၁ ကွဲးနီၣ်တၢ် ၂၂:၁-၁၉
၂၂ စီၤဒၤဝံး တဲဝဲလၢ “အဝဲအံၤ မ့ၢ်ဝဲ ယွၤလၢအမ့ၢ်အတီ ယဟိဝၤယွၤ အဟံၣ် ဒီးအဝဲအံၤ မ့ၢ်ဝဲ တၢ်လုၢ်လီၢ်တခါလၢ ပှၤအံၣ်စရ့လးဖိ ကလုၢ်ထီၣ် တၢ်လုၢ်ဒွဲၣ်အူတဖၣ်အဂီၢ်လီၤ.”+
၂ စီၤဒၤဝံး ဟ့ၣ်လီၤတၢ်ကလုၢ် ဒ်သိးကကိးဖှိၣ်ဝဲ ပှၤထံဂၤကီၢ်ဂၤဖိလၢ+ အအိၣ်ဝဲလၢ ကီၢ်အံၣ်စရ့လးအပူၤ ဒီးစီၤဒၤဝံး ဟ့ၣ်အဝဲသ့ၣ် မူဒါ ဒ်ပှၤဘူးတဲာ်လၢၢ်တဖၣ် လၢအကဘၣ်ဘူးတဲာ် ဒီးစိးပျၤလၢၢ်တဖၣ်လၢ တၢ်တ့ထီၣ် ယွၤလၢအမ့ၢ်အတီတဂၤ အဟံၣ် အဂီၢ်လီၤ.+
၃ ဒီးစီၤဒၤဝံး ကတဲာ်ကတီၤပာ်စၢၤ စ့ၢ်ကီး ထးအါအါဂီၢ်ဂီၢ်လၢ ထးပနဲာ်ဖိတဖၣ် ဒီးထးတံာ်ဃာ်တၢ်တဖၣ်လၢ တြဲၤတဖၣ်အဂီၢ် ဒီးတိၢ်ဘီဒီဒူၣ် တုၤဒၣ်လဲာ် ပှၤစီၤအီၤတသ့လၢၤဘၣ်.+
၄ အဝဲကတဲာ်ကတီၤ စ့ၢ်ကီး သ့ၣ်ဆှိအ့ရ့း အသ့ၣ်ဘၣ်တဖၣ်+ လၢပှၤဂံၢ်အီၤ တလၢာ်ဘၣ်, မ့ၢ်လၢ ပှၤစံဒိၣ်ဖိ+ ဒီးပှၤစိၢ်ဖိ+ ဟဲစိာ်န့ၢ်ဝဲ စီၤဒၤဝံးလၢ သ့ၣ်ဆှိအ့ရ့း အသ့ၣ်ဘၣ်တဖၣ် အါအါဂီၢ်ဂီၢ် အဃိလီၤ.
၅ ဒီးစီၤဒၤဝံး တဲဝဲလၢ “ဟံၣ်လၢ ပှၤကဘၣ်တ့ထီၣ်အီၤ လၢယဟိဝၤယွၤ အဂီၢ်န့ၣ် ကဘၣ်မ့ၢ် ဟံၣ်လၢ အလီၤဘီလီၤမုၢ် သပှၢ်တၢၢ်လီၤ.+ ထဲန့ၣ်မးပှၤလၢ ထံကီၢ်ကိးဘ့ၣ်ဒဲးအပူၤ ကသ့ၣ်ညါ ဟံၣ်အံၤအဂ့ၢ်+ ဒီးအတၢ်ဃံတၢ်လၤလီၤ.+ ဘၣ်ဆၣ် ယဖိခွါ စီၤၡလိၤမိၤန့ၣ် အသးစၢ် ဒီးအတၢ်လဲၤခီဖျိ တအိၣ်အါအါဘၣ်.+ အဃိ ယက ကတဲာ်ကတီၤပာ်စၢၤ တၢ်လၢ စီၤၡလိၤမိၤအဂီၢ်လီၤ.” အဃိ တချုးလၢ စီၤဒၤဝံး သံဒံးဘၣ်န့ၣ် အဝဲကတဲာ်ကတီၤပာ်စၢၤ တၢ်ဖိတၢ်လံၤ အါအါဂီၢ်ဂီၢ်လီၤ.
၆ တကးဒံးဘၣ် စီၤဒၤဝံး ကိးန့ၢ် အဖိခွါ စီၤၡလိၤမိၤ ဒီးဟံးစုနဲၣ်ကျဲအီၤ ဒ်သိးကတ့ထီၣ် ဟံၣ်တဖျၢၣ်လၢ အံၣ်စရ့လးအကစၢ် ယဟိဝၤယွၤ အဂီၢ်လီၤ.
