၁ ကွဲးနီၣ်တၢ် ၂၉:၁-၃၀
၂၉ စီၤပၤဒၤဝံး တဲဘၣ် တၢ်အိၣ်ဖှိၣ်ဒီတဖုလၢ “ယဖိခွါ စီၤၡလိၤမိၤ လၢကစၢ်ယွၤ ဃုထၢထီၣ်အီၤန့ၣ်+ အသးစၢ်ဒံး ဒီးအတၢ်လဲၤခီဖျိ တအိၣ်အါအါဘၣ်.+ တၢ်မၤလၢအဘၣ်မၤဝဲန့ၣ် မ့ၢ်တၢ်မၤလၢအဒိၣ်အမုၢ် ဒီးတၢ်သူၣ်ထီၣ်အံၤန့ၣ် တမ့ၢ်တၢ်လုၢ်ဟံၣ်* လၢပှၤဟီၣ်ခိၣ်ဖိ အဂီၢ်ဘၣ်, မ့ၢ်ဝဲလၢ ကစၢ်ယဟိဝၤယွၤ အဂီၢ်လီၤ.+
၂ ဒီးယဂုာ်ကျဲးစၢး လၢာ်ဂံၢ်လၢာ်ဘါ ဒ်သိး ကကတဲာ်ကတီၤတၢ်လၢ ယကစၢ်ယွၤ အဟံၣ်အဂီၢ်လီၤ. ယဟ့ၣ်လီၤ ထူ, စ့ညၣ်, တိၢ်ဘီ, ထး,+ သ့ၣ်,+ တၢ်မျၢ်မဟူယၤ, လၢၢ်လီၤဆီတဖၣ်, လၢၢ်ဖိဃံလၤတဖၣ်, လၢၢ်လၢအလုၢ်ဒိၣ်ပှ့ၤဒိၣ် ကိးကလုာ်ဒဲး ဒီးလၢၢ်ဝါ အါအါဂီၢ်ဂီၢ်လီၤ.
၃ ယကတဲာ်ကတီၤပာ်စၢၤ တၢ်သ့ၣ်တဖၣ်န့ၣ် ခဲလၢာ်လၢ ဟံၣ်စီဆှံတဖျၢၣ်အံၤ အဂီၢ်လီၤ. ဒီးတကးဒံးဘၣ် လၢယနီၢ်ကစၢ် တၢ်လုၢ်ဒိၣ်ပှ့ၤဒိၣ်တဖၣ်အကျါ+ ယကဟ့ၣ်လီၤဒံး ထူဒီးစ့ညၣ်လၢ ယကစၢ်ယွၤ အဟံၣ်အဂီၢ် မ့ၢ်လၢ ယဘၣ်သူၣ်ဘၣ်သး ယကစၢ်ယွၤ အဟံၣ်အဃိလီၤ.+
၄ ဒီးလၢပှၤကကျးဘၢ ဒၢးဖိတဖၣ် အဒူၣ်အဂီၢ်န့ၣ် ယကဟ့ၣ်လီၤစ့ၢ်ကီး ထူလၢ အဟဲလၢ အိဖ့ၢ်တၢ်လီၢ်+ အတၤလၣ်* ၃,၀၀၀ ဒီးစ့ညၣ် လၢအဘၣ်တၢ်ပှံၢ်စီအီၤ အတၤလၣ် ၇,၀၀၀
၅ လၢပှၤကမၤတၢ်လၢ ထူအဂီၢ်, ပှၤကမၤတၢ်လၢ စ့ညၣ်အဂီၢ် ဒီးလၢတၢ်မၤခဲလၢာ်လၢ ပှၤစုသ့ဖိတဖၣ် ကမၤဝဲအဂီၢ်န့ၣ်လီၤ. ခဲအံၤန့ၣ် မတဂၤ သးအိၣ် ဟ့ၣ်မၤဘူၣ်တၢ်လၢ ယဟိဝၤယွၤ အဂီၢ်လဲၣ်.”+
၆ အဃိ ဒူၣ်ဖိထၢဖိ* အပဒိၣ်တဖၣ်, အံၣ်စရ့လးအဒူၣ် အပဒိၣ်တဖၣ်, ပှၤတကထိ အခိၣ်တဖၣ်, ပှၤတကယၤ အခိၣ်တဖၣ်+ ဒီးပှၤအခိၣ်တဖၣ်လၢ အကွၢ်ထွဲ စီၤပၤအတၢ်မၤန့ၣ်+ မၤဘူၣ်လီၤတၢ်လၢ တၢ်သူၣ်အိၣ်သးအိၣ် အပူၤလီၤ.
