၁ ၡမူၤအ့လး ၁၇:၁-၅၈
၁၇ ဒီးပှၤဖလ့ၡသးဖိ+ ပာ်ဖှိၣ်ထီၣ်အသုးမုၢ်လၢ ဝ့ၢ်စကိၤ လၢအမ့ၢ် ယူဒၤအဝ့ၢ်တဖျၢၣ် ဒ်သိးအကဒုးတၢ် အဂီၢ်လီၤ. ဒီးအဝဲသ့ၣ် ဆီလီၤအသးလၢ အ့ဖ့းစဒးမံၣ်အပူၤ+ လၢအအိၣ်လၢ ဝ့ၢ်စကိၤ+ ဒီးဝ့ၢ်ဧစ့ကၤ+ အဘၢၣ်စၢၤလီၤ.
၂ စီၤစီလူး ဒီးပှၤအံၣ်စရ့လးဖိ ပာ်ဖှိၣ်ထီၣ်အသး ဒီးဆီလီၤအသးလၢ အ့လၤအတၢ်တြီၤပူၤ+ ဒီးအဝဲသ့ၣ် ကတဲာ်ကတီၤထီၣ်အသး ဒ်သိးအကဒုး ပှၤဖလ့ၡသးဖိ အဂီၢ်လီၤ.
၃ ပှၤဖလ့ၡသးဖိအိၣ်လၢ ကစၢၢ်တဖျၢၣ်အလိၤ ဒီးပှၤအံၣ်စရ့လးဖိ အိၣ်လၢ ကစၢၢ်အဂၤတဖျၢၣ်အလိၤ ဒီးလၢအဝဲသ့ၣ် အဘၢၣ်စၢၤန့ၣ် တၢ်တြီၤအိၣ်ဝဲလီၤ.
၄ ပှၤဒူပှၤဃိၤတဂၤ ဟဲထီၣ်လၢ ပှၤဖလ့ၡသးဖိ အဒဲကဝီၤပူၤလီၤ. ဒီးအမံၤမ့ၢ်ဝဲ စီၤကၤလယး+ ဒီးအဟဲလၢ ဝ့ၢ်ကၤသး+ ဒီးအနီၢ်ထီဝဲ ဃုပျၢ် ဒီးတထါလီၤ.*
၅ ဒီးအဝဲဖျီၣ်အခိၣ်သၣ်ဃံဒီး ခိၣ်ဖျီၣ်သုးတိၢ်ဘီ ဒီးကၤဝဲ ဆ့ကၤသုးတိၢ်ဘီလၢ အလီၤဂာ်ဒီး ညၣ်အသဘျံး တဖၣ်လီၤ. ဒီးဆ့ကၤသုးတိၢ်ဘီန့ၣ်+ ဃၢဝဲ ၡက့လး ၅,၀၀၀ လီၤ.*
၆ ဒီးအဝဲဖျီၣ်ဃာ်ဝဲ တၢ်ဒီသဒၢလၢ အဘၣ်တၢ်တ့အီၤလၢ တိၢ်ဘီ လၢအခီၣ်လိၤဃံ အဂီၢ် ဒီးလၢအချၢဃံန့ၣ် အဝံဃာ်ဝဲ ဘီဖိ+ တိၢ်ဘီတဘ့ၣ်လီၤ.
၇ ဒီးအဘီဖးဒိၣ်အဘိ မၤအသးဒ်ထၣ်အတီတဘိ+ အသိး ဒီးအဘီဖးဒိၣ် အကနၣ်ထးန့ၣ် အဃၢဝဲ ၡက့လး ၆၀၀ လီၤ.* ဒီးပှၤတဂၤလၢ အစိာ်န့ၢ်အီၤ အကတီၤတဘ့ၣ်န့ၣ် ဟးဝဲလၢ အမဲာ်ညါလီၤ.
၈ ဒီးအလဲၤဆၢထၢၣ် ဒီးကိးပသူထီၣ်လၢ အံၣ်စရ့လးဖိသုးဖိတဖၣ်+ အအိၣ်လၢ “ဘၣ်မနုၤအဃိ သုဟဲထီၣ်ဆီလီၤသး ဒ်သိးသုကဒုးတၢ်အဂီၢ်လဲၣ်. ယကဲ ပှၤဖလ့ၡသးဖိ ဒီးသုကဲ စီၤစီလူး အခ့အပှၤတဖၣ် တမ့ၢ်ဧီၤ. ဃုထၢထီၣ်ပှၤတဂၤလၢ အကဒုးတၢ်လၢသုဂီၢ် ဒီးမၢအဟဲလီၤ ဒုးယၤတထံၣ်.
