၁ စီၤပၤ ၂၁:၁-၂၉
၂၁ တၢ်သ့ၣ်တဖၣ်န့ၣ် ဝံၤအလီၢ်ခံ တၢ်ကဲထီၣ်အသးတခါလၢ အဘၣ်ဃးဒီး ပှၤယံးစရ့လးဖိ စီၤနၤဘိး အစပံးကျီး လၢအအိၣ်လၢ ဝ့ၢ်ယံးစရ့လးအပူၤလီၤ.+ ဒီးစပံးကျီးန့ၣ် အိၣ်ဝဲလၢ ၡၤမရံ အစီၤပၤအၤဃာ်အနီ* အကပၤလီၤ.
၂ စီၤအၤဃာ် တဲဘၣ် စီၤနၤဘိးလၢ “ခီဖျိလၢ နစပံးကျီးန့ၣ် အိၣ်ဘူးဒီး ယဟံၣ်အဃိ ဟ့ၣ်ယၤ နစပံးကျီး ဒ်သိးယကသူၣ်အီၣ် တၢ်ဒိးတၢ်လၣ် အကျီးအဂီၢ်မီၤ. ဒီးယကဟ့ၣ်က့ၤနၤ စပံးကျီးလၢ အဂ့ၤဒိၣ်န့ၢ်ဒံးနကျီး, မ့တမ့ၢ်ဘၣ်န့ၣ် နမ့ၢ်လီကီန့ၣ် ယကဟ့ၣ်လီၤနၤလၢစ့ ဒ်အလုၢ်အပှ့ၤအိၣ်ဝဲအသိးလီၤ.”
၃ ဘၣ်ဆၣ် စီၤနၤဘိး တဲဘၣ် စီၤအၤဃာ်လၢ “ယမ့ၢ်ဟ့ၣ်နၤ ယမိၢ်ပၢ်ဖံဖု လၢပျၢၤတဖၣ် အတၢ်န့ၢ်သါန့ၣ် လ့ၤတက့ၤ ယဟိဝၤယွၤ တဘၣ်သးဘၣ်.”+
၄ ဒီးခီဖျိလၢ ပှၤယံးစရ့လးဖိ စီၤနၤဘိး တဲစီၤအၤဃာ်လၢ “ယတဟ့ၣ်နၤ ယမိၢ်ပၢ်ဖံဖု လၢပျၢၤတဖၣ် အတၢ်န့ၣ်သါဘၣ်” အဃိ စီၤအၤဃာ် အသးအ့န့ ဒီးအသးဟးဂီၤဒီး က့ၤနုာ်လီၤလၢ အဟံၣ်ပူၤလီၤ. ဝံၤဒီး အဝဲလဲၤမံနီၤလၢ အလီၢ်မံခိၣ် ဒီးဃၣ်ကွံာ်အမဲာ်လၢ တၢ်ကပၤ ဒီးတအီၣ်တၢ်ဘၣ်.
၅ စီၤအၤဃာ် အမါနီၢ်အံၤစ့ဘ့ၤလး+ လဲၤလၢအအိၣ် ဒီးသံကွၢ်အီၤလၢ “ဘၣ်မနုၤအဃိ နသးအုးတုၤလၢ နတအီၣ်တၢ်ဘၣ်လဲၣ်.”
၆ စီၤအၤဃာ် တဲအီၤလၢ “ယတဲဘၣ် ပှၤယံးစရ့လးဖိ စီၤနၤဘိးလၢ ‘ဆါန့ၢ်ယၤ နစပံးကျီးမီၤ, မ့တမ့ၢ်ဘၣ် နမ့ၢ်လီကီန့ၣ် လၢနစပံးကျီးအလီၢ် ယကဟ့ၣ်နၤ ကျီးလၢ အဂၤတကျီး.’ ဘၣ်ဆၣ် စီၤနၤဘိး တဲယၤလၢ အတဟ့ၣ်ယၤ အစပံးကျီးဘၣ်.”