၇ ဒီးလၢတၢ်မၤလၢ ယွၤလၢအမ့ၢ်အတီတဂၤ အဟံၣ်အဂီၢ်န့ၣ် အဝဲသ့ၣ်ဟ့ၣ်လီၤဝဲ ထူအတၤလၣ် ၅,၀၀၀, ဒၤရံး* အဘ့ၣ် ၁၀,၀၀၀, စ့ညၣ်အတၤလၣ် ၁၀,၀၀၀, တိၢ်ဘီ အတၤလၣ် ၁၈,၀၀၀ ဒီးထးအတၤလၣ် ၁၀၀,၀၀၀ လီၤ.
၈ ပှၤတဂၤဂ့ၤ တဂၤဂ့ၤ လၢအအိၣ်ဒီး လၢၢ်လၢ အလုၢ်ဒိၣ်ပှ့ၤဒိၣ်တဖၣ်န့ၣ် အဝဲသ့ၣ် ဟ့ၣ်လီၤဝဲလၢ တၢ်လုၢ်ဒိၣ်ပှ့ၤဒိၣ်အလီၢ် လၢယဟိဝၤယွၤ အဟံၣ်ပူၤ လၢအအိၣ်လၢ ပှၤက့ရၡိၣ်ဖိ+ စီၤယဃံအ့လး+ အတၢ်ကွၢ်ထွဲအဖီလာ်လီၤ.
၉ ပှၤဂီၢ်မုၢ်တဖၣ် ဟ့ၣ်မၤဘူၣ်တၢ်လၢ တၢ်သးအိၣ်အပူၤလီၤ. ဒီးခီဖျိလၢ အဝဲသ့ၣ် ဟ့ၣ်မၤဘူၣ်တၢ်လၢ ယဟိဝၤယွၤအအိၣ် လၢအသးဒီဖျၢၣ်အဃိ+ အဝဲသ့ၣ် သူၣ်ခုသးခု ဒီးစီၤပၤဒၤဝံး စ့ၢ်ကီး သူၣ်ခုသးခု ဒိၣ်မးလီၤ.
၁၀ ဝံၤဒီး စီၤဒၤဝံး စံးထီၣ်ပတြၢၤ ယဟိဝၤယွၤ လၢတၢ်အိၣ်ဖှိၣ် ဒီတဖုအမဲာ်ညါ ဒီးတဲဝဲလၢ “အိ ပဖုဖးဒိၣ် စီၤအံၣ်စရ့လး အကစၢ် ယဟိဝၤယွၤဧၢ, မ်နဘၣ် တၢ်စံးထီၣ်ပတြၢၤ အစိၤစိၤအဃၣ်ဃၣ်တက့ၢ်.
၁၁ အိ ယဟိဝၤယွၤဧၢ, တၢ်စိတၢ်ကမီၤ,+ တၢ်ဂံၢ်တၢ်ဘါ,+ တၢ်ဃံတၢ်လၤ, တၢ်ကပြုၢ်ကပြီၤ ဒီးတၢ်ကဟုကညီၢ်န့ၣ်+ အိၣ်ဝဲဒီးနၤလီၤ. တၢ်အိၣ်လၢမူခိၣ် ဒီးဟီၣ်ခိၣ် ကိးမံၤဒဲးန့ၣ် မ့ၢ်နတၢ်လီၤ.+ အိ ယဟိဝၤယွၤဧၢ, ဘီမုၢ်မ့ၢ်နတၢ်+ ဒီးနမ့ၢ် ပှၤအခိၣ်လၢ အပၢတၢ်လၢ ပှၤခဲလၢာ် အဖီခိၣ်လီၤ.