၉ အဒုးယၤမ့ၢ်နၢၤ ဒီးမ့ၢ်မၤသံယၤန့ၣ် ပကကဲထီၣ် သုခ့သုပှၤလီၤ. ဘၣ်ဆၣ် ယဒုးအီၤမ့ၢ်နၢၤ ဒီးယမ့ၢ်မၤသံအီၤန့ၣ် သုကကဲထီၣ် ပခ့ပပှၤ ဒီးသုကဘၣ် မၤန့ၢ်တၢ်လၢ ပဂီၢ်လီၤ.”
၁၀ ဒီးပှၤဖလ့ၡသးဖိတဂၤန့ၣ် တဲဝဲလၢ “ယဃ့ဘူၣ်* အံၣ်စရ့လးအသုးမုၢ်+ တနံၤအံၤလီၤ. ပျၢ်လီၤန့ၢ်ယၤ ပှၤတဂၤ ဒ်သိးပကဒုးလိာ်ပသးသၢၤ.”
၁၁ ဖဲစီၤစီလူး ဒီးပှၤအံၣ်စရ့လးဖိ ခဲလၢာ် နၢ်ဟူဝဲ ပှၤဖလ့ၡသးဖိ တဂၤန့ၣ် အတၢ်ကတိၤအခါ အဝဲသ့ၣ် ပျံၤတၢ်ဒိၣ်မးလီၤ.
၁၂ ဒီးစီၤဒၤဝံး အပၢ်မ့ၢ်ဝဲ စီၤယံးၡဲလီၤ. စီၤယံးၡဲန့ၣ် အိၣ်လၢ အ့ဖရးသး+ လၢအမ့ၢ် ဝ့ၢ်ဘ့ၤသလ့ဃ့ၣ်+ လၢယူဒၤအဟီၣ်ကဝီၤအပူၤလီၤ. စီၤယံးၡဲန့ၣ်+ အိၣ်ဒီး အဖိခွါဃိးဂၤ+ ဒီးဖဲစီၤစီလူး ကဲစီၤပၤအခါ စီၤယံးၡဲ အသးပှၢ်လံ.
၁၃ စီၤယံးၡဲ အဖိခွါ အဒိၣ်ကတၢၢ် သၢဂၤန့ၣ် လဲၤပိာ်ဝဲ စီၤစီလူးအခံလၢ တၢ်ဒုးပျီပူၤလီၤ.+ အဖိခွါ သၢဂၤ လၢအလဲၤလၢ တၢ်ဒုးပျီပူၤန့ၣ် အမံၤမ့ၢ်ဝဲ စီၤအလံအာ်+ လၢအမ့ၢ် အဖိဝဲၢ်ကိ, အဖိခွါ ခံဂၤတဂၤန့ၣ် မ့ၢ်ဝဲ စီၤအဘံနဒာ်+ ဒီးသၢဂၤတဂၤန့ၣ် မ့ၢ်ဝဲ စီၤၡးမၤလီၤ.+
၁၄ စီၤဒၤဝံး မ့ၢ်ဝဲအဖိခွါ အဆံးကတၢၢ်တဂၤ+ ဒီးအဖိခွါ အဒိၣ်ကတၢၢ်သၢဂၤန့ၣ် ပိာ်ဝဲစီၤစီလူးအခံလီၤ.
၁၅ စီၤဒၤဝံးန့ၣ် လဲၤဟဲက့ၤ လဲၤဟဲက့ၤလၢ စီၤစီလူးအအိၣ် ဒ်သိး ကကွၢ်ထွဲဝဲ အပၢ်အသိလၢ+ ဝ့ၢ်ဘ့ၤသလ့ဃ့ၣ်အဂီၢ်လီၤ.
၁၆ ဒီးလၢအသီ ၄၀ အတီၢ်ပူၤ ပှၤဖလ့ၡသးဖိတဂၤန့ၣ် ဟဲဆၢထၢၣ်လၢ တၢ်မဲာ်ညါ လၢဂီၤခီတဘျီ ဒီးလၢဟါခီတဘျီ ကိးနံၤဒဲးလီၤ.
၁၇ ဒီးစီၤယံးၡဲ တဲဘၣ် အဖိခွါ စီၤဒၤဝံးလၢ “ဘုအဝဲာ် တအ့ဖး* ဒီးကိၣ်အလိၣ် တဆံအံၤ ဝံသးစူၤ လဲၤစိာ်န့ၢ်နကၠီ တဖၣ်လၢ အအိၣ်လၢသုးအဒဲကဝီၤပူၤ ချ့ချ့တက့ၢ်.
