၁ ပ့းတရူး ၁:၁-၂၅
၁ ယၤ, စီၤပ့းတရူး လၢအမ့ၢ် ယ့ၣ်ၡူးခရံာ် အတၢ်မၢဖိတဂၤ+ ကွဲးလံာ်အံၤဆူ ပှၤလၢအအိၣ်ဝဲဆိးဝဲ တစိၢ်တလီၢ် လၢဟီၣ်ခိၣ်အံၤ လၢအလီၤပြံလီၤပြါဝဲလၢ ပီၣ်တူး အကီၢ်ရ့ၣ်, ကလၤတံ, ကးပၤဒကံ အကီၢ်ရ့ၣ်,+ အၤစံ အကီၢ်ရ့ၣ် ဒီးဘံၤသူၤနံ အကီၢ်ရ့ၣ်တဖၣ်အပူၤ အအိၣ်လီၤ.
၂ ပၢ်ကစၢ်ယွၤ+ ဃုထၢထီၣ်သု ဒ်အတၢ်သ့ၣ်ညါပာ်စၢၤ အိၣ်ဝဲအသိးလီၤ. ဒီးအဝဲပာ်စီဆှံသု ခီဖျိလၢ သးစီဆှံ+ ဒ်သိးသုကအိၣ်ဒီး တၢ်ဒိကနၣ် ဒီးသုကမ့ၢ်ပှၤလၢ အဘၣ်တၢ်ဖှံသုလၢ ယ့ၣ်ၡူးခရံာ် အသွံၣ်အဂီၢ်လီၤ.+
မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိး ဒံးယံာ်ဒံးအါထီၣ်တက့ၢ်.
၃ ပကစၢ်ယ့ၣ်ၡူးခရံာ်အပၢ် လၢအမ့ၢ်စ့ၢ်ကီး အကစၢ်ယွၤန့ၣ် မ်အဘၣ် တၢ်စံးထီၣ်ပတြၢၤအီၤတက့ၢ်. ကစၢ်ယွၤ ပာ်ဖျါထီၣ် တၢ်သးကညီၤအါမးလၢ ပဖီခိၣ် ခီဖျိအဒုးအိၣ်ဖျဲၣ်ထီၣ် ပှၤလၢအသီတဘျီ+ ဒ်သိးပကအိၣ်ဒီး တၢ်မုၢ်လၢ်လၢအမူဝဲအဂီၢ်လီၤ.+ တၢ်အဝဲအံၤ ဟဲကဲထီၣ်ခီဖျိလၢ အဒုးဂဲၤဆၢထၢၣ်သမူထီၣ်က့ၤ ယ့ၣ်ၡူးခရံာ်လၢ တၢ်သံအဃိလီၤ.+
၄ ကစၢ်ယွၤဟ့ၣ်သု တၢ်န့ၢ်သါလၢ အဟးဂီၤတသ့ဘၣ်,+ အစီဆှံဝဲ ဒီးအကအိၣ်ဝဲလီၤထူလီၤယိာ်လီၤ. တၢ်န့ၢ်သါအံၤ အိၣ်ခိးပာ်စၢၤသုလၢ မူခိၣ်လီၤ.+
၅ မ့ၢ်လၢသုအိၣ်ဒီး တၢ်နာ်အဃိ ကစၢ်ယွၤ ဒီသဒၢသုလၢ အတၢ်စိတၢ်ကမီၤ ဒ်သိးသုကဒိးန့ၢ်ဘၣ် တၢ်အုၣ်က့ၤခီၣ်က့ၤ အဂီၢ်လီၤ. တၢ်အုၣ်က့ၤခီၣ်က့ၤ အဝဲအံၤ ကဘၣ် တၢ်ပာ်ဖျါထီၣ်အီၤလၢ တၢ်အကတၢၢ် အဆၢကတီၢ်လီၤ.
