၁ ယိၤဟၣ် ၃:၁-၂၄
၃ ပၢ်အတၢ်အဲၣ်လၢပဖီခိၣ်+ ဒိၣ်ထဲလဲၣ်န့ၣ် ဆိကမိၣ်ကွၢ်တက့ၢ်. အတၢ်အဲၣ်အံၤ ဒိၣ်ဝဲတုၤဒၣ်လဲာ် အဝဲကိးပှၤလၢ အဖိတဖၣ်*+ ဒီးပမ့ၢ်အဖိတဖၣ် သပှၢ်တၢၢ်လီၤ. လၢတၢ်န့ၣ်အဃိ ဟီၣ်ခိၣ်တသ့ၣ်ညါပှၤဘၣ်,+ မ့ၢ်လၢ အတသ့ၣ်ညါ ကစၢ်ယွၤဘၣ်အဃိလီၤ.+
၂ ဒီပုၢ်ဝဲၢ်သးဘိသ့ၣ်ဧၢ, ခဲအံၤန့ၣ် ပမ့ၢ်ကစၢ်ယွၤ အဖိတဖၣ်လံ.+ ဘၣ်ဆၣ် ပကကဲထီၣ်ဘၣ် တၢ်မနုၤလဲၣ်န့ၣ်+ အဝဲတပာ်ဖျါထီၣ်န့ၢ်ပှၤဒံးဘၣ်. ပသ့ၣ်ညါလၢ ဖဲအဝဲပာ်ဖျါထီၣ်အသးအခါ ပကကဲဒ်အီၤအသိး, မ့ၢ်လၢ ပကထံၣ်ဘၣ်အီၤ ဒ်အအိၣ်ဝဲ နီၢ်ကီၢ်အသိးလီၤ.
၃ ဒီးကယဲၢ်ပှၤလၢ အအိၣ်ဒီးတၢ်မုၢ်လၢ်အံၤလၢ အဒိးသန့ၤထီၣ်အသးလၢအီၤန့ၣ် မၤစီဆှံထီၣ် အနီၢ်ကစၢ်အသး+ ဒ်အဝဲစီဆှံဝဲ အသိးလီၤ.
၄ ပှၤလၢအဆဲးမၤ တၢ်ဒဲးဘးကိးဂၤဒဲးန့ၣ် ဆဲးမၤကမၣ်စ့ၢ်ကီး တၢ်သိၣ်တၢ်သီလီၤ. ဒီးတၢ်ဒဲးဘးန့ၣ် မ့ၢ်တၢ်မၤကမၣ် တၢ်သိၣ်တၢ်သီလီၤ.
၅ သုသ့ၣ်ညါစ့ၢ်ကီးလၢ ယ့ၣ်ၡူးဘၣ်တၢ်ပာ်ဖျါထီၣ်အီၤ ဒ်သိး အကထုးထီၣ်ကွံာ် ပတၢ်ဒဲးဘးအဂီၢ်+ ဒီးတၢ်ဒဲးဘး တအိၣ်လၢ အပူၤ နီတစဲးဘၣ်.
၆ ပှၤလၢအဆဲးလဲၤတၢ်ဒီးယ့ၣ်ၡူး ကိးဂၤဒဲးန့ၣ် တမ့ၢ်ပှၤလၢအဆဲးမၤ တၢ်ဒဲးဘးဘၣ်.+ ပှၤတဂၤဂ့ၤတဂၤဂ့ၤလၢ အဆဲးမၤတၢ်ဒဲးဘးန့ၣ် တထံၣ်ဘၣ်ယ့ၣ်ၡူးဘၣ် ဒီးတသ့ၣ်ညါအီၤဘၣ်.
၇ ဖိဆံးသ့ၣ်ဧၢ, သုတဘၣ်ပျဲလၢ ပှၤကကွဲန့ၢ်လွဲန့ၢ်သု နီတဂၤတဂ့ၤ. ပှၤလၢအဆဲးမၤဝဲ တၢ်တီတၢ်လိၤန့ၣ် မ့ၢ်ဝဲပှၤတီပှၤလိၤ ဒ်ယ့ၣ်ၡူး တီဝဲလိၤဝဲအသိးလီၤ.
