၁ ကွဲးနီၣ်တၢ် ၅:၁-၂၆
၅ ပှၤသ့ၣ်တဖၣ်အံၤ မ့ၢ်ဝဲ စီၤအံၣ်စရ့လး အဖိခွါဝဲၢ်ကိ စီၤရူၤဘ့ၣ်+ အဖိခွါတဖၣ်လီၤ. စီၤရူၤဘ့ၣ်န့ၣ် မ့ၢ်ဝဲ ဖိဝဲၢ်ကိလီၤ. ဘၣ်ဆၣ် အဝဲမၤဘၣ်အၢ အပၢ်အလီၢ်မံအဃိ+ ဖိဝဲၢ်ကိအတၢ်ခွဲးတၢ်ယာ် ဘၣ်တၢ်ဟ့ၣ်လီၤကွံာ်အီၤဆူ စီၤအံၣ်စရ့လး အဖိခွါ စီၤယိၤသး+ အဖိခွါတဖၣ်လီၤ. အဃိ လၢတၢ်ကွဲးနီၣ်ကွဲးဃါလၢ အဘၣ်ဃးဒီး အဝဲသ့ၣ်အစၢၤအသွဲၣ်လၢ အကြၢးဒိးန့ၢ်ဘၣ် ဖိဝဲၢ်ကိ အတၢ်ခွဲးတၢ်ယာ် အကျါန့ၣ် စီၤရူၤဘ့ၣ်တပၣ်ဘၣ်.
၂ စီၤယူဒၤန့ၣ်+ ဒိၣ်န့ၢ်ဒံးအဒီပုၢ်ဝဲၢ်တဖၣ် ဒီးပှၤအခိၣ်တဂၤ ဟဲလီၤစၢၤလီၤသွဲၣ်လၢအီၤ+ သနာ်က့ ဖိဝဲၢ်ကိ အတၢ်ခွဲးတၢ်ယာ်န့ၣ် မ့ၢ်ဝဲ စီၤယိၤသးအတၢ်လီၤ.
၃ စီၤအံၣ်စရ့လး အဖိဝဲၢ်ကိ စီၤရူၤဘ့ၣ် အဖိခွါတဖၣ် မ့ၢ်ဝဲ စီၤဃနိး, စီၤပးလူ, စီၤဃ့ၤစရိၣ် ဒီးစီၤကၢ်မံၤလီၤ.+
၄ စီၤယိၤအ့လး အဖိခွါတဖၣ်* မ့ၢ်ဝဲ စီၤၡမါယၤ, စီၤၡမါယၤ အဖိခွါ မ့ၢ်ဝဲ စီၤကိး, စီၤကိး အဖိခွါ မ့ၢ်ဝဲ စီၤၡံမံၤ,
၅ စီၤၡံမံၤ အဖိခွါမ့ၢ်ဝဲ စီၤမံကၤ, စီၤမံကၤ အဖိခွါ မ့ၢ်ဝဲ စီၤရအါယၤ, စီၤရအါယၤ အဖိခွါ မ့ၢ်ဝဲ စီၤဘဧၤလး,
၆ စီၤဘဧၤလး အဖိခွါ မ့ၢ်ဝဲ စီၤဘ့ရၤ လၢကီၢ်အၤၡူၢ် အစီၤပၤ တံးလကးပံးလန့စ့ၢ်+ က့ၤဖီၣ်ဝဲန့ၣ်လီၤ. အဝဲ မ့ၢ်ဝဲ ပှၤရူၤဘ့ၣ်ဖိ အခိၣ်အနၢ်လီၤ.