၇ ဒီးအမါ နီၢ်အံၤစ့ဘ့ၤလး တဲအီၤလၢ “နကဲ စီၤပၤတဂၤလၢ အပၢတၢ်လၢ အံၣ်စရ့လးအဖီခိၣ် တမ့ၢ်ဧီၤ. ယကဟ့ၣ်နၤ ပှၤယံးစရ့လးဖိ စီၤနၤဘိး အစပံးကျီး. သးအုးလၢၤတဂ့ၤ, ဂဲၤဆၢထၢၣ် အီၣ်တၢ်တမံၤမံၤဟီ.”+
၈ အဃိ နီၢ်အံၤစ့ဘ့ၤလး ကွဲးလံာ်ပရၢတဖၣ်လၢ စီၤအၤဃာ်အမံၤ ဒီးစဲပနီၣ်ဃာ်ဝဲလၢ စီၤအၤဃာ်အတၢ်စဲပနီၣ်+ ဒီးဆှၢလီၤဝဲလၢ ပှၤသူၣ်က့သးပှၢ်+ ဒီးပှၤဒိၣ်ပှၤပှၢ်တဖၣ် လၢအအိၣ်လၢ စီၤနၤဘိး အဝ့ၢ်န့ၣ်လီၤ.
၉ လၢလံာ်ပရၢတဖၣ်အပူၤန့ၣ် အဝဲကွဲးဝဲလၢ “ဘိးဘၣ်သ့ၣ်ညါလၢ ပှၤကဘၣ်ဒုၣ်တၢ်အီၣ် ဒီးဒုးဆ့ၣ်နီၤ စီၤနၤဘိးလၢ ပှၤဂီၢ်မုၢ်အမဲာ်ညါတက့ၢ်.
၁၀ ဒီးမၢပှၤပိာ်ခွါလၢ အဘျုးတအိၣ် နီတမံၤဘၣ်ခံဂၤ ဆ့ၣ်နီၤလၢ အမဲာ်ညါ ဒီးပာ်ဒ့ၣ်ပာ်ကမၣ်အီၤ+ ဒီးတဲလၢ ‘နဆိၣ်အၢကစၢ်ယွၤ ဒီးစီၤပၤလံ.’+ ဝံၤဒီး လဲၤကိးအီၤလၢ ဝ့ၢ်ချၢဒီး ကွံာ်သံအီၤလၢ လၢၢ်တက့ၢ်.”+
၁၁ အဃိ ပှၤပိာ်ခွါလၢ အမ့ၢ်ပှၤသူၣ်က့သးပှၢ်တဖၣ် ဒီးပှၤဒိၣ်ပှၤပှၢ်တဖၣ် လၢအအိၣ်လၢ စီၤနၤဘိး အဝ့ၢ်ပူၤန့ၣ် မၤဝဲဒ် တၢ်ကွဲးအသးလၢ လံာ်ပရၢအပူၤ လၢနီၢ်အံၤစ့ဘ့ၤလး ဆှၢလီၤန့ၢ် အဝဲသ့ၣ်န့ၣ်လီၤ.
၁၂ ဒီးအဝဲသ့ၣ် ဘိးဘၣ်သ့ၣ်ညါလၢ ပှၤကဘၣ်ဒုၣ်တၢ်အီၣ် ဒီးဒုးဆ့ၣ်နီၤ စီၤနၤဘိးလၢ ပှၤဂီၢ်မုၢ်အမဲာ်ညါလီၤ.
၁၃ ဝံၤဒီး ပှၤပိာ်ခွါလၢ အဘျုးတအိၣ်နီတမံၤဘၣ်ခံဂၤ ဟဲဆ့ၣ်နီၤလၢ စီၤနၤဘိး အမဲာ်ညါ ဒီးပာ်ဒ့ၣ်ပာ်ကမၣ်အီၤ လၢပှၤဂီၢ်မုၢ် အမဲာ်ညါ ဒီးတဲဝဲလၢ “စီၤနၤဘိး ဆိၣ်အၢကစၢ်ယွၤ ဒီးစီၤပၤလံ.”+ ဝံၤဒီး အဝဲသ့ၣ် လဲၤကိးထီၣ်အီၤလၢ ဝ့ၢ်အချၢ ဒီးကွံာ်သံအီၤလၢ လၢၢ်လီၤ.+
၁၄ ဒီးအဝဲသ့ၣ် ဆှၢက့ၤ တၢ်ကစီၣ်လၢ နီၢ်အံၤစ့ဘ့ၤလးအအိၣ်လၢ “ပှၤကွံာ်သံ စီၤနၤဘိးလၢ လၢၢ်လံ.”+
၁၅ ဖဲနီၢ်အံၤစ့ဘ့ၤလး နၢ်ဟူဘၣ်လၢ ပှၤကွံာ်သံ စီၤနၤဘိးလၢလၢၢ်အခါ အဝဲတဲ စီၤအၤဃာ်လၢ “လၢညါ နကဟ့ၣ်လီၤ ပှၤယံးစရ့လးဖိ+ စီၤနၤဘိးစ့ ဒ်သိး နကပှ့ၤအစပံးကျီးအဂီၢ် ဘၣ်ဆၣ် အဝဲတတူၢ်လိာ်ဘၣ်. ခဲအံၤ စီၤနၤဘိး တအိၣ်မူလၢၤဘၣ်. အဝဲသံလံအဃိ လဲၤဟံးန့ၢ်အစပံးကျီးသၢၤ.”