၈ ပှၤလၢအဆဲးမၤ တၢ်ဒဲးဘးန့ၣ် အဘၣ်ဃးဒီး မုၣ်ကီၤလံၢ် မ့ၢ်လၢ မုၣ်ကီၤလံၢ်န့ၣ် မၤဝဲတၢ်ဒဲးဘး လၢအခီၣ်ထံးလံၤလံၤ အဃိလီၤ.+ လၢတၢ်ဂ့ၢ်အံၤအဃိ ကစၢ်ယွၤအဖိခွါ ဟဲဝဲ ဒ်သိး အကမၤဟးဂီၤကွံာ်ဝဲ မုၣ်ကီၤလံၢ် အတၢ်မၤတဖၣ်လီၤ.+
၉ ပှၤလၢ အမ့ၢ် ကစၢ်ယွၤအဖိန့ၣ် တဆဲးမၤတၢ်ဒဲးဘး+ နီတဂၤဘၣ်, မ့ၢ်လၢ ကစၢ်ယွၤ အသးစီဆှံ* ဆဲးအိၣ်ဆိးလၢအဝဲသ့ၣ်အပူၤ အဃိလီၤ. ဒီးမ့ၢ်လၢ အဝဲသ့ၣ်မ့ၢ် ကစၢ်ယွၤ အဖိတဖၣ်အဃိ+ အဝဲသ့ၣ်ဆဲးမၤ တၢ်ဒဲးဘးတသ့ဘၣ်.
၁၀ ကစၢ်ယွၤအဖိ ဒီးမုၣ်ကီၤလံၢ်အဖိ အိၣ်ဖျါထီၣ်ဝဲ ခီဖျိလၢ တၢ်ဂ့ၢ်အဝဲအံၤအဃိလီၤ. ပှၤလၢအတဆဲးမၤ တၢ်တီတၢ်လိၤဘၣ်န့ၣ် တဘၣ်ဃးဒီး ကစၢ်ယွၤဘၣ်. ဒီးပှၤလၢအတအဲၣ် အဒီပုၢ်ဝဲၢ်ဘၣ်န့ၣ်+ တဘၣ်ဃးဒီး ကစၢ်ယွၤဘၣ်.
၁၁ တၢ်ကစီၣ်လၢ သုနၢ်ဟူဘၣ်လၢ အခီၣ်ထံးလံၤလံၤန့ၣ် မ့ၢ်ဝဲ ပကဘၣ် အဲၣ်လိာ်ကွံလိာ်ပသး တဂၤဒီးတဂၤလီၤ.+
၁၂ ပတကြၢးလီၤဂာ်ဒီး စီၤကၤယံၣ်ဘၣ်. အဝဲမ့ၢ်ပှၤလၢ အဘၣ်ဃးဒီး မုၣ်ကီၤလံၢ်* ဒီးမၤသံအပုၢ်လီၤ.+ ဘၣ်မနုၤအဃိ စီၤကၤယံၣ် မၤသံအီၤလဲၣ်. မ့ၢ်လၢ စီၤကၤယံၣ် အတၢ်မၤတဖၣ်န့ၣ် မ့ၢ်အအၢအသီ+ ဘၣ်ဆၣ် အပုၢ်အတၢ်မၤတဖၣ်န့ၣ် မ့ၢ်အတီအလိၤအဃိလီၤ.+
၁၃ ဒီပုၢ်ဝဲၢ်သ့ၣ်ဧၢ, တဘၣ်ကမၢကမၣ်လၢ ဟီၣ်ခိၣ်သးဟ့သုအဃိတဂ့ၤ.+
၁၄ မ့ၢ်လၢ ပအဲၣ်ပဒီပုၢ်ဝဲၢ်တဖၣ် အဃိ+ ပသ့ၣ်ညါလၢ ပလီၤဂာ်ဒ်သိးဒီး ပှၤလၢအသံတ့ၢ်ဒီးမူထီၣ်လံ.+ ပှၤလၢအတအဲၣ် အဒီပုၢ်ဝဲၢ်တဖၣ်ဘၣ်န့ၣ် လီၤဂာ်ဒီး ပှၤသံဒံးလီၤ.+
၁၅ ပှၤကိးဂၤဒဲးလၢ အသးဟ့ အဒီပုၢ်ဝဲၢ်န့ၣ် မ့ၢ်ပှၤလၢအမၤသံတၢ်လီၤ.+ ဒီးသုသ့ၣ်ညါလၢ ပှၤလၢအမၤသံပှၤဂၤန့ၣ် အတဒိးန့ၢ်ဘၣ် တၢ်မူအထူအယိာ်ဘၣ်.+
