလၢ ပှၤသံတဖၣ် တဂဲၤဆၢထၢၣ် သမူထီၣ်က့ၤဘၣ်လဲၣ်.
၁၃ တၢ်ဂဲၤဆၢထၢၣ် သမူထီၣ်က့ၤ မ့ၢ်တအိၣ်နီၢ်ကီၢ်ဘၣ်န့ၣ် ခရံာ်စ့ၢ်ကီး တဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဘၣ်.
၁၄ တၢ်မ့ၢ်တဒုးဂဲၤဆၢထၢၣ် သမူထီၣ်က့ၤ ခရံာ်ဘၣ်န့ၣ် ပတၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်ကလီကလီ ဒီးသုတၢ်စူၢ်တၢ်နာ်န့ၣ် မ့ၢ်စ့ၢ်ကီး တၢ်ကလီကလီလီၤ.
၁၅ တကးဒံးဘၣ် ပဟးအုၣ်ပသးလၢ ကစၢ်ယွၤ ဒုးဂဲၤဆၢၣ်ထၢၣ် သမူထီၣ်က့ၤခရံာ်လီၤ. ဘၣ်ဆၣ် ပှၤသံမ့ၢ်တဂဲၤဆၢထၢၣ် သမူထီၣ်က့ၤ အနီၢ်ကီၢ်ဘၣ်န့ၣ် အဝဲတဒုးဂဲၤဆၢထၢၣ် သမူထီၣ်က့ၤခရံာ်ဘၣ်.+ မ့မ့ၢ်ဒ်န့ၣ်န့ၣ် ပကဲထီၣ် ကစၢ်ယွၤ အပှၤအုၣ်အသးလၢ အကဘျံးကဘျၣ်တဖၣ်လီၤ.+
၁၆ ပှၤသံတဖၣ် မ့ၢ်တဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဘၣ်န့ၣ် ခရံာ်စ့ၢ်ကီး တဂဲၤဆၢထၢၣ် သမူထီၣ်က့ၤဘၣ်.
၁၇ တကးဒံးဘၣ် ခရံာ်မ့ၢ်တဂဲၤဆၢထၢၣ် သမူထီၣ်က့ၤဘၣ်န့ၣ် သုတၢ်စူၢ်တၢ်နာ်စ့ၢ်ကီး အဘျုးတအိၣ်ဘၣ်. ဒီးသုအိၣ်ဒံးလၢ သုတၢ်ဒဲးဘးအပူၤလီၤ.+
၁၈ ဒီးအခီပညီ မ့ၢ်စ့ၢ်ကီးလၢ ပှၤလၢအသံလၢ ခရံာ်အပူၤန့ၣ် ဟးဂီၤကွံာ်ဝဲလီၤ.+
၁၉ ပမ့ၢ်အိၣ်ဒီး တၢ်မုၢ်လၢ်လၢ ခရံာ်အပူၤ ထဲလၢပတၢ်အိၣ်မူတစိၤအံၤ အဂီၢ်လီၤန့ၣ် ပမ့ၢ်ပှၤလၢ အလီၤသးကညီၤဒိၣ်န့ၢ် ပှၤအဂၤခဲလၢာ်လီၤ.
