၂ ကရံၣ်သူး ၄:၁-၁၈
၄ ပအိၣ်ဒီး တၢ်စံၣ်တဲၤတဲလီၤတၢ်မၤအံၤ မ့ၢ်လၢ ကစၢ်ယွၤပာ်ဖျါထီၣ် တၢ်သးကညီၤလၢ ပဖီခိၣ်အဃိလီၤ. လၢတၢ်န့ၣ်အဃိ ပတဟ့ၣ်အၡူဘၣ်.
၂ ဘၣ်ဆၣ် ပတတူၢ်လိာ် တၢ်လၢအလီၤမဲာ်ဆှး လၢပှၤမၤခူသူၣ်အီၤတဖၣ်ဘၣ်. ပတလဲၤတၢ်လၢ တၢ်လီတၢ်ဝ့ၤအပူၤဘၣ်. ဒီးပတကျဲၣ်ကျီ ကစၢ်ယွၤအကလုၢ်ကထါ ဃုာ်ဒီး တၢ်အဂၤတဖၣ်ဘၣ်.+ မ့ၢ်လၢ ပပာ်ဖျါထီၣ် တၢ်မ့ၢ်တၢ်တီအဃိ လၢကစၢ်ယွၤ အမဲာ်ညါန့ၣ် ပကဲထီၣ် ပှၤဒိဂ့ၤတဲာ်ဘၣ်လၢ ပှၤဟီၣ်ခိၣ်ဖိကိးဂၤဒဲး အသးလၢအသ့ၣ်ညါဒၣ်တၢ် အဂီၢ်လီၤ.+
၃ ဒီးတၢ်သးခုကစီၣ်လၢ ပစံၣ်တဲၤတဲလီၤအီၤ မ့ၢ်ဘၣ်တၢ်ကျၢၢ်ဘၢအီၤန့ၣ် အအိၣ်ကျၢၢ်ဘၢအသးလၢ ပှၤလၢအကတုၤလၢ တၢ်ဟးဂီၤတဖၣ် အမဲာ်ညါလီၤ.
၄ ဒီးပှၤလၢ အတစူၢ်တနာ်တၢ်ဘၣ်တဖၣ်အံၤ ဟီၣ်ခိၣ်အကစၢ်+ မၤခံးအဝဲသ့ၣ်အသး*+ ဒ်သိး တၢ်သးခုကစီၣ်လၢ အပှဲၤဒီးတၢ်လၤကပီၤ လၢအဘၣ်ဃးဒီး ခရံာ်လၢအမ့ၢ် ကစၢ်ယွၤ အက့ၢ်အဂီၤန့ၣ်+ အတၢ်ကပီၤ သုတကပီၤထီၣ်ဘၣ် အဝဲသ့ၣ်တဂ့ၤ အဂီၢ်လီၤ.+
၅ ပတစံၣ်တဲၤတဲလီၤတၢ် ဘၣ်ဃးဒီးပနီၢ်ကစၢ်အဂ့ၢ်ဘၣ်. ပစံၣ်တဲၤတဲလီၤလၢ ယ့ၣ်ၡူးခရံာ်န့ၣ် မ့ၢ်ကစၢ် ဒီးပကဲထီၣ်သုကုၢ်လၢ ယ့ၣ်ၡူးအဂီၢ်လီၤ.
၆ ကစၢ်ယွၤ မ့ၢ်ပှၤတဂၤလၢ အတဲဝဲလၢ “မ်တၢ်ကပီၤ ကပီၤထီၣ်လၢ တၢ်ခံးကျါတက့ၢ်.”+ ခီဖျိလၢ ခရံာ်အမဲာ်သၣ်အဃိ ကစၢ်ယွၤမၤကပီၤထီၣ်ပသး+ ဒီးပသးန့ၣ် ကပီၤထီၣ်ဝဲလၢ တၢ်သ့ၣ်ညါလၢ အလီၤလိၢ်လီၤလး လၢအဘၣ်ဃးဒီး ကစၢ်ယွၤလီၤ.
၇ ပလီၤဂာ်ဒ်သိးဒီး သပၢၤဟီၣ်ခိၣ်လၢ+ တၢ်လုၢ်ဒိၣ်ပှ့ၤဒိၣ်တမံၤအံၤ*+ အိၣ်လၢအပူၤ အဃိပာ်ဖျါထီၣ်လၢ ပဒိးန့ၢ်ဘၣ် တၢ်ဂံၢ်တၢ်ဘါလီၤဆီလၢ ကစၢ်ယွၤအအိၣ် ဒီးတမ့ၢ်လၢ ပနီၢ်ကစၢ်အအိၣ်ဘၣ်.+
၈ ပဘၣ်တၢ်ဆီၣ်တံၢ်ပှၤ လၢကျဲကိးဘိဒဲး ဘၣ်ဆၣ် တၢ်ဆီၣ်တံၢ်ပှၤတုၤလၢ ပဟူးတန့ၢ်လၢၤဘၣ်န့ၣ် တမ့ၢ်ဘၣ်. ပကဘၣ်မၤဒ်လဲၣ်န့ၣ် ပတသ့ၣ်ညါဘၣ်. ဘၣ်ဆၣ် ကျဲလၢပကပူၤဖျဲးအဂီၢ် တအိၣ်ဘၣ်န့ၣ် တမ့ၢ်ဘၣ်.+
၉ ပဘၣ်တၢ်မၤအၢမၤနးပှၤ ဘၣ်ဆၣ် ကစၢ်ယွၤ တပာ်တ့ၢ်ပှၤဘၣ်.+ ပှၤမၤဘၣ်ဒိပှၤ ဘၣ်ဆၣ် ပတဟးဂီၤဘၣ်.+
၁၀ ဒ်ယ့ၣ်ၡူးအသိး ပတူၢ်ဘၣ်တၢ် ဒီးပထံၣ်ဘၣ် တၢ်လီၤဘၣ်ယိၣ်လၢ ပသးသမူအဂီၢ်ထီဘိ+ အဃိ ပာ်ဖျါထီၣ်ဝဲလၢ ပအိၣ်မူ ဒ်ယ့ၣ်ၡူးအိၣ်မူအသိးလီၤ.