၇ စီၤဘ့ရၤ အဒီပုၢ်ဝဲၢ်တဖၣ် ဒ်အဝဲသ့ၣ် အဒူၣ်ဖိထၢဖိ အတၢ်ကွဲးနီၣ်ကွဲးဃါ အိၣ်ဝဲအသိး မ့ၢ်ဝဲဒ်အံၤလီၤ. စီၤယံၤအ့လး မ့ၢ်ဝဲ ပှၤအခိၣ်, စီၤစကၤရယၤ
၈ ဒီးစီၤဧၤစး အဖိခွါ စီၤဘ့လၤလီၤ. စီၤဧၤစး မ့ၢ်ဝဲ စီၤၡ့မၤ အဖိခွါ ဒီးစီၤၡ့မၤ မ့ၢ်ဝဲ စီၤယိၤအ့လး အဖိခွါလီၤ. စီၤဘ့လၤ အဒူၣ်ဖိထၢဖိ အိၣ်ဝဲဆိးဝဲလၢ ဝ့ၢ်ဧရိၤဧ့ၢ်+ ပၢၢ်တုၤလၢ ဝ့ၢ်နဘိ ဒီးဘဧၤလးမဧိၣ်လီၤ.+
၉ မ့မ့ၢ် လၢမုၢ်ထီၣ်တခီန့ၣ် အဝဲသ့ၣ် အိၣ်ဝဲပၢၢ်တုၤလၢ ပှၢ်မုၢ်ကနၢအခီၣ်ထံးလၢ အဘူးဒီး ထံကျိဖရၤသး+ မ့ၢ်လၢ အဝဲသ့ၣ် အဆၣ်ဖိကီၢ်ဖိတဖၣ် အါထီၣ်ဂီၢ်ထီၣ်ဝဲလၢ ကံးလဧး အဟီၣ်ကဝီၤပူၤ အဃိလီၤ.+
၁၀ ဖဲစီၤစီလူး ပၢတၢ်အခါ အဝဲသ့ၣ်ဒုးဝဲ ပှၤဟၤကၢ်ဖိ ဒီးအဝဲသ့ၣ် မၤနၢၤကွံာ်ဝဲ ပှၤဟၤကၢ်ဖိလီၤ. အဃိ အဝဲသ့ၣ် အိၣ်လၢ ပှၤဟၤကၢ်ဖိ အဒဲတဖၣ်အပူၤလၢ တၢ်လီၢ်ခဲလၢာ်လၢ အအိၣ်ဝဲလၢ ကံးလဧး အဟီၣ်ကဝီၤ အမုၢ်ထီၣ်တခီလီၤ.
၁၁ ဒီးစီၤကး အစၢၤအသွဲၣ်တဖၣ် အိၣ်ဝဲလၢ စီၤရူၤဘ့ၣ် အစၢၤအသွဲၣ် အကပၤ ဖဲကီၢ်ဘၤၡၣ် တုၤလၢ ဝ့ၢ်စၤလကးန့ၣ်လီၤ.+
၁၂ လၢကီၢ်ဘၤၡၣ်န့ၣ် စီၤယိၤအ့လး မ့ၢ်ဝဲ ပှၤအခိၣ်, စီၤၡးဖး မ့ၢ်ဝဲ ပှၤခံဂၤတဂၤ ဒီးစီၤယၤနဲ ဒီးစီၤၡၤဖး စ့ၢ်ကီး မ့ၢ်ဝဲ ပှၤခိၣ်ပှၤနၢ်လီၤ.
၁၃ အဝဲသ့ၣ် အဘူးအတံၢ်တဖၣ် မ့ၢ်ဝဲ စီၤမံၤက့လး, စီၤမၡူလၣ်, စီၤၡဘၤ, စီၤယိၤရဲ, စီၤယၤကၣ်, စီၤစံၤ ဒီးစီၤဧၤဘ့ၢ်လီၤ. ခဲလၢာ်ခဲဆ့အိၣ်ဝဲ နွံဂၤလီၤ.
၁၄ ပှၤတဖၣ်န့ၣ် မ့ၢ်ဝဲ စီၤအဘံဃယ့းလး အဖိခွါတဖၣ်လီၤ. စီၤအဘံဃယ့းလး မ့ၢ်ဝဲ စီၤဃူရံၤ အဖိခွါလီၤ. စီၤဃူရံၤ မ့ၢ်ဝဲ စီၤယၤရိၤ အဖိခွါ, စီၤယၤရိၤ မ့ၢ်ဝဲ စီၤကံးလဧး အဖိခွါ, စီၤကံးလဧး မ့ၢ်ဝဲ စီၤမံၤက့လး အဖိခွါ, စီၤမံၤက့လး မ့ၢ်ဝဲ စီၤယၡံၤၡဲ အဖိခွါ, စီၤယၡံၤၡဲ မ့ၢ်ဝဲ စီၤယၤရိၤ အဖိခွါ, စီၤယၤရိၤ မ့ၢ်ဝဲ စီၤဘူစး အဖိခွါလီၤ.
