၁ ကွဲးနီၣ်တၢ် ၂၃:၁-၃၂
၂၃ ဖဲစီၤဒၤဝံး သးပှၢ်ထီၣ် ဒီးဘူးထီၣ်လၢ အကသံအခါ အဝဲဒုးကဲထီၣ် အဖိခွါ စီၤၡလိၤမိၤလၢ အံၣ်စရ့လး အစီၤပၤလီၤ.+
၂ ဝံၤဒီး အဝဲကိးဖှိၣ်ဝဲ အံၣ်စရ့လး အပဒိၣ်ဖးဒိၣ် ခဲလၢာ်, ပှၤလုၢ်တၢ်ဒိၣ်တဖၣ်+ ဒီးပှၤလ့ၤဝံဖိတဖၣ်လီၤ.+
၃ ပှၤလ့ၤဝံဖိ လၢအသးနံၣ်အိၣ် အနံၣ် ၃၀ ဒီးဆူအဖီခိၣ်န့ၣ် ဘၣ်တၢ်ဂံၢ်အဝဲသ့ၣ်လီၤ.+ ပှၤဂံၢ်အဝဲသ့ၣ် တဂၤဘၣ်တဂၤ ဒီးအနီၣ်ဂံၢ်ခဲလၢာ် အိၣ်ဝဲ အဂၤ ၃၈,၀၀၀ လီၤ.
၄ လၢပှၤတဖၣ်န့ၣ်အကျါ ပှၤလၢအတီခိၣ်ရိၤမဲ တၢ်မၤလၢ အဘၣ်ဃးဒီး ယဟိဝၤယွၤ အဟံၣ်န့ၣ် အိၣ်ဝဲအဂၤ ၂၄,၀၀၀ ဒီးပှၤခိၣ်ပှၤနၢ်တဖၣ် ဒီးစံၣ်ညီၣ်ကွီၢ်တဖၣ် အိၣ်ဝဲအဂၤ ၆,၀၀၀ လီၤ.+
၅ ဒီးပှၤခိးတြဲၤဖိ+ အိၣ်ဝဲအဂၤ ၄,၀၀၀ ဒီးပှၤလၢ အစံးထီၣ်ပတြၢၤ+ ယဟိဝၤယွၤ ခီဖျိလၢ တၢ်ဒ့တၢ်အူ အတၢ်ပီးတၢ်လီတဖၣ်န့ၣ် အိၣ်ဝဲ အဂၤ ၄,၀၀၀ လီၤ. ဘၣ်ဃးဒီး တၢ်ပီးတၢ်လီတဖၣ်အံၤန့ၣ် စီၤဒၤဝံး တဲဝဲလၢ “ယတ့ထီၣ် တၢ်သ့ၣ်တဖၣ်အံၤလၢ တၢ်စံးထီၣ်ပတြၢၤ ယွၤအဂီၢ်လီၤ.”
၆ ဒီးဒ်စီၤလ့ၤဝံ အဖိခွါတဖၣ် လၢအမ့ၢ် စီၤက့ရၡိၣ်, စီၤကဃး ဒီးစီၤမရၤရံၤ+ အစၢၤအသွဲၣ် အိၣ်ဝဲအသိး စီၤဒၤဝံး နီၤဖးလီၤ အဝဲသ့ၣ်လၢ အကရူၢ်တဖၣ်န့ၣ်လီၤ.+
၇ လၢပှၤက့ရၡိၣ်ဖိ အကျါန့ၣ် မ့ၢ်ဝဲ စီၤလၤဒၣ် ဒီးစီၤၡံမံၤလီၤ.
၈ စီၤလၤဒၣ် အဖိခွါ သၢဂၤ မ့ၢ်ဝဲ စီၤယဃံအ့လး လၢအမ့ၢ် ပှၤအခိၣ်, စီၤစ့ၤသၣ် ဒီးစီၤယိၤအ့လးလီၤ.+
၉ စီၤၡံမံၤ အဖိခွါသၢဂၤ မ့ၢ်ဝဲ စီၤၡလိမိး, စီၤဃစံၤအ့လး ဒီးစီၤဟၤရၣ်လီၤ. ပှၤသ့ၣ်တဖၣ်အံၤ မ့ၢ်ဝဲ စီၤလၤဒၣ် အဒူၣ်ဖိထၢဖိ အခိၣ်တဖၣ်လီၤ.
