၁ ကွဲးနီၣ်တၢ် ၁၉:၁-၁၉
၁၉ လၢခံ ပှၤဧၣ်မိၣ်ဖိ အစီၤပၤနၤဃၣ် သံဝဲ ဒီးအဖိခွါ ကဲထီၣ်စီၤပၤလၢ အလီၢ်လီၤ.+
၂ ဒီးစီၤဒၤဝံး တဲဝဲလၢ “ယကပာ်ဖျါထီၣ် တၢ်အဲၣ်လၢအတီ+ လၢစီၤနၤဃၣ် အဖိခွါ စီၤဃၤနူၣ် အဖီခိၣ် မ့ၢ်လၢအပၢ်ပာ်ဖျါထီၣ်တ့ၢ် တၢ်အဲၣ်လၢအတီလၢ ယဖီခိၣ်အဃိလီၤ.” အဃိ စီၤဒၤဝံး မၢအခ့အပှၤတဖၣ် လဲၤမၤမုာ်ထီၣ်က့ၤ စီၤဃၤနူၣ်အသး ခီဖျိလၢ အပၢ်သံအဃိလီၤ. ဘၣ်ဆၣ် ဖဲစီၤဒၤဝံး အခ့အပှၤတဖၣ် လဲၤနုာ်လီၤလၢ ပှၤဧၣ်မိၣ်ဖိ+ အကီၢ်ပူၤအခါ
၃ ပှၤဧၣ်မိၣ်ဖိ အခိၣ်အနၢ်တဖၣ် တဲဘၣ် စီၤဃၤနူၣ်လၢ “မ့ၢ်နဆိကမိၣ်လၢ စီၤဒၤဝံး ဆှၢလီၤ အခ့အပှၤတဖၣ်အံၤ ခီဖျိလၢ အအဲၣ်ဒိး မၤလၤကပီၤ နပၢ်အနီၢ်ကီၢ်ဧါ. နီၢ်ကီၢ်န့ၣ် စီၤဒၤဝံး ဆှၢလီၤ အခ့အပှၤတဖၣ် လၢနအိၣ် ခီဖျိလၢ အဝဲအဲၣ်ဒိး ဃုသ့ၣ်ညါ ကီၢ်အဂ့ၢ် ဒ်တၢ်မဲာ်ချံအသိး ဒီးမၤနၢၤနၤအဃိ, တမ့ၢ်ဧီၤ.”
၄ အဃိ စီၤဃၤနူၣ် ဖီၣ်န့ၢ် စီၤဒၤဝံး အခ့အပှၤတဖၣ် ဒီးလူၤကွံာ်ဝဲ အနိးဆူၣ်ခၣ်ဆူၣ်+ ဒီးကူးတဲာ်ဝဲ အဝဲသ့ၣ် အဆ့ကၤ စးထီၣ်လၢ အခံကိၢ် တုၤလီၤလၢအဖီလာ် ဒီးပျဲက့ၤအဝဲသ့ၣ်လီၤ.
၅ ဖဲပှၤတဲဘၣ် စီၤဒၤဝံး ဘၣ်ဃးဒီး ပိာ်ခွါတဖၣ်န့ၣ် အဂ့ၢ်အခါ တဘျီဃီန့ၣ် စီၤဒၤဝံး ဆှၢလီၤဝဲ ပိာ်ခွါအဂၤတဖၣ် ဒ်သိးကလဲၤထံၣ်လိာ်သးဒီး အဝဲသ့ၣ်, မ့ၢ်လၢ ပှၤပိာ်ခွါတဖၣ်န့ၣ် ဘၣ်တၢ်မၤမဲာ်ဆှးအီၤ ဒိၣ်မးအဃိလီၤ. စီၤပၤတဲဘၣ် အဝဲသ့ၣ်လၢ “အိၣ်လၢ ဝ့ၢ်ယရံၤဃိအပူၤ+ တုၤလၢ သုနိးဆူၣ်ခၣ်ဆူၣ် ထီၣ်ကဒါက့ၤမး ဟဲက့ၤတက့ၢ်.”
