၁ စီၤပၤ ၂၂:၁-၅၃
၂၂ လၢစူၤရံ ဒီးအံၣ်စရ့လး အဘၢၣ်စၢၤန့ၣ် တၢ်ဒုးတအိၣ်ဘၣ် သၢနံၣ်ညါလီၤ.
၂ ဒီးဖဲသၢနံၣ်တနံၣ်န့ၣ် ယူဒၤအစီၤပၤယဟိၤၡၤဖး+ လဲၤလီၤဝဲလၢ အံၣ်စရ့လး အစီၤပၤအအိၣ်လီၤ.+
၃ ဒီးအံၣ်စရ့လး အစီၤပၤတဲဘၣ် အခ့အပှၤတဖၣ်လၢ “ဝ့ၢ်ရၤမိးကံးလဧး+ ကဲပတၢ်န့ၣ် သုသ့ၣ်ညါဧါ. ဘၣ်ဆၣ် ပမၤယံာ်မၤနီၢ်ပသးလၢ ပကဟံးန့ၢ်က့ၤအီၤလၢ စူၤရံအစီၤပၤ အစုပူၤလီၤ.”
၄ ဒီးအဝဲသံကွၢ် စီၤယဟိၤၡၤဖးလၢ “နကလဲၤပိာ်ယခံ ဒ်သိးပကလဲၤဒုးတၢ်လၢ ဝ့ၢ်ရၤမိးကံးလဧးဧါ.” စီၤယဟိၤၡၤဖး တဲဆၢ အံၣ်စရ့လး အစီၤပၤလၢ “ယၤဒီးနၤန့ၣ် မ့ၢ်ဒ်သိးသိး, ယပှၤဂီၢ်မုၢ်န့ၣ် မ့ၢ်နပှၤဂီၢ်မုၢ် ဒီးယကသ့ၣ်တဖၣ်န့ၣ် မ့ၢ်နကသ့ၣ်တဖၣ်လီၤ.”+
၅ ဘၣ်ဆၣ် စီၤယဟိၤၡၤဖးတဲဘၣ် အံၣ်စရ့လး အစီၤပၤလၢ “ဝံသးစူၤ သံကွၢ်ဆိ+ ယဟိဝၤယွၤတက့ၢ်.”+
၆ အဃိ အံၣ်စရ့လး အစီၤပၤ ကိးဖှိၣ် ဝံတဖၣ် ဒီးအဝဲသ့ၣ် ကအိၣ်ဝဲ အဂၤ ၄၀၀ ဒီးအံၣ်စရ့လး အစီၤပၤ သံကွၢ်အဝဲသ့ၣ်လၢ “မ့ၢ်ယကဘၣ် လဲၤထီၣ်ဒုး ဝ့ၢ်ရၤမိးကံးလဧးဧါ, တဘၣ်လဲၤဘၣ်ဧါ.” အဝဲသ့ၣ် တဲဝဲလၢ “လဲၤထီၣ်ဟီ, ယဟိဝၤယွၤ ကဟ့ၣ်လီၤဝ့ၢ်လၢ နစုပူၤလီၤ.”
၇ ဒီးစီၤယဟိၤၡၤဖး တဲဝဲလၢ “ဖဲအံၤ ယဟိဝၤယွၤ အဝံတအိၣ်နီတဂၤဧီၤ. ပကသံကွၢ်တၢ်လၢအီၤ စ့ၢ်ကီးမီၤ.”+
၈ ဒီးအံၣ်စရ့လးအစီၤပၤတဲ စီၤယဟိၤၡၤဖးလၢ “ပှၤပိာ်ခွါလၢ ကသံကွၢ်န့ၢ်ပှၤ တၢ်လၢယဟိဝၤယွၤအအိၣ်န့ၣ် အိၣ်တဂၤဒံး.+ ဘၣ်ဆၣ် အဝဲမ့ၢ်တဲတၢ် ဒ်ဝံအသိး လၢအဘၣ်ဃးဒီးယၤန့ၣ် တဂ့ၤနီတဘျီဘၣ်.+ အဝဲတဲဝဲထဲအအၢလီၤ. အဃိ ယသးဟ့အီၤလီၤ.+ အဝဲမ့ၢ် စီၤယံးမလၤ အဖိခွါ စီၤမံၤကါယၤလီၤ.” ဒီးစီၤယဟိၤၡၤဖး တဲအီၤလၢ “စီၤပၤန့ၣ် တကြၢးတဲတၢ် ဒ်န့ၣ်ဘၣ်.”
