၁ ကွဲးနီၣ်တၢ် ၁၂:၁-၄၀
-
ပှၤလၢ အဆီၣ်ထွဲ စီၤဒၤဝံး အတၢ်ပၢ (၁-၄၀)
၁၂ ပှၤလၢအလဲၤလၢ စီၤဒၤဝံးအအိၣ် ဖဲအလဲၤအိၣ်ခူသူၣ်လၢ ဝ့ၢ်စံကလးလၢ+ စီၤကံၣ် အဖိခွါ စီၤစီလူး+ အဃိန့ၣ် ဘၣ်တၢ်ပာ်ဖျါထီၣ်အီၤ ဒ်လၢလာ်အံၤ အသိးလီၤ. အဝဲသ့ၣ် ပၣ်ဃုာ်လၢ ပှၤဒူပှၤဃိၤ တဖၣ်လၢ အမၤစၢၤ စီၤဒၤဝံးလၢ တၢ်ဒုး အကျါလီၤ.+
၂ အဝဲသ့ၣ် စိာ်ဒီးချံၣ် ဒီးအဝဲသ့ၣ် ခးပျၢ် ဒီးကွံာ်လၢၢ်လၢ နီၣ်ဘျုး*+ လၢအစုစ့ၣ်မ့ၢ်ဂ့ၤ အစုထွဲမ့ၢ်ဂ့ၤ+ သ့ခံကပၤလၢာ်လီၤ. အဝဲသ့ၣ် မ့ၢ်ဝဲ စီၤစီလူး အဒီပုၢ်ဝဲၢ်ခွါတဖၣ်* လၢအမ့ၢ် ဘံၣ်ယၤမံၣ် အဒူၣ်န့ၣ်လီၤ.+
၃ စီၤအဃံၤဧ့စ့ၢ် မ့ၢ်ဝဲ ပှၤအခိၣ် ဒီးပှၤလၢခံတဂၤန့ၣ် မ့ၢ်ဝဲ စီၤယိးအၣ် (အဝဲသ့ၣ် ခံဂၤလၢာ်န့ၣ် မ့ၢ်ဝဲ ပှၤကံဘဧၤဖိ+ စီၤၡမၤ အဖိခွါ), စီၤဧၤစမၤဝ့း+ အဖိခွါတဖၣ် လၢအမ့ၢ် စီၤယံးစအ့လးဒီး စီၤပ့လ့း, စီၤဘရၤကၤ, ပှၤဧၤနသိးဖိ စီၤယ့ၤဟူ,
၄ ပှၤကံးဘိၣ်ဖိ+ စီၤယံးၡမၤယၤ လၢအမ့ၢ် ပှၤသုးဖိလၢ အဂံၢ်ဆူၣ်ဘါဆူၣ်တဂၤ လၢပှၤအဂၤသၢဆံ+ အကျါ ဒီးမ့ၢ်ဝဲ ပှၤအဂၤသၢဆံအခိၣ်, စီၤယံးရမံယၤ, စီၤယၤဃစအ့လး, စီၤယိဃၤနၣ်, ပှၤကဒ့ရၤဖိ စီၤယိစဘး,
၅ စီၤအလူစဲၤ, စီၤယရံမိး, စီၤဘလံယၤ, စီၤၡမၤရယၤ, ပှၤဃၤရံာ်ဖိ စီၤၡဖးတယၤ,
၆ ပှၤကိၤရးဖိတဖၣ်+ လၢအမ့ၢ် စီၤအ့လကါနၤ, စီၤယံးၡံယၤ, စီၤဧစၤရ့လး, စီၤယိၤဧ့စ့ၢ် ဒီးစီၤယၤၡဘၣ်
၇ ဒီးစီၤယရိဃၣ် လၢအဟဲလၢ ဝ့ၢ်ကဒိၢ်န့ၣ် အဖိခွါတဖၣ် လၢအမ့ၢ် စီၤယိၤဧ့လးဒီး စီၤစဘၤဒယၤလီၤ.