၁၀ ဒီးစီၤၡံမံၤ အဖိခွါတဖၣ် မ့ၢ်ဝဲ စီၤယၤဃး, စီၤစံနၤ,* စီၤဧူၡး ဒီးစီၤဘရံဧၤလီၤ. ပှၤလွံၢ်ဂၤအံၤ မ့ၢ်ဝဲ စီၤၡံမံၤ အဖိခွါလီၤ.
၁၁ စီၤယၤဃး မ့ၢ်ဝဲပှၤအခိၣ် ဒီးစီၤစံစၤမ့ၢ်ဝဲ ပှၤခံဂၤတဂၤလီၤ. ဘၣ်ဆၣ် ခီဖျိလၢ စီၤဧူၡး ဒီးစီၤဘရံဧၤအဖိခွါ တအိၣ် အါအါဘၣ်အဃိ တၢ်ပာ်ပနီၣ် အဝဲသ့ၣ်ခံဂၤ ဒ်ဒူၣ်ဖိထၢဖိ* တဒူၣ်ဃီလၢ အအိၣ်ဒီးမူဒါ တမံၤဃီလီၤ.
၁၂ စီၤကဃး အဖိခွါလွံၢ်ဂၤ မ့ၢ်ဝဲ စီၤဧၤမရၣ်, စီၤယံးစဟၢ်,+ စီၤဃ့ဘြိၣ် ဒီးစီၤဧူးစံၤအ့လးလီၤ.+
၁၃ စီၤဧၤမရၣ် အဖိခွါတဖၣ် မ့ၢ်ဝဲ စီၤအၤဟရိၣ်+ ဒီးစီၤမိၤၡ့လီၤ.+ ဘၣ်ဆၣ် စီၤအၤဟရိၣ် ဒီးအဖိခွါတဖၣ် ဘၣ်တၢ်ဃုထၢထီၣ်အဝဲသ့ၣ်+ အစိၤစိၤအဃၣ်ဃၣ် ဒ်သိး အဝဲသ့ၣ် ကပာ်စီဆှံ တၢ်လီၢ်စီဆှံကတၢၢ်, ကလုၢ်ထီၣ် တၢ်လုၢ်တၢ်ပာ်တဖၣ်လၢ ယဟိဝၤယွၤ အမဲာ်ညါ, ကမၤတၢ်အခ့အပှၤ အတၢ်မၤလၢ ယွၤအဂီၢ် ဒီးကဆိၣ်ဂ့ၤတၢ် လၢယွၤအမံၤ ထီဘိ အဂီၢ်လီၤ.+
၁၄ မ့မ့ၢ် ယွၤလၢအမ့ၢ်အတီအပှၤ စီၤမိၤၡ့န့ၣ် အဖိခွါတဖၣ် အမံၤပၣ်ဃုာ်လၢ ပှၤလ့ၤဝံဖိတဖၣ် အဒူၣ်ကျါလီၤ.
၁၅ စီၤမိၤၡ့ အဖိခွါတဖၣ် မ့ၢ်ဝဲ စီၤက့းရၡိၣ်+ ဒီးစီၤအလံၤဧ့စ့ၢ်လီၤ.+
၁၆ လၢစီၤက့းရၡိၣ် အဖိခွါတဖၣ် အကျါန့ၣ် စီၤၡဘူၤအ့လး+ မ့ၢ်ဝဲ ပှၤအခိၣ်လီၤ.
၁၇ လၢစီၤအလံၤဧ့စ့ၢ် အစၢၤအသွဲၣ်တဖၣ်* အကျါန့ၣ် စီၤရဃါဘယၤ+ မ့ၢ်ဝဲ ပှၤအခိၣ်လီၤ. စီၤအလံၤဧ့စ့ၢ် အဖိခွါလၢ အဂၤတအိၣ်ဘၣ်. မ့မ့ၢ် စီၤရဃါဘယၤန့ၣ် အဖိခွါ အိၣ်ဝဲအါဂၤလီၤ.
၁၈ လၢစီၤယံးစဟၢ်+ အဖိခွါတဖၣ် အကျါန့ၣ် စီၤၡလိမံး+ မ့ၢ်ဝဲပှၤအခိၣ်လီၤ.
