၁ ကွဲးနီၣ်တၢ် ၁၀:၁-၁၄
-
စီၤစီလူး ဒီးအဖိခွါတဖၣ် သံဝဲ (၁-၁၄)
၁၀ ဒီးပှၤဖလ့ၡသးဖိတဖၣ် ဒုးလိာ်သးဒီး ပှၤအံၣ်စရ့လးဖိလီၤ. ဒီးပှၤအံၣ်စရ့လးဖိတဖၣ် ဃ့ၢ်ကွံာ်ဝဲလၢ ပှၤဖလ့ၡသးဖိတဖၣ် အမဲာ်ညါလီၤ. ပှၤအံၣ်စရ့လးဖိအါဂၤ သံဝဲလၢ ကစၢၢ် ကံးလဘိ အလိၤလီၤ.+
၂ ဒီးပှၤဖလ့ၡသးဖိတဖၣ် လူၤဝဲစီၤစီလူး ဒီးအဖိခွါတဖၣ် တုၤလၢအချုး ဒီးမၤသံဝဲ စီၤစီလူးဒီး အဖိခွါတဖၣ် လၢအမ့ၢ် စီၤယိနၤသၣ်, စီၤအဘံနဒာ်, ဒီးစီၤမးလကံၡူၤ+ န့ၣ်လီၤ.
၃ ဒီးစီၤစီလူးစ့ၢ်ကီး ပှၤဒုးအီၤသပှၢ်တၢၢ် ဒီးပှၤခးပျၢ်ဖိတဖၣ် ထံၣ်ချုးအီၤ ဒီးခးအီၤ ဒီးအဘၣ်ဒိဘၣ်ထံးဝဲလီၤ.+
၄ ဒီးစီၤစီလူး တဲဘၣ် ပှၤလၢအစိာ် အတၢ်စုကဝဲၤတဂၤန့ၣ်လၢ “ဒ်သိး ပှၤလၢ အတဒိးဘၣ် တၢ်ကူးတရံးတဖၣ် သုတဟဲ မၤယၤအၢအၢသီသီ တဂ့ၤအဂီၢ် ထုးထီၣ်နနး ဒီးဆဲးယၤတက့ၢ်.”+ ဘၣ်ဆၣ် ပှၤလၢအစိာ် အတၢ်စုကဝဲၤတဂၤန့ၣ် ပျံၤတၢ်ဒိၣ်မးအဃိ အဝဲတအဲၣ်ဒိးမၤဝဲဘၣ်. အဃိ စီၤစီလူး ဟံးန့ၢ်နး ဒီးမၤသံလီၤအသးလီၤ.+
၅ ဖဲပှၤလၢအစိာ် စီၤစီလူး အတၢ်စုကဝဲၤတဂၤန့ၣ် ထံၣ်ဝဲလၢ စီၤစီလူးသံအခါ အဝဲထုးထီၣ်အနီၢ်ကစၢ်အနး ဒီးမၤသံလီၤအသး စ့ၢ်ကီးလီၤ.
၆ အဃိ စီၤစီလူး, အဖိခွါသၢဂၤ ဒီးပှၤလၢအအိၣ်လၢ အဟံၣ်ပူၤခဲလၢာ် သံဝဲတပူၤဃီလီၤ.+
၇ ဖဲပှၤအံၣ်စရ့လးဖိခဲလၢာ်လၢ အအိၣ်လၢ တၢ်တြီၤန့ၣ် သ့ၣ်ညါဘၣ်ဝဲလၢ ပှၤကိးဂၤဒဲး ဃ့ၢ်ကွံာ်ဝဲ ဒီးစီၤစီလူး ဒီးအဖိခွါသၢဂၤသံအခါ အဝဲသ့ၣ် ဃ့ၢ်ထီၣ်ကွံာ်ဝဲလၢ အဝဲသ့ၣ် အဝ့ၢ်တဖၣ်အပူၤလီၤ. ဒီးပှၤဖလ့ၡသးဖိတဖၣ် ဟဲနုာ်လီၤဝဲလၢ ဝ့ၢ်တဖၣ်အပူၤ ဒီးအိၣ်ဝဲဖဲန့ၣ်လီၤ.