၁၆ ပသ့ၣ်ညါထီၣ် တၢ်အဲၣ်တၢ်ကွံ ခီဖျိလၢ ယ့ၣ်ၡူး ဟ့ၣ်လီၤကွံာ် အသးသမူ လၢပဂီၢ်အဃိလီၤ.+ ဒီးပဝဲသ့ၣ်တဖၣ် ပအိၣ်ဒီးမူဒါလၢ ပကဟ့ၣ်လီၤကွံာ် ပသးသမူ လၢပဒီပုၢ်ဝဲၢ်တဖၣ် အဂီၢ်လီၤ.+
၁၇ ဘၣ်ဆၣ် ပှၤလၢ အအိၣ်ယၢအီၣ်ယၢန့ၣ် မ့ၢ်ထံၣ်ဝဲလၢ အဒီပုၢ်ဝဲၢ်တဂၤ လိၣ်ဘၣ်တၢ်မၤစၢၤ သနာ်က့ အဝဲမ့ၢ်တပာ်ဖျါထီၣ် တၢ်သးကညီၤလၢ အဖီခိၣ်ဘၣ်န့ၣ် ပတဲလၢ အအဲၣ်ကစၢ်ယွၤ ကသ့ဒ်လဲၣ်.+
၁၈ ဖိဆံးသ့ၣ်ဧၢ, ပတကြၢး အဲၣ်တၢ်ထဲလၢ ပတၢ်ကတိၤဒီး ပထးခိၣ်ဘၣ်.+ လၢတၢ်သူၣ်ဘျၢသးဘျၢအပူၤ+ ပကြၢးပာ်ဖျါထီၣ်အီၤ ခီဖျိလၢ ပတၢ်မၤတဖၣ်လီၤ.+
၁၉ ပမ့ၢ်မၤဒ်န့ၣ်န့ၣ် ပကသ့ၣ်ညါလၢ ပဘၣ်ဃးဒီး တၢ်မ့ၢ်တၢ်တီ ဒီးပကဒုးနာ်န့ၢ်လီၤ ပနီၢ်ကစၢ်အသးလၢ ကစၢ်ယွၤ အမဲာ်ညါလီၤ.
၂၀ ဒီးပသးမ့ၢ်စံၣ်ညီၣ်ပှၤ သနာ်က့ ကစၢ်ယွၤန့ၣ် ဒိၣ်န့ၢ်ဒံးပသး ဒီးသ့ၣ်ညါတၢ်ခဲလၢာ်လီၤ.+
၂၁ ဒီပုၢ်ဝဲၢ်သးဘိသ့ၣ်ဧၢ, ပသးမ့ၢ်တစံၣ်ညီၣ်ပှၤဘၣ်န့ၣ် ပတဲတၢ်ဒီး ကစၢ်ယွၤလၢ တၢ်သးဒူအပူၤ ကဘူၣ်ဝဲလီၤ.+
၂၂ ဒီးမ့ၢ်လၢပမၤထွဲ အတၢ်မၤလိာ်တဖၣ် ဒီးမၤတၢ်လၢ အဘၣ်အသးအဃိ တၢ်လၢ ပဃ့တမံၤဂ့ၤတမံၤဂ့ၤန့ၣ် ပဒိးန့ၢ်ဘၣ်လၢ အအိၣ်လီၤ.+
၂၃ ဒီးကစၢ်ယွၤအတၢ်မၤလိာ် အိၣ်ဝဲလၢ ပကစူၢ်က့ၤနာ်က့ၤအဖိခွါ ယ့ၣ်ၡူးခရံာ်အမံၤ+ ဒီးအဲၣ်လိာ်ကွံလိာ်ပသး တဂၤဒီးတဂၤ+ ဒ်အမၤလိာ်ပှၤ အသိးလီၤ.
၂၄ တကးဒံးဘၣ် ပှၤလၢအမၤထွဲ ကစၢ်ယွၤအတၢ်မၤလိာ်တဖၣ်န့ၣ် ဆဲးလဲၤတၢ်ဒီးကစၢ်ယွၤ ဒီးကစၢ်ယွၤ ဆဲးလဲၤတၢ်ဒီးအီၤလီၤ.+ ဒီးခီဖျိသးစီဆှံလၢ ကစၢ်ယွၤ ဟ့ၣ်လီၤပှၤအဃိ ပသ့ၣ်ညါလၢ ကစၢ်ယွၤ ဆဲးလဲၤတၢ်ဒီးပှၤလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ကစၢ်ယွၤ အဖိတဖၣ်.”
^ အခီပညီလိၤလိၤ “အချံအသၣ်.”
^ အခီပညီလိၤလိၤ “ပှၤအၢပှၤသီတဂၤ.”