၁၈ ဒီးလဲၤစိာ် တၢ်နုၢ်ထံလီၤသကၤ အလိၣ်တဆံအံၤလၢ သုးဖိတကထိအခိၣ်တဂၤ အအိၣ်တက့ၢ်. ဒီးနကဘၣ် လဲၤကွၢ်စ့ၢ်ကီး နကၠီတဖၣ် အတၢ်အိၣ်သး မၤသးဒ်လဲၣ် ဒီးနကဘၣ်ဟံးန့ၢ် တၢ်အုၣ်သး တခါခါလၢ အဝဲသ့ၣ်အအိၣ် ဒီးဟဲက့ၤစိာ်အီၤလီၤ.”
၁၉ အဝဲသ့ၣ် အိၣ်ဒီး စီၤစီလူး ဒီးအံၣ်စရ့လးသုးဖိ အဂၤတဖၣ် လၢအအိၣ်လၢ အ့လၤအတၢ်တြီၤပူၤ+ ဒ်သိးကဒုးတၢ်ဒီး ပှၤဖလ့ၡသးဖိအဂီၢ်လီၤ.+
၂၀ ဒီးစီၤဒၤဝံး ဂဲၤဆၢထၢၣ်ဂီၤဂီၤ ဒီးမၤလိာ်ပာ်စၢၤ ပှၤတဂၤဂၤလၢ အကကွၢ်န့ၢ်အီၤသိလီၤ. ဒီးအဝဲဘိၣ်ထီၣ် တၢ်ဖိတၢ်လံၤတဖၣ် ဒီးလဲၤတၢ်ဒ် စီၤယံးၡဲမၤလိာ်အီၤ အသိးလီၤ. ဖဲအဝဲလဲၤတုၤလၢ သုးအဒဲကဝီၤအခါ ဘၣ်ဖဲသုးမုၢ် လဲၤထီၣ်လၢတၢ်မဲာ်ညါ ဒီးကိးပသူထီၣ်ဝဲ တၢ်ဒုးအတၢ်ကိးပသူထီၣ်လီၤ.
၂၁ ပှၤအံၣ်စရ့လးဖိ ဒီးပှၤဖလ့ၡသးဖိ လဲၤသုးဘူးထီၣ်အသး အဃိ အဝဲသ့ၣ် ခံဒူၣ် ကွၢ်ဆၢၣ်မဲာ်လိာ်သးလၢ တၢ်ဒုးပျီပူၤလီၤ.
၂၂ တဘျီဃီန့ၣ် စီၤဒၤဝံး ပာ်တ့ၢ်ကွံာ် အတၢ်ဖိတၢ်လံၤလၢ ပှၤကွၢ်ထွဲတၢ်ဖိတၢ်လံၤတဂၤ အစုပူၤ ဒီးအလဲၤဃ့ၢ်လၢ တၢ်ဒုးပျီပူၤလီၤ. ဖဲအဝဲ လဲၤတုၤဝဲအခါ အဝဲသံကွၢ်ဘၣ်ဃးဒီး အကၠီတဖၣ် အတၢ်အိၣ်သးလီၤ.+
၂၃ ဖဲစီၤဒၤဝံး တဲတၢ်ဒီးအဝဲသ့ၣ်အခါ ပှၤဖလ့ၡသးဖိ အပှၤဒူပှၤဃိၤတဂၤ ဟဲထီၣ်လၢ ပှၤဖလ့ၡသးဖိ အသုးဖိတဖၣ်အကျါလီၤ. အမံၤမ့ၢ်ဝဲ စီၤကၤလယး+ ဒီးအဟဲလၢ ဝ့ၢ်ကၤသးလီၤ. ဒီးအတဲ တၢ်ကတိၤတဖျၢၣ်ဃီ ဒ်လၢညါအသိး+ ဒီးစီၤဒၤဝံး နၢ်ဟူအီၤလီၤ.