၈ ပှၤကးဖိတနီၤ လဲၤအိၣ်ဃူ စီၤဒၤဝံး ဖဲအအိၣ်ဝဲလၢ တၢ်အိၣ်သဒၢအလီၢ်လၢ ပှၢ်မုၢ်ကနၢ အပူၤလီၤ.+ အဝဲသ့ၣ်မ့ၢ် ပှၤဒူပှၤဃိၤ, သုးဖိလၢ အန့ၢ်ဘၣ်တၢ်သိၣ်လိလၢ ကဒုးတၢ်အဂီၢ် ဒီးအဝဲသ့ၣ် အိၣ်ကတဲာ်ကတီၤ ပာ်စၢၤအသးဒီး ကတီၤဖးဒိၣ်ဒီးဘီ ထီဘိလီၤ. ဒီးအဝဲသ့ၣ် အမဲာ်သၣ်တဖၣ် လီၤဂာ်ဒ် ခ့ယုၢ်အမဲာ်သၣ် ဒီးဃ့ၢ်ဝဲချ့ထဲသိးဒီး တၤဟိတဖၣ် လၢကစၢၢ်ကလိကျါလီၤ.
၉ အဝဲသ့ၣ် မ့ၢ်ဝဲ စီၤဧ့စ့ၢ် လၢအမ့ၢ် ပှၤအခိၣ်, ခံဂၤတဂၤ မ့ၢ်ဝဲ စီၤဧိၤဘါဒယၤ, သၢဂၤတဂၤ မ့ၢ်ဝဲ စီၤအလံအာ်,
၁၀ လွံၢ်ဂၤတဂၤ မ့ၢ်ဝဲ စီၤမံးၡမနၤ, ယဲၢ်ဂၤတဂၤ မ့ၢ်ဝဲ စီၤယံးရမံယၤ,
၁၁ ဃုဂၤတဂၤ မ့ၢ်ဝဲ စီၤဧၤတဲ, နွံဂၤတဂၤ မ့ၢ်ဝဲ စီၤအလံၤအ့လး,
၁၂ ဃိးဂၤတဂၤ မ့ၢ်ဝဲ စီၤယိဃၤနၣ်, ခွံဂၤတဂၤ မ့ၢ်ဝဲ စီၤအ့လစၤဘး,
၁၃ အဂၤတဆံ မ့ၢ်ဝဲ စီၤယံးရမံယၤ ဒီးပှၤဆံတဂၤ မ့ၢ်ဝဲ စီၤမၤကဘၤနဲလီၤ.
၁၄ ပှၤသ့ၣ်တဖၣ်န့ၣ် မ့ၢ်ဝဲ ပှၤကးဖိ+ ဒီးအဝဲသ့ၣ်မ့ၢ် သုးမုၢ်အခိၣ်တဖၣ်လီၤ. ပှၤလၢအဂံၢ်စၢ်ကတၢၢ်လၢ အဝဲသ့ၣ်အကျါန့ၣ် မၤပှၤအဂၤ ၁၀၀ နၢၤဝဲ ဒီးပှၤလၢအဂံၢ်ဆူၣ်ကတၢၢ်န့ၣ် မၤပှၤအဂၤ ၁,၀၀၀ နၢၤဝဲလီၤ.+
၁၅ ပှၤသ့ၣ်တဖၣ်န့ၣ် မ့ၢ်ဝဲ ပှၤသုးဖိတဖၣ်လၢ အလဲၤခီထံကျိယၢ်ဒ့ၣ် ဖဲလါထီၣ် အခီၣ်ထံးတလါ, ဖဲထံကျိ အထံဒိၣ်ထီၣ်ဝဲ တုၤလၢထံကၢၢ်နံၤ အဖီခိၣ်အခါ ဒီးအဝဲသ့ၣ် နီဟးထီၣ်ကွံာ် ပှၤလၢအအိၣ်လၢ တၢ်ပၢၤခိၣ်ခဲလၢာ် ဆူမုၢ်ထီၣ် ဒီးဆူမုၢ်နုာ်န့ၣ်လီၤ.