၆ လၢခံ ပှၤဧၣ်မိၣ်ဖိ သ့ၣ်ညါဝဲလၢ စီၤဒၤဝံး သးဟ့ အဝဲသ့ၣ်အဃိ စီၤဃၤနူၣ် ဒီးပှၤဧၣ်မိၣ်ဖိတဖၣ် ဆှၢလီၤဝဲ စ့ညၣ်အတၤလၣ်* ၁,၀၀၀ ဒ်သိးကလဲၤငါန့ၢ်ဝဲ လ့ၣ်ကဟၣ်သုး ဒီးပှၤဒိးကသ့ၣ်သုးဖိတဖၣ်လၢ ကီၢ်မ့းစပတၤမံ, အရဲမၤကၤ ဒီးစိဘၤ အတၢ်လီၢ်န့ၣ်လီၤ.+
၇ အဃိ အဝဲသ့ၣ် ငါန့ၢ်ဝဲ လ့ၣ်ကဟၣ် အခိၣ် ၃၂,၀၀၀ ဃုာ်ဒီး မၤကၤအစီၤပၤ ဒီးအသုးဖိတဖၣ် ဒီးအဝဲသ့ၣ် ဟဲဆီလီၤအသးလၢ မ့ဒဘၤ အမဲာ်ညါလီၤ.+ ဒီးပှၤဧၣ်မိၣ်ဖိတဖၣ် ပာ်ဖှိၣ်ထီၣ်အသးလၢ အဝဲသ့ၣ် အဝ့ၢ်တဖၣ်အပူၤ ဒီးဟဲထီၣ်လၢ ကဒုးတၢ်အဂီၢ်လီၤ.
၈ ဖဲစီၤဒၤဝံး နၢ်ဟူဝဲ တၢ်ဂ့ၢ်အံၤအခါ အဝဲဆှၢလီၤ စီၤယိၤအာ်+ ဒီးအသုးမုၢ်ဒီတဖု ဃုာ်ဒီး ပှၤသုးဖိလၢ အဂံၢ်ဆူၣ်ဘါဆူၣ် ကတၢၢ်တဖၣ်လီၤ.+
၉ ဒီးပှၤဧၣ်မိၣ်ဖိတဖၣ် လဲၤထီၣ် ဆီလီၤအသးလၢ ဝ့ၢ်တြဲၤ အခီၣ်ထံးလီၤ. ဖဲန့ၣ်အခါ စီၤပၤလၢ အဟဲဝဲတဖၣ်န့ၣ် အိၣ်ဝဲလၢ တၢ်ပျီပူၤလီၤ.
၁၀ ဖဲစီၤယိၤအာ် ထံၣ်ဝဲ အဒုၣ်အဒါ အသုးမုၢ်တဖၣ် ဟဲထီၣ်သဖှိဒုးအီၤ လၢအမဲာ်ညါမ့ၢ်ဂ့ၤ အလီၢ်ခံမ့ၢ်ဂ့ၤအခါ အဝဲဃုထၢထီၣ် အသုးဖိလၢ အဂ့ၤကတၢၢ်လၢ အံၣ်စရ့လးအပူၤ ဒီးမၢအဝဲသ့ၣ် လဲၤထီၣ်ဆီလီၤသး ဒ်သိးကဒုးဝဲ ပှၤစူၤရံဖိလီၤ.+
၁၁ ဒီးအဝဲ ပာ်လီၤဝဲ အသုးဖိလၢ အဂၤတဖၣ်လၢ အဒီပုၢ်ဝဲၢ် စီၤအဘံၡဲၤ+ အစုပူၤ ဒ်သိးအဝဲသ့ၣ် ကလဲၤထီၣ် ဆီလီၤအသး ဒီးဒုးဝဲပှၤဧၣ်မိၣ်ဖိ အဂီၢ်လီၤ.
၁၂ ဒီးအဝဲတဲဝဲလၢ “ပှၤစူၤရံဖိတဖၣ်+ အဂံၢ်အဘါ မ့ၢ်ဆူၣ်တလၢ လၢယဂီၢ်န့ၣ် နကဘၣ် ဟဲမၤစၢၤယၤ ဒီးပှၤဧၣ်မိၣ်ဖိတဖၣ် အဂံၢ်အဘါ မ့ၢ်ဆူၣ်တလၢ လၢနဂီၢ်န့ၣ် ယကမၤစၢၤနၤလီၤ.
၁၃ ပကဘၣ် ပာ်ဆူၣ်ပသး ဒီးအိၣ်ဒီး တၢ်သူၣ်ဒူသးဒူ+ လၢပပှၤဂီၢ်မုၢ် ဒီးပကစၢ်ယွၤ အဝ့ၢ်တဖၣ်အဂီၢ် ဒီးယဟိဝၤယွၤ ကမၤတၢ်လၢ အထံၣ်ဝဲလၢ အဂ့ၤန့ၣ်လီၤ.”