၂၄ ဖဲအံၣ်စရ့လးသုးဖိ ခဲလၢာ်ထံၣ်ဝဲ ပှၤပိာ်ခွါတဂၤန့ၣ်အခါ အဝဲသ့ၣ် ပျံၤတၢ်အဃိ အဝဲသ့ၣ် ဂုၤက့ၤလၢလီၢ်ခံလီၤ.+
၂၅ ဒီးအံၣ်စရ့လး သုးဖိတဖၣ် တဲဝဲလၢ “ပှၤပိာ်ခွါလၢ အဟဲထီၣ်တဂၤန့ၣ် နထံၣ်ဧါ. အဟဲဃ့ဘူၣ် ပှၤအံၣ်စရ့လးဖိလီၤ.+ ပှၤလၢအမၤသံအီၤတဂၤန့ၣ် စီၤပၤကဟ့ၣ်အီၤ တၢ်ထူးတၢ်တီၤ အါအါဂီၢ်ဂီၢ် ဒီးအကဟ့ၣ်အီၤ အဖိမုၣ်လီၤ.+ ဒီးအပၢ်အဒူၣ်ဖိထၢဖိန့ၣ် တလိၣ်ဟ့ၣ် စီၤပၤလၢ တၢ်လၢပှၤအံၣ်စရ့လးဖိ ဘၣ်ဟ့ၣ်စီၤပၤတဖၣ်ဘၣ်.”
၂၆ စီၤဒၤဝံး သံကွၢ်ဝဲ ပှၤပိာ်ခွါတဖၣ် လၢအဆၢထၢၣ်ဘူးဒီးအီၤလၢ “ပှၤတဂၤလၢအမၤသံ ပှၤဖလ့ၡသးဖိ လၢန့ၣ်တဂၤ ဒီးမၤလီၤမၢ်ကွံာ် တၢ်ဒုၣ်ဒွဲၣ် လၢအံၣ်စရ့လးအပူၤန့ၣ် ပှၤကဟ့ၣ်အီၤ တၢ်မနုၤလဲၣ်. ပှၤဖလ့ၡသးဖိလၢ အတဒိးဘၣ်တၢ်ကူးတရံး လၢအဟဲဃ့ဘူၣ် ယွၤလၢအမူဝဲတဂၤ အသုးဖိတဖၣ်န့ၣ် အဝဲဆိကမိၣ်လီၤအသးလၢ အမ့ၢ်မတဂၤလဲၣ်.”+
၂၇ ဒီးပှၤတဲကဒီးအီၤလၢ ပှၤလၢအမၤသံအီၤတဂၤန့ၣ် ပှၤကဟ့ၣ်အီၤတၢ် ဒ်အံၤဒ်နုၤလီၤ.
၂၈ ဖဲအကၠီအဒိၣ်ကတၢၢ် စီၤအလံအာ်+ နၢ်ဟူဘၣ်လၢ အတဲတၢ်ဒီး ပှၤသုးဖိတဖၣ်အခါ အသးပှံၢ်ထီၣ်အီၤ ဒီးတဲအီၤလၢ “ဘၣ်မနုၤအဃိ နဟဲလီၤလဲၣ်. ဒီးသိစှၤဒု လၢပှၢ်မုၢ်ကနၢန့ၣ် နပာ်တ့ၢ်ဒီး မတဂၤလဲၣ်.+ နပာ်ထီၣ်ထီနသး ဒီးနကူၣ်ထီၣ်တၢ်လၢ အအၢအသီန့ၣ် ယသ့ၣ်ညါဧဲၤ. နဟဲလီၤန့ၣ် အိၣ်ဒၣ်နအဲၣ်ဒိးကွၢ် တၢ်ဒုးလီၤ.”
၂၉ ဒီးစီၤဒၤဝံး တဲဝဲလၢ “တဘျီအံၤ ယမၤကမၣ်တၢ်ဒ်လဲၣ်. အိၣ်ဒၣ်ယသံကွၢ်တၢ်လီၤဒၢး.”
၃၀ စီၤဒၤဝံး ဃၣ်ဃီၤ အသးလၢ ပှၤအဂၤတဂၤအအိၣ် ဒီးသံကွၢ်အီၤ တၢ်သံကွၢ်ဒ်အလီၢ်လီၢ်+ ဒီးပှၤတဲဆၢအီၤ ဒ်အလီၢ်လီၢ်အသိးလီၤ.+
၃၁ ဒီးတၢ်လၢ စီၤဒၤဝံးတဲဝဲတဖၣ်န့ၣ် ပှၤနၢ်ဟူဝဲဒီး ပှၤလဲၤတဲဘၣ် စီၤစီလူးလီၤ. အဃိ စီၤစီလူးမၢ ပှၤလဲၤကိးန့ၢ် စီၤဒၤဝံးလီၤ.