၇ စီၤဒၤဝံး တဲဘၣ် အဖိခွါ စီၤၡလိၤမိၤလၢ “ယၤန့ၣ် ယသးဆူၣ်လၢ ယကတ့ထီၣ် ဟံၣ်တဖျၢၣ်လၢ ယကစၢ် ယဟိဝၤယွၤ အမံၤအဂီၢ်လီၤ.+
၈ ဘၣ်ဆၣ် ယဟိဝၤယွၤ တဲဘၣ်ယၤလၢ ‘နဒုးတ့ၢ် တၢ်ဒုးအါမး ဒီးနလူလီၤတ့ၢ် တၢ်သွံၣ်အါမးလီၤ. မ့ၢ်လၢ နလူလီၤတ့ၢ်တၢ်သွံၣ် အါမးလၢဟီၣ်ခိၣ်လိၤ လၢယမဲာ်ညါအဃိ နတဘၣ်တ့ထီၣ် ဟံၣ်တဖျၢၣ်လၢ ယမံၤအဂီၢ်ဘၣ်.+
၉ နကအိၣ်ဒီး ဖိခွါတဂၤလၢ+ အကမ့ၢ်ပှၤလၢ အအိၣ်ခုၣ်ခုၣ်* ဒီးယကဟ့ၣ်ဒုးအိၣ်ဘှံးအီၤလၢ အဒုၣ်အဒါလၢ အအိၣ်ဝးတရံးအီၤ ခဲလၢာ်လီၤ.+ အမံၤကမ့ၢ် စီၤၡလိၤမိၤ*+ ဒီးဖဲအပၢတၢ်အခါ ယကဟ့ၣ်လီၤ ပှၤအံၣ်စရ့လးဖိ တၢ်မုာ်တၢ်ခုၣ် ဒီးတၢ်ဘံၣ်တၢ်ဘၢလီၤ.+
၁၀ အဝဲကမ့ၢ် ပှၤတဂၤလၢ အကတ့ထီၣ် ဟံၣ်တဖျၢၣ်လၢ ယမံၤအဂီၢ်လီၤ.+ အဝဲကကဲထီၣ် ယဖိခွါ ဒီးယကကဲထီၣ် အပၢ်လီၤ.+ ယကဒုးအိၣ်ဂၢၢ်ဆိးကျၢၤ ဘီမုၢ်အလီၢ်ပစိာ် လၢအံၣ်စရ့လး အဖီခိၣ်န့ၣ် လီၤထူလီၤယိာ်လီၤ.’+
၁၁ “ယဖိခွါဧၢ, မ်ယဟိဝၤယွၤ အိၣ်ဒီးနၤ ဒီးမ်နမၤတၢ် ကဲထီၣ်လိၣ်ထီၣ်ဒီး တ့ထီၣ် ဟံၣ်တဖျၢၣ်လၢ နကစၢ် ယဟိဝၤယွၤ အဂီၢ် ဒ်အတဲပာ်စၢၤဝဲ ဘၣ်ဃးဒီးနၤ အသိးန့ၣ်တက့ၢ်.+
၁၂ ဖဲယဟိဝၤယွၤ ဟ့ၣ်စိဟ့ၣ်ကမီၤနၤလၢ အံၣ်စရ့လး အဖီခိၣ်အခါ မ်အဟ့ၣ်နၤ တၢ်ကူၣ်တၢ်ဆး ဒီးတၢ်နၢ်ပၢၢ်+ ဒ်သိးနမၤထွဲ နကစၢ် ယဟိဝၤယွၤ အတၢ်သိၣ်တၢ်သီ ကန့ၢ်အဂီၢ် တက့ၢ်.+
၁၃ ဒီးတၢ်ဘျၢတဖၣ် ဒီးတၢ်သိၣ်တၢ်သီတဖၣ်လၢ+ ယဟိဝၤယွၤ မၤလိာ်တ့ၢ် စီၤမိၤၡ့လၢ ကဟ့ၣ်ဝဲ ပှၤအံၣ်စရ့လးဖိန့ၣ် နမ့ၢ်မၤပိာ်ထွဲအီၤ လီၤတံၢ်လီၤဆဲးန့ၣ် နမၤတၢ် ကကဲထီၣ်လိၣ်ထီၣ်လီၤ.+ အဃိ ပာ်ဆူၣ်နသး ဒီးအိၣ်ဒီး တၢ်သူၣ်ဒူသးဒူတက့ၢ်. တဘၣ်ပျံၤတၢ်တဂ့ၤ.+
၁၄ ဒ်သိး ယက ကတဲာ်ကတီၤ ပာ်စၢၤတၢ်လၢ ယဟိဝၤယွၤ အဟံၣ်အဂီၢ် ယဘၣ်တူၢ်ဆါယသးဒိၣ်မးလီၤ. ယကတဲာ်ကတီၤပာ်စၢၤ ထူအတၤလၣ်* ၁၀၀,၀၀၀ ဒီးစ့ညၣ် အတၤလၣ် ၁,၀၀၀,၀၀၀ ဒီးတိၢ်ဘီဒီးထး အါအါဂီၢ်ဂီၢ်+ တုၤလၢ ပှၤစီၤအီၤ တသ့လၢၤဘၣ်. ဒီးယကတဲာ်ကတီၤပာ်စၢၤ သ့ၣ်ဒီးလၢၢ်တဖၣ်+ ဘၣ်ဆၣ် နကပာ်ဖှိၣ်အါထီၣ် တၢ်သ့ၣ်တဖၣ်န့ၣ်လီၤ.