၉ ဒီးအံၣ်စရ့လး အစီၤပၤကိးန့ၢ်ဝဲ ပဒိၣ်ဖးဒိၣ်တဂၤ ဒီးတဲအီၤလၢ “ဟဲက့ၤကိးန့ၢ်ယၤ စီၤယံးမလၤ အဖိခွါ စီၤမံၤကါယၤ မ့ၢ်ချ့.”+
၁၀ ဒီးအံၣ်စရ့လး အစီၤပၤ ဒီးယူဒၤအစီၤပၤယဟိၤၡၤဖး ကူကၤဝဲ စီၤပၤ အတၢ်ကူတၢ်ကၤတဖၣ် ဒီးအဝဲသ့ၣ် ဆ့ၣ်နီၤလၢ အနီၢ်ကစၢ် အလီၢ်ပစိာ်အဖီခိၣ် ဖဲကြဲၢ်လၢ အအိၣ်ဝဲလၢ ဝ့ၢ်ၡၤမရံ အတြဲၤအကျဲနုာ်လီၤ န့ၣ်လီၤ. ဒီးဝံတဖၣ်န့ၣ် တဲတၢ်ဒ် ဝံအသိး ကိးဂၤဒဲး လၢအဝဲသ့ၣ် အမဲာ်ညါလီၤ.+
၁၁ ဝံၤဒီး စီၤကနၤနါ အဖိခွါ စီၤစံးဒကံယၤ တ့ထီၣ်ဝဲ တၢ်အနၢၤတဖၣ်လၢထး ဒီးတဲဝဲလၢ “ယဟိဝၤယွၤ တဲဝဲဒ်အံၤ, ‘နကဆီၣ်ဖျိးကွံာ် ပှၤစူၤရံဖိလၢ တၢ်အနၢၤတဖၣ်အံၤ တုၤလၢအဝဲသ့ၣ် လီၤမၢ်ကွံာ် ခဲလၢာ်လီၤ.’”
၁၂ ဒီးဝံအဂၤတဖၣ်န့ၣ် တဲတၢ်ဒ်ဝံအသိး တမံၤဃီကိးဂၤဒဲး ဒီးတဲဝဲလၢ “ယဟိဝၤယွၤ ကဟ့ၣ်လီၤ ဝ့ၢ်ရၤမိးကံးလဧး လၢစီၤပၤအစုပူၤလီၤ. အဃိ လဲၤထီၣ်ဒုးန့ၢ် ဝ့ၢ်ရၤမိးကံးလဧးဟီ, နကမၤနၢၤတၢ်လီၤ.”
၁၃ ဒီးပှၤစိာ်တၢ်ကစီၣ်ဖိတဂၤ လၢအလဲၤကိးန့ၢ် စီၤမံၤကါယၤန့ၣ် တဲစီၤမံၤကါယၤလၢ “ဝံတဖၣ် တဲစီၤပၤ တၢ်လၢအဂ့ၤတခီ ကိးဂၤဒဲးလီၤ. ဝံသးစူၤ တၢ်လၢနကတဲသ့ၣ်တဖၣ်န့ၣ် မ်အကလီၤဂာ် ဒ်တၢ်လၢအဝဲသ့ၣ် တဲပာ်စၢၤတဖၣ် ဒီးမ်နကတဲ တၢ်လၢအဂ့ၤတခီတက့ၢ်.”+
၁၄ ဘၣ်ဆၣ် စီၤမံၤကါယၤ တဲဝဲလၢ “ယအၢၣ်လီၤတၢ်လၢ ယဟိဝၤယွၤ အမဲာ်ညါလၢ တၢ်တမံၤဂ့ၤတမံၤဂ့ၤလၢ ယဟိဝၤယွၤ တဲယၤန့ၣ် ယကတဲလီၤ.”
၁၅ ဒီးစီၤမံၤကါယၤ ဟဲနုာ်လၢ စီၤပၤအအိၣ် ဒီးစီၤပၤသံကွၢ်အီၤလၢ “စီၤမံၤကါယၤဧၢ, မ့ၢ်ပကဘၣ် လဲၤထီၣ်ဒုး ဝ့ၢ်ရၤမိးကံးလဧးဧါ, တဘၣ်လဲၤဘၣ်ဧါ.” တဘျီဃီန့ၣ် စီၤမံၤကါယၤ တဲဆၢက့ၤဝဲလၢ “ယဟိဝၤယွၤ ကဟ့ၣ်လီၤ ဝ့ၢ်ရၤမိးကံးလဧး လၢစီၤပၤအစုပူၤလီၤ. အဃိ လဲၤထီၣ်ဟီ, နကမၤနၢၤတၢ်လီၤ.”