၁၆ ဖဲစီၤအၤဃာ် နၢ်ဟူဝဲလၢ စီၤနၤဘိး သံလံအခါ စီၤအၤဃာ် လဲၤလီၤလၢ ပှၤယံးစရ့လးဖိ စီၤနၤဘိး အစပံးကျီး ဒ်သိးကဟံးန့ၢ်အီၤအဂီၢ်လီၤ.
၁၇ ဘၣ်ဆၣ် ကစၢ်ယဟိဝၤယွၤတဲဘၣ် ပှၤတံးၡဘးဖိ စီၤအ့ၤလံယၤလၢ+
၁၈ “ဂဲၤဆၢထၢၣ် ဒီးလဲၤထံၣ်လိာ်သးဒီး အံၣ်စရ့လး အစီၤပၤအၤဃာ် လၢအအိၣ်လၢ ၡၤမရံ န့ၣ်တက့ၢ်.+ အဝဲအိၣ်လၢ စီၤနၤဘိး အစပံးကျီးဖဲန့ၣ် ဒီးအဝဲလဲၤ ဒ်သိး ကဟံးန့ၢ်ကျီးအဂီၢ်လီၤ.
၁၉ နကဘၣ်တဲ စီၤအၤဃာ်လၢ ‘ယဟိဝၤယွၤ တဲဝဲလၢ “မ့ၢ်နမၤသံ ပှၤပိာ်ခွါတဂၤ+ ဒီးဟံးန့ၢ်စ့ၢ်ကီး အဟီၣ်ခိၣ်လီၢ်ဧါ.”’+ ဝံၤဒီးတဲအီၤလၢ ‘ယဟိဝၤယွၤ တဲဝဲလၢ “တၢ်လီၢ်ဖဲ ထွံၣ်တဖၣ်လ့ၣ်ကွံာ် စီၤနၤဘိး အသွံၣ်န့ၣ် ထွံၣ်တဖၣ်ကလ့ၣ်ကွံာ် နသွံၣ်လီၤ.”’”+
၂၀ စီၤအၤဃာ် တဲစီၤအ့ၤလံယၤလၢ “ယဒုၣ်ယဒါဧၢ, နထံၣ်ယၤလံမၢၤ.”+ ဒီးစီၤအ့ၤလံယၤ တဲဆၢဝဲလၢ “မ့ၢ်, ယထံၣ်နၤလံ. ကစၢ်ယွၤ တဲဝဲလၢ ‘မ့ၢ်လၢနပာ်လီၤနသး ဂၢၢ်ဂၢၢ်ကျၢၤကျၢၤလၢ နကမၤတၢ်လၢ ယဟိဝၤယွၤ ထံၣ်ဝဲလၢ အအၢအဃိ+
၂၁ ယကဒုးလီၤဘၣ် တၢ်နးတၢ်ဖှီၣ်လၢနလိၤ, ယကခွဲပျီကွံာ် နစၢၤနသွဲၣ် ဒီးယကမၤသံ ပှၤပိာ်ခွါလၢ နဒူၣ်ဖိထၢဖိအကျါ ကိးဂၤဒဲး+ ဃုာ်ဒီး နဒူၣ်ဖိထၢဖိလၢ အပတီၢ်ဖုၣ်ကတၢၢ် ဒီးလၢအဂံၢ်စၢ်တဖၣ် လၢအံၣ်စရ့လးအပူၤလီၤ.+
၂၂ ဒီးမ့ၢ်လၢ နမၤပှံၢ်ထီၣ်ယသး ဒီးဆီၣ်ထွဲ ပှၤအံၣ်စရ့လးဖိ လၢကမၤတၢ်ဒဲးဘး အဃိ ယကမၤ နစၢၤနသွဲၣ် ဒ်ယမၤ စီၤနဘးအဖိခွါ စီၤယၤရၤဘၣ်+ အစၢၤအသွဲၣ် ဒီးစီၤအဃံယၤ အဖိခွါ စီၤဘါၡၤ+ အစၢၤအသွဲၣ် အသိးလီၤ.’