၁၂ တၢ်ထူးတၢ်တီၤဒီး တၢ်လၤကပီၤန့ၣ် ဟဲလၢနအိၣ်+ ဒီးနပၢ တၢ်ခဲလၢာ်လီၤ.+ လၢနစုပူၤန့ၣ် အိၣ်ဒီး တၢ်စိတၢ်ကမီၤ+ ဒီးတၢ်ဂံၢ်တၢ်ဘါ+ ဒီးနစု ဒုးကဲထီၣ် ပှၤတဂၤဂ့ၤ တဂၤဂ့ၤလၢ ပှၤဖးဒိၣ်သ့+ ဒီးနဟ့ၣ်ပှၤခဲလၢာ် လၢတၢ်ဂံၢ်တၢ်ဘါသ့လီၤ.+
၁၃ အိ ပကစၢ်ယွၤဧၢ, ပစံးဘျုးနၤ ဒီးစံးထီၣ်ပတြၢၤ နမံၤဃံလၤလီၤ.
၁၄ “ယၤဒီးယပှၤဂီၢ်မုၢ်အံၤ ပတမ့ၢ်တၢ်နီတမံၤဘၣ် အဃိ ပဟ့ၣ်မၤဘူၣ်လီၤ တၢ်ဒ်အံၤ ကသ့ဒ်လဲၣ်. နီၢ်ကီၢ်န့ၣ် တၢ်ခဲလၢာ် ဟဲလၢနအိၣ် ဒီးအိၣ်ဒၣ် ပဟ့ၣ်က့ၤနၤ တၢ်လၢအကဲတ့ၢ် နတၢ်လီၤ.
၁၅ ဒ်ပမိၢ်ပၢ်ဖံဖု လၢပျၢၤတဖၣ်အသိး ပဝဲစ့ၢ်ကီး လၢနမဲာ်ညါန့ၣ် ပကဲ ပှၤထံဂၤကီၢ်ဂၤဖိလီၤ.+ ပတၢ်အိၣ်မူ လၢဟီၣ်ခိၣ်ချၢအံၤန့ၣ် မ့ၢ်ဒ်တၢ်အကဒုအသိး+ ဒီးတၢ်မုၢ်လၢ် တအိၣ်ဘၣ်.
၁၆ အိ ပကစၢ် ယဟိဝၤယွၤဧၢ, တၢ်ထူးတၢ်တီၤလၢ ပကတဲာ်ကတီၤပာ်စၢၤ ဒ်သိး ပကတ့ထီၣ် ဟံၣ်လၢနမံၤစီဆှံအဂီၢ်န့ၣ် ဟဲလၢနအိၣ် ဒီးအမ့ၢ်နတၢ် ခဲလၢာ်လီၤ.
၁၇ အိ ကစၢ်ယွၤဧၢ, ယသ့ၣ်ညါဂ့ၤဂ့ၤလၢ နသမံသမိး ပှၤသူၣ်ပှၤသး+ ဒီးနဘၣ်သူၣ်ဘၣ်သး တၢ်သးတီလီၤ.*+ လၢတၢ်သူၣ်ဘျၢသးဘျၢအပူၤ ယမၤဘူၣ်လီၤ တၢ်သ့ၣ်တဖၣ်အံၤ ခဲလၢာ်လီၤ. ဒီးခဲအံၤ ယထံၣ်ဘၣ်လၢ နပှၤဂီၢ်မုၢ်လၢ အအိၣ်ဖဲအံၤ မၤဘူၣ်လီၤတၢ်လၢ နအိၣ် လၢတၢ်သူၣ်အိၣ်သးအိၣ် အပူၤအဃိ မၤသးခု ယသးဒိၣ်မး.