၁၆ ဒီးစီၤပၤ တဲအီၤလၢ “ဒ်သိး နကတဲယၤ ထဲတၢ်မ့ၢ်တၢ်တီလၢ ယဟိဝၤယွၤ အမံၤပူၤအဂီၢ် ယကဘၣ်မၢ နအၢၣ်လီၤဆိတၢ် ပှဲၤဘျီလဲၣ်.”
၁၇ အဃိ စီၤမံၤကါယၤ တဲဝဲလၢ “ယထံၣ်လၢ ပှၤအံၣ်စရ့လးဖိခဲလၢာ် လီၤမုၢ်ပြံပြါ လၢကစၢၢ်ကလိကျါ+ ဒ်သိလၢ ပှၤကွၢ်ထွဲအီၤ တအိၣ်ဘၣ်အသိးလီၤ. ဒီးယဟိဝၤယွၤ တဲဝဲလၢ ‘ပှၤသ့ၣ်တဖၣ်အံၤ အကစၢ်တအိၣ်ဘၣ်. မ်အဝဲသ့ၣ်တဂၤစုာ်စုာ် က့ၤကဒါက့ၤလၢ အဟံၣ်မုာ်မုာ်တက့ၢ်.’”
၁၈ ဒီးအံၣ်စရ့လး အစီၤပၤတဲဘၣ် စီၤယဟိၤၡၤဖးလၢ “ယတဲနၤလံတမ့ၢ်ဧီၤ, ‘အဝဲမ့ၢ်တဲတၢ်ဒ် ဝံအသိး လၢအဘၣ်ဃးဒီးယၤန့ၣ် အတတဲဝဲ လၢအဂ့ၤဘၣ်. အဝဲတဲဝဲထဲ အအၢလီၤ.’”+
၁၉ ဝံၤဒီးစီၤမံၤကါယၤ တဲဝဲလၢ “ခဲအံၤန့ၣ် ဒိကနၣ်တၢ်လၢ ယဟိဝၤယွၤ တဲဝဲန့ၣ်တက့ၢ်. ယထံၣ်တ့ၢ် ယဟိဝၤယွၤ ဆ့ၣ်နီၤလၢ အလီၢ်ပစိာ်အဖီခိၣ်+ ဒီးမူခိၣ်အသုးမုၢ်ခဲလၢာ် ဆၢထၢၣ်ဘူးဒီးအီၤလၢ အစ့ၣ် ဒီးလၢအထွဲလီၤ.+
၂၀ ဒီးယဟိဝၤယွၤ တဲဝဲလၢ ‘မတဂၤကလဲၤ ကွဲန့ၢ်လွဲန့ၢ် စီၤအၤဃာ် ဒ်သိးအဝဲကလဲၤထီၣ်ဒုးတၢ်လၢ ဝ့ၢ်ရၤမိးကံးလဧး ဒီးသံဖဲန့ၣ်လဲၣ်.’ ဒီးမူခိၣ်ကလူးတဂၤ တဲဝဲတမံၤ ဒီးလၢအဝဲတဂၤ တဲဝဲလၢ အဂၤတမံၤလီၤ.
၂၁ ဒီးမူခိၣ်ကလူး*+ တဂၤ ဟဲဆၢထၢၣ်လၢ ယဟိဝၤယွၤ အမဲာ်ညါ ဒီးတဲဝဲလၢ ‘ယကလဲၤ ကွဲန့ၢ်လွဲန့ၢ်အီၤ.’ ဒီးယဟိဝၤယွၤ သံကွၢ်အီၤလၢ ‘နကကွဲန့ၢ်လွဲန့ၢ် အီၤဒ်လဲၣ်.’