၁၄ ဒီးစီၤယိၤအာ် ဒီးအသုးတဖၣ် လဲၤထီၣ်ဝဲ ဒ်သိးကဒုးဝဲ ပှၤစူၤရံဖိ ဒီးပှၤစူၤရံဖိတဖၣ် ဃ့ၢ်ကွံာ်ဝဲလီၤ.+
၁၅ ဖဲပှၤဧၣ်မိၣ်ဖိတဖၣ် ထံၣ်ဝဲလၢ ပှၤစူၤရံဖိတဖၣ် ဃ့ၢ်ကွံာ်ဝဲအခါ အဝဲသ့ၣ်စ့ၢ်ကီး ဃ့ၢ်ထီၣ်ကွံာ်ဝဲလၢ စီၤယိၤအာ် အဒီပုၢ်ဝဲၢ်ခွါ စီၤအဘံၡဲၤ အမဲာ်ညါ ဒီးက့ၤနုာ်ကဒါက့ၤလၢ ဝ့ၢ်ပူၤလီၤ. ဝံၤဒီး စီၤယိၤအာ် ဟဲက့ၤကဒါလၢ ဝ့ၢ်ယရူၤၡလ့ၣ်လီၤ.
၁၆ ဖဲပှၤစူၤရံဖိတဖၣ် ထံၣ်ဝဲလၢ ပှၤအံၣ်စရ့လးဖိ မၤနၢၤ အဝဲသ့ၣ်အခါ အဝဲသ့ၣ် ဆှၢလီၤ ပှၤစိာ်တၢ်ကစီၣ်ဖိတဖၣ် ဒ်သိး ကကိးန့ၢ် ပှၤစူၤရံဖိတဖၣ် လၢအအိၣ်လၢ ထံကျိ*+ အဟီၣ်ကဝီၤ ဒီးစီၤဟးဒးဧ့စ့ၢ် အသုးမုၢ်အခိၣ် စီၤၡိဘး တီခိၣ်ရိၤမဲ အဝဲသ့ၣ်လီၤ.+
၁၇ ဖဲပှၤတဲဘၣ် စီၤဒၤဝံး တၢ်ဂ့ၢ်အံၤအခါ တဘျီဃီန့ၣ် စီၤဒၤဝံး ကိးဖှိၣ်ဝဲ အံၣ်စရ့လး အသုးဖိခဲလၢာ် ဒီးအဝဲသ့ၣ် လဲၤခီဂာ်ဝဲ ထံကျိယၢ်ဒ့ၣ် ဒီးလဲၤတုၤလၢ ပှၤစူၤရံဖိအအိၣ် ဒီးဆီလီၤအသး ဒ်သိးကဒုး ပှၤစူၤရံဖိလီၤ. စီၤဒၤဝံး လဲၤထီၣ်ဒုးဝဲ ပှၤစူၤရံဖိတဖၣ် ဒီးပှၤစူၤရံဖိတဖၣ် ဒုးဝဲ စီၤဒၤဝံးလီၤ.+
၁၈ ဘၣ်ဆၣ် ပှၤစူၤရံဖိတဖၣ် ဃ့ၢ်ထီၣ်ကွံာ်ဝဲလၢ အံၣ်စရ့လး အမဲာ်ညါ ဒီးစီၤဒၤဝံး မၤသံဝဲ ပှၤစူၤရံဖိ အပှၤနီလ့ၣ်ကဟၣ်ဒုးသုးအဂၤ ၇,၀၀၀, အပှၤသုးဖိ အဂၤ ၄၀,၀၀၀ ဒီးအမၤသံကွံာ်ဝဲ အဝဲသ့ၣ် အသုးမုၢ်အခိၣ် စီၤၡိဘးလီၤ.
၁၉ ဖဲစီၤဟးဒးဧ့စ့ၢ် အခ့အပှၤတဖၣ် ထံၣ်ဘၣ်ဝဲလၢ အံၣ်စရ့လး မၤနၢၤကွံာ် အဝဲသ့ၣ်အခါ+ တဘျီဃီန့ၣ် အဝဲသ့ၣ် မၤတၢ်ဃူတၢ်ဖိးဒီး စီၤဒၤဝံး ဒီးအဝဲသ့ၣ် ဒိးပၢအသးလၢ စီၤဒၤဝံး အတၢ်ပၢ ဖီလာ်လီၤ.+ ဒီးပှၤစူၤရံဖိတဖၣ် တအဲၣ်ဒိးမၤစၢၤ ပှၤဧၣ်မိၣ်ဖိတဖၣ် လၢၤဘၣ်.
တၢ်ဂ့ၢ်အဘျဲၣ်တဖၣ်
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်ဝဲ ထံကျိဖရၤသး.
