၂ ကွဲးနီၣ်တၢ် ၂၇:၁-၉
-
ယူဒၤဘီမုၢ် အစီၤပၤယိၤသၣ် (၁-၉)
၂၇ ဖဲစီၤယိၤသၣ်+ ကဲထီၣ်စီၤပၤအခါ အသးနံၣ်အိၣ်ဝဲ ၂၅ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၆ နံၣ်လီၤ. စီၤယိၤသၣ် အမိၢ်မ့ၢ်ဝဲ နီၢ်ယရူၡၤ လၢအမ့ၢ် စီၤစၤဒိး အဖိမုၣ်န့ၣ်လီၤ.+
၂ စီၤယိၤသၣ် ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒ်အပၢ်စီၤဧူးစံယါ မၤတ့ၢ်ဝဲအသိးလီၤ.+ ဘၣ်ဆၣ် စီၤယိၤသၣ်န့ၣ် တနုာ်လီၤလၢ ယဟိဝၤယွၤ အတၢ်လုၢ်ဟံၣ်ပူၤဘၣ်+ အဃိ အတမၤကမၣ်တၢ် ဒ်အပၢ်မၤတ့ၢ်ဝဲအသိးဘၣ်. သနာ်က့ ပှၤဂီၢ်မုၢ်တဖၣ်န့ၣ် ဆဲးမၤတၢ် အၢအၢသီသီလီၤ.
၃ စီၤယိၤသၣ် မ့ၢ်ပှၤလၢ အတ့ထီၣ် ယဟိဝၤယွၤ အဟံၣ်အတြဲၤလၢ တၢ်ဖီခိၣ်တဘ့ၣ်လီၤ.+ ဒီးအဝဲတ့ကျၢၤထီၣ် တၢ်လူၢ်ဧိၤဖ့လး အဒူၣ်လီၤ.+
၄ အဝဲတ့ထီၣ်စ့ၢ်ကီး ဝ့ၢ်တဖၣ်လၢ+ ယူဒၤအကစၢၢ်ကလိကျါ+ ဒီးအဝဲတ့ထီၣ် တၢ်လီၢ်တဖၣ်လၢ အိၣ်ဒီးအဒူၣ်လၢအကျၢၤ+ ဒီးတၢးတဖၣ်လၢ+ ပှၢ်လၢ်ကျါလီၤ.
၅ စီၤယိၤသၣ် လဲၤဒုး ပှၤဧၣ်မိၣ်ဖိအစီၤပၤ+ ဒီးလၢခံန့ၣ် မၤနၢၤအီၤ ဒီးပှၤဧၣ်မိၣ်ဖိတဖၣ်လီၤ. အဃိ ဖဲတၢ်တနံၣ်န့ၣ် ပှၤဧၣ်မိၣ်ဖိတဖၣ် ဟ့ၣ်လီၤ စီၤယိၤသၣ် စ့ညၣ် အတၤလၣ်* ၁၀၀, ဘုကၠူၣ် အကိၢ်* ၁၀,၀၀၀ ဒီးဘုမုယီၤ အကိၢ်* ၁၀,၀၀၀ လီၤ. ဖဲခံနံၣ်တနံၣ် ဒီးသၢနံၣ်တနံၣ် စ့ၢ်ကီး ပှၤဧၣ်မိၣ်ဖိ ဟ့ၣ်လီၤအီၤ ထဲန့ၣ်လီၤ.+
၆ ဒီးစီၤယိၤသၣ် ပာ်လီၤအသး ဂၢၢ်ဂၢၢ်ကျၢၤကျၢၤလၢ အကအိၣ်မူပိာ်ထွဲ ဒ်တၢ်ဘၣ် ယဟိဝၤယွၤ အသးအသိး အဃိ အတၢ်စိတၢ်ကမီၤ ဒိၣ်ထီၣ်ဝဲကွ့ၢ်ကွ့ၢ်လီၤ.
၇ မ့မ့ၢ် စီၤယိၤသၣ် အဂ့ၢ်လၢအဂၤတဖၣ်, အဝဲဒုးတၢ်အဂ့ၢ် ဒီးတၢ်လၢအမၤတ့ၢ်ဝဲန့ၣ် ဘၣ်တၢ်ကွဲးလီၤအီၤလၢ အံၣ်စရ့လးဒီးယူဒၤ အစီၤပၤတဖၣ် အလံာ်ပူၤလီၤ.+
၈ ဖဲစီၤယိၤသၣ် ကဲထီၣ်စီၤပၤအခါ အသးနံၣ်အိၣ်ဝဲ ၂၅ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၆ နံၣ်လီၤ.+
၉ လၢခံ စီၤယိၤသၣ် သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤ လၢစီၤဒၤဝံးအဝ့ၢ်ပူၤလီၤ.+ ဒီးအဖိခွါ စီၤအၤဃး ကဲထီၣ်စီၤပၤလၢ အလီၢ်လီၤ.+
တၢ်ဂ့ၢ်အဘျဲၣ်တဖၣ်
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ဘုကၠူၣ် ၁ ကိၢ်န့ၣ် ကအိၣ်ဝဲ အကံလိ ၁၆၀. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ဘုမုယီၤ ၁ ကိၢ်န့ၣ် ကအိၣ်ဝဲ အကံလိ ၁၃၀. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.