၃၂ စီၤဒၤဝံး တဲဘၣ် စီၤစီလူးလၢ “သုသးတဘၣ်လီၤစၢ်လၢ ပှၤဖလ့ၡသးဖိ တဂၤအံၤအဃိ နီတဂၤတဂ့ၤ. ယကလဲၤ ဒုးတၢ်ဒီးအီၤလီၤ.”+
၃၃ ဘၣ်ဆၣ် စီၤစီလူး တဲဘၣ် စီၤဒၤဝံးလၢ “နသးစၢ်ဒံးအဃိ+ နလဲၤဒုး ပှၤဖလ့ၡသးဖိ တဂၤအံၤ တန့ၢ်ဘၣ်. ပှၤတဂၤအံၤ အကဲပာ်စၢၤ ပှၤသုးဖိ လၢအသးစၢ်အခါလံ.”
၃၄ စီၤဒၤဝံး တဲဆၢက့ၤ စီၤစီလူးလၢ “ယကဲ ပှၤကွၢ်သိလၢ ယပၢ်အသိ အဂီၢ်လီၤ. ဘၣ်တဘျီ ခ့ယုၢ်ဟဲဒီး+ စိာ်ကွံာ်ဝဲ သိတဒုလၢ သိတဖၣ်အကျါလီၤ. ဒီးအဂၤတဘျီန့ၣ် တၤသူတဒု ဟဲမၤဝဲဒ်န့ၣ်စ့ၢ်ကီးလီၤ.
၃၅ ယလဲၤလူၤမၤသံ ခ့ယုၢ်ဒီးတၤသူ ဒီးယမၤပူၤဖျဲးသိဖိလၢ အကိာ်ပူၤလီၤ. ဖဲအဂဲၤဆၢထၢၣ် ထီဒါယၤအခါ ယဖီၣ်န့ၢ်အခၣ်ဆူၣ် ဒီးမၤလီၤဃံၢ်အီၤ ဒီးမၤသံကွံာ်အီၤလီၤ.
၃၆ ခ့ယုၢ်ဒီးတၤသူန့ၣ် ယမၤသံကွံာ်အီၤလီၤ. မ့ၢ်လၢ ပှၤဖလ့ၡသးဖိ လၢအတဒိးဘၣ် တၢ်ကူးတရံးတဂၤန့ၣ် ဟဲဃ့ဘူၣ် ယွၤလၢအမူဝဲတဂၤ အသုးဖိတဖၣ်အဃိ အကကဲထီၣ် ဒ်န့ၣ်လီၤ.”+
၃၇ စီၤဒၤဝံး ဆဲးတဲဝဲလၢ “ယဟိဝၤယွၤ လၢအမၤပူၤဖျဲးယၤ လၢခ့ယုၢ်ဒီးတၤသူ အစုပူၤန့ၣ် ကမၤပူၤဖျဲးယၤလၢ ပှၤဖလ့ၡသးဖိ တဂၤန့ၣ် အစုပူၤလီၤ.”+ ဒီးစီၤစီလူး တဲစီၤဒၤဝံးလၢ “လဲၤဟီ, ဒီးမ်ယဟိဝၤယွၤ အိၣ်ဒီးနၤတက့ၢ်.”
၃၈ စီၤစီလူး ဒုးကူဒုးကၤထီၣ် စီၤဒၤဝံးလၢ အနီၢ်ကစၢ်အကူအကၤလီၤ. အဖျီၣ်ထီၣ်ဝဲ ခိၣ်ဖျီၣ်သုးတိၢ်ဘီ လၢစီၤဒၤဝံးအခိၣ်လိၤ ဝံၤဒီး ဒုးကၤထီၣ်အီၤလၢ ဆ့ကၤသုးလီၤ.
၃၉ ဒီးစီၤဒၤဝံး စၢတံၢ်ထီၣ် အနးတဘ့ၣ်လၢ အကူအကၤအလိၤ ဒီးဟးကွၢ်ဝဲလီၤ. မ့ၢ်လၢ အဝဲတကၤညီနုၢ် တၢ်သ့ၣ်တဖၣ်အံၤဘၣ်အဃိ အဟးဝဲတသ့ဘၣ်. အဃိ အဝဲတဲစီၤစီလူးလၢ “ယတကၤညီနုၢ်တၢ်သ့ၣ်တဖၣ်အံၤဘၣ်အဃိ ယမ့ၢ်ကၤ တၢ်သ့ၣ်တဖၣ်အံၤန့ၣ် ယလဲၤတသ့ဘၣ်.” အဃိ စီၤဒၤဝံး ဘ့ၣ်လီၤကွံာ် တၢ်သ့ၣ်တဖၣ်န့ၣ်လီၤ.
