၁ ကွဲးနီၣ်တၢ် ၁၃:၁-၁၄
၁၃ စီၤဒၤဝံး တၢၣ်ပီၣ်တၢၣ်ပီလိာ်သးဒီး ပှၤတကယၤအခိၣ်တဖၣ် ဒီးပှၤတကထိအခိၣ်တဖၣ် ဃုာ်ဒီးပှၤခိၣ်ပှၤနၢ် ကိးဂၤဒဲးလီၤ.+
၂ ဒီးစီၤဒၤဝံး တဲဘၣ် အံၣ်စရ့လး အတၢ်အိၣ်ဖှိၣ်ဒီတဖုလၢ “သုမ့ၢ်ဘၣ်သူၣ်ဘၣ်သး ဒီးပကစၢ် ယဟိဝၤယွၤ မ့ၢ်တူၢ်လိာ်ဝဲန့ၣ် ပကဆှၢလီၤ တၢ်ကစီၣ်လၢ ပဒီပုၢ်ဝဲၢ်လၢ အအိၣ်တ့ၢ်တဖၣ်လၢ ကီၢ်အံၣ်စရ့လး ကိးတီၤဒဲးအပူၤ အအိၣ် ဒီးလၢပှၤလုၢ်တၢ်ဒိၣ်တဖၣ် ဒီးပှၤလ့ၤဝံၤဖိတဖၣ် လၢအအိၣ်လၢ အဝဲသ့ၣ် အဝ့ၢ်တဖၣ်အပူၤ*+ အအိၣ် ဒ်သိး အဝဲသ့ၣ် ကဟဲပာ်ဖှိၣ်ထီၣ်အသး ဒီးပှၤအဂီၢ်လီၤ.
၃ ဒီးမ်ပလဲၤဟံးန့ၢ်က့ၤ ပကစၢ်ယွၤ အတလါစီဆှံ+ တက့ၢ်.” အဝဲတဲဝဲဒ်န့ၣ် မ့ၢ်လၢ ဖဲစီၤစီလူး ပၢတၢ်အခါ ပှၤတကွၢ်ထွဲ တလါစီဆှံ ဂ့ၤဂ့ၤဘၣ်.+
၄ ဒီးမ့ၢ်လၢ ပှၤခဲလၢာ် ထံၣ်ဝဲလၢ အဂ့ၤအဃိ တၢ်အိၣ်ဖှိၣ်ဒီတဖု သးလီၤပလိာ်ဝဲလၢ ကမၤဝဲဒ်န့ၣ်လီၤ.
၅ အဃိ စီၤဒၤဝံး ကိးဖှိၣ်ဝဲ ပှၤအံၣ်စရ့လးဖိခဲလၢာ် စးထီၣ်လၢ ကီၢ်အဲၤကူပတူး အထံကျိ* ပၢၢ်တုၤလၢ လံၤဘိၤဃမါသး*+ ဒ်သိး ကလဲၤဟံးန့ၢ်က့ၤ ယွၤလၢအမ့ၢ်အတီတဂၤ အတလါစီဆှံ လၢအအိၣ်လၢ ဝ့ၢ်ကံးရယးယဧၤရံၣ်+ အဂီၢ်န့ၣ်လီၤ.
၆ စီၤဒၤဝံး ဒီးအံၣ်စရ့လး အပှၤဂီၢ်မုၢ်ခဲလၢာ် လဲၤဝဲလၢ ဝ့ၢ်ဘဧၤလၤ+ လၢအမ့ၢ် ဝ့ၢ်ကံးရယးယဧၤရံၣ် လၢအအိၣ်လၢ ယူဒၤအဒူၣ် အဟီၣ်ကဝီၤပူၤ ဒ်သိး ကဟံးန့ၢ် ယွၤအမ့ၢ်အတီ လၢအဆ့ၣ်နီၤလၢ အလီၢ်ပစိာ်လၢ ခ့ရူာ်တဖၣ် အဖီခိၣ်*+ အတလါစီဆှံလီၤ. လၢတလါစီဆှံ အမဲာ်ညါန့ၣ် ညီနုၢ် ပှၤကိးထီၣ် ယဟိဝၤယွၤ အမံၤလီၤ.
