၁ ကွဲးနီၣ်တၢ် ၁၄:၁-၁၇
၁၄ ဝ့ၢ်စိၢ် အစီၤပၤဃံရၣ်+ ဆှၢလီၤ ပှၤစိာ်တၢ်ကစီၣ်ဖိတဖၣ်လၢ စီၤဒၤဝံး အအိၣ်လီၤ. ဒီးအဆှၢလီၤစ့ၢ်ကီး သ့ၣ်ဆှိအ့ရ့းတဖၣ်, ပှၤလၢ တ့တၢ်ဘှီတၢ်လၢသ့ၣ် ဒီးပှၤမၤလၢၢ်ဖိတဖၣ်* လၢကတ့ထီၣ်န့ၢ် စီၤဒၤဝံး အဟံၣ်တဖျၢၣ် အဂီၢ်လီၤ.+
၂ ဒီးစီၤဒၤဝံး သ့ၣ်ညါဝဲလၢ ယဟိဝၤယွၤ ပာ်ဂၢၢ်ပာ်ကျၢၤအီၤ ဒ်စီၤပၤတဂၤအသိး+ လၢအံၣ်စရ့လးအဂီၢ် ဒီးမၤဆူၣ်ထီၣ်အဘီမုၢ် လၢအပှၤဂီၢ်မုၢ် အံၣ်စရ့လး အဂီၢ်လီၤ.+
၃ ဖဲစီၤဒၤဝံး အိၣ်လၢ ဝ့ၢ်ယရူၤၡလ့ၣ် အခါ အဝဲဟံးန့ၢ်အါထီၣ် အမါတဖၣ်+ ဒီးအဖိမုၣ် ဒီးအဖိခွါတဖၣ် အိၣ်ဖျဲၣ်အါထီၣ်ဝဲလီၤ.+
၄ အဖိတဖၣ်လၢ အအိၣ်ဖျဲၣ်ထီၣ်လၢ ဝ့ၢ်ယရူၤၡလ့ၣ်န့ၣ်+ အမံၤမ့ၢ်ဝဲ စီၤၡးမူၤ, စီၤၡိၤဘာ်, စီၤနၤသၣ်,+ စီၤၡလိၤမိၤ,+
၅ စီၤယံးဘဃၢ်, စီၤအလံၡူၤ, စီၤအ့လပၤလ့း,
၆ စီၤနိကၤ, စီၤန့ဖ့း, စီၤယၤဖံ,
၇ စီၤအလံၡမၤ, စီၤဘဧ့လယၤဒၤ ဒီးစီၤအလံၤဖလ့းလီၤ.
၈ ပှၤဖလ့ၡသးဖိတဖၣ် နၢ်ဟူဝဲလၢ စီၤဒၤဝံး ဘၣ်တၢ်ဒိးဖှူအီၤ ဒ်စီၤပၤတဂၤအသိး လၢအံၣ်စရ့လးခဲလၢာ် အဖီခိၣ်လီၤ.+ ဖဲအဝဲသ့ၣ် နၢ်ဟူဝဲဒ်န့ၣ်အခါ အဝဲသ့ၣ်ခဲလၢာ် ဟဲဒုး စီၤဒၤဝံးလီၤ.+ ဒီးဖဲစီၤဒၤဝံးနၢ်ဟူဝဲ တၢ်ဂ့ၢ်အံၤအခါ အဝဲလဲၤထီၣ်ဝဲ ဒ်သိးကဒုး ပှၤဖလ့ၡသးဖိလီၤ.
၉ ဒီးပှၤဖလ့ၡသးဖိ လဲၤဒုးတၢ်ဖဲ ရၤဖၤအတၢ်တြီၤပူၤ+ တဘျီဝံၤတဘျီလီၤ.