၈ လၢခံတသီ ဖဲပှၤဖလ့ၡသးဖိတဖၣ် လဲၤဟံးန့ၢ် ပှၤလၢအသံတဖၣ် အတၢ်ကူတၢ်သိး ဒီးအတၢ်စုကဝဲၤတဖၣ်အခါ အဝဲသ့ၣ်ထံၣ်ဝဲ စီၤစီလူး ဒီးအဖိခွါတဖၣ် သံဝဲလၢ ကစၢၢ် ကံးလဘိအလိၤလီၤ.+
၉ အဃိ အဝဲသ့ၣ် ဟံးန့ၢ်ဝဲ အတၢ်ကူတၢ်သိး ဒီးအစုကဝဲၤတဖၣ် ဒီးဒီၣ်တဲာ်ကွံာ်ဝဲ အကိာ်လီၤ. ဒီးအဝဲသ့ၣ် ဆှၢလီၤဝဲ ပှၤစိာ်တၢ်ကစီၣ်ဖိတဖၣ်လၢ ပှၤဖလ့ၡသးဖိ အကီၢ်ဒီတဘ့ၣ်ညါ ဒ်သိးကရၤလီၤဝဲ တၢ်ကစီၣ်လၢ အဝဲသ့ၣ် အတၢ်ဂီၤတၢ်ဖှီၣ်+ အတၢ်လုၢ်ဟံၣ်တဖၣ်အပူၤ ဒီးလၢပှၤဂီၢ်မုၢ်အကျါ အဂီၢ်လီၤ.
၁၀ ဒီးအဝဲသ့ၣ် ပာ်လီၤဝဲ စီၤစီလူး အတၢ်ကူတၢ်သိး ဒီးအစုကဝဲၤတဖၣ် လၢအဝဲသ့ၣ် အယွၤအတၢ်လုၢ်ဟံၣ်ပူၤ ဒီးဘျးထီၣ်ဝဲ အခိၣ်ကုလၢ ဒၤကိၣ် အဟံၣ်လီၤ.+
၁၁ ဖဲပှၤလၢအအိၣ်လၢ ဝ့ၢ်ယၤဘ့ၣ်+ လၢကံးလဧးဟီၣ်ကဝီၤအပူၤ နၢ်ဟူဝဲ တၢ်ခဲလၢာ်လၢ ပှၤဖလ့ၡသးဖိတဖၣ် မၤဝဲ စီၤစီလူးအခါ+
၁၂ အဝဲသ့ၣ် အသုးဖိ လၢအသးဒူ ကိးဂၤဒဲးန့ၣ် လဲၤဟံးန့ၢ်ဝဲ စီၤစီလူး ဒီးအဖိခွါတဖၣ် အစိၣ်လီၤ. အဝဲသ့ၣ် ဟဲက့ၤစိာ်ကဒါက့ၤ စီၤစီလူး ဒီးအဖိခွါတဖၣ် အစိၣ်လၢ ယၤဘ့ၣ်+ ဒီးခူၣ်လီၤကွံာ် အဝဲသ့ၣ်အဃံတဖၣ် ဖဲသ့ၣ်ဖးဒိၣ်တထူၣ် အခီၣ်ထံး ဒီးအဝဲသ့ၣ် ဒုၣ်တၢ်အီၣ် နွံသီလီၤ.
၁၃ စီၤစီလူး သံဝဲခီဖျိလၢ အတတီဒီး ယဟိဝၤယွၤဘၣ် အဃိလီၤ. အဝဲတဒိကနၣ် ယဟိဝၤယွၤ အကလုၢ်ဘၣ်.+ တကးဒံးဘၣ် အဝဲလဲၤသံကွၢ်တၢ်လၢ ပှၤလၢအဆဲးကျိးဒီး ပှၤသံအအိၣ်+
၁၄ ဒီးအတသံကွၢ်တၢ်လၢ ယဟိဝၤယွၤ အအိၣ်ဘၣ်. အဃိ ကစၢ်ယွၤ မၤသံကွံာ်အီၤ ဒီးဟ့ၣ်လီၤ အဘီအမုၢ်လၢ စီၤယံးၡဲအဖိခွါ စီၤဒၤဝံး အစုပူၤလီၤ.+