၄၀ ဒီးစီၤဒၤဝံး ဟံးထီၣ်အနီၣ်ထိးဘိ ဒီးလဲၤထၢန့ၢ်ဝဲ လၢၢ်ဘျ့ဘျ့ ယဲၢ်ဖျၢၣ် လၢထံကျိဖိ ဒီးထၢနုာ်လၢၢ်တဖၣ်န့ၣ်လၢ အထၢၣ်ပူၤ ဒီးစိာ်ဝဲ အနီၣ်ဘျုး*+ လၢအစုပူၤလီၤ. ဒီးအဝဲလဲၤဝဲလၢ ပှၤဖလ့ၡသးဖိတဂၤန့ၣ် အအိၣ်လီၤ.
၄၁ ပှၤဖလ့ၡသးဖိတဂၤန့ၣ် လဲၤဃီၤလၢ စီၤဒၤဝံးအအိၣ် ဒံးယံာ်ဒံးဘူးထီၣ် ဒီးပှၤလၢအစိာ်န့ၢ်အီၤ အကတီၤတဂၤန့ၣ် အိၣ်ဝဲလၢ အမဲာ်ညါလီၤ.
၄၂ မ့ၢ်လၢ စီၤဒၤဝံးန့ၣ် အညၣ်ဂီၤ ဒီးမ့ၢ်ဝဲ ပှၤပိာ်ခွါသးစၢ်လၢ အဒိၣ်တၢ်ဂ့ၤမးအဃိ+ ဖဲပှၤဖလ့ၡသးဖိတဂၤန့ၣ် ထံၣ်အီၤအခါ အတပာ်ကဲအီၤ နီတစဲးဘၣ်.
၄၃ ပှၤဖလ့ၡသးဖိ တဲဘၣ် စီၤဒၤဝံးလၢ “နဟဲစိာ်ဒီး နီၣ်က့တဖၣ်န့ၣ် နဆိကမိၣ်လၢ ယကဲထွံၣ်ဧါ.”+ ဒီးပှၤဖလ့ၡသးဖိတဂၤန့ၣ် ကိးထီၣ်အယွၤတဖၣ် ဒ်သိးကဆိၣ်အၢဝဲ စီၤဒၤဝံးအဂီၢ်လီၤ.
၄၄ ဒီးပှၤဖလ့ၡသးဖိ တဲစီၤဒၤဝံးလၢ “ဟဲဃီၤ လၢယအိၣ်ဟီ. ယကဒုးအီၣ်နညၣ်လၢ ထိၣ်လၢအယူၤလၢ တၢ်ဖးဖီတဖၣ် ဒီးဆၣ်ဖိကီၢ်ဖိအဒူတဖၣ် လၢပျီပူၤလီၤ.”
၄၅ စီၤဒၤဝံး တဲဆၢက့ၤ ပှၤဖလ့ၡသးဖိ တဂၤန့ၣ်လၢ “နဃ့ဘူၣ် အံၣ်စရ့လး အကစၢ်ယွၤ အသုးဖိတဖၣ် ဒီးနဟဲစိာ်ဒီးနး, ဘီ ဒီးဘီဖိ+ ဒ်သိးနကဒုးတၢ်ဒီးယၤလီၤ. မ့မ့ၢ်ယၤန့ၣ် ယဟဲလၢ တၢ်သုးမုၢ်ဂီၢ်မုၢ်အကစၢ် ယဟိဝၤယွၤအမံၤ+ ဒ်သိးယကဒုးတၢ်ဒီးနၤလီၤ.+
၄၆ တနံၤအံၤ ယဟိဝၤယွၤ ကဟ့ၣ်လီၤနၤ လၢယစုပူၤ+ ဒီးယကမၤသံကွံာ်နၤ ဒီးဒီၣ်တဲာ်ကွံာ် နခိၣ်သၣ်ဃံလီၤ. ဒီးတနံၤအံၤ ပှၤဖလ့ၡသးသုးဖိတဖၣ် အစိၣ်န့ၣ် ယကဟ့ၣ်ဒုးအီၣ်ကွံာ် ထိၣ်လၢအယူၤလၢ တၢ်ဖးဖီတဖၣ် ဒီးဆၣ်ဖိကီၢ်ဖိအဒူတဖၣ်လီၤ. ဒီးပှၤဟီၣ်ခိၣ်ဖိခဲလၢာ် ကသ့ၣ်ညါဝဲလၢ ကစၢ်ယွၤအိၣ်ဒီး ပှၤအံၣ်စရ့လးဖိလီၤ.+