၁၆ ပှၤပိာ်ခွါတနီၤလၢ ဘံၣ်ယၤမံၣ် ဒီးယူဒၤ အဒူၣ်ကျါန့ၣ် လဲၤလၢ စီၤဒၤဝံးအအိၣ် လၢအတၢ်အိၣ်သဒၢ အလီၢ်န့ၣ်လီၤ.+
၁၇ ဒီးစီၤဒၤဝံး လဲၤလၢ အဝဲသ့ၣ်အအိၣ် ဒီးတဲအဝဲသ့ၣ်လၢ “သုမ့ၢ်ဟဲလၢ တၢ်ဃူတၢ်ဖိးအဂီၢ် ဒ်သိး သုကမၤစၢၤယၤန့ၣ် ယကသးတီဒီးသုလီၤ. ဘၣ်ဆၣ် ယတမၤ ကမၣ်တၢ်ဘၣ်အဃိ သုမ့ၢ်ဟဲဒ်သိး သုကဟ့ၣ်လီၤကွံာ်ယၤလၢ ယဒုၣ်ယဒါတဖၣ် အစုပူၤန့ၣ် မ်ပမိၢ်ပၢ်ဖံဖု လၢပျၢၤတဖၣ် အကစၢ်ယွၤ ထံၣ်ဝဲ ဒီးစံၣ်ညီၣ်တၢ်တက့ၢ်.”+
၁၈ ဒီးသးစီဆှံ ဟဲလီၤဘၣ်လၢ ပှၤသၢဆံအခိၣ် စီၤဧမၤစဲအလိၤ+ ဒီးအတဲဝဲလၢ
“စီၤဒၤဝံးဧၢ, ပမ့ၢ်နတၢ်. စီၤယံးၡဲ+ အဖိခွါဧၢ, ပအိၣ်ဒီးနၤလီၤ.
တၢ်ဃူတၢ်ဖိး, မ်တၢ်ဃူတၢ်ဖိး အိၣ်ဒီးနၤ ဒီးမ်တၢ်ဃူတၢ်ဖိး အိၣ်ဒီးပှၤလၢ အမၤစၢၤနၤ,မ့ၢ်လၢ နကစၢ်ယွၤ မၤစၢၤနၤအဃိ န့ၣ်တက့ၢ်.”+
အဃိ စီၤဒၤဝံး တူၢ်လိာ် အဝဲသ့ၣ် ဒီးပာ်ထီၣ် အဝဲသ့ၣ်လၢ သုးခိၣ်တဖၣ်လၢ အသုးဖိအကျါလီၤ.
၁၉ ဖဲစီၤဒၤဝံး ဟဲဒီး ပှၤဖလ့ၡသးဖိ ဒ်သိး ကဒုးတၢ်ဒီး စီၤစီလူးအခါ ပှၤတနီၤလၢ မနၤၡ့ၤ အဒူၣ်ကျါ ပာ်တ့ၢ်ကွံာ် စီၤစီလူး ဒီးလဲၤအိၣ်ဃူ စီၤဒၤဝံး စ့ၢ်ကီးလီၤ. ဘၣ်ဆၣ် စီၤဒၤဝံး တမၤစၢၤ ပှၤဖလ့ၡသးဖိတဖၣ်ဘၣ်, မ့ၢ်လၢ ဖဲပှၤဖလ့ၡသးဖိ အခိၣ်အနၢ်တဖၣ်+ တၢၣ်ပီၣ်တၢၣ်ပီလိာ်သး ဝံၤအလီၢ်ခံ အဝဲသ့ၣ် တဲဝဲလၢ “စီၤဒၤဝံး ကပာ်တ့ၢ်ပှၤ ဒီးကအိၣ်ဃူက့ၤ အကစၢ် စီၤစီလူး ဒီးပသးသမူ ကၡူဝဲလီၤ.” အဃိ အဝဲသ့ၣ် မၢစီၤဒၤဝံး က့ၤကွံာ်ဝဲလီၤ.+
၂၀ ဖဲစီၤဒၤဝံး လဲၤလၢဝ့ၢ်စံကလး+ အခါ ပှၤလၢမနၤၡ့ၤအဒူၣ်ကျါ ဟဲအိၣ်ဃူအီၤလီၤ. လၢမနၤၡ့ၤ အဒူၣ်ကျါန့ၣ် အဝဲသ့ၣ် မ့ၢ်ဝဲ ပှၤအကထိအခိၣ် လၢအမ့ၢ် စီၤဧၤဒနၤ, စီၤယိစဘး, စီၤယဒံၤဧ့လး, စီၤမံၤက့လး, စီၤယိစဘး, စီၤအလံဟူၤ ဒီးစီၤစံးလသဲလီၤ.+
၂၁ အဝဲသ့ၣ် ခဲလၢာ် မ့ၢ်ဝဲ ပှၤလၢအဂံၢ်ဆူၣ်ဘါဆူၣ်, ပှၤသူၣ်ဒူသးဒူ+ ဒီးအဝဲသ့ၣ် ကဲထီၣ်ဝဲ သုးမုၢ်အခိၣ် အဃိ အဝဲသ့ၣ် မၤစၢၤ စီၤဒၤဝံး ဒ်သိး ကဒုးဝဲ ပှၤသုးဖိတဖုလီၤ.