၂၀ ဘၣ်ဆၣ် ခရံာ်ဘၣ်တၢ်ဒုးဂဲၤဆၢထၢၣ် သမူထီၣ်က့ၤအီၤလၢ တၢ်သံလံ ဒီးအဝဲမ့ၢ် တၤသၣ်ဆိလၢ ပှၤလၢအသံ သ့ၣ်တဖၣ်အကျါလီၤ.+
၂၁ ဒ်တၢ်သံ ဟဲအိၣ်ထီၣ်ဝဲ ခီဖျိလၢ ပိာ်ခွါတဂၤအဃိအသိးန့ၣ်+ တၢ်ဂဲၤဆၢထၢၣ် သမူထီၣ်က့ၤလၢ တၢ်သံစ့ၢ်ကီး ဟဲအိၣ်ထီၣ်ဝဲခီဖျိလၢ ပိာ်ခွါတဂၤအဃိလီၤ.+
၂၂ ဒ်ပှၤခဲလၢာ် သံလၢစီၤအၤဒၣ် အဃိအသိး+ ပှၤခဲလၢာ် ကဘၣ် တၢ်မၤသမူထီၣ်က့ၤအီၤလၢ ခရံာ်အဃိလီၤ.+
၂၃ ဘၣ်ဆၣ် ပှၤတဂၤဒီးတဂၤ ဘၣ်တၢ်မၤသမူထီၣ်က့ၤအီၤ ဒ်တၢ်ရဲၣ်တၢ်ကျဲၤ အိၣ်ဝဲအသိးလီၤ. ပှၤလၢ အဘၣ်တၢ်မၤသမူထီၣ်က့ၤအီၤ အဆိကတၢၢ်န့ၣ်* မ့ၢ်ဝဲခရံာ်လီၤ.+ ဒီးလၢခံ ဖဲခရံာ်အတၢ်ဟဲက့ၤအိၣ်ဒီးပှၤ အဆၢကတီၢ်န့ၣ် ပှၤလၢအမ့ၢ် ခရံာ်အတၢ်တဖၣ် ကဘၣ်တၢ်မၤ သမူထီၣ်က့ၤအီၤလီၤ.+
၂၄ လၢခံ ဖဲအဝဲ မၤဟးဂီၤကွံာ် ကယဲၢ် တၢ်ပၢတၢ်ပြး, တၢ်ကဲခိၣ်ကဲနၢ် ဒီးတၢ်စိတၢ်ကမီၤ ခဲလၢာ်ခဲဆ့ ဝံၤအလီၢ်ခံ ဖဲအကတၢၢ်န့ၣ် အဝဲကဟ့ၣ်က့ၤဘီမုၢ်လၢ ပၢ်ကစၢ်ယွၤအစုပူၤလီၤ.+
၂၅ မ့ၢ်လံ, ခရံာ်ကဘၣ်ပၢတၢ် ဒ်စီၤပၤအသိး တုၤလီၤလၢ ကစၢ်ယွၤပာ်လီၤ အဒုၣ်အဒါခဲလၢာ်လၢ အခီၣ်အဖီလာ်လီၤ.+
၂၆ ဒီးတၢ်သံန့ၣ် မ့ၢ်ဝဲဒုၣ်ဒါလၢ အကဘၣ်တၢ် မၤဟးဂီၤကွံာ်အီၤ အလီၢ်ခံကတၢၢ်လီၤ.+
၂၇ တၢ်ကွဲးအသးအိၣ်ဝဲလၢ ကစၢ်ယွၤ “ပာ်လီၤတၢ်ခဲလၢာ် လၢခရံာ် အခီၣ်ဖီလာ်လီၤ.”+ ဘၣ်ဆၣ် ဖဲအတဲဝဲလၢ ‘တၢ်ခဲလၢာ် ဘၣ်တၢ်ပာ်လီၤအီၤလၢ ခရံာ်အဖီလာ်’+ န့ၣ်ဖျါလီၤတံၢ်လၢ ကစၢ်ယွၤ လၢအပာ်တၢ်ခဲလၢာ် လၢအဖီလာ်တဂၤန့ၣ် တပၣ်ဘၣ်.+
၂၈ ဒီးဖဲတၢ်ခဲလၢာ် ဘၣ်တၢ်ပာ်လီၤအီၤလၢ ဖိခွါအဖီလာ်မ့ၢ်ဝံၤန့ၣ် ဖိခွါအနီၢ်ကစၢ်စ့ၢ်ကီး ကပာ်လီၤအသးလၢ ပှၤလၢအပာ်လီၤတၢ်ခဲလၢာ် လၢအဖီလာ်တဂၤန့ၣ် အဖီလာ်+ ဒ်သိးကစၢ်ယွၤကမ့ၢ် တၢ်ခဲလၢာ်လၢ ပှၤခဲလၢာ်အဂီၢ်လီၤ.+
၂၉ မ့တမ့ၢ်ဒ်န့ၣ်ဘၣ်န့ၣ် ပှၤလၢအဒိးဘျၢအသး ဒ်သိးကကဲထီၣ် ပှၤသံအဂီၢ်န့ၣ် ကမၤဝဲတၢ်မနုၤလဲၣ်.+ ဒီးပှၤသံတဖၣ် မ့ၢ်တဂဲၤဆၢထၢၣ် သမူထီၣ်က့ၤဘၣ်န့ၣ် ဘၣ်မနုၤအဃိ ပှၤဒိးဘျၢအသး ဒ်သိးကကဲထီၣ် ပှၤသံအဂီၢ်လဲၣ်.