၁၅ အဝဲသ့ၣ် အဒူၣ်ဖိထၢဖိ အခိၣ်န့ၣ် မ့ၢ်ဝဲ စီၤအဃံၤလီၤ. စီၤအဃံၤ မ့ၢ်ဝဲ စီၤဧၤဘ့ၤဒ့လး အဖိခွါ ဒီးစီၤဧၤဘ့ၤဒ့လး မ့ၢ်ဝဲ စီၤကူနံၤအဖိခွါလီၤ.
၁၆ အဝဲသ့ၣ်အိၣ်လၢ ကံးလဧး,+ ဘၤၡၣ်+ ဒီးအဒူသဝီတဖၣ်အပူၤ ဒီးတုၤလၢ ၡၤရိၣ် တၢ်အီၣ်ဆၣ်အလီၢ်ခဲလၢာ် အကတၢၢ်န့ၣ်လီၤ.
၁၇ ဖဲယူဒၤအစီၤပၤ ယိၤသၣ်+ ဒီးအံၣ်စရ့လး အစီၤပၤ ယၤရၤဘၣ်*+ ပၢတၢ်အစိၤန့ၣ် အဝဲသ့ၣ် ခဲလၢာ် ဘၣ်တၢ်ကွဲးနီၣ်ကွဲးဃါလီၤအီၤ ဒ်အတၢ်ဟဲလီၤစၢၤလီၤသွဲၣ် အိၣ်ဝဲအသိးလီၤ.
၁၈ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ်န့ၣ် အဝဲသ့ၣ်အိၣ်ဒီး ပှၤသုးဖိလၢ အဂံၢ်ဆူၣ်ဘါဆူၣ် အဂၤ ၄၄,၇၆၀ လၢအစိာ်ဒီး ကတီၤ, နး, ချံၣ် ဒီးအဒုးတၢ်သ့န့ၣ်လီၤ.
၁၉ အဝဲသ့ၣ် ဒုးဝဲ ပှၤဟၤကၢ်ဖိ,+ စီၤယတူၢ်, စီၤနါဖံၣ်+ ဒီးစီၤနိဒာ်လီၤ.
၂၀ ဒီးဖဲအဝဲသ့ၣ်ဒုး ပှၤသ့ၣ်တဖၣ်န့ၣ်အခါ အဝဲသ့ၣ် ဃ့တၢ်မၤစၢၤလၢ ကစၢ်ယွၤအအိၣ်လီၤ. ဒီးမ့ၢ်လၢအဝဲသ့ၣ် နာ်န့ၢ်ကစၢ်ယွၤအဃိ ကစၢ်ယွၤ မၤစၢၤအဝဲသ့ၣ် ဒီးဟ့ၣ်လီၤ ပှၤဟၤကၢ်ဖိ ဒီးပှၤခဲလၢာ်လၢ အအိၣ်ဒီးပှၤဟၤကၢ်ဖိန့ၣ် လၢအဝဲသ့ၣ်အစုပူၤလီၤ.+
၂၁ အဝဲသ့ၣ်ဖီၣ်န့ၢ်ဝဲ ပှၤတဖၣ်န့ၣ် အကီၤလၤအူး အဒု ၅၀,၀၀၀, သိအဒု ၂၅၀,၀၀၀, ကသ့ၣ်ယီၤ အဒု ၂,၀၀၀ ဒီးပှၤအဂၤ ၁၀၀,၀၀၀ လီၤ.