၂၂ မူခိၣ်ကလူးတဂၤန့ၣ် တဲဆၢဝဲလၢ ‘ယကလဲၤမၤဒ်သိး စီၤအၤဃာ် အဝံ ကိးဂၤဒဲး ကတဲလံၣ်တဲလီတၢ် အဂီၢ်လီၤ.’+ အဃိ ကစၢ်ယွၤ တဲဝဲလၢ ‘နကကွဲန့ၢ်လွဲန့ၢ်အီၤ ဒီးတကးဒံးဘၣ်န့ၣ် နကမၤနၢၤတၢ်လီၤ. အဃိ လဲၤမၤဒ်န့ၣ် အသိးတက့ၢ်.’
၂၃ လၢတၢ်န့ၣ်အဃိ ခဲအံၤန့ၣ် ယဟိဝၤယွၤ မၤဒ်သိးနဝံတဖၣ်အံၤ ကတဲလံၣ်တဲလီတၢ် ကိးဂၤဒဲးလံ.+ ဒီးအနီၢ်ကီၢ်န့ၣ် ယဟိဝၤယွၤ တဲဝဲလၢ နကထံၣ်ဘၣ် တၢ်နးတၢ်ဖှီၣ်လီၤ.”+
၂၄ ဒီးစီၤကနၤနါ အဖိခွါ စီၤစံးဒကံယၤ လဲၤဃီၤလၢ စီၤမံၤကါယၤအအိၣ် ဒီးဒဲအမဲာ်သၣ် ဒီးတဲဝဲလၢ “မ့မ့ၢ်ဒ်န့ၣ်န့ၣ် ယဟိဝၤယွၤ အသးစီဆှံ ဟးထီၣ်လၢ ယအိၣ် ဒီးလဲၤလၢနအိၣ် ဒ်သိးအကတဲတၢ်ဒီးနၤ အဂီၢ်လီၤဧါ. အလဲၤကျဲ ဖဲလဲၣ်တဘိလဲၣ်.”+
၂၅ စီၤမံၤကါယၤ တဲဆၢဝဲလၢ “အလဲၤကျဲ ဖဲလဲၣ်တဘိလဲၣ်န့ၣ် နကသ့ၣ်ညါဘၣ် ဖဲမုၢ်နံၤလၢ နလဲၤနုာ်အိၣ်ခူသူၣ်လၢ ဒၢးလၢတၢ်လီၢ်ခံတဖျၢၣ်အပူၤ အခါန့ၣ်လီၤ.”
၂၆ ဝံၤဒီး အံၣ်စရ့လး အစီၤပၤတဲဝဲလၢ “လဲၤကိးစီၤမံၤကါယၤ ဒီးလဲၤဟ့ၣ်လီၤအီၤလၢ ဝ့ၢ်အပဒိၣ်ဖးဒိၣ် စီၤအၤမိၣ် ဒီးစီၤပၤအဖိခွါ စီၤယိးအၣ် အအိၣ်တက့ၢ်.
၂၇ တဲဘၣ်အဝဲသ့ၣ်လၢ ‘စီၤပၤတဲဝဲဒ်အံၤ, “ပၢနုာ်ပှၤတဂၤအံၤလၢ ဃိာ်ပူၤ+ ဒီးဒုးအီၣ်ဒုးအီအီၤလၢ ကိၣ်ဒီးထံ ထဲတစဲးဖိ တုၤလၢယဟဲက့ၤကဒါ မုာ်မုာ်တက့ၢ်.”’”
၂၈ ဘၣ်ဆၣ် စီၤမံၤကါယၤ တဲဝဲလၢ “နမ့ၢ်ဟဲက့ၤမုာ်မုာ်န့ၣ် အခီပညီမ့ၢ်ဝဲဒၣ် ယဟိဝၤယွၤ တတဲတၢ် ခီဖျိယၤဘၣ်.”+ ဒီးအဝဲဆဲးတဲဝဲလၢ “သုဝဲကိးဂၤဒဲး, ပာ်သူၣ်ပာ်သးနီၤ.”
၂၉ အဃိ အံၣ်စရ့လး အစီၤပၤ ဒီးယူဒၤ အစီၤပၤယဟိၤၡၤဖး လဲၤထီၣ်လၢ ဝ့ၢ်ရၤမိးကံးလဧးလီၤ.+
၃၀ အံၣ်စရ့လး အစီၤပၤ တဲဘၣ် စီၤယဟိၤၡၤဖးလၢ “ယကမၤလီၤဆီထီၣ်ယသး ဒီးလဲၤလၢ တၢ်ဒုးပျီအပူၤလီၤ. မ့မ့ၢ်နၤန့ၣ် နကဘၣ်ကၤထီၣ် စီၤပၤ အတၢ်ကူတၢ်ကၤလီၤ.” အဃိ အံၣ်စရ့လး အစီၤပၤ မၤလီၤဆီထီၣ်အသး+ ဒီးလဲၤလၢ တၢ်ဒုးပျီပူၤလီၤ.