၃၀ ဒီးပကွၢ်ဆၢၣ်မဲာ်ဘၣ်စ့ၢ်ကီး တၢ်ဘၣ်ယိၣ်ဘၣ်ဘှီ ကိးနၣ်ရံၣ်ဒဲး* လၢမနုၤအဃိလဲၣ်.+
၃၁ ဒီပုၢ်ဝဲၢ်သ့ၣ်ဧၢ, ဒ်ယပာ်ကဖၢလၢ ယသးလၢသုဃိ လၢပကစၢ် ယ့ၣ်ၡူးခရံာ် အပူၤအသိး ယအုၣ်ယသးလၢ ယကွၢ်ဆၢၣ်မဲာ်ဘၣ် တၢ်သံကိးနံၤဒဲးလီၤ.
၃၂ ယမ့ၢ်ဒုးလိာ်သးဒီး ဆၣ်ဖိကီၢ်ဖိအမံၤလၢ အဒူအဃိၤတဖၣ် လၢဝ့ၢ်အ့းဖ့းစူးအပူၤ+ ဒ်ပှၤအဂၤ ဒုးတ့ၢ်ဝဲအသိး သနာ်က့ မ့ၢ်အဘျုးအိၣ်လၢ ယဂီၢ်ဒ်လဲၣ်. ပှၤသံသ့ၣ်တဖၣ် မ့ၢ်တဂဲၤဆၢထၢၣ် သမူထီၣ်က့ၤဘၣ်န့ၣ် ဒ်ပှၤဂၤတဲဝဲအသိး “မ့ၢ်လၢ ခဲမုၢ်ဆ့ၣ်န့ၣ် ပကသံအဃိ ကဲ, ပအီၣ်တၢ် ဒီးအီတၢ်ဟီ.”+
၃၃ တဘၣ်ပျဲပှၤဂၤ လံၣ်န့ၢ်လီန့ၢ်သုတဂ့ၤ. တၢ်ရ့လိာ်လၢ အတဂ့ၤဘၣ်တဖၣ်န့ၣ် မၤဟးဂီၤဝဲ လုၢ်လၢ်လၢအဂ့ၤတဖၣ်လီၤ.+
၃၄ သ့ၣ်ညါလီၤက့ၤသုသး ဒ်သိးသုကမၤ တၢ်တီတၢ်လိၤအဂီၢ် ဒီးတဘၣ်ဆဲးမၤ တၢ်ဒဲးဘးတဂ့ၤ. သုဝဲသ့ၣ်တနီၤနီၤန့ၣ် သုတအိၣ်ဒီး တၢ်သ့ၣ်ညါ ဘၣ်ဃးဒီး ကစၢ်ယွၤ နီတစဲးဘၣ်. ယတဲဒ်အံၤန့ၣ် ဒ်သိးသုကမဲာ်ဆှးအဂီၢ်လီၤ.
၃၅ ဘၣ်ဆၣ် ပှၤတဂၤဂၤ ကတဲဝဲလၢ “ပှၤသံသ့ၣ်တဖၣ် ကဂဲၤဆၢထၢၣ် သမူထီၣ်က့ၤဒ်လဲၣ်. ဒီးအဝဲသ့ၣ်မ့ၢ်ဂဲၤဆၢထၢၣ် သမူထီၣ်က့ၤန့ၣ် အဝဲသ့ၣ်ကအိၣ်ဒီး အမိၢ်ပှၢ် ဒ်လဲၣ်တကလုာ်လဲၣ်.”+
၃၆ ပှၤလၢ အသးတဆးဘၣ်သ့ၣ်ဧၢ, တၢ်ချံလၢ နဖှံလီၤန့ၣ် မ့ၢ်တအုၣ်သံဆိဘၣ်ဒီး တမဲထီၣ်ဝဲဘၣ်.
၃၇ နမ့ၢ်ဖှံလီၤ ဘုကၠူၣ်မ့ၢ်ဂ့ၤ, ဘုအဂုၤအဂၤမ့ၢ်ဂ့ၤ နကဖှံလီၤ ထဲဒၣ်တၢ်ချံလီၤ. ဒီးတမ့ၢ်လၢ နကဖှံလီၤတၢ်လၢ အမဲထီၣ်ပာ်စၢၤလံဘၣ်.