၁၈ ပဖုဖးဒိၣ်တဖၣ် လၢအမ့ၢ် စီၤအၤဘြၤဟၣ်, စီၤအံၤစဲး ဒီးစီၤအံၣ်စရ့လး အကစၢ် ယဟိဝၤယွၤဧၢ, မၤစၢၤ နပှၤဂီၢ်မုၢ် ဒ်သိး အဝဲသ့ၣ် ကဆဲးအိၣ်ဒီး တၢ်ပာ်သူၣ်ပာ်သး ဒ်အံၤ ဒီးတၢ်ဆိကမိၣ် ဒ်အံၤတဖၣ် လီၤထူလီၤယိာ် ဒီးဟံးစုနဲၣ်ကျဲ အဝဲသ့ၣ်အသး လၢနအိၣ် ထီဘိတက့ၢ်.+
၁၉ ဒီးမၤစၢၤ ယဖိခွါ စီၤၡလိၤမိၤ ဒ်သိး အကမၤထွဲ နတၢ်မၤလိာ်တဖၣ်,+ နတၢ်ဒုးသ့ၣ်နီၣ်ထီၣ်တဖၣ် ဒီးနတၢ်ဘျၢတဖၣ် လၢအသးဒီဖျၢၣ်*+ အဂီၢ်တက့ၢ်. မၤစၢၤအီၤလၢ အကမၤထွဲ တၢ်သ့ၣ်တဖၣ်န့ၣ် ခဲလၢာ် ဒီးသူတၢ်လၢ ယကတဲာ်ကတီၤပာ်စၢၤတဖၣ် ဒ်သိး ကတ့ထီၣ် တၢ်လုၢ်ဟံၣ်အဂီၢ်တက့ၢ်.”+
၂၀ ဝံၤဒီး စီၤဒၤဝံး တဲဘၣ် တၢ်အိၣ်ဖှိၣ် ဒီတဖုလၢ “ခဲအံၤ စံးထီၣ်ပတြၢၤ သုကစၢ် ယဟိဝၤယွၤ တက့ၢ်.” အဃိ တၢ်အိၣ်ဖှိၣ်ဒီတဖု စံးထီၣ်ပတြၢၤ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ ဒီးထိၣ်လီၤပှီၤအသးလၢ ယဟိဝၤယွၤ ဒီးစီၤပၤ အမဲာ်ညါလီၤ.
၂၁ ဒီးအဝဲသ့ၣ် ဆဲးလုၢ်ထီၣ်ဝဲ တၢ်လုၢ်တၢ်ပာ်တဖၣ်လၢ ယဟိဝၤယွၤ အအိၣ် ဒီးလုၢ်ထီၣ်ဒံးဝဲ တၢ်လုၢ်ဒွဲၣ်အူတဖၣ်လၢ+ ယဟိဝၤယွၤအအိၣ် တုၤလီၤလၢ လၢခံတနံၤလီၤ. အဝဲသ့ၣ်လုၢ်ထီၣ်ဝဲ ကျီၢ်ဖါဖိ အဒု ၁,၀၀၀, သိဖါအဒု ၁,၀၀၀, သိဖါဖိ အဒု ၁,၀၀၀ ဒီးအဝဲသ့ၣ်လုၢ်ထီၣ်ဝဲ စပံးထံလၢ တၢ်လုၢ်တၢ်ပာ်အဂီၢ်လီၤ.+ အဝဲသ့ၣ် လုၢ်ထီၣ် တၢ်လုၢ်တၢ်ပာ် အါအါဂီၢ်ဂီၢ် လၢပှၤအံၣ်စရ့လးဖိ ခဲလၢာ်အဂီၢ်လီၤ.+
၂၂ ဖဲနံၤအဝဲန့ၣ် အဝဲသ့ၣ် အီၣ်တၢ်အီတၢ်လၢ ယဟိဝၤယွၤ အမဲာ်ညါ လၢတၢ်သူၣ်ခုသးခု ဒိၣ်မးအပူၤ+ ဒီးအဝဲသ့ၣ် ဒုးကဲထီၣ် စီၤဒၤဝံး အဖိခွါ စီၤၡလိၤမိၤ လၢစီၤပၤ ခံဘျီတဘျီ ဒီးဒိးဖှူအီၤ ဒ်ပှၤအခိၣ်တဂၤ+ ဒီးဒုးကဲထီၣ်ဝဲ စီၤစၤဒိး ဒ်ပှၤလုၢ်တၢ်ဒိၣ်တဂၤ အသိး+ လၢယဟိဝၤယွၤ အမဲာ်ညါလီၤ.
၂၃ ဒီးစီၤၡလိၤမိၤ ဆ့ၣ်နီၤလၢ ယဟိဝၤယွၤ အလီၢ်ပစိာ်+ ဒ်စီၤပၤအသိး လၢအပၢ် စီၤဒၤဝံးအလီၢ်လီၤ. အဝဲမၤတၢ် ကဲထီၣ်လိၣ်ထီၣ် ဒီးပှၤအံၣ်စရ့လးဖိ ခဲလၢာ် ဒိကနၣ် အကလုၢ်လီၤ.