၁၅ နကအိၣ်ဒီး ပှၤမၤတၢ်ဖိအါမး လၢအမ့ၢ် ပှၤဘူးတဲာ်လၢၢ်တဖၣ်, ပှၤမၤလၢၢ်ဖိတဖၣ်,+ ပှၤလၢတ့တၢ်ဘှီတၢ် လၢသ့ၣ်တဖၣ် ဒီးပှၤစုသ့တဖၣ် လၢအမၤတၢ်သ့ ကိးကလုာ်ဒဲးလီၤ.+
၁၆ ထူ, စ့ညၣ်, တိၢ်ဘီ ဒီးထးန့ၣ် ပှၤစီၤအီၤတလၢာ်ဘၣ်.+ ဂဲၤဆၢထၢၣ် ဒီးစးထီၣ်မၤတၢ်ဟီ. မ်ယဟိဝၤယွၤ အိၣ်ဒီးနၤတက့ၢ်.”+
၁၇ ဝံၤဒီး စီၤဒၤဝံး မၤလိာ်ဝဲ အံၣ်စရ့လး အပဒိၣ်ခဲလၢာ်လၢ ကမၤစၢၤ အဖိခွါ စီၤၡလိၤမိၤ ဒီးတဲဝဲလၢ
၁၈ “သုကစၢ် ယဟိဝၤယွၤ အိၣ်ဒီးသု ဒီးဟ့ၣ်လီၤသု တၢ်မုာ်တၢ်ခုၣ်လၢ တၢ်လီၢ်လၢ သုကပိာ်ကပၤဝးဝး တမ့ၢ်ဧီၤ. ကစၢ်ယွၤ ဟ့ၣ်လီၤပှၤကီၢ်ဖိတဖၣ် လၢယစုပူၤ ဒီးကီၢ်အိၣ်ဝဲလၢ ယဟိဝၤယွၤ ဒီးအပှၤဂီၢ်မုၢ် အတၢ်ပၢဖီလာ်လံ.
၁၉ ခဲအံၤန့ၣ် ဆၢတဲာ်လီၤ သုသးဒီဖျၢၣ်* လၢသုကဃုသုကစၢ် ယဟိဝၤယွၤ တက့ၢ်.+ ဒီးစးထီၣ်တ့ထီၣ် ယဟိဝၤယွၤ လၢအမ့ၢ် ယွၤလၢအမ့ၢ်အတီတဂၤ+ အတၢ်စီဆှံအလီၢ် ဒ်သိး ပှၤကလဲၤဆှၢ ယဟိဝၤယွၤ အတၢ်အၢၣ်လီၤအီလီၤ အတလါ ဒီးတၢ်ပီးတၢ်လီ စီဆှံတဖၣ်ဆူ+ ဟံၣ်လၢ ပှၤကတ့ထီၣ်ဝဲလၢ ယဟိဝၤယွၤ အမံၤအဂီၢ်တက့ၢ်.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အိၣ်ဘှံး.”
^ ဟဲလၢ ဧ့ၤဘြံၤအတၢ်ကတိၤ လၢအခီပညီမ့ၢ်ဝဲ “တၢ်မုာ်တၢ်ခုၣ်.”
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ အခီပညီလိၤလိၤ “သုသးဒီတဖျၢၣ် ဒီးသုတၢ်အိၣ်မူ ကိးသနၢၣ်ဒဲးအပူၤ.”
