၁ တံၤမသ့း ၅:၁-၂၅
၅ တဘၣ်ဒူ ပိာ်ခွါလၢအသးပှၢ်တဂ့ၤ.+ လၢတၢ်န့ၣ်အလီၢ် တဲတၢ်ဒီးအီၤဒ် နတဲတၢ်ဒီး နပၢ်အသိး ဒီးပိာ်ခွါလၢအသးစၢ်တဖၣ်န့ၣ် တဲတၢ်ဒီးအီၤဒ် နတဲတၢ်ဒီး နဒီပုၢ်ဝဲၢ်ခွါတဖၣ်အသိး တက့ၢ်.
၂ ဒီးပိာ်မုၣ်လၢအသးပှၢ်တဖၣ်န့ၣ် တဲတၢ်ဒီးအီၤဒ် နတဲတၢ်ဒီး နမိၢ်အသိး ဒီးပိာ်မုၣ်သးစၢ်တဖၣ်န့ၣ် တဲတၢ်ဒီးအီၤဒ် နတဲတၢ်ဒီး နဒီပုၢ်ဝဲၢ်မုၣ်တဖၣ်အသိး လၢတၢ်သးကဆှီ အပူၤတက့ၢ်.
၃ ဆိကမိၣ်န့ၢ်တၢ်* လၢပိာ်မုၣ်လၢ အမ့ၢ်မုၣ်ကမဲအနီၢ်ကီၢ်တဖၣ်*+ အဂီၢ်န့ၣ်တက့ၢ်.
၄ ဘၣ်ဆၣ် မုၣ်ကမဲလၢ အအိၣ်ဒီး အဖိ မ့တမ့ၢ် အလံၤတဖၣ်န့ၣ် မ်အဖိဒီးအလံၤတဖၣ် ပာ်ဖျါထီၣ်ဆိ တၢ်သးတီဒီးကစၢ်ယွၤ လၢအနီၢ်ကစၢ်ဟံၣ်ပူၤဃီပူၤ+ ဒီးဟ့ၣ်ဆၢက့ၤ မိၢ်ပၢ်ဒီးဖံဖုတဖၣ် ဒ်တၢ်လၢအဝဲသ့ၣ် ကြၢးဒိးန့ၢ်ဘၣ်ဝဲ+ အသိးန့ၣ်တက့ၢ်. အဝဲအံၤမ့ၢ်ဝဲ တၢ်ဘၣ်ကစၢ်ယွၤအသးလီၤ.+
၅ ပိာ်မုၣ်တဖၣ်လၢ အကဲမုၣ်ကမဲ အနီၢ်ကီၢ်လၢ အတၢ်တအိၣ် နီတမံၤဘၣ်န့ၣ် မုၢ်လၢ်တၢ်လၢ ကစၢ်ယွၤအအိၣ်+ ဒီးဆဲးဃ့ကညးတၢ် ဒီးဃ့ထုကဖၣ်တၢ်လၢ မုၢ်နၤဒီးလၢမုၢ်ဆါလီၤ.+
၆ မ့မ့ၢ် မုၣ်ကမဲလၢ အအိၣ်မူဝဲထဲလၢ တၢ်မုာ်တၢ်ပၠီၣ်အဂီၢ်န့ၣ် မူဝဲဘၣ်ဆၣ် သံဝဲလၢ နီၢ်သးတခီလံ.
၇ အဃိ ဒ်သိးတၢ်ပာ်ဒ့ၣ်ပာ်ကမၣ် အဝဲသ့ၣ်အလီၢ် သုတအိၣ်တဂ့ၤအဂီၢ်န့ၣ် ဆဲးဟ့ၣ်လီၤ တၢ်ဟံးစုနဲၣ်ကျဲတဖၣ်အံၤတက့ၢ်.