၁၉ စီၤဃ့ဘြိၣ် အဖိခွါတဖၣ် မ့ၢ်ဝဲ စီၤအရံယာ် လၢအမ့ၢ် ပှၤအခိၣ်, ခံဂၤတဂၤ မ့ၢ်ဝဲ စီၤအမၤရယၤ, သၢဂၤတဂၤ မ့ၢ်ဝဲ စီၤယၤဃစအ့လး ဒီးလွံၢ်ဂၤတဂၤ မ့ၢ်ဝဲ စီၤယကၤမၣ်လီၤ.+
၂၀ စီၤဧူးစံၤအ့လး+ အဖိခွါတဖၣ် မ့ၢ်ဝဲ စီၤမံကၤ လၢအမ့ၢ် ပှၤအခိၣ် ဒီးခံဂၤတဂၤ မ့ၢ်ဝဲ စီၤယံးၡံယၤလီၤ.
၂၁ စီၤမရၤရံၤ အဖိခွါတဖၣ် မ့ၢ်ဝဲ စီၤမးဃလံ ဒီးစီၤမူၡံၤလီၤ.+ စီၤမးဃလံ အဖိခွါတဖၣ် မ့ၢ်ဝဲ စီၤအလၤဧစၢ် ဒီးစီၤကံၣ်လီၤ.
၂၂ စီၤအလၤဧစၢ် သံကွံာ်ဝဲ ဘၣ်ဆၣ် အဖိခွါ တအိၣ်နီတဂၤဘၣ် ဒီးအိၣ်ထဲ အဖိမုၣ်တဖၣ်လီၤ. အဃိ စီၤကံၣ် အဖိခွါတဖၣ် လၢအမ့ၢ် အဝဲသ့ၣ် အဘူးအတံၢ်န့ၣ်* ဟံးန့ၢ်အဝဲသ့ၣ် ဒ်အမါအသိးလီၤ.
၂၃ စီၤမူၡံၤ အဖိခွါသၢဂၤ မ့ၢ်ဝဲ စီၤမးဃလံ, စီၤဧ့ဒ့ၢ် ဒီးစီၤယရၤမိးလီၤ.
၂၄ ပှၤတဖၣ်န့ၣ် မ့ၢ်ဝဲ ပှၤလ့ၤဝံဖိ ဒ်အဒူၣ်ဖိထၢဖိ ဒီးအဒူၣ်ဖိထၢဖိ အခိၣ်အနၢ်တဖၣ် အိၣ်ဝဲအသိးလီၤ. ပှၤလ့ၤဝံဖိလၢ အသးနံၣ်အိၣ် အနံၣ် ၂၀ ဒီးဆူအဖီခိၣ်န့ၣ် ပှၤထၢအဝဲသ့ၣ် အနီၣ်ဂံၢ် ဒီးကွဲးနီၣ်ဃာ် အဝဲသ့ၣ်အမံၤ ဒီးအဝဲသ့ၣ် မၤတၢ်မၤလၢ အဘၣ်ဃးဒီး ယဟိဝၤယွၤ အဟံၣ်လီၤ.
၂၅ စီၤဒၤဝံး တဲဝဲလၢ “အံၣ်စရ့လး အကစၢ် ယဟိဝၤယွၤ ဒုးအိၣ်ဘှံး အပှၤဂီၢ်မုၢ်+ ဒီးအဝဲကအိၣ်လၢ ဝ့ၢ်ယရူၤၡလ့ၣ်အပူၤ လီၤထူလီၤယိာ်လီၤ.+
၂၆ ဒီးပှၤလ့ၤဝံဖိတဖၣ် တလိၣ်လဲၤစိာ်ဝဲ ဒဲစီဆှံ ဒီးဒဲအတၢ်ဖိတၢ်လံၤတဖၣ် နီတမံၤလၢၤဘၣ်.”+
၂၇ ပှၤလ့ၤဝံဖိ လၢအသးနံၣ်အိၣ် အနံၣ် ၂၀ ဒီးဆူအဖီခိၣ်န့ၣ် ဘၣ်တၢ်ဂံၢ်အဝဲသ့ၣ် ဒ်စီၤဒၤဝံး အတၢ်ဟံးစုနဲၣ်ကျဲ လၢခံကတၢၢ်တဖၣ် အသိးလီၤ.