၂၂ ဒီးဒ်သိး ပှၤကဟဲမၤစၢၤ စီၤဒၤဝံးအဂီၢ်+ တနံၤဘၣ်တနံၤ အဝဲသ့ၣ်ဟဲလၢအအိၣ် အါထီၣ်အါထီၣ်လီၤ. အဃိ စီၤဒၤဝံး အသုးမုၢ်န့ၣ် အါထီၣ်ဝဲ ထဲသိးဒီး ကစၢ်ယွၤ အသုးမုၢ်လီၤ.+
၂၃ ပှၤသုးဖိလၢ အအိၣ်ဒီး တၢ်စုကဝဲၤတဖၣ်လၢ အလဲၤလၢ စီၤဒၤဝံးအအိၣ် ဖဲဝ့ၢ်ဃ့ဘြိၣ်+ ဒ်သိး ကဟ့ၣ်လီၤကွံာ် စီၤစီလူး အဘီမုၢ်တၢ်ပၢ လၢစီၤဒၤဝံးအအိၣ် ဒ်ယဟိဝၤယွၤ တဲဝဲအသိးန့ၣ် အနီၣ်ဂံၢ်အိၣ်ဝဲ ဒ်လၢလာ်အံၤအသိးလီၤ.+
၂၄ လၢယူဒၤ အဒူၣ်ကျါန့ၣ် ပၣ်ဃုာ်ဒီး ပှၤပိာ်ခွါ လၢအစိာ်ဝဲ ကတီၤဖးဒိၣ် ဒီးဘီန့ၣ် အိၣ်ဝဲအဂၤ ၆,၈၀၀ လီၤ.
၂၅ လၢစူၤမ့းအိၣ် အဒူၣ်ကျါန့ၣ် ပၣ်ဃုာ်ဒီး ပှၤသုးဖိလၢ အဂံၢ်ဆူၣ်ဘါဆူၣ် ဒီးအသူၣ်ဒူသးဒူ အဂၤ ၇,၁၀၀ လီၤ.
၂၆ လၢပှၤလ့ၤဝံဖိ အဒူၣ်ကျါန့ၣ် ပၣ်ဃုာ်ဒီး ပှၤအဂၤ ၄,၆၀၀ လီၤ.
၂၇ စီၤယဟိၤယဒါ+ ကဲဝဲ စီၤအၤဟရိၣ် အစၢၤအသွဲၣ်တဖၣ် အခိၣ်+ ဒီးပှၤအိၣ်ဒီးအီၤ အဂၤ ၃,၇၀၀ လီၤ.
၂၈ လၢအဝဲသ့ၣ်အကျါန့ၣ် ပၣ်ဃုာ်ဒီး ပှၤသးစၢ် စီၤစၤဒိး+ လၢအမ့ၢ် ပှၤလၢ အဂံၢ်ဆူၣ်ဘါဆူၣ်ဒီး အသူၣ်ဒူသးဒူ ဃုာ်ဒီး အပၢ်အဒူၣ်ဖိထၢဖိ အခိၣ်အနၢ် ၂၂ ဂၤလီၤ.
၂၉ လၢပှၤဘံၣ်ယၤမံၣ်ဖိ လၢအမ့ၢ် စီၤစီလူး အဒီပုၢ်ဝဲၢ်တဖၣ်* အကျါန့ၣ်+ ပၣ်ဃုာ်ဒီး ပှၤအဂၤ ၃,၀၀၀ လီၤ. လၢအပူၤကွံာ်န့ၣ် အဝဲသ့ၣ် အါတက့ၢ် မ့ၢ်ပှၤလၢ အဆီၣ်ထွဲ စီၤစီလူး ဒီးအဒူၣ်ဖိထၢဖိလၢ တၢ်သးတီအပူၤလီၤ.