၈ ပှၤတဂၤဂၤ မ့ၢ်တအံးထွဲကွၢ်ထွဲ ပှၤလၢ အဘၣ်ဃးဒီးအီၤတဖၣ် လီၤဆီဒၣ်တၢ် အဟံၣ်ဖိဃီဖိန့ၣ် မ့ၢ်အဂ့ၢ်လိာ်ကွံာ် တၢ်စူၢ်တၢ်နာ်ဒီး အအၢန့ၢ်ဒံး ပှၤလၢ အတၢ်နာ်တအိၣ်ဘၣ်လီၤ.+
၉ မုၣ်ကမဲလၢ အသးနံၣ်အိၣ် ၆၀ ဆူအဖီခိၣ်န့ၣ် ကဘၣ်တၢ်ဖၢနုာ်လီၤအမံၤလၢ စရီအပူၤလီၤ. ဘၣ်ဆၣ် အဝဲကဘၣ်မ့ၢ် ပှၤလၢအတီတ့ၢ်ဒီးအဝၤ*
၁၀ ဒီးအကဘၣ်အိၣ်ဒီး မံၤဂ့ၤသၣ်ဂ့ၤလၢ အမၤတၢ်မၤလၢအဂ့ၤ+ ဒ်သိးဒီး အကွၢ်လုၢ်ဒိၣ်ထီၣ် အဖိတဖၣ်,+ အပာ်ဖျါထီၣ် တၢ်သးအိၣ်တူၢ်လိာ် ပှၤတမှံၤ,+ အသ့န့ၢ် ပှၤစီဆှံတဖၣ်အခီၣ်,+ အမၤစၢၤပှၤလၢ အဘၣ်ကီဘၣ်ခဲတဖၣ်+ ဒီးအဟ့ၣ်လီၤအသးလၢ တၢ်မၤဂ့ၤခဲလၢာ်အဂီၢ်လီၤ.
၁၁ မ့မ့ၢ် မုၣ်ကမဲလၢ အသးစၢ်တဖၣ်န့ၣ် တဘၣ်ဖၢနုာ်အဝဲသ့ၣ်အမံၤလၢ စရီအံၤအပူၤတဂ့ၤ, မ့ၢ်လၢ ဖဲအဝဲသ့ၣ်အတၢ်သူၣ်လီသးကွံ ဘၣ်ဃးဒီးတၢ်မံဃုာ်န့ၣ် မၤတံာ်တာ်အဝဲသ့ၣ်လၢ ကမၤခရံာ်အတၢ်မၤအခါ အဝဲသ့ၣ်ကအဲၣ်ဒိး ဆီဟံၣ်ဆီဃီလီၤ.
၁၂ ဒီးအဝဲသ့ၣ် ကဘၣ် တၢ်စံၣ်ညီၣ် မ့ၢ်လၢ အဝဲသ့ၣ်တတီဒီး အတၢ်အၢၣ်လီၤလၢ အအၢၣ်လီၤဝဲလၢညါဘၣ် အဃိလီၤ.
၁၃ တကးဒံးဘၣ် ဘၣ်သ့ၣ်သ့ၣ် အဝဲသ့ၣ် ကမၤလိထီၣ်အသးလၢ ပှၤကၢၣ်အလုၢ်အလၢ် ဒီးကဟးဝ့ၤဝီၤဝဲလၢ တဟံၣ်ဘၣ်တဟံၣ်လီၤ. အဃိ တမ့ၢ်ထဲလၢ အဝဲသ့ၣ် ကကဲထီၣ်ပှၤကၢၣ်ဘၣ်, အဝဲသ့ၣ် ကကဲထီၣ်စ့ၢ်ကီး ပှၤလၢအဟးတဲအီၣ်ပှၤဂ့ၢ်, ဟးမၤဘၣ်ထွဲလိာ်အသးဒီး ပှၤဂၤအဂ့ၢ်+ ဒီးတဲတၢ်လၢ အတကြၢးတဲဝဲဘၣ်တဖၣ်လီၤ.