၂၈ အဝဲသ့ၣ် အမူဒါတဖၣ်န့ၣ် မ့ၢ်ဝဲလၢ ကမၤစၢၤ စီၤအၤဟရိၣ် အဖိခွါတဖၣ်လၢ+ တၢ်မၤလၢ အဘၣ်ဃးဒီး ယဟိဝၤယွၤ အဟံၣ်အဂီၢ် ဒီးလၢကကွၢ်ထွဲ တၢ်ပျီတဖၣ်+ ဒီးပှၤအီၣ်တၢ်အဒၢးတဖၣ် ဒီးလၢတၢ်မၤကဆှီထီၣ် တၢ်လၢအစီဆှံခဲလၢာ် ဒီးတၢ်မၤတမံၤဂ့ၤ တမံၤဂ့ၤ လၢယွၤလၢအမ့ၢ်အတီတဂၤ အဟံၣ် အဂီၢ်လီၤ.
၂၉ ဒီးအဝဲသ့ၣ် မၤစၢၤတၢ် ဘၣ်ဃးဒီး ကိၣ်လၢအဘၣ် တၢ်ပာ်လီၤအီၤ,*+ ကိၣ်ကမူၣ်လၢ အဂ့ၤလၢ တၢ်လုၢ်ဘုအဂီၢ်, ကိၣ်ဘူဘူဖိလၢ အတပၣ်ဒီး ကိၣ်မံၣ်ဘၣ်,+ ကိၣ်လၢအဘၣ် တၢ်ကုၢ်အီၤလၢ သပၢၤထးဘံၣ်ဘၣ် အဖီခိၣ်, ကိၣ်ကမူၣ်လၢ အဘၣ်တၢ်ဃါဃုာ်အီၤဒီးသိ+ ဒီးလၢ တၢ်ထိၣ်တၢ်ဒွးတၢ် ခဲလၢာ်အဂီၢ်လီၤ.
၃၀ အဝဲသ့ၣ် ကဘၣ်ဆၢထၢၣ် စံးဘျုးစံးဖှိၣ် ဒီးစံးထီၣ်ပတြၢၤ ယဟိဝၤယွၤ ကိးဂီၤဒဲး+ ဒီးလၢဟါခီ စ့ၢ်ကီး ကဘၣ်မၤဝဲဒ်န့ၣ် ကိးဟါဒဲးလီၤ.+
၃၁ ဒီးအဝဲသ့ၣ် မၤစၢၤတၢ် ဖဲပှၤလုၢ်ထီၣ် တၢ်လုၢ်ဒွဲၣ်အူတဖၣ်လၢ ယဟိဝၤယွၤ အအိၣ် လၢမုၢ်အိၣ်ဘှံးနံၤမ့ၢ်ဂ့ၤ,+ လါထီၣ်သီမ့ၢ်ဂ့ၤ+ ဒီးဖဲဘူၣ်တဖၣ် ဘၣ်ဝဲအခါ+ ဒ်တၢ်သိၣ်တၢ်သီလၢ အဘၣ်ထွဲလိာ်သးဒီး တၢ်သ့ၣ်တဖၣ်န့ၣ် အိၣ်ဝဲအသိး ဒီးအဝဲသ့ၣ် မၤဝဲဒ်အံၤလၢ ယဟိဝၤယွၤ အမဲာ်ညါ ထီဘိလီၤ.
၃၂ အဝဲသ့ၣ် မၤစ့ၢ်ကီး အမူဒါတဖၣ်လၢ အဘၣ်ထွဲလိာ်သးဒီး တၢ်အိၣ်ဖှိၣ်အဒဲ ဒီးတၢ်စီဆှံအလီၢ်လီၤ. ဒီးအဝဲသ့ၣ် မၤစၢၤ အဘူးအတံၢ်တဖၣ်* လၢအမ့ၢ် စီၤအၤဟရိၣ် အဖိခွါတဖၣ်လၢ တၢ်မၤလၢ အဘၣ်ဃးဒီး ယဟိဝၤယွၤ အဟံၣ်လီၤ.
တၢ်ဂ့ၢ်အဘျဲၣ်တဖၣ်
^ လၢအဆၢဖိ ၁၁ န့ၣ် မ့ၢ်ဝဲ စီၤစံစၤ.
^ အခီပညီလိၤလိၤ “ပၢ်အဒူၣ်ဖိထၢဖိ.”
^ အခီပညီလိၤလိၤ “ဖိခွါတဖၣ်.”
^ အခီပညီလိၤလိၤ “ဒီပုၢ်ဝဲၢ်ခွါတဖၣ်.”
^ မ့ၢ်ဝဲ ကိၣ်လၢတၢ်လုၢ်ထီၣ်တၢ်အဂီၢ်.
^ အခီပညီလိၤလိၤ “ဒီပုၢ်ဝဲၢ်ခွါတဖၣ်.”