၇ ဘၣ်ဆၣ် ဖဲအဝဲသ့ၣ် လဲၤဟံးန့ၢ် ယွၤလၢအမ့ၢ်အတီတဂၤ အတလါစီဆှံ လၢစီၤအဘံနဒာ် အဟံၣ်အခါ အဝဲသ့ၣ် ပာ်လီၤအီၤလၢ လ့ၣ်သီသီတခိၣ်အပူၤ+ ဒ်သိးကဆှၢထီၣ်အီၤအဂီၢ်လီၤ. ဒီးစီၤဧူးစၤ ဒီးစီၤအဃံယိၤ ဆှၢဝဲ လ့ၣ်တခိၣ်အံၤလီၤ.+
၈ ဒီးစီၤဒၤဝံး ဒီးပှၤအံၣ်စရ့လးဖိခဲလၢာ် အိၣ်ဒီး တနၢ်တဖၣ်, သီတူၢ်တဖၣ်, တၢ်ခြ့ခြ့တဖၣ်,+ စှၢၣ်စှံးတဖၣ်,+ ကွဲၤတဖၣ်+ ဒီးအဝဲသ့ၣ် သူၣ်ဝံၣ်သးဆၢတၢ် ဒီးမၤတၢ်သူၣ်ဖှံသးညီ လၢအသးဒီဖျၢၣ်လၢ ယွၤလၢအမ့ၢ်အတီတဂၤ အမဲာ်ညါလီၤ.
၉ ဘၣ်ဆၣ် ဖဲအဝဲသ့ၣ် လဲၤတုၤလၢ စီၤခံဒိၢ် အကြဲၢ်ပူၤအခါ မ့ၢ်လၢကျီၢ်တဖၣ် ဘူးကမၤလီၤတကျၢၢ် လ့ၣ်အဃိ စီၤဧူးစၤ ယူာ်ဃီၤအစု ဒီးဖီၣ်ဃာ် တလါစီဆှံလီၤ.
၁၀ ဒီးယဟိဝၤယွၤ သးဒိၣ်ထီၣ် စီၤဧူးစၤ ဒိၣ်မးလီၤ. ဒီးမ့ၢ်လၢ စီၤဧူးစၤ ယူာ်ဃီၤအစု လၢတလါစီဆှံအအိၣ်+ အဃိ ကစၢ်ယွၤ မၤသံကွံာ်အီၤ ဒီးအသံဝဲလၢ ကစၢ်ယွၤ အမဲာ်ညါလီၤ.+
၁၁ ဒီးမ့ၢ်လၢ ယဟိဝၤယွၤ အတၢ်သးဒိၣ် ဖျိးထီၣ်လၢ စီၤဧူးစၤအလိၤအဃိ စီၤဒၤဝံး သးပှံၢ်ထီၣ်တၢ်လီၤ.* ဒီးပှၤကိး တၢ်လီၢ်တတီၤအံၤ အမံၤလၢ ဖ့ရ့းဧူးစၤ* တုၤလၢ မုၢ်မဆါတနံၤအံၤလီၤ.
၁၂ ဖဲနံၤအဝဲန့ၣ် စီၤဒၤဝံး ပျံၤထီၣ် ယွၤလၢအမ့ၢ်အတီတဂၤ ဒီးတဲဝဲလၢ “ယကဟဲက့ၤဆှၢ ယွၤလၢအမ့ၢ်အတီတဂၤ အတလါစီဆှံ လၢယအိၣ် ကသ့ဒ်လဲၣ်.”+
၁၃ အဃိ စီၤဒၤဝံး တဟဲက့ၤဆှၢ တလါစီဆှံလၢ အအိၣ်တၢ်လီၢ် လၢအမ့ၢ် စီၤဒၤဝံး အဝ့ၢ်လၢၤဘၣ်. ဘၣ်ဆၣ် အဝဲ မၢပှၤလဲၤပာ်ဝဲလၢ ပှၤကၤသးဖိ စီၤဧိၤဘ့းအ့ဒိၣ် အဟံၣ်န့ၣ်လီၤ.
၁၄ ဒီးယွၤလၢအမ့ၢ်အတီတဂၤ အတလါစီဆှံ အိၣ်ဝဲဒီး စီၤဧိၤဘ့းအ့ဒိၣ် အဟံၣ်ဖိဃီဖိ ဖဲစီၤဧိၤဘ့းအ့ဒိၣ် အဟံၣ်န့ၣ် သၢလါ ဒီးယဟိဝၤယွၤ ဆိၣ်ဂ့ၤ စီၤဧိၤဘ့းအ့ဒိၣ် အဟံၣ်ဖိဃီဖိ ဒီးတၢ်လၢအအိၣ်ဒီးအီၤ ခဲလၢာ်လီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဝ့ၢ်တဖၣ်လၢ အအိၣ်ဒီး အတၢ်ပျီတဖၣ်.”
^ မ့ၢ်စ့ၢ်ကီး “လၢၡံဃိၢ်.”
^ မ့ၢ်စ့ၢ်ကီး “ဃမါသး အခိၣ်ထိး.”
^ ဘၣ်သ့ၣ်သ့ၣ် ကမ့ၢ် “အဘၢၣ်စၢၤ.”
^ မ့ၢ်စ့ၢ်ကီး “အသးတမုာ်ဘၣ်.”
^ အခီပညီမ့ၢ်ဝဲ “တၢ်သးဒိၣ် ဖျိးထီၣ်လၢ စီၤဧူးစၤအလိၤ.”