၃၀ လၢအ့ဖရဲၣ် အဒူၣ်ကျါန့ၣ် ပၣ်ဃုာ်ဒီး ပှၤအဂၤ ၂၀,၈၀၀ လီၤ. အဝဲသ့ၣ် မ့ၢ်ပှၤသုးဖိလၢ အဂံၢ်ဆူၣ်ဘါဆူၣ်, အသူၣ်ဒူသးဒူ ဒီးအမံၤဒိၣ်သၣ်ဒိၣ် လၢအပၢ်အဒူၣ်ဖိထၢဖိ အကျါလီၤ.
၃၁ လၢမနၤၡ့ၤ အဒူၣ်တဝာ် အကျါန့ၣ် ပၣ်ဃုာ်ဒီး ပှၤအဂၤ ၁၈,၀၀၀ လီၤ. အဝဲသ့ၣ် ဘၣ်တၢ်ဃုထၢထီၣ် ပာ်စၢၤအီၤလၢ ကဟဲဒုးကဲထီၣ် စီၤဒၤဝံးလၢ စီၤပၤန့ၣ်လီၤ.
၃၂ လၢယံးစၣ်ကၢ် အဒူၣ်ကျါန့ၣ် ပၣ်ဃုာ်ဒီး ပှၤအဂၤ ၂၀၀ လၢအမ့ၢ် အဝဲသ့ၣ်အခိၣ်အနၢ်တဖၣ်လီၤ. အဝဲသ့ၣ် သ့ၣ်ညါနၢ်ပၢၢ်ဝဲ တၢ်အိၣ်သးဒီး တၢ်ဆၢကတီၢ် ဒီးပှၤအံၣ်စရ့လးဖိ ကဘၣ်မၤမနုၤလဲၣ်န့ၣ် အဝဲသ့ၣ် သ့ၣ်ညါဝဲလီၤ. ဒီးအဝဲသ့ၣ် အဒီပုၢ်ဝဲၢ်* ခဲလၢာ် အိၣ်လၢ အဝဲသ့ၣ် အတၢ်တီခိၣ်ရိၤမဲ အဖီလာ်လီၤ.
၃၃ လၢစဘူလိၣ် အဒူၣ်ကျါန့ၣ် ပၣ်ဃုာ်ဒီး ပှၤလၢအနုာ်လီၤ ကဲသုးသ့ အဂၤ ၅၀,၀၀၀ လီၤ. အဝဲသ့ၣ် မ့ၢ်ပှၤလၢ အအိၣ်ကတဲာ်ကတီၤ အသးလၢ တၢ်ဒုးအဂီၢ် ဒီးအိၣ်ဝဲဒီး တၢ်စုကဝဲၤ အကလုာ်ကလုာ်လီၤ. အဝဲသ့ၣ် ပာ်ဖှိၣ်ထီၣ်အသးဒီး စီၤဒၤဝံးလၢ အသးဒီဖျၢၣ်လီၤ.*
၃၄ လၢနးသၤလံ အဒူၣ်ကျါန့ၣ် ပၣ်ဃုာ်ဒီး ပှၤခိၣ်ပှၤနၢ် အဂၤ ၁,၀၀၀ ဒီးပှၤလၢ အိၣ်ဒီး အဝဲသ့ၣ် အဂၤ ၃၇,၀၀၀ န့ၣ်စိာ်ဃုာ်ဒီး ကတီၤဖးဒိၣ် ဒီးဘီလီၤ.
၃၅ လၢဒၣ် အဒူၣ်ကျါန့ၣ် ပၣ်ဃုာ်ဒီး ပှၤလၢ အအိၣ်ကတဲာ်ကတီၤ အသးလၢတၢ်ဒုးအဂီၢ် အဂၤ ၂၈,၆၀၀ လီၤ.
၃၆ လၢအၤၡ့ၢ် အဒူၣ်ကျါန့ၣ် ပၣ်ဃုာ်ဒီး ပှၤလၢအနုာ်လီၤကဲသုးသ့ အဂၤ ၄၀,၀၀၀ လီၤ. အဝဲသ့ၣ် မ့ၢ်ပှၤလၢ အအိၣ်ကတဲာ်ကတီၤ အသးလၢ တၢ်ဒုးအဂီၢ်လီၤ.