၁၄ အဃိ ယအဲၣ်ဒိးလၢ မုၣ်ကမဲလၢ အသးစၢ်တဖၣ်န့ၣ် ကဆီဟံၣ်ဆီဃီ,+ ကဟံးအဖိ+ ဒီးကွၢ်ထွဲ အဟံၣ်ဖိဃီဖိ ဒ်သိးအသုတဟ့ၣ် တၢ်ခွဲးတၢ်ယာ်လၢ ပှၤလၢအထီဒါတၢ် ကဒုၣ်ဒွဲၣ်တၢ်တဂ့ၤအဂီၢ်လီၤ.
၁၅ နီၢ်ကီၢ်န့ၣ် အဝဲသ့ၣ်တနီၤနီၤ ဃၣ်ကွံာ်အသး ဒီးပိာ်ထီၣ် မုၣ်ကီၤလံၢ်* အခံလံ.
၁၆ ပိာ်မုၣ်လၢ အစူၢ်က့ၤနာ်က့ၤတၢ်တဂၤ အဘူးအတံၢ်လၢ အကဲမုၣ်ကမဲမ့ၢ်အိၣ်န့ၣ် မ်အမၤစၢၤအဝဲသ့ၣ် ဒ်သိးအဝဲသ့ၣ် သုတကဲထီၣ် တၢ်ဝံဃၢလၢ တၢ်အိၣ်ဖှိၣ်အဂီၢ်တဂ့ၤ န့ၣ်တက့ၢ်. အမ့ၢ်မၤဝဲဒ်န့ၣ်န့ၣ် တၢ်အိၣ်ဖှိၣ်မၤစၢၤဝဲ ပိာ်မုၣ်လၢအမ့ၢ် မုၣ်ကမဲအနီၢ်ကီၢ်တဖၣ်*+ ကသ့ဝဲလီၤ.
၁၇ တၢ်အိၣ်ဖှိၣ်သးပှၢ်တဖၣ် တီခိၣ်ရိၤမဲတၢ် ဂ့ၤဂ့ၤအဃိ+ ပှၤကြၢးပာ်ကဲအဝဲသ့ၣ်ခံစး+ လီၤဆီဒၣ်တၢ် တၢ်အိၣ်ဖှိၣ်သးပှၢ်လၢ အဂုာ်ကျဲးစၢးလၢ တၢ်စံၣ်တဲၤတဲလီၤတၢ်* ဒီးတၢ်သိၣ်လိနဲၣ်လိတၢ် န့ၣ်တက့ၢ်.+
၁၈ တၢ်ကွဲးအသးအိၣ်ဝဲလၢ “ဖဲကျီၢ်ဖါ ယီၢ်ဘုအခါ နတဘၣ်ဖျီၣ်ဃာ် အကိာ်ပူၤတဂ့ၤ.”+ ဒီးတၢ်ကွဲးအသး အိၣ်စ့ၢ်ကီးလၢ “ပှၤမၤတၢ်ဖိန့ၣ် ကြၢးန့ၢ်ဘၣ် အဘူးအလဲလီၤ.”+
၁၉ တၢ်ပာ်ဒ့ၣ်ပာ်ကမၣ်လၢ တၢ်အိၣ်ဖှိၣ်သးပှၢ် တဂၤဂၤအလိၤ မ့ၢ်အိၣ်တမံၤမံၤ ဘၣ်ဆၣ် ပှၤအုၣ်အသးခံဂၤ သၢဂၤ+ မ့ၢ်တအိၣ်ဘၣ်ဒီး တဘၣ်တူၢ်လိာ်အီၤတဂ့ၤ.
၂၀ ပှၤလၢအဆဲးမၤတၢ်ဒဲးဘးန့ၣ်+ သိၣ်ဃီၣ်အီၤလၢ+ ပှၤခဲလၢာ် အမဲာ်ညါ ဒ်သိးကကဲထီၣ် တၢ်ဟ့ၣ်ပလီၢ်လၢ ပှၤအဂၤတဖၣ်အဂီၢ်တက့ၢ်.