၂၃ ဘၣ်ဃးဒီး နီၢ်အံၤစ့ဘ့ၤလးန့ၣ် ယဟိဝၤယွၤ တဲဝဲလၢ ‘ထွံၣ်တဖၣ် ကအီၣ်ကွံာ် နီၢ်အံၤစ့ဘ့ၤလး လၢဟီၣ်ခိၣ်လီၢ် တကဝီၤလၢ ဝ့ၢ်ယံးစရ့လးအပူၤန့ၣ်လီၤ.+
၂၄ ပှၤတဂၤဂ့ၤ တဂၤဂ့ၤလၢ အဘၣ်ဃးဒီး စီၤအၤဃာ် မ့ၢ်သံလၢဝ့ၢ်ပူၤန့ၣ် ထွံၣ်ကအီၣ် အဝဲသ့ၣ်လီၤ. ဒီးအဝဲသ့ၣ် တဂၤဂ့ၤ တဂၤဂ့ၤ မ့ၢ်သံလၢ ပျီပူၤန့ၣ် ထိၣ်လၢအယူၤလၢ တၢ်ဖးဖီန့ၣ် ကအီၣ်အဝဲသ့ၣ်လီၤ.+
၂၅ နီၢ်ကီၢ်န့ၣ် ပှၤလၢ အပာ်လီၤအသး ဂၢၢ်ဂၢၢ်ကျၢၤကျၢၤ ထဲသိးဒီး စီၤအၤဃာ်လၢ+ အကမၤတၢ်လၢ ယဟိဝၤယွၤ ထံၣ်ဝဲလၢအအၢန့ၣ် တအိၣ်နီတဂၤဒံးဘၣ်. ဒီးအမါ နီၢ်အံၤစ့ဘ့ၤလး ထိၣ်ဟူးထိၣ်ဂဲၤထီၣ် အသးလၢ အကမၤ တၢ်အၢတဖၣ်အံၤလီၤ.+
၂၆ စီၤအၤဃာ် မၤတၢ်လၢ အလီၤသးဘၣ်အၢ ဒိၣ်ကတၢၢ်ခီဖျိ အဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် ဒ်ပှၤအမိၢ်ဖိလၢ ယဟိဝၤယွၤ နီဟးထီၣ်ကွံာ်အီၤလၢ ပှၤအံၣ်စရ့လးဖိ အမဲာ်ညါမၤဝဲအသိးလီၤ.’”+
၂၇ ဖဲစီၤအၤဃာ် နၢ်ဟူတၢ်ကတိၤတဖၣ်န့ၣ်အခါ အဝဲဖှီညာ် အဆ့ကၤ ဒီးကူထီၣ်ကၤထီၣ် ထၢၣ်တၢ်ကံးညာ်လီၤ.* အဝဲဒုၣ်တၢ်အီၣ်, မံနီၤကၤဝဲဒီး ထၢၣ်တၢ်ကံးညာ် ဒီးဟးဝ့ၤဝီၤဝဲလၢ တၢ်သးဟးဂီၤအပူၤလီၤ.
၂၈ ဒီးယဟိဝၤယွၤ တဲဘၣ် ပှၤတံးၡဘးဖိ စီၤအ့ၤလံယၤလၢ
၂၉ “ခီဖျိလၢ ယတၢ်ကတိၤအဃိ စီၤအၤဃာ် ဆီၣ်လီၤအသးထဲလဲၣ်န့ၣ် မ့ၢ်နထံၣ်ဧါ.+ မ့ၢ်လၢ အဆီၣ်လီၤအသးလၢ ယမဲာ်ညါအဃိ ဖဲအအိၣ်မူဒံးအဆၢကတီၢ်န့ၣ် ယတဒုးလီၤ တၢ်နးတၢ်ဖှီၣ် လၢအလိၤဘၣ်. ယကဒုးလီၤ တၢ်နးတၢ်ဖှီၣ်လၢ အစၢၤအသွဲၣ်အလိၤ လၢအဖိခွါအစိၤလီၤ.”+