၃၇ လၢရူၤဘ့ၣ်အဒူၣ်, လၢကးအဒူၣ် ဒီးလၢမနၤၡ့ၤ အဒူၣ်တဝာ် လၢအအိၣ်လၢ ထံကျိယၢ်ဒ့ၣ် အဝၢ်ဘးခီန့ၣ်+ ပၣ်ဃုာ်ဒီး ပှၤသုးဖိ အဂၤ ၁၂၀,၀၀၀ လၢအအိၣ်ဒီး တၢ်စုကဝဲၤ အကလုာ်ကလုာ်လီၤ.
၃၈ ပှၤတဖၣ်န့ၣ် မ့ၢ်ပှၤလၢ အကဲသုးသ့လၢ အအိၣ်ကတဲာ်ကတီၤ အသးလၢ တၢ်ဒုးအဂီၢ် ကိးဂၤဒဲး ဒီးအဝဲသ့ၣ် လဲၤဝဲလၢ ဝ့ၢ်ဃ့ဘြိၣ် လၢတၢ်သးတဖျၢၣ်ဃီအပူၤ ဒ်သိးကဒုးကဲထီၣ် စီၤဒၤဝံးလၢ စီၤပၤလၢ အံၣ်စရ့လးခဲလၢာ် အဖီခိၣ်လီၤ. ဒီးပှၤအံၣ်စရ့လးဖိ လၢအဂၤကိးဂၤဒဲးန့ၣ် အသးလီၤပလိာ်လိာ်သးလၢ အကဒုးကဲထီၣ် စီၤဒၤဝံးလၢ စီၤပၤလီၤ.+
၃၉ ဒီးအဝဲသ့ၣ် အိၣ်ဒီးစီၤဒၤဝံး ဖဲန့ၣ်သၢသီလီၤ. ဒီးမ့ၢ်လၢ ပှၤပိာ်ခွါတဖၣ်လၢ ယူဒၤအဒူၣ်ကျါ ကတဲာ်ကတီၤ တၢ်အီၣ်တၢ်အီလၢ အဝဲသ့ၣ် အဂီၢ်အဃိ အဝဲသ့ၣ် အီၣ်ဝဲအီဝဲလီၤ.
၄၀ ဒီးပှၤလၢ အအိၣ်ဘူးဒီး အဝဲသ့ၣ် ဒီးပှၤလၢအအိၣ်ယံၤဒီး အဝဲသ့ၣ် ပၢၢ်တုၤလၢ ယံးစၣ်ကၢ်, စဘူလိၣ် ဒီးနးသၤလံအဒူၣ် အဟီၣ်ကဝီၤတဖၣ် ဒၣ်လဲာ် တီၣ်ထီၣ် တၢ်အီၣ်တၢ်အီလၢ ကသ့ၣ်ယီၤတဖၣ်, ကီၤလၤအူးတဖၣ် ဒီးလၢကျီၢ်တဖၣ်အလိၤ ဒီးဟဲစိာ်ဝဲလီၤ. အဝဲသ့ၣ် ဟဲစိာ်ဝဲ ကိၣ်ကမူၣ်, ကိၣ်လၢ အဘၣ်တၢ်တ့အီၤလၢ ချၢၣ်ဒၢသၣ်, စပံးသၣ်ဃ့, စပံးထံ, သိ, ကျီၢ် ဒီးမဲာ်တဲးလဲး အါအါဂီၢ်ဂီၢ် မ့ၢ်လၢ အံၣ်စရ့လးအကီၢ် ပှဲၤဝဲဒီး တၢ်သူၣ်ဖှံသးညီ အဃိလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ပျံၤလၢပှၤသူဝဲဒ်သိး ကကွံာ်လၢၢ်အဂီၢ်.
^ အဲၣ်ဒိးတဲဝဲ ပှၤအဒူၣ် တဒူၣ်ဃီဒီး စီၤစီလူး.
^ အဲၣ်ဒိးတဲဝဲ ပှၤအဒူၣ် တဒူၣ်ဃီဒီး စီၤစီလူး.
^ အဲၣ်ဒိးတဲဝဲ ပှၤအဒူၣ် တဒူၣ်ဃီ.
^ မ့ၢ်စ့ၢ်ကီး “ပှၤလၢအပာ်ဖှိၣ်ထီၣ်အသးဒီး စီၤဒၤဝံးန့ၣ် တမ့ၢ်ပှၤလၢ အသးအိၣ်ခံဖျၢၣ် နီတဂၤဘၣ်.”