၁၀ ဒီးစီၤဒၤဝံး သံကွၢ် ကစၢ်ယွၤလၢ “မ့ၢ်ယဘၣ် လဲၤထီၣ်ဒုး ပှၤဖလ့ၡသးဖိဧါ. နကဟ့ၣ်လီၤကွံာ် အဝဲသ့ၣ်လၢ ယစုပူၤဧါ.” ဒီးယဟိဝၤယွၤ တဲဆၢက့ၤ စီၤဒၤဝံးလၢ “လဲၤထီၣ်, ယကဟ့ၣ်လီၤကွံာ် အဝဲသ့ၣ် လၢနစုပူၤ သပှၢ်တၢၢ်လီၤ.”+
၁၁ အဃိ စီၤဒၤဝံး လဲၤဝဲလၢ ဘဧၤလးပရၤစံၣ်+ ဒီးစီၤဒၤဝံး မၤသံကွံာ် အဝဲသ့ၣ်ဖဲန့ၣ် ဒီးစီၤဒၤဝံး တဲဝဲလၢ “ယွၤလၢအမ့ၢ်အတီတဂၤ ဆီၣ်ဖျိးကွံာ် ယဒုၣ်ယဒါတဖၣ် ခီဖျိလၢယစု ဒ်ထံဆီၣ်ဖျိးတၢ် အသိးလီၤ.” အဃိ အဝဲသ့ၣ် ကိးန့ၢ်ဝဲ တၢ်လီၢ်တတီၤန့ၣ် အမံၤလၢ ဘဧၤလးပရၤစံၣ်လီၤ.*
၁၂ ဒီးပှၤဖလ့ၡသးဖိတဖၣ် ပာ်တ့ၢ်ကွံာ် အဝဲသ့ၣ် အယွၤတဖၣ် ဖဲန့ၣ်လီၤ. ဒီးဖဲစီၤဒၤဝံး ဟ့ၣ်လီၤ တၢ်ကလုၢ်အခါ ပှၤဒွဲၣ်အူထီၣ်ကွံာ် ယွၤတဖၣ်န့ၣ်လီၤ.+
၁၃ လၢခံ ပှၤဖလ့ၡသးဖိတဖၣ် လဲၤဒုးကဒီးတၢ်ဖဲ တၢ်တြီၤပူၤလီၤ.+
၁၄ ဒီးစီၤဒၤဝံး သံကွၢ်ကဒီးတၢ်လၢ ကစၢ်ယွၤအအိၣ် ဒီးယွၤလၢအမ့ၢ်အတီတဂၤ တဲအီၤလၢ “လဲၤထီၣ်လၢ အဝဲသ့ၣ် အအိၣ်လိၤလိၤတဂ့ၤ. လဲၤတရံးလၢ အဝဲသ့ၣ် အလီၢ်ခံတကပၤ ဒီးလဲၤဒုး အဝဲသ့ၣ်လၢ တပှီာ်ဘကၤတဖၣ် အမဲာ်ညါ တကပၤတက့ၢ်.+
၁၅ ဖဲသုနၢ်ဟူ တၢ်အသီၣ်လၢ အလီၤဂာ်ဒီး သုးဖိအဟးသီၣ် လၢတပှီာ်ဘကၤတဖၣ် အဖီခိၣ်န့ၣ် သုကဘၣ်သ့ၣ်ညါလၢ ယွၤလၢအမ့ၢ်အတီတဂၤ လဲၤတၢ်လၢ သုမဲာ်ညါ ဒ်သိးကမၤသံ ပှၤဖလ့ၡသးဖိ အသုးမုၢ် အဃိ လဲၤထီၣ်ဒုးတၢ် ချ့ချ့တက့ၢ်.”+
၁၆ ဒီးစီၤဒၤဝံး မၤဝဲဒ် ယွၤလၢအမ့ၢ်အတီတဂၤ မၤလိာ်ပာ်စၢၤ အီၤအသိး+ ဒီးအဝဲသ့ၣ် မၤသံဝဲ ပှၤဖလ့ၡသးဖိ အသုးမုၢ် စးထီၣ်လၢ ဝ့ၢ်ကံးဘိၣ် တုၤလီၤလၢ ဝ့ၢ်က့စ့ၢ်လီၤ.+
၁၇ ဒီးစီၤဒၤဝံး အမံၤဟူထီၣ်သါလီၤလၢ တၢ်လီၢ်ကိးတီၤဒဲး ဒီးယဟိဝၤယွၤ မၤဝဲဒ်သိး ပှၤကလုာ်ခဲလၢာ် ကပျံၤအီၤအဂီၢ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤလၢအတ့ထီၣ် တၢ်ဒူၣ်.”
^ အခီပညီမ့ၢ်ဝဲ “ကစၢ်လၢ အဆီၣ်ဖျိးကွံာ်တၢ်.”