၃၈ နီၢ်ကီၢ်န့ၣ် ကစၢ်ယွၤဟ့ၣ်လီၤဝဲ တၢ်ချံတဖၣ် အမိၢ်ပှၢ်ဒ်အအဲၣ်ဒိး ဟ့ၣ်လီၤဝဲအသိးလီၤ. ဒီးဖဲတၢ်ချံ တဖျၢၣ်ဘၣ်တဖျၢၣ် ဒိၣ်ထီၣ်ဝဲအခါ တလီၤဂာ်လိာ်အသးဘၣ်.
၃၉ တၢ်ညၣ်န့ၣ် အတဒ်သိးလိာ်အသးခဲလၢာ်ဘၣ်. ပှၤဟီၣ်ခိၣ်ဖိန့ၣ် အညၣ်တမံၤ, ကျီၢ်န့ၣ် အညၣ်တမံၤ, ထိၣ်န့ၣ် အညၣ်တမံၤ ဒီးညၣ်န့ၣ် အညၣ်တမံၤလီၤ.
၄၀ ဒီးတၢ်အမိၢ်ပှၢ်တဖၣ် လၢအဘၣ်ဃးဒီး မူခိၣ်အိၣ်ဝဲ+ ဒီးတၢ်အမိၢ်ပှၢ်တဖၣ် လၢအဘၣ်ဃးဒီး ဟီၣ်ခိၣ်အိၣ်ဝဲစ့ၢ်ကီးလီၤ.+ ဘၣ်ဆၣ် တၢ်အမိၢ်ပှၢ်တဖၣ် လၢအဘၣ်ဃးဒီးမူခိၣ် အလၤကပီၤန့ၣ် အိၣ်ဝဲတမံၤ ဒီးတၢ်အမိၢ်ပှၢ်တဖၣ် လၢအဘၣ်ဃးဒီးဟီၣ်ခိၣ် အလၤကပီၤန့ၣ် အိၣ်ဝဲတမံၤလီၤ.
၄၁ မုၢ်န့ၣ် အလၤကပီၤအိၣ်ဝဲတမံၤ, လါန့ၣ် အလၤကပီၤအိၣ်ဝဲတမံၤ+ ဒီးဆၣ်တဖၣ်န့ၣ် အလၤကပီၤအိၣ်ဝဲလၢ အဂၤတမံၤလီၤ. ဒီးဆၣ်တဖျၢၣ် ဒီးတဖျၢၣ်ဒၣ်လဲာ် အလၤကပီၤ တဒ်သိးလိာ်အသးဘၣ်.
၄၂ ပှၤသံလၢအကဂဲၤဆၢထၢၣ် သမူထီၣ်က့ၤန့ၣ် ကမၤအသးဒ်န့ၣ်အသိး စ့ၢ်ကီးလီၤ. မိၢ်ပှၢ်န့ၣ် လီၤဂာ်ဒ်တၢ်ချံ လၢအဘၣ်တၢ်ဖှံလီၤအီၤ ဒီးအုၣ်သံဝဲ ဘၣ်ဆၣ် ဖဲအဘၣ်တၢ် ဒုးဂဲၤဆၢထၢၣ်က့ၤအီၤအခါ အအုၣ်သံကျၣ်သံ တသ့ဘၣ်.+
၄၃ ဒီးဖဲအဘၣ်တၢ်ဖှံလီၤအီၤအခါ အတအိၣ်ဒီးတၢ်လၤကပီၤဘၣ်. ဘၣ်ဆၣ် ကဂဲၤဆၢထၢၣ်က့ၤလၢ တၢ်လၤကပီၤအပူၤလီၤ.+ ဒီးဖဲအဘၣ်တၢ်ဖှံလီၤအီၤအခါ အအိၣ်ဒီး တၢ်ဂံၢ်စၢ်ဘါစၢ် ဘၣ်ဆၣ် ကဂဲၤဆၢထၢၣ်က့ၤလၢ တၢ်စိတၢ်ကမီၤအပူၤလီၤ.+
၄၄ ဒီးအဘၣ်တၢ်ဖှံလီၤအီၤလၢ မိၢ်ပှၢ်လၢ အဘၣ်ဃးဒီး သွံၣ်ထံဖံးညၣ် ဘၣ်ဆၣ် ကဂဲၤဆၢထၢၣ်က့ၤလၢ ပှၤနီၢ်သးဖိ အမိၢ်ပှၢ်လီၤ. မိၢ်ပှၢ်လၢ အဘၣ်ဃးဒီး သွံၣ်ထံဖံးညၣ်မ့ၢ်အိၣ်န့ၣ် ပှၤနီၢ်သးဖိ အမိၢ်ပှၢ်အိၣ်စ့ၢ်ကီးလီၤ.