၄၇ ပှၤလၢ အပာ်ဖှိၣ်ထီၣ်အသး ဖဲအံၤကိးဂၤဒဲး ကသ့ၣ်ညါဝဲလၢ ယဟိဝၤယွၤ တလိၣ်ဘၣ်ဝဲ နးဒီးဘီ ဒ်သိးအကမၤပူၤဖျဲး အပှၤဂီၢ်မုၢ်အဂီၢ်ဘၣ်.+ မတၤကမၤနၢၤတၢ်ဒုးလဲၣ်န့ၣ် ယဟိဝၤယွၤ ကဆၢတဲာ်ဝဲလီၤ.*+ ဒီးအဝဲကဟ့ၣ်လီၤ သုဝဲကိးဂၤဒဲးလၢ ပစုပူၤလီၤ.”+
၄၈ ဒီးပှၤဖလ့ၡသးဖိတဂၤန့ၣ် သုးဘူးထီၣ်အသး ဒ်သိးကသဂၢၢ် စီၤဒၤဝံးအဂီၢ်လီၤ. ဒီးဒ်သိး စီၤဒၤဝံး ကသဂၢၢ် ပှၤဖလ့ၡသးဖိတဂၤန့ၣ်အဂီၢ် အဝဲလဲၤဃ့ၢ်ဝဲလၢ တၢ်ဒုးပျီပူၤ ချ့ချ့လီၤ.
၄၉ စီၤဒၤဝံး ဘုးထီၣ်လၢၢ်လၢ အထၢၣ်ပူၤ ဒီးကွံာ်ဝဲလၢၢ် လၢနီၣ်ဘျုးလီၤ. အဝဲကွံာ်ဝဲ ဘၣ်လၢ ပှၤဖလ့ၡသးဖိတဂၤန့ၣ် အမဲာ်တူၢ်ခိၣ် ဒီးလၢၢ်န့ၣ် နုာ်လီၤဝဲလၢ အမဲာ်တူၢ်ခိၣ် ဒီးပှၤဖလ့ၡသးဖိတဂၤန့ၣ် လီၤဃံၢ်ကျးမဲာ်လၢ ဟီၣ်ခိၣ်လိၤလီၤ.+
၅၀ အဃိ စီၤဒၤဝံးမၤနၢၤဝဲ ပှၤဖလ့ၡသးဖိတဂၤန့ၣ် လၢနီၣ်ဘျုး ဒီးလၢၢ်တဖျၢၣ်လီၤ. စီၤဒၤဝံး တစိာ်ဒီး နးလၢအစုပူၤဘၣ် သနာ်က့ အဝဲမၤလီၤဃံၢ်ဝဲ ပှၤဖလ့ၡသးဖိတဂၤန့ၣ် ဒီးမၤသံကွံာ်အီၤလီၤ.+
၅၁ ဒီးစီၤဒၤဝံး လဲၤဃ့ၢ်ဝဲလၢအအိၣ် ဒီးဆၢထၢၣ်လၢ အခီၣ်ထံးလီၤ. ဒီးအဝဲဖီၣ်န့ၢ်ဝဲ ပှၤဖလ့ၡသးဖိတဂၤန့ၣ် အနး+ ဒီးထုးထီၣ်ဝဲလၢ အတြိးပူၤလီၤ. ဒီးဒ်သိး စီၤဒၤဝံး ကမၤလီၤတံၢ်ဝဲလၢ အသံဝဲ နီၢ်ကီၢ်ကီၢ်အဂီၢ် အဒီၣ်တဲာ်ကွံာ်ဝဲ ပှၤဖလ့ၡသးဖိတဂၤန့ၣ် အခိၣ်သၣ်ဃံလီၤ. ဖဲပှၤဖလ့ၡသးဖိတဖၣ် ထံၣ်ဝဲလၢ အပှၤဒူပှၤဃိၤတဂၤအံၤ သံဝဲအခါ အဝဲသ့ၣ် ဃ့ၢ်ကွံာ်ဝဲလီၤ.+
၅၂ ဖဲန့ၣ် အံၣ်စရ့လးအသုးဖိ ဒီးသုးဖိလၢ ယူဒၤအဒူၣ်ကျါ ကိးပသူထီၣ်ဝဲ ဒီးလူၤဝဲ ပှၤဖလ့ၡသးဖိ စးထီၣ်လၢ တၢ်တြီၤ+ တုၤလၢ ဝ့ၢ်ဧ့ကြိၣ် အတြဲၤတဖၣ်လီၤ.+ ဒီးပှၤဖလ့ၡသးဖိ လၢအသံဝဲတဖၣ်အစိၣ်န့ၣ် အိၣ်ဝဲလၢ ကျဲလၢအလဲၤလၢ ၡၤရဲၣ်+ ပၢၢ်တုၤလၢ ဝ့ၢ်ကၤသး ဒီးဝ့ၢ်ဧ့ကြိၣ်လီၤ.