၆ လၢတၢ်ဂ့ၢ်အံၤအဃိ သုကသးခုဒိၣ်မးလီၤ. ဘၣ်ဆၣ် ဆၢကတီၢ်ခဲအံၤ ဘၣ်သ့ၣ်သ့ၣ် သုကဘၣ်သးအုး တစိၢ်တလီၢ် ခီဖျိလၢ တၢ်မၤကွၢ် အကလုာ်ကလုာ်အဃိလီၤ.+
၇ တၢ်မၤအသးဒ်အံၤန့ၣ် မ့ၢ်ဒ်သိးသုတၢ်နာ်လၢ+ အဘၣ်တၢ်မၤကွၢ်တ့ၢ်အီၤန့ၣ် ကကဲထီၣ် တၢ်စံးထီၣ်ပတြၢၤ, တၢ်လၤကပီၤ ဒီးတၢ်ပာ်ကဲလၢသုဂီၢ် ဖဲယ့ၣ်ၡူးခရံာ်+ ဘၣ်တၢ် လီၣ်ဖျါထီၣ်အီၤအခါလီၤ. ဒီးတၢ်နာ်ဒ်အံၤတကလုာ်န့ၣ် အလုၢ်ဒိၣ်ပှ့ၤဒိၣ်န့ၢ်ဒံး ထူလၢအဘၣ်တၢ်မၤကွၢ်အီၤလၢ မ့ၣ်အူဝံၤဝဲ သနာ်က့ အဟးဂီၤဝဲသ့ဒံးလီၤ.
၈ သုတထံၣ်ဘၣ်ခရံာ် နီတဘျီဘၣ် သနာ်က့ သုအဲၣ်အီၤလီၤ. ဒီးခဲအံၤသုမ့ၢ်တထံၣ်အီၤဘၣ် သနာ်က့ သုစူၢ်က့ၤနာ်က့ၤအီၤဒီး သုသးခုဒိၣ်မးလၢ တၢ်သးခုဒိၣ်ဒိၣ်မုၢ်မုၢ်လၢ သုတဲဖျါထီၣ်တလၢာ်ဘၣ်,
၉ မ့ၢ်လၢ သုသ့ၣ်ညါလီၤတံၢ်လီၤဆဲးလၢ သုကဒိးန့ၢ်ဘၣ် တၢ်အုၣ်က့ၤခီၣ်က့ၤလၢ+ သုတၢ်နာ်အဃိလီၤ.
၁၀ ဝံတဖၣ်လၢ အတဲဆိပာ်စၢၤဝဲ ဘၣ်ဃးဒီး တၢ်သးကညီၤ ဒိၣ်ဒိၣ်မုၢ်မုၢ်လၢ ကစၢ်ယွၤပာ်ဖျါထီၣ်လၢ သုဖီခိၣ်န့ၣ် သံကွၢ်သံဒိးဝဲလၢ တၢ်သးဆူၣ်အပူၤ ဒီးဃုသ့ၣ်ညါဝဲ ဘၣ်ဃးဒီး တၢ်အုၣ်က့ၤခီၣ်က့ၤအံၤအဂ့ၢ် လီၤတံၢ်လီၤဆဲးလီၤ.+
၁၁ သးစီဆှံ ဒုးသ့ၣ်ညါဆိအဝဲသ့ၣ်လၢ ခရံာ်ကဘၣ်တူၢ် တၢ်နးတၢ်ဖှီၣ်တဖၣ်+ ဝံၤအလီၢ်ခံ အကဒိးန့ၢ်ဘၣ် တၢ်လၤတၢ်ကပီၤလီၤ. အဃိ အဝဲသ့ၣ်ဂုာ်ကျဲးစၢး ဃုသ့ၣ်ညါဝဲလၢ တၢ်ကမၤအသး ဒီးခရံာ်ဒ်လဲၣ်+ ဒီးအကမၤအသးလၢ ဆၢကတီၢ်ဖဲလဲၣ် န့ၣ်လီၤ.