၃၁ ဒီးစူၤရံအစီၤပၤ မၤလိာ်ပာ်စၢၤ လ့ၣ်ကဟၣ် အသုးခိၣ် ၃၂ ဂၤလၢ+ “ပှၤအဒိၣ်မ့ၢ်ဂ့ၤ အဆံးမ့ၢ်ဂ့ၤ တဘၣ်ဒုးနီတဂၤတဂ့ၤ. ဒုးထဲအံၣ်စရ့လး အစီၤပၤတဂၤတက့ၢ်.”
၃၂ ဒီးဖဲလ့ၣ်ကဟၣ် အသုးခိၣ်တဖၣ် ထံၣ်ဝဲ စီၤယဟိၤၡၤဖးအခါ အဝဲသ့ၣ် တဲလီၤအသးလၢ “ပှၤတဂၤအံၤ ကဘၣ်မ့ၢ်အံၣ်စရ့လး အစီၤပၤလီၤ.” အဃိအဝဲသ့ၣ် လဲၤဒုးအီၤ ဒီးစီၤယဟိၤၡၤဖး ကိးပသူထီၣ်လၢ တၢ်မၤစၢၤအဂီၢ်လီၤ.
၃၃ ဒီးဖဲလ့ၣ်ကဟၣ် အသုးခိၣ်တဖၣ် ထံၣ်ဘၣ်ဝဲလၢ အတမ့ၢ် အံၣ်စရ့လး အစီၤပၤဘၣ်အခါ အဝဲသ့ၣ် တလူၤစီၤပၤ ယဟိၤၡၤဖးလၢၤဘၣ်.
၃၄ ဘၣ်ဆၣ် ပှၤတဂၤခးပျၢ်တဘိ ဒီးပျၢ်တဘိန့ၣ် လဲၤဘၣ် အံၣ်စရ့လး အစီၤပၤ ဖဲအဆ့ကၤထး အသဘျံးတဖၣ် အကဆူးလီၤ. အဃိ စီၤပၤတဲဘၣ် ပှၤလၢအနီအလ့ၣ်ကဟၣ်တဂၤလၢ “ယဘၣ်ဒိဖးနးလံ. ဃၣ်ကွံာ်လ့ၣ်ကဟၣ် ဒီးဒုးဟးထီၣ်ယၤလၢ တၢ်ဒုးပျီပူၤတက့ၢ်.”+
၃၅ ဖဲတၢ်တနံၤန့ၣ် တၢ်ဒုးဆူၣ်ဒိၣ်မး ဒီးပှၤပိာ်ဆၢထၢၣ် စီၤပၤလၢ လ့ၣ်ကဟၣ်အပူၤ ဒီးအမဲာ်ဃၣ်ဃီၤအသးလၢ ပှၤစူၤရံဖိ အအိၣ်တခီလီၤ. စီၤပၤအတၢ်ပူၤလီၢ်န့ၣ် အသွံၣ်ယွၤလီၤဝဲ လၢလ့ၣ်ကဟၣ်သုးအပူၤ ဒီးလၢဟါလီၤခီန့ၣ် အဝဲသံဝဲလီၤ.+
၃၆ ဖဲမုၢ်လီၤနုာ်အဆၢကတီၢ်န့ၣ် ပှၤကိးပသူထီၣ်လၢ ဒဲကဝီၤဒီတဘ့ၣ်ညါ ဒီးတဲလၢ “က့ၤကဒါက့ၤလၢ သုဝ့ၢ်ကိးဂၤဒဲး ဒီးက့ၤကဒါက့ၤလၢ သုတၢ်လီၢ် ကိးဂၤဒဲးတက့ၢ်.”+
၃၇ ဒီးစီၤပၤသံဝဲဒ်န့ၣ်လီၤ. ဒီးပှၤဟဲက့ၤစိာ် စီၤပၤလၢ ဝ့ၢ်ၡၤမရံအပူၤဒီး ပှၤခူၣ်လီၤအီၤဖဲန့ၣ်လီၤ.