၂၁ လၢကစၢ်ယွၤ, ယ့ၣ်ၡူးခရံာ် ဒီးမူခိၣ်ကလူးလၢ အဘၣ်တၢ်ဃုထၢအီၤတဖၣ် အမဲာ်ညါန့ၣ် ယမၤလိာ်နၤသပှၢ်တၢၢ်လၢ နကမၤထွဲ တၢ်ဟံးစုနဲၣ်ကျဲတဖၣ်အံၤ ဒီးတဘၣ် စံၣ်ညီၣ်ဆိပာ်စၢၤတၢ် ဒီးကွၢ်ဒိၣ်ဆံးအါစှၤတၢ်တဂ့ၤ.+
၂၂ တဘၣ်ပာ်ထီၣ် နစုချ့ချ့လၢ ပိာ်ခွါအလိၤ နီတဂၤတဂ့ၤ.*+ ဒီးတဘၣ် ပၣ်ဃုာ်လၢ ပှၤဂၤ အတၢ်ဒဲးဘးအကျါတဂ့ၤ. အိၣ်စီဆှံ ထီဘိတက့ၢ်.
၂၃ တဘၣ်အီထံလၢၤတဂ့ၤ.* လၢနကဖုအဂီၢ် ဒီးလၢနဆိးက့ တလီၢ်လီၢ်အဃိ အီစပံးထံတစဲးဖိတက့ၢ်.
၂၄ ပှၤတနီၤနီၤန့ၣ် အတၢ်ဒဲးဘး အိၣ်ဖျါထီၣ်ဝဲ ပျီပျီအဃိ ဘၣ်တၢ်စံၣ်ညီၣ် အဝဲသ့ၣ် တဘျီဃီလီၤ. မ့မ့ၢ် ပှၤအဂၤတနီၤနီၤန့ၣ် အတၢ်ဒဲးဘး ကအိၣ်ဖျါထီၣ်လၢ ခါဆူညါလီၤ.+
၂၅ ဒ်န့ၣ်အသိး တၢ်မၤလၢအဂ့ၤတဖၣ်န့ၣ် အိၣ်ဖျါထီၣ်ဝဲပျီပျီ+ ဒီးတၢ်လၢ အတအိၣ်ဖျါထီၣ် ပျီပျီဘၣ်တဖၣ်န့ၣ် တၢ်ပာ်ခူသူၣ်အီၤ ယံာ်ယံာ်တသ့ဘၣ်.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “မၤလၤကပီၤ.”
^ မ့ၢ်စ့ၢ်ကီး “မုၣ်ကမဲလၢအလိၣ်ဘၣ် တၢ်မၤစၢၤနီၢ်ကီၢ်” လၢပှၤမၤစၢၤအဝဲသ့ၣ် တအိၣ်နီတဂၤဘၣ်.
^ အခီပညီလိၤလိၤ “အဝၤအိၣ်ထဲတဂၤ.”
^ အခီပညီလိၤလိၤ “စၤတၣ်.” မံၤအံၤအခီပညီမ့ၢ်ဝဲ “ပှၤလၢအထီဒါတၢ်.”
^ မ့ၢ်စ့ၢ်ကီး “မုၣ်ကမဲလၢအလိၣ်ဘၣ် တၢ်မၤစၢၤနီၢ်ကီၢ်” လၢပှၤမၤစၢၤအဝဲသ့ၣ် တအိၣ်နီတဂၤဘၣ်.
^ အခီပညီလိၤလိၤ “တဲတၢ်.”
^ မ့ၢ်ဝဲ တဘၣ်ပာ်ထီၣ် ပိာ်ခွါတဂၤဂၤလၢ မူဒါအဂီၢ် ချ့ချ့တဂ့ၤ.
^ မ့ၢ်စ့ၢ်ကီး “အီထဲထံလၢၤတဂ့ၤ.”