၅၃ ဖဲပှၤအံၣ်စရ့လးဖိ လၢအလူၤသဖှိဒုးဝဲ ပှၤဖလ့ၡသးဖိတဖၣ် ဟဲက့ၤတုၤဝဲအခါ အဝဲသ့ၣ် ဂုာ်န့ၢ်ဆူၣ်ဝဲ ပှၤဖလ့ၡသးဖိ အဒဲကဝီၤတဖၣ်လီၤ.
၅၄ ဒီးစီၤဒၤဝံး ဟံးန့ၢ်ဝဲ ပှၤဖလ့ၡသးဖိတဂၤန့ၣ် အခိၣ်သၣ်ဃံ ဒီးလဲၤစိာ်ဝဲလၢ ဝ့ၢ်ယရူၤၡလ့ၣ်အပူၤလီၤ. မ့မ့ၢ် ပှၤဖလ့ၡသးဖိတဂၤန့ၣ် အတၢ်စုကဝဲၤတဖၣ်န့ၣ် အဝဲပာ်ဝဲလၢ အနီၢ်ကစၢ်အဒဲပူၤလီၤ.+
၅၅ ဖဲစီၤစီလူး ထံၣ်ဝဲလၢ စီၤဒၤဝံး လဲၤထီၣ် ဒ်သိးအကသဂၢၢ် ပှၤဖလ့ၡသးဖိတဂၤန့ၣ်အခါ စီၤစီလူး တဲဘၣ် အသုးမုၢ်အခိၣ် စီၤအဘံန့ၢ်လၢ+ “စီၤအဘံန့ၢ်ဧၢ, ပှၤပိာ်ခွါတဂၤန့ၣ်+ မ့ၢ်မတဂၤ အဖိခွါလဲၣ်.” စီၤအဘံန့ၢ် တဲဆၢက့ၤလၢ “အိ စီၤပၤဧၢ, ယအၢၣ်လီၤနၤ သပှၢ်တၢၢ်လၢ ယတသ့ၣ်ညါဘၣ်.”
၅၆ ဒီးစီၤပၤ တဲဝဲလၢ “ပှၤပိာ်ခွါသးစၢ်တဂၤန့ၣ် မ့ၢ်မတဂၤအဖိခွါလဲၣ်န့ၣ် ဃုသ့ညါတက့ၢ်.”
၅၇ စီၤဒၤဝံး မၤသံဝဲ ပှၤဖလ့ၡသးဖိတဂၤန့ၣ်ဝံၤဒီး ဖဲအဟဲက့ၤဝဲအခါ စီၤအဘံန့ၢ် လဲၤကိးအီၤလၢ စီၤစီလူးအအိၣ်လီၤ. ဒီးပှၤဖလ့ၡသးဖိတဂၤန့ၣ်+ အခိၣ်သၣ်ဃံ အိၣ်ဝဲလၢ စီၤဒၤဝံး အစုပူၤလီၤ.
၅၈ ဒီးစီၤစီလူး သံကွၢ်အီၤလၢ “နကဲ မတဂၤအဖိခွါလဲၣ်.” ဒီးစီၤဒၤဝံး တဲဆၢဝဲလၢ “ယမ့ၢ် နခ့နပှၤစီၤယံးၡဲ+ လၢအမ့ၢ် ပှၤဘ့ၤသလ့ဃ့ၣ်ဖိ အဖိခွါလီၤ.”+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ အိၣ်ဝဲ ၅၇ ကံလိဃၣ်ဃၣ် လၢအမ့ၢ် ၁၂၅ ပီၣ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ အိၣ်ဝဲ ၇ ကံလိ လၢအမ့ၢ်ဝဲ ၁၅ ပီၣ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “ယတၤ.”
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်ဝဲ ပျံၤလၢ ပှၤသူအီၤဒ်သိး ကကွံာ်လၢၢ်အဂီၢ်.
^ အခီပညီလိၤလိၤ “တၢ်ဒုးန့ၣ် မ့ၢ်ယဟိဝၤယွၤအတၢ်.”