၃၈ ဖဲအဝဲသ့ၣ် သ့စီကွံာ် လ့ၣ်ကဟၣ်လၢ ဝ့ၢ်ၡၤမရံ အကမါအဃၢၤအခါ ဒ်ယဟိဝၤယွၤ တဲပာ်စၢၤဝဲအသိး ထွံၣ်တဖၣ် လ့ၣ်ကွံာ်ဝဲ စီၤအၤဃာ် အသွံၣ် ဒီးပိာ်မုၣ်ဆါလီၤအီၣ်သးတဖၣ်* လုၢ်ထံဖဲန့ၣ်လီၤ.*+
၃၉ ဒီးမ့မ့ၢ် စီၤအၤဃာ် အဂ့ၢ်လၢအဂၤတဖၣ်, တၢ်လၢအမၤဝဲခဲလၢာ်, ဟံၣ်လၢအတ့ထီၣ်ဝဲလၢ ကဆီမဲ+ ဒီးဝ့ၢ်လၢ အတ့ထီၣ်ဝဲခဲလၢာ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လးအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၄၀ ဒီးစီၤအၤဃာ် သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး+ ဒီးအဖိခွါ စီၤအဃၤစယၤ+ ကဲထီၣ်စီၤပၤလၢ အလီၢ်လီၤ.
၄၁ ဖဲအံၣ်စရ့လး အစီၤပၤအၤဃာ် ပၢတၢ်လွံၢ်နံၣ်တနံၣ်န့ၣ် စီၤအၤစါ အဖိခွါ စီၤယဟိၤၡၤဖး+ ကဲထီၣ်ဝဲစီၤပၤလၢ ယူဒၤအဖီခိၣ်လီၤ.
၄၂ ဖဲစီၤယဟိၤၡၤဖး ကဲထီၣ်စီၤပၤအခါ အသးနံၣ်အိၣ်ဝဲ ၃၅ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၂၅ နံၣ်လီၤ. စီၤယဟိၤၡဖး အမိၢ်အမံၤမ့ၢ်ဝဲ နီၢ်ဧစူဘၤ လၢအမ့ၢ် စီၤၡံးလဃံ အဖိမုၣ်န့ၣ်လီၤ.
၄၃ စီၤယဟိၤၡၤဖး အိၣ်မူမၤထွဲဝဲဒ် အပၢ်စီၤအၤစါ+ အသိးထီဘိလီၤ. ဒီးအဝဲတဃၣ်ကွံာ်အသးလၢ အပၢ်အကျဲဘၣ် ဒီးအဝဲမၤတၢ်လၢ ယဟိဝၤယွၤ ထံၣ်ဝဲလၢအဂ့ၤန့ၣ်လီၤ.+ ဘၣ်ဆၣ် မ့မ့ၢ်တၢ်လီၢ်ထီၣ်ထီတဖၣ်န့ၣ် တဘၣ် တၢ်မၤဟးဂီၤကွံာ်အီၤဒံးဘၣ် ဒီးပှၤဂီၢ်မုၢ်တဖၣ် ဆဲးလုၢ်ထီၣ်ဒံးတၢ် ဒီးဒွဲၣ်ခုၣ်ထီၣ် တၢ်လုၢ်လၢ တၢ်လီၢ်ထီၣ်ထီတဖၣ် အဖီခိၣ်ဒံးလီၤ.+
၄၄ စီၤယဟိၤၡၤဖး ဆဲးပၢၤဃာ် တၢ်ဃူတၢ်ဖိးဒီး အံၣ်စရ့လး အစီၤပၤလီၤ.+
၄၅ မ့မ့ၢ် စီၤယဟိၤၡၤဖး အဂ့ၢ်လၢအဂၤတဖၣ်, အတၢ်မၤလၢ အဒိၣ်အမုၢ်တဖၣ်အဂ့ၢ် ဒီးအဒုးတၢ် ဒ်လဲၣ်အဂ့ၢ်န့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၄၆ ဒီးပိာ်ခွါခဲလၢာ်လၢ အဆါလီၤအီၣ်သးလၢ+ တၢ်ဘူၣ်ထီၣ်ဘါထီၣ်အလီၢ် လၢအပၢ်စီၤအၤစါအစိၤ လၢအအိၣ်တ့ၢ်ဒံးလၢ ကီၢ်ပူၤန့ၣ် စီၤယဟိၤၡၤဖး မၤလီၤမၢ်ကွံာ်ဝဲခဲလၢာ်လီၤ.+