၁၁ ပမူဘၣ်ဆၣ် လၢယ့ၣ်ၡူးအဃိန့ၣ် တၢ်လီၤဘၣ်ယိၣ်လၢ ပသးသမူအဂီၢ် အိၣ်ဝဲထီဘိ+ အဃိ ပာ်ဖျါထီၣ်ဝဲလၢ ပအိၣ်မူ ဒ်ယ့ၣ်ၡူးအိၣ်မူအသိးလီၤ.
၁၂ ဘၣ်ဆၣ် ခီဖျိလၢ ပဝဲဒၣ်အံၤ ပကွၢ်ဆၢၣ်မဲာ်ဒီး တၢ်သံ အဃိ အကဲထီၣ်တၢ်မူလၢ သုဂီၢ်လီၤ.
၁၃ ပအိၣ်ဒီးတၢ်နာ်တမံၤဃီ ဒ်တၢ်ကွဲးအသးအိၣ်ဝဲလၢ “ယစူၢ်က့ၤနာ်က့ၤတၢ်အဃိ ယတဲတၢ်လီၤ.”+ ပဝဲစ့ၢ်ကီး ပစူၢ်က့ၤနာ်က့ၤတၢ်အဃိ ပတဲတၢ်လီၤ.
၁၄ ပသ့ၣ်ညါလၢ ပှၤလၢ အဒုးဂဲၤဆၢထၢၣ်က့ၤ ယ့ၣ်ၡူးန့ၣ် ကဒုးဂဲၤဆၢထၢၣ်က့ၤစ့ၢ်ကီးပှၤ ဒ်သိး ပကအိၣ်ဘၣ်ဒီးယ့ၣ်ၡူးအဂီၢ်လီၤ. ဒီးအဝဲကပာ်ဖျါထီၣ်ပှၤ ဃုာ်ဒီးသုလၢ ယ့ၣ်ၡူးအမဲာ်ညါလီၤ.+
၁၅ တၢ်သ့ၣ်တဖၣ်န့ၣ် ခဲလၢာ်န့ၣ် မ့ၢ်ဝဲလၢသုဂီၢ် ဒ်သိးကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်န့ၣ် ကဒံးယံာ်ဒံးအါထီၣ်ဝဲ အဂီၢ်လီၤ. တၢ်ကကဲထီၣ်အသးဒ်န့ၣ် ခီဖျိလၢပှၤလၢ အစံးဘျုးစံးဖှိၣ် ကစၢ်ယွၤန့ၣ် ဒံးယံာ်ဒံးအါထီၣ်ဝဲ အဃိလီၤ. ဒီးတၢ်အဝဲန့ၣ် ကကဲထီၣ် တၢ်လၤကပီၤလၢ ကစၢ်ယွၤအဂီၢ်လီၤ.+
၁၆ အဃိ ပတဟ့ၣ်အၡူဘၣ်. ပနီၢ်ခိ မ့ၢ်ဟးဂီၤကယီကယီ ဒံးယံာ်ဒံးအါထီၣ် ဘၣ်ဆၣ် ပသူၣ်ပသးဒိးန့ၢ်ဘၣ် တၢ်ဂံၢ်တၢ်ဘါလၢအသီ တနံၤဘၣ်တနံၤလီၤ.
၁၇ တၢ်နးတၢ်ဖှီၣ်* လၢအဘၣ်ပှၤန့ၣ် မ့ၢ်ဝဲတၢ်တစဲးဖိ ဒီးမ့ၢ်ဒၣ် တၢ်တစိၢ်တလီၢ်လီၤ. ဘၣ်ဆၣ် အဒုးအိၣ်ထီၣ်န့ၢ်ပှၤ တၢ်လၤကပီၤလၢ အဒိၣ်န့ၢ်အန့ၣ် စၢၢ်တလၢၢ် ဒီးအအိၣ်ဝဲ လီၤထူလီၤယိာ်လီၤ.+
၁၈ အဃိ ပတကွၢ်တၢ်လၢ ပထံၣ်အီၤသ့တဖၣ်ဘၣ်. ပကွၢ်တၢ်လၢ ပထံၣ်အီၤတသ့ဘၣ်တဖၣ်လီၤ.+ တၢ်လၢ ပထံၣ်အီၤသ့တဖၣ်န့ၣ် အိၣ်ဝဲတစိၢ်တလီၢ် ဘၣ်ဆၣ် တၢ်လၢ ပထံၣ်အီၤတသ့ဘၣ်တဖၣ်န့ၣ် အိၣ်ဝဲလီၤထူလီၤယိာ်လီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “မၤဘျီၣ်အဝဲသ့ၣ်အသး.”
^ မ့ၢ်ဝဲ တၢ်စံၣ်တဲၤတဲလီၤတၢ်မၤလၢ ကစၢ်ယွၤဟ့ၣ်လီၤဝဲ (၂ ကရံၣ်သူး ၄:၁, ၂, ၅).
^ မ့ၢ်စ့ၢ်ကီး “တၢ်မၤကွၢ်.”