၄၅ အဃိ တၢ်ကွဲးအသးအိၣ်ဝဲလၢ “ပိာ်ခွါအဆိကတၢၢ်တဂၤ စီၤအၤဒၣ်န့ၣ် ကဲထီၣ်ပှၤလၢ အမူဝဲတဂၤလီၤ.+ မ့မ့ၢ် စီၤအၤဒၣ် အလီၢ်ခံကတၢၢ်တဂၤန့ၣ်* ကဲထီၣ်ပှၤနီၢ်သးဖိတဂၤ လၢအဟ့ၣ်လီၤတၢ်မူလီၤ.”+
၄၆ ဘၣ်ဆၣ် ပှၤနီၢ်သးဖိအမိၢ်ပှၢ်န့ၣ် တအိၣ်ဆိဘၣ်. မိၢ်ပှၢ်လၢ အမ့ၢ်နီၢ်ခိသွံၣ်ထံဖံးညၣ် အိၣ်ဆိဝဲ ဒီးပှၤနီၢ်သးဖိအမိၢ်ပှၢ် အိၣ်ထီၣ်လၢခံလီၤ.
၄၇ ပိာ်ခွါ အဆိကတၢၢ်တဂၤလၢ အဟဲအိၣ်ထီၣ်လၢ ဟီၣ်ခိၣ်ချၢန့ၣ် ဘၣ်တၢ်တ့အီၤလၢ ဟီၣ်ခိၣ်ကမူၣ်လီၤ.+ မ့မ့ၢ် ပိာ်ခွါ ခံဂၤတဂၤန့ၣ် ဟဲလၢမူခိၣ်လီၤ.+
၄၈ ပှၤတဖၣ်လၢ ဘၣ်တၢ်တ့လီၤအီၤလၢ ဟီၣ်ခိၣ်ကမူၣ်န့ၣ် လီၤဂာ်ဒီး ပှၤတဂၤလၢ အဘၣ်တၢ်တ့လီၤအီၤလၢ ဟီၣ်ခိၣ်ကမူၣ်လီၤ. ဒီးပှၤမူခိၣ်ဖိတဖၣ်န့ၣ် လီၤဂာ်ဒီးပှၤလၢ အအိၣ်လၢ မူခိၣ်တဂၤလီၤ.+
၄၉ ဒီးဒ်ပလီၤဂာ်ဒီး ပှၤတဂၤလၢ အဘၣ်တၢ်တ့လီၤအီၤ လၢဟီၣ်ခိၣ်ကမူၣ်+ အက့ၢ်အဂီၤအသိးန့ၣ် ပကလီၤဂာ်ဒီး ပှၤတဂၤလၢ အအိၣ်လၢမူခိၣ် အက့ၢ်အဂီၤစ့ၢ်ကီးလီၤ.+
၅၀ ဘၣ်ဆၣ် ဒီပုၢ်ဝဲၢ်သ့ၣ်ဧၢ, ယကတဲသုလၢ သွံၣ်ထံဖံးညၣ်န့ၣ် န့ၢ်သါဘၣ် ကစၢ်ယွၤ အဘီအမုၢ်တသ့ဘၣ်. ဒီးတၢ်လၢအဟးဂီၤသ့န့ၣ် တန့ၢ်သါဘၣ် တၢ်လၢ အဟးဂီၤတသ့ဘၣ်န့ၣ်ဘၣ်.