၄၇ ဖဲန့ၣ်အခါ လၢကီၢ်အဒိၣ်အပူၤန့ၣ်+ စီၤပၤတအိၣ်ဘၣ် ဘၣ်ဆၣ် အိၣ်ဒီးပဒိၣ်ဖးဒိၣ်တဂၤလၢ အမၤတၢ်ဒ် စီၤပၤအသိးလီၤ.+
၄၈ စီၤယဟိၤၡၤဖး တ့ထီၣ်စ့ၢ်ကီးဝဲ ကဘီတၢ်ၡံၣ်တဖၣ်* ဒ်သိးကလဲၤမၤန့ၢ်ထူလၢ ကီၢ်အိဖ့ၢ်အဂီၢ်လီၤ.+ ဘၣ်ဆၣ် ခီဖျိလၢ ကဘီတဖၣ် ဟးဂီၤဖဲ ဧ့စယိၣ်က့းဘ့ၢ်အဃိ ကဘီတဖၣ် တလဲၤလၢၤဘၣ်.+
၄၉ ဒီးစီၤအၤဃာ် အဖိခွါ စီၤအဃၤစယၤ တဲဘၣ် စီၤယဟိၤၡၤဖးလၢ “ပျဲယခ့ယပှၤတဖၣ် လဲၤဒီးနခ့နပှၤတဖၣ်လၢ ကဘီတဖၣ်အပူၤမီၤ.” ဘၣ်ဆၣ် စီၤယဟိၤၡၤဖး တဟ့ၣ်အခွဲးဘၣ်.
၅၀ လၢခံ စီၤယဟိၤၡၤဖး သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး+ ဒီးဘၣ်တၢ်ခူၣ်လီၤကွံာ်အီၤ တပူၤဃီဒီး အမိၢ်ပၢ်ဖံဖု လၢပျၢၤတဖၣ်လၢ အဖုဖးဒိၣ် စီၤဒၤဝံး အဝ့ၢ်ပူၤလီၤ. ဒီးအဖိခွါ စီၤယဟိရၣ်+ ကဲထီၣ်စီၤပၤလၢ အလီၢ်လီၤ.
၅၁ ဖဲယူဒၤ အစီၤပၤယဟိၤၡၤဖး ပၢတၢ် ၁၇ နံၣ်တနံၣ်န့ၣ် စီၤအၤဃာ် အဖိခွါ စီၤအဃၤစယၤ+ ကဲထီၣ်စီၤပၤလၢ အံၣ်စရ့လးအဖီခိၣ် လၢဝ့ၢ်ၡၤမရံအပူၤ ဒီးအဝဲပၢဘၣ်ဝဲ အံၣ်စရ့လး ခံနံၣ်လီၤ.
၅၂ ဒီးတၢ်လၢ ယဟိဝၤယွၤ ထံၣ်ဝဲလၢအအၢန့ၣ် စီၤအဃၤစယၤ မၤဝဲတလီၢ်လီၢ် ဒီးအဝဲအိၣ်မူ မၤထွဲဝဲဒ်သိးအမိၢ်+ ဒီးအပၢ်+ ဒီးစီၤနဘး အဖိခွါ စီၤယၤရၤဘၣ် လၢအဆီၣ်ထွဲ အံၣ်စရ့လးလၢ ကမၤတၢ်ဒဲးဘးန့ၣ်လီၤ.+
၅၃ အဝဲဆဲး ဘူၣ်ထီၣ်ဘါထီၣ် ဘဧၤလး+ ဒီးမၤဆါ အံၣ်စရ့လး အကစၢ် ယဟိဝၤယွၤအသး+ ဒ်အပၢ်မၤတ့ၢ်ဝဲအသိးလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ပှၤနီၢ်သးဖိ.”
^ မ့ၢ်ဝဲ ဃဲသဲမုၣ်တဖၣ်.
^ ဘၣ်သ့ၣ်သ့ၣ် ကမ့ၢ် “ထွံၣ်တဖၣ်န့ၣ် လ့ၣ်ထီၣ်ဝဲ စီၤအၤဃာ်အသွံၣ် ဖဲပိာ်မုၣ်ဆါလီၤအီၣ်သးတဖၣ် လုၢ်ထံအလီၢ်.”
^ ကွၢ် တၢ်ကတိၤအခီပညီ.