၂၂ မ့ၢ်လၢ ယွၤလၢအမ့ၢ်အတီတဂၤ ဒုးတၢ်အဃိ အဝဲသ့ၣ် အဒုၣ်အဒါတဖၣ် သံဝဲအါအါဂီၢ်ဂီၢ်လီၤ.+ ဒီးအဝဲသ့ၣ် အိၣ်က့ၤဝဲလၢ ပှၤတဖၣ်န့ၣ်အတၢ်လီၢ် တုၤလၢ ပှၤက့ၤဖီၣ်အဝဲသ့ၣ် တစုလီၤ.+
၂၃ ဒီးပှၤမနၤၡ့ၤဖိ+ အဒူၣ်တဝာ် အစၢၤအသွဲၣ်တဖၣ်န့ၣ် အနီၣ်ဂံၢ်အိၣ်ဝဲအါမးလီၤ. အဝဲသ့ၣ်အိၣ်ဝဲ စးထီၣ်လၢ ဘၤၡၣ် တုၤလၢ ဘဧၤလးဃ့ရမိၣ်, စနံၢ် ဒီးကစၢၢ် ဃ့ရမိၣ်လီၤ.+
၂၄ အဝဲသ့ၣ် အဒူၣ်ဖိထၢဖိတဖၣ် အခိၣ်အနၢ် အမံၤန့ၣ် ဘၣ်တၢ်ပာ်ဖျါထီၣ်အီၤ ဒ်လၢလာ်အံၤအသိးလီၤ. စီၤဧ့ၤဖ့ၢ်, စီၤယံၡံၤ, စီၤအလံၤအ့လး, စီၤဧၤစရံၤအ့လး, စီၤယံးရမံယၤ, စီၤဟိဒါယၤ ဒီးစီၤယၤဃဒံၤအ့လးလီၤ. ပှၤတဖၣ်န့ၣ် မ့ၢ်ဝဲ ပှၤသုးဖိလၢ အဂံၢ်ဆူၣ်ဘါဆူၣ်, အမံၤဒိၣ်သၣ်ဒိၣ် ဒီးမ့ၢ်စ့ၢ်ကီး အဝဲသ့ၣ် အဒူၣ်ဖိထၢဖိ အခိၣ်အနၢ်တဖၣ်လီၤ.
၂၅ ဘၣ်ဆၣ် အဝဲသ့ၣ် တတီဒီး အမိၢ်ပၢ်ဖံဖု လၢပျၢၤတဖၣ် အကစၢ်ယွၤဘၣ်. ဒီးဒ်ပိာ်မုၣ် ဆါလီၤအီၣ်သးအသိး အဝဲသ့ၣ် ဟ့ၣ်လီၤအသးလၢ ပှၤကလုာ်တဖၣ်လၢ ကစၢ်ယွၤ မၤဟးဂီၤကွံာ်ဝဲလၢ အဝဲသ့ၣ် အမဲာ်ညါတဖၣ်န့ၣ် အယွၤတဖၣ်အအိၣ်လီၤ.+
၂၆ အဃိ အံၣ်စရ့လး အကစၢ်ယွၤ ထိၣ်ဟူးထိၣ်ဂဲၤထီၣ် ကီၢ်အၤၡူၢ်အစီၤပၤ ပူလး အသး+ (မ့ၢ်ဝဲ ကီၢ်အၤၡူၢ်အစီၤပၤ စီၤတံးလကးပံးလန့စ့ၢ်)+ ဒ်သိး အဝဲကက့ၤဖီၣ်ဝဲ ပှၤရူၤဘ့ၣ်ဖိ, ပှၤကးဖိ ဒီးပှၤမနၤၡ့ၤဖိ အဒူၣ်တဝာ် ဒီးက့ၤကိး အဝဲသ့ၣ်ဆူ ဃၤလၤ, ဝ့ၢ်ဃၤဘိၢ်, ဟၤရၢ် ဒီးထံကျိကိစၣ်လီၤ.+ ဒီးအဝဲသ့ၣ် အိၣ်ဝဲဖဲန့ၣ် တုၤလၢ မုၢ်မဆါတနံၤအံၤန့ၣ်လီၤ.
တၢ်ဂ့ၢ်အဘျဲၣ်တဖၣ်
^ လၢဧ့ၤဘြံၤကျိာ်န့ၣ် တၢ်ကတိၤတဖျၢၣ်အံၤ အခီပညီ မ့ၢ်ဝဲ “ဖိခွါ,” “လံၤ” မ့တမ့ၢ် “ပှၤအစၢၤအသွဲၣ်.”
^ မ့ၢ်ဝဲ စီၤယၤရၤဘၣ် ခံဂၤတဂၤ.