၁၂ ဒီးကစၢ်ယွၤပာ်ဖျါထီၣ်န့ၢ် ဝံတဖၣ်လၢ တၢ်လၢအဝဲသ့ၣ်တဲတ့ၢ်ဝဲန့ၣ် တမ့ၢ်လၢ အဝဲသ့ၣ်အနီၢ်ကစၢ်အဂီၢ်ဘၣ်, မ့ၢ်ဒၣ်လၢသုဂီၢ်လီၤ. ဒီးတၢ်ဂ့ၢ်လၢအဝဲသ့ၣ် တဲတ့ၢ်ဝဲတဖၣ်အံၤ ပှၤလၢအစံၣ်တဲၤတဲလီၤ တၢ်သးခုကစီၣ်န့ၣ် စံၣ်တဲၤတဲလီၤသု ခီဖျိလၢ သးစီဆှံ လၢအဘၣ်တၢ်ဆှၢလီၤအီၤလၢ မူခိၣ်လီၤ.+ ဒီးမူခိၣ်ကလူးတဖၣ် အဲၣ်ဒိးနၢ်ပၢၢ် တၢ်ဂ့ၢ်တဖၣ်အံၤ လီၤတံၢ်လီၤဆဲးလီၤ.
၁၃ အဃိ ကတဲာ်ကတီၤထီၣ် သုသးလၢ သုကမၤတၢ်ဆူၣ်ဆူၣ် အဂီၢ်တက့ၢ်.+ အိၣ်ဆၢပံၢ်ကလာ်+ ဒီးအိၣ်ခိးကွၢ်လၢ် တၢ်သးကညီၤ ဒိၣ်ဒိၣ်မုၢ်မုၢ် လၢတၢ်ကဟ့ၣ်လီၤသု ဖဲတၢ်လီၣ်ဖျါထီၣ် ယ့ၣ်ၡူးခရံာ် အခါန့ၣ်တက့ၢ်.
၁၄ ခဲအံၤ သုမ့ၢ်ဖိသၣ်တဖၣ်လၢ အနၢ်လိၤအဃိ တဘၣ်မၤထွဲ တၢ်သူၣ်လီသးကွံလၢ အအိၣ်ဒီးသုလၢညါ ဖဲသုတၢ်သ့ၣ်ညါယွၤ တအိၣ်ဒံးဘၣ်အခါန့ၣ် လၢၤတဂ့ၤ.
၁၅ ဒ်ပှၤစီဆှံတဂၤလၢ အကိးန့ၢ်သုအသိးန့ၣ် သုဝဲစ့ၢ်ကီး ကဲထီၣ်ပှၤလၢအစီဆှံ လၢတၢ်လၢ သုမၤအီၤခဲလၢာ်အပူၤတက့ၢ်.+
၁၆ တၢ်ကွဲးအသးအိၣ်ဝဲလၢ “ယစီဆှံအဃိ သုကဘၣ်စီဆှံလီၤ.”+
၁၇ ဒီးသုမ့ၢ်ကိးထီၣ်ပၢ်လၢ အစံၣ်ညီၣ်ပှၤကိးဂၤဒဲး ဒ်တၢ်လၢအဝဲသ့ၣ် မၤဝဲအသိး ဒီးအတကွၢ် ဒိၣ်ဆံးအါစှၤတၢ်ဘၣ်တဂၤန့ၣ်+ ဖဲသုအိၣ်သုဆိး တစိၢ်တလီၢ်လၢ ဟီၣ်ခိၣ်အံၤ အဆၢကတီၢ်န့ၣ် ပာ်ဖျါထီၣ်လၢ သုအိၣ်ဒီးတၢ်ပျံၤ ကစၢ်ယွၤတက့ၢ်.+
၁၈ ဘၣ်ဃးဒီး သုတၢ်အိၣ်မူလၢ အဘျုးတအိၣ်ဘၣ်လၢ သုမိၢ်ပၢ်ဖံဖု လၢပျၢၤတဖၣ် ဟ့ၣ်လီၤသုန့ၣ် သုသ့ၣ်ညါလၢ တၢ်တမၤပူၤဖျဲးထီၣ်ကွံာ်သု*+ ခီဖျိလၢ တၢ်လၢအဟးဂီၤသ့တဖၣ် ဒ်သိးဒီးထူ မ့တမ့ၢ် စ့အဃိဘၣ်.