၅၁ ယကတဲဘၣ်သုလၢ တၢ်ခူသူၣ်စီဆှံတခါလီၤ. ပဝဲဒၣ်အံၤ ပတမံလၢ တၢ်သံအပူၤကိးဂၤဒဲးဘၣ်. ဘၣ်ဆၣ် ပဝဲခဲလၢာ် ပကဘၣ်တၢ်လဲလိာ်ပှၤ+
၅၂ တဘျီဃီလၢ တဖျးမဲာ်အတီၢ်ပူၤ ဖဲကွဲၤအလီၢ်ခံကတၢၢ်တဖျၢၣ် သီၣ်ထီၣ် အဆၢကတီၢ်လီၤ. ကွဲၤကသီၣ်ထီၣ်ဝဲ+ ဒီးပှၤသံတဖၣ် ကဂဲၤဆၢထၢၣ်က့ၤဆူ သးသမူလၢ အဟးဂီၤတသ့ဘၣ် ဒီးပကဘၣ် တၢ်လဲလိာ်ပှၤလီၤ.
၅၃ တၢ်လၢအဟးဂီၤသ့အံၤ ကဘၣ်ကဲထီၣ် တၢ်လၢအဟးဂီၤတသ့ဘၣ်+ ဒီးတၢ်လၢ အသံသ့အံၤ ကဘၣ်ကဲထီၣ် တၢ်လၢအသံတသ့ဘၣ်လီၤ.+
၅၄ ဘၣ်ဆၣ် ဖဲတၢ်လၢ အဟးဂီၤသ့အံၤ ကဲထီၣ်တၢ်လၢ အဟးဂီၤတသ့ဘၣ် ဒီးတၢ်လၢအသံသ့အံၤ ကဲထီၣ်တၢ်လၢ အသံတသ့ဘၣ်အခါ တၢ်ကွဲးအသး လၢအတဲဝဲလၢ “တၢ်သံ ဘၣ်တၢ်ယူၢ်လီၤကွံာ်အီၤ လီၤထူလီၤယိာ်”+ န့ၣ် ကလၢထီၣ်ပှဲၤထီၣ်လီၤ.
၅၅ “တၢ်သံဧၢ, နတၢ်မၤနၢၤအိၣ်ဖဲလဲၣ်. တၢ်သံဧၢ, နစုၣ်နပျၢ်အိၣ်ဖဲလဲၣ်.”+
၅၆ တၢ်စုၣ်တၢ်ပျၢ်လၢ အဒုးအိၣ်ထီၣ်တၢ်သံန့ၣ် မ့ၢ်တၢ်ဒဲးဘးလီၤ.+ ဒီးတၢ်ဒဲးဘး အစိကမီၤန့ၣ် မ့ၢ်ဝဲစီၤမိၤၡ့ အတၢ်သိၣ်တၢ်သီလီၤ.+
၅၇ ဘၣ်ဆၣ် ပစံးဘျုးဘၣ် ကစၢ်ယွၤမ့ၢ်လၢ အဟ့ၣ်ပှၤတၢ်မၤနၢၤ ခီဖျိလၢ ပကစၢ်ယ့ၣ်ၡူးခရံာ် အဃိလီၤ.+
၅၈ လၢတၢ်န့ၣ်အဃိ ယဒီပုၢ်ဝဲၢ်သးဘိသ့ၣ်ဧၢ, သုသ့ၣ်ညါလၢ သုတၢ်မၤလၢ ကစၢ်အဂီၢ်န့ၣ် တကဲထီၣ် တၢ်ကလီကလီဘၣ်+ အဃိ အိၣ်ဂၢၢ်ဆိးကျၢၤ+ ဒီးတဘၣ် ဒံဝ့ၤဒံဝီၤတဂ့ၤ. ဒီးမၤတၢ်ဆူၣ်ဆူၣ်လၢ+ ကစၢ်အတၢ်မၤအပူၤ ထီဘိတက့ၢ်.
တၢ်ဂ့ၢ်အဘျဲၣ်တဖၣ်
^ ဘၣ်တၢ်ကိးစ့ၢ်ကီးအီၤလၢ စီၤပ့းတရူး.
^ အခီပညီလိၤလိၤ “တၤသၣ်ဆိ.”
^ မ့ၢ်စ့ၢ်ကီး “ကိးဆၢကတီၢ်ဒဲး.”
^ တၢ်ကတိၤတဖျၢၣ်အံၤ အဲၣ်ဒိးတဲဝဲ ယ့ၣ်ၡူး.