၂၄ ပဒိၣ်ခဲလၢာ်,+ ပှၤသုးဖိလၢ အဂံၢ်ဆူၣ်ဘါဆူၣ်တဖၣ်+ ဒီးစီၤပၤဒၤဝံး အဖိခွါ ခဲလၢာ်+ ဒိးပၢအသးလၢ စီၤပၤၡလိၤမိၤ အတၢ်ပၢဖီလာ်န့ၣ်လီၤ.
၂၅ ယဟိဝၤယွၤ ဒုးကဲထီၣ် စီၤၡလိၤမိၤလၢ ပှၤဖးဒိၣ်တဂၤ လၢပှၤအံၣ်စရ့လးဖိ ခဲလၢာ်အမဲာ်ညါ ဒီးဟ့ၣ်လီၤအီၤ စီၤပၤအလၤကပီၤ အါန့ၢ်ဒံး စီၤပၤအဂၤလၢ အပၢတ့ၢ် ပှၤအံၣ်စရ့လးဖိလီၤ.+
၂၆ ဒီးစီၤယံးၡဲ အဖိခွါ စီၤဒၤဝံး ပၢဘၣ် ပှၤအံၣ်စရ့လးဖိ ခဲလၢာ်လီၤ.
၂၇ အဝဲပၢဘၣ်တၢ်လၢ ပှၤအံၣ်စရ့လးဖိအဖီခိၣ် အနံၣ် ၄၀ လီၤ. လၢဝ့ၢ်ဃ့ဘြိၣ် အပူၤန့ၣ် အပၢဘၣ်တၢ် ၇ နံၣ်+ ဒီးလၢဝ့ၢ်ယရူၤၡလ့ၣ် အပူၤန့ၣ် အပၢဘၣ်တၢ် ၃၃ နံၣ်လီၤ.+
၂၈ စီၤဒၤဝံးအိၣ်မူ တုၤလၢ အသးပှၢ်ထီၣ်ဖးဒိၣ်+ ဒီးအဝဲ အိၣ်ဝဲဒီး တၢ်ထူးတၢ်တီၤ, တၢ်လၤကပီၤ ဒီးသံဝဲလၢ တၢ်သူၣ်မံသးမုာ် အပူၤလီၤ. ဒီးအဖိခွါ စီၤၡလိၤမိၤ ကဲထီၣ် စီၤပၤလၢ အလီၢ်န့ၣ်လီၤ.+
၂၉ စီၤပၤဒၤဝံး အဂ့ၢ် စးထီၣ်လၢ အခီၣ်ထံး တုၤလၢ အကတၢၢ်န့ၣ် ဘၣ်တၢ်ကွဲးနီၣ်အီၤလၢ ပှၤထံၣ်တၢ်* လၢအမ့ၢ် စီၤၡမူၤအ့လး, ဝံနၤသၣ်+ ဒီးပှၤထံၣ်တၢ်ထံၣ်လၢညါခီ စီၤကး+ အတၢ်ကွဲးနီၣ်ကွဲးဃါတဖၣ် အပူၤလီၤ.
၃၀ တၢ်ကွဲးနီၣ်ကွဲးဃါတဖၣ်အံၤ ပာ်ဖျါထီၣ် အတၢ်ပၢအဂ့ၢ်, အတၢ်မၤလၢ အဒိၣ်အမုၢ် ဒီးတၢ်လၢ အဟဲကဲထီၣ်အသးဒီးအီၤ, ပှၤအံၣ်စရ့လးဖိ ဒီးဘီမုၢ်တဖၣ်လၢ အကပိာ်ကပၤ ခဲလၢာ်အဂ့ၢ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “နီ.”
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ အခီပညီလိၤလိၤ “ပၢ်အဒူၣ်ဖိထၢဖိ.”
^ ဒၤရံးန့ၣ် မ့ၢ်ဝဲ ပှၤပၤရၣ်ဖိ အထူကရံၣ်တဘ့ၣ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “တၢ်တီတၢ်လိၤ, တၢ်သူၣ်ဘျၢသးဘျၢ.”
^ မ့ၢ်စ့ၢ်ကီး “တၢ်သးတီ လၢလၢပှဲၤပှဲၤ.”
^ ကွၢ် တၢ်ကတိၤအခီပညီ.