၁၉ ဘၣ်ဆၣ် သုဘၣ်တၢ်မၤထူၣ်ဖျဲးထီၣ်သု ခီဖျိလၢ ခရံာ်အသွံၣ်လၢ အလုၢ်ဒိၣ်ပှ့ၤဒိၣ်လၢ+ အလီၤဂာ်ဒ် သိဖိလၢ အတၢ်တလၢတပှဲၤတအိၣ်ဘၣ် ဒီးအစီဆှံတဒု+ အသွံၣ်အသိးလီၤ.+
၂၀ မ့ၢ်လီၤ, ကစၢ်ယွၤ ဃုထၢဆိပာ်စၢၤခရံာ် တချုးလၢ ပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ်န့ၣ်လီၤ.*+ ဘၣ်ဆၣ် ခရံာ်အိၣ်ဖျါထီၣ်လၢသုဂီၢ်+ ဖဲဆၢကတီၢ်အံၤ အကတၢၢ်လီၤ.
၂၁ ခီဖျိလၢ ခရံာ်အဃိ သုနာ်ကစၢ်ယွၤတဂၤလၢ+ အမၤသမူထီၣ်က့ၤခရံာ်လၢ တၢ်သံ+ ဒီးဟ့ၣ်လီၤအီၤလၢ တၢ်လၤတၢ်ကပီၤလီၤ.+ အဃိ နာ်ကစၢ်ယွၤဒီး မုၢ်လၢ်တၢ်လၢအအိၣ်တက့ၢ်.
၂၂ ခဲအံၤ ခီဖျိလၢသုဒိကနၣ် တၢ်မ့ၢ်တၢ်တီအဃိ သုမၤကဆှီထီၣ်သုသးလီၤ. လၢတၢ်န့ၣ်အဃိ သုအိၣ်ဒီး ဒီပုၢ်ဝဲၢ်တၢ်အဲၣ်လၢ အတအိၣ်ဒီး တၢ်ပာ်မၤအသးဘၣ်.+ အဃိ အဲၣ်လိာ်ကွံလိာ်သုသးဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်တက့ၢ်.+
၂၃ သုအိၣ်ဖျဲၣ်ထီၣ်လၢအသီန့ၣ်+ တမ့ၢ်ခီဖျိလၢ တၢ်အချံအသၣ်လၢ အဟးဂီၤသ့ဝဲအဃိဘၣ်. မ့ၢ်ဝဲခီဖျိ တၢ်အချံအသၣ်လၢ အဟးဂီၤတသ့ဘၣ်အဃိ,+ လၢကစၢ်ယွၤလၢအမူဝဲ ဒီးအိၣ်ဂၢၢ်ဆိးကျၢၤဝဲတဂၤ အကလုၢ်ကထါအဃိလီၤ.+
၂၄ ဒ်တၢ်ကွဲးအသး တဲဝဲအသိး “ပှၤဟီၣ်ခိၣ်ဖိခဲလၢာ်န့ၣ် လီၤဂာ်ဒ် နီၣ်အသိး ဒီးအဝဲသ့ၣ်အလၤကပီၤခဲလၢာ်န့ၣ် လီၤဂာ်ဒ်ဖီလၢ တၢ်ပျီပူၤအသိးလီၤ. နီၣ်န့ၣ် ဃ့ထီကွံာ်ဝဲ ဒီးဖီန့ၣ် လီၤဆှုကွံာ်ဝဲလီၤ.
၂၅ မ့မ့ၢ် ယဟိဝၤယွၤ* အကလုၢ်ကထါန့ၣ် အိၣ်ဂၢၢ်ဆိးကျၢၤဝဲ လီၤထူလီၤယိာ်လီၤ.”+ ဒီး “တၢ်ကလုၢ်ကထါအံၤ” မ့ၢ်ဝဲတၢ်သးခုကစီၣ်လၢ အဘၣ်တၢ်စံၣ်တဲၤတဲလီၤအီၤလၢ သုအိၣ်လီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဘၣ်တၢ်ပှ့ၤက့ၤသု.”
^ မ့ၢ်စ့ၢ်ကီး “စးထီၣ်လၢ တၢ်ဒုးအိၣ်ထီၣ်ဟီၣ်ခိၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